ವಿಶ್ವಕಪ್ ಟೂರ್ನಿ: ಇಂದು ವಿಂಡೀಸ್ಗೆ ಆಫ್ರಿಕ ಸವಾಲು
ನಾಗ್ಪುರ, ಮಾ.24: ಸತತ ಎರಡು ಪಂದ್ಯಗಳಲ್ಲಿ ಜಯ ಸಾಧಿಸಿರುವ ವೆಸ್ಟ್ಇಂಡೀಸ್ ತಂಡ ಶುಕ್ರವಾರ ಇಲ್ಲಿ ನಡೆಯಲಿರುವ ಪಂದ್ಯದಲ್ಲಿ ದಕ್ಷಿಣ ಆಫ್ರಿಕ ತಂಡವನ್ನು ಎದುರಿಸಲಿದ್ದು, ವಿಶ್ವಕಪ್ ಟೂರ್ನಿಯಲ್ಲಿ ಸೆಮಿ ಫೈನಲ್ನಲ್ಲಿ ಸ್ಥಾನ ಗಿಟ್ಟಿಸಿಕೊಳ್ಳುವ ವಿಶ್ವಾಸದಲ್ಲಿದೆ.
ಈಗಾಗಲೇ 2 ಪಂದ್ಯಗಳಲ್ಲಿ ಜಯ ಸಾಧಿಸಿ ಗ್ರೂಪ್-1ರಲ್ಲಿ ಅಗ್ರ ಸ್ಥಾನದಲ್ಲಿರುವ ವಿಂಡೀಸ್ ಇನ್ನೊಂದು ಪಂದ್ಯದಲ್ಲಿ ಜಯ ಗಳಿಸಿದರೆ ಸೆಮಿ ಫೈನಲ್ ಸ್ಥಾನ ಖಚಿತವಾಗಲಿದೆ. 3ನೆ ಪಂದ್ಯದಲ್ಲಿ ಆಫ್ರಿಕವನ್ನು ಎದುರಿಸಲಿರುವ ವಿಂಡೀಸ್ ತನ್ನ ಕೊನೆಯ ಪಂದ್ಯದಲ್ಲಿ ಅಫ್ಘಾನಿಸ್ತಾನವನ್ನು ಎದುರಿಸಲಿದೆ.
ಇಂಗ್ಲೆಂಡ್ ವಿರುದ್ಧ ಮೊದಲ ಪಂದ್ಯವನ್ನು ಸೋತಿದ್ದ ದ.ಆಫ್ರಿಕ ತಂಡ ಅಫ್ಘಾನಿಸ್ತಾನದ ವಿರುದ್ಧ ಪಂದ್ಯವನ್ನು ಗೆದ್ದುಕೊಂಡಿತ್ತು. ಗ್ರೂಪ್-1ರಲ್ಲಿ 3ನೆ ಸ್ಥಾನದಲ್ಲಿರುವ ಆಫ್ರಿಕ ತಂಡಕ್ಕೆ ವಿಂಡೀಸ್ ಗೆಲುವು ಸಾಧಿಸುವುದು ಅತ್ಯಂತ ಮುಖ್ಯವಾಗಿದೆ.
ನಾಗ್ಪುರದಲ್ಲಿ ಸ್ಪಿನ್ನರ್ಗಳು ಪ್ರಮುಖ ಪಾತ್ರವಹಿಸಲಿದ್ದು, ಆಫ್ರಿಕ ಸ್ಪಿನ್ನರ್ ಇಮ್ರಾನ್ ತಾಹಿರ್ ಹಾಗೂ ವಿಂಡೀಸ್ನ ಸ್ಯಾಮುಯೆಲ್ ಬದ್ರಿ ಗೇಮ್ ಚೇಂಜರ್ ಆಗಿದ್ದಾರೆ. ಆಲ್ರೌಂಡರ್ ಜೆಪಿ ಡುಮಿನಿ ಗಾಯಗೊಂಡಿರುವುದು ಆಫ್ರಿಕ ತಂಡದ ಸಮತೋಲನವನ್ನು ಏರು ಪೇರಾಗಿಸಿದೆ.
ಡುಮಿನಿ ಸ್ಥಾನವನ್ನು ತುಂಬಲು ರಿಲೀ ರೊಸ್ಸೌ ಹಾಗೂ ಫರ್ಹಾನ್ ಬೆಹಾರ್ದಿನ್ ನಡುವೆ ಸ್ಪರ್ಧೆ ಏರ್ಪಟ್ಟಿದೆ. ಡೇಲ್ ಸ್ಟೇಯ್ನಿ ಬದಲಿಗೆ ಕಾಗಿಸೊ ರಬಾಡ ವೇಗದ ದಾಳಿ ಮುನ್ನಡೆಸುವ ಸಾಧ್ಯತೆಯಿದೆ. ಆ್ಯರೊನ್ ಫಾಂಗಿಸೊ 5 ತಿಂಗಳ ಬಳಿಕ ಅಂತಾರಾಷ್ಟ್ರೀಯ ಕ್ರಿಕೆಟ್ಗೆ ಮರಳುವ ನಿರೀಕ್ಷೆಯಿದೆ.
ಶ್ರೀಲಂಕಾ ವಿರುದ್ಧ ಪಂದ್ಯದ ವೇಳೆ ಸ್ನಾಯು ಸೆಳೆತಕ್ಕೆ ಒಳಗಾಗಿದ್ದ ಕ್ರಿಸ್ ಗೇಲ್ ಫಿಟ್ನೆಸ್ ಪಡೆದಿದ್ದು, ಶುಕ್ರವಾರದ ಪಂದ್ಯದಲ್ಲಿ ಆಡಲು ಸಜ್ಜಾಗಿದ್ದಾರೆ.
ಅಂಕಿ-ಅಂಶ:
ದಕ್ಷಿಣ ಆಫ್ರಿಕ ತಂಡ ವಿಂಡೀಸ್ ವಿರುದ್ಧ ಆಡಿರುವ 9 ಟ್ವೆಂಟಿ-20 ಪಂದ್ಯಗಳ ಪೈಕಿ ಆರರಲ್ಲಿ ಜಯ ಸಾಧಿಸಿದೆ. ವೆಸ್ಟ್ಇಂಡೀಸ್ 2015ರ ಜನವರಿಯಲ್ಲಿ ನಡೆದಿದ್ದ ಟ್ವೆಂಟಿ-20 ಸರಣಿಯಲ್ಲಿ ಆಫ್ರಿಕವನ್ನು ಮಣಿಸಿತ್ತು.
ಕ್ರಿಸ್ ಗೇಲ್ 2007ರ ಸೆಪ್ಟಂಬರ್ನಲ್ಲಿ ನಡೆದಿದ್ದ ಮೊದಲ ಆವೃತ್ತಿಯ ಟ್ವೆಂಟಿ-20 ವಿಶ್ವಕಪ್ನಲ್ಲಿ ದಕ್ಷಿಣ ಆಫ್ರಿಕದ ವಿರುದ್ಧವೇ ಚೊಚ್ಚಲ ಶತಕ ಸಿಡಿಸಿದ್ದರು. ಇದೇ ವಿಶ್ವಕಪ್ನಲ್ಲಿ ಇಂಗ್ಲೆಂಡ್ನ ವಿರುದ್ಧ 2ನೆ ಬಾರಿ ಟಿ-20ಯಲ್ಲಿ ಶತಕ ಬಾರಿಸಿದ್ದರು.
ಹಾಶಿಮ್ ಅಮ್ಲಗೆ ಟ್ವೆಂಟಿ-20 ಕ್ರಿಕೆಟ್ನಲ್ಲಿ ಸಾವಿರ ರನ್ ಪೂರೈಸಿದ ಆಫ್ರಿಕದ ನಾಲ್ಕನೆ ದಾಂಡಿಗ ಎನಿಸಿಕೊಳ್ಳಲು ಇನ್ನು 49 ರನ್ ಅಗತ್ಯವಿದೆ.
ತಂಡಗಳು: ದಕ್ಷಿಣ ಆಫ್ರಿಕ: ಕ್ವಿಂಟನ್ ಡಿಕಾಕ್(ವಿಕೆಟ್ಕೀಪರ್), ಹಾಶಿಮ್ ಅಮ್ಲ, ಎಫ್ಡು ಪ್ಲೆಸಿಸ್(ನಾಯಕ), ಎಬಿ ಡಿವಿಲಿಯರ್ಸ್, ರಿಲೀ ರೊಸ್ಸೌ/ಬೆಹಾರ್ದಿನ್, ಡೇವಿಡ್ ಮಿಲ್ಲರ್,ಡೇವಿಡ್ ವೈಸ್/ಕ್ರಿಸ್ ಮೊರಿಸ್, ಕೈಲ್ ಅಬಾಟ್, ಕಾಗಿಸೊ ರಬಾಡ, ಆ್ಯರೊನ್ ಫಾಂಗಿಸೊ, ಇಮ್ರಾನ್ ತಾಹಿರ್.
ವೆಸ್ಟ್ಇಂಡೀಸ್: ಕ್ರಿಸ್ ಗೇಲ್, ಜಾನ್ಸನ್ ಚಾರ್ಲ್ಸ್, ಆ್ಯಂಡ್ರೆ ಫ್ಲೆಚರ್, ಮರ್ಲಾನ್ ಸ್ಯಾಮುವೆಲ್ಸ್, ದಿನೇಶ್ ರಾಮ್ದಿನ್(ವಿಕೆಟ್ಕೀಪರ್), ಆ್ಯಂಡ್ರೆ ರಸ್ಸೆಲ್, ಡ್ವೇಯ್ನೆ ಬ್ರಾವೊ, ಡರೆನ್ ಸಮ್ಮಿ(ನಾಯಕ), ಚಾರ್ಲ್ಸ್ ಬ್ರಾತ್ವೇಟ್, ಸ್ಯಾಮುಯೆಲ್ ಬದ್ರಿ, ಸುಲೇಮನ್ ಬೆನ್.
ಪಂದ್ಯದ ಸಮಯ: ರಾತ್ರಿ 7:30
