ವಿಶ್ವಕಪ್: ಭಾರತ ವಿರುದ್ಧ ಆಸ್ಟ್ರೇಲಿಯ 160/6
ಮೊಹಾಲಿ, ಮಾ.27: ಉಸ್ಮಾನ್ ಖ್ವಾಜಾ ಹಾಗೂ ಆ್ಯರೊನ್ ಫಿಂಚ್ ಮೊದಲ ವಿಕೆಟ್ಗೆ ಸೇರಿಸಿದ 54 ರನ್ ಜೊತೆಯಾಟದ ನೆರವಿನಿಂದ ಆಸ್ಟ್ರೇಲಿಯ 20 ಓವರ್ನಲ್ಲಿ 6 ವಿಕೆಟ್ ನಷ್ಟಕ್ಕೆ 160 ರನ್ ಗಳಿಸಿದೆ.
ರವಿವಾರ ಇಲ್ಲಿನ ಪಿಸಿಎ ಸ್ಟೇಡಿಯಂನಲ್ಲಿ ನಡೆದ ಟ್ವೆಂಟಿ-20 ವಿಶ್ವಕಪ್ನ ಸೂಪರ್-10ರ ಗ್ರೂಪ್-2ರ ಮಹತ್ವದ ಪಂದ್ಯದಲ್ಲಿ ಟಾಸ್ ಜಯಿಸಿದ ಆಸ್ಟ್ರೇಲಿಯದ ನಾಯಕ ಸ್ಟೀವನ್ ಸ್ಮಿತ್ ಮೊದಲು ಬ್ಯಾಟಿಂಗ್ ಆಯ್ದುಕೊಂಡರು.
ಇನಿಂಗ್ಸ್ ಆರಂಭಿಸಿದ ಖ್ವಾಜಾ ಹಾಗೂ ಫಿಂಚ್ 4.2 ಓವರ್ಗಳಲ್ಲಿ 54 ರನ್ ಜೊತೆಯಾಟ ನಡೆಸಿ ಭರ್ಜರಿ ಆರಂಭ ನೀಡಿದ್ದರು. ಖ್ವಾಜಾ(26) ವೇಗದ ಬೌಲರ್ ಆಶೀಷ್ ನೆಹ್ರಾಗೆ ವಿಕೆಟ್ ಒಪ್ಪಿಸಿದ ತಕ್ಷಣ ಆಸೀಸ್ನ ರನ್ ವೇಗಕ್ಕೆ ಕಡಿವಾಣ ಬಿತ್ತು.
ಡೇವಿಡ್ ವಾರ್ನರ್(6) ಹಾಗೂ ಸ್ಮಿತ್(2) ಬೆನ್ನುಬೆನ್ನಿಗೆ ಔಟಾದಾಗ ಆಸೀಸ್ನ ಸ್ಕೋರ್ 3 ವಿಕೆಟ್ ನಷ್ಟಕ್ಕೆ 74 ರನ್. ಸ್ಮಿತ್ ಟೂರ್ನಿಯಲ್ಲಿ ಮೊದಲ ಬಾರಿ ಬೌಲಿಂಗ್ ಮಾಡುವ ಅವಕಾಶ ಪಡೆದಿದ್ದ ಯುವರಾಜ್ ಸಿಂಗ್ಗೆ ವಿಕೆಟ್ ಒಪ್ಪಿಸಿದರು. ಫಿಂಚ್(43 ರನ್, 34 ಎಸೆತ, 3 ಬೌಂಡರಿ, 2 ಸಿಕ್ಸರ್) ಹಾಗೂ ಮ್ಯಾಕ್ಸ್ವೆಲ್(31) 4ನೆ ವಿಕೆಟ್ಗೆ 26 ರನ್ ಜೊತೆಯಾಟ ನಡೆಸಿದರು. ಅರ್ಧಶತಕದ ಮೇಲೆ ಕಣ್ಣಿಟ್ಟಿದ್ದ ಫಿಂಚ್ಗೆ ಹಾರ್ದಿಕ್ ಪಾಂಡ್ಯ ಪೆವಿಲಿಯನ್ ಹಾದಿ ತೋರಿಸಿದರು.
ಫಿಂಚ್ ನಿರ್ಗಮನದ ನಂತರ ಜೊತೆಯಾದ ಮ್ಯಾಕ್ಸ್ವೆಲ್(31) ಹಾಗೂ ವ್ಯಾಟ್ಸನ್ (ಔಟಾಗದೆ 18)5ನೆ ವಿಕೆಟ್ಗೆ 30 ರನ್ ಜೊತೆಯಾಟ ನಡೆಸಿ ತಂಡದ ಸ್ಕೋರನ್ನು 130ಕ್ಕೆ ತಲುಪಿಸಿದರು. 28 ಎಸೆತಗಳಲ್ಲಿ ತಲಾ 1 ಬೌಂಡರಿ,ಸಿಕ್ಸರ್ ಬಾರಿಸಿದ ಮ್ಯಾಕ್ಸ್ವೆಲ್ 31 ರನ್ಗೆ ಬುಮ್ರಾ ಬೌಲಿಂಗ್ನಲ್ಲಿ ಕ್ಲೀನ್ ಬೌಲ್ಡಾದರು.
ಅಂತಿಮ ಓವರ್ನಲ್ಲಿ 15 ರನ್ ಗಳಿಸಿದ ವ್ಯಾಟ್ಸನ್ ಹಾಗೂ ನೆವಿಲ್ ತಂಡದ ಸ್ಕೋರನ್ನು 160ಕ್ಕೆ ತಲುಪಿಸಿದರು.
