ಆರ್ಟಿಐ ಕಾರ್ಯಕರ್ತನ ಹತ್ಯೆ ಪ್ರಕರಣ : ಉನ್ನತ ಮಟ್ಟದ ತನಿಖಾ ತಂಡ ರಚನೆಗೆ ಆಗ್ರಹ
ಮಂಗಳೂರು, ಮಾ.30: ಇತ್ತೀಚೆಗೆ ದುಷ್ಕರ್ಮಿಗಳಿಂದ ಹತ್ಯೆಗೀಡಾಗಿರುವ ಆರ್ಟಿಐ ಕಾರ್ಯಕರ್ತ ವಿನಾಯಕ ಪಾಂಡುರಂಗ ಬಾಳಿಗಾ ಹತ್ಯೆ ಪ್ರಕರಣದ ತನಿಖೆಗೆ ಐಪಿಎಸ್ ಅಧಿಕಾರಿಗಳನ್ನೊಳಗೊಂಡ ಉನ್ನತ ಮಟ್ಟದ ತನಿಖಾ ತಂಡವನ್ನು ನೇಮಿಸುವಂತೆ ವಿಚಾರವಾದಿ ಸಂಘಟನೆಯ ರಾಷ್ಟ್ರೀಯ ಅಧ್ಯಕ್ಷ ಪ್ರೊ.ನರೇಂದ್ರ ನಾಯಕ್ ಆಗ್ರಹಿಸಿದ್ದಾರೆ.
ನಗರದ ಖಾಸಗಿ ಹೊಟೇಲ್ನಲ್ಲಿ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ಮಾಹಿತಿ ಹಕ್ಕಿನಡಿಯಲ್ಲಿ ನಗರದ ಕೆಲವು ಅಕ್ರಮಗಳನ್ನು ಬಯಲಿಗೆಳೆದ ನಿಷ್ಠಾವಂತ ಆರ್ಟಿಐ ಕಾರ್ಯಕರ್ತ ವಿನಾಯಕ ಬಾಳಿಗಾರನ್ನು ಹತ್ಯೆ ಮಾಡುವ ಮೂಲಕ ದುಷ್ಕರ್ಮಿಗಳು ಸಮಾಜಕ್ಕೆ ತಪ್ಪು ಸಂದೇಶವೊಂದನ್ನು ರವಾನೆ ಮಾಡಿದ್ದಾರೆ. ಆದ್ದರಿಂದ ಹತ್ಯೆ ಪ್ರಕರಣದ ನಿಷ್ಪಕ್ಷಪಾತ ತನಿಖೆಗೆ ಉನ್ನತ ಮಟ್ಟದ ತಂಡದ ರಚಿಸಬೇಕೆಂದು ಆಗ್ರಹಿಸಿದರು. ಬಾಳಿಗಾ ಅವರು ಮಾಹಿತಿ ಹಕ್ಕಿನಡಿಯಲ್ಲಿ ಮಾಹಿತಿಗಳನ್ನು ಪಡೆದು ನಗರದ ಬಿಲ್ಡರ್ಗಳ, ಅಕ್ರಮ ಕಟ್ಟಡಗಳ, ಕೆಲವು ವ್ಯಕ್ತಿ, ದೇವಸ್ಥಾನದ ಅಕ್ರಮಗಳನ್ನು ಬಯಲಿಗೆಳೆದಿದ್ದರು. ಇದರಿಂದ ಬಾಳಿಗಾ ಅವರಿಗೆ ವೈಯಕ್ತಿಕ ಲಾಭ ಇಲ್ಲದಿದ್ದರೂ ಸಮಾಜಕ್ಕೆ ಲಾಭ ಇದೆ. ಸಮಾಜದ ಹಿತದೃಷ್ಟಿಯಿಂದ ಧಾರ್ಮಿಕ ಕೇಂದ್ರಗಳ, ಸಾರ್ವಜನಿಕರಿಗೆ ತೊಂದರೆ ನೀಡುವ ಅಕ್ರಮ ಕಟ್ಟಡಗಳ ಮಾಹಿತಿಗಳನ್ನು ಮಾಹಿತಿ ಹಕ್ಕಿನಡಿ ಕಲೆ ಹಾಕುವುದು ಅಪರಾಧವೇ, ಅವುಗಳನ್ನು ನ್ಯಾಯಾಲಯದಲ್ಲಿ ಪ್ರಶ್ನಿಸಬಾರದೇ ಎಂದವರು ಪ್ರಶ್ನಿಸಿದರು.
ಬಾಳಿಗಾ ಕೆಲವರನ್ನು ಬ್ಲಾಕ್ಮೇಲ್ ಮಾಡುತ್ತಿದ್ದರೆಂದು ಸಮಾಜದ ಒಂದು ವರ್ಗ ಆರೋಪ ಮಾಡುತ್ತಿದೆ. ನಿಮ್ಮ ಬಳಿ ಈ ಬಗ್ಗೆ ಪುರಾವೆ ಇದ್ದರೆ ನಮಗೆ ಒದಗಿಸಿ ಎಂದು ಸವಾಲು ಹಾಕಿರುವ ನರೇಂದ್ರ ನಾಯಕ್, ಓರ್ವ ಪ್ರಾಮಾಣಿಕ ಆರ್ಟಿಐ ಕಾರ್ಯಕರ್ತನ ಮೇಲೆ ಸುಖಾಸುಮ್ಮನೆ ಆರೋಪ ಮಾಡಬೇಡಿ. ಅವರು ಬ್ಲಾಕ್ಮೇಲ್ ಮೂಲಕ ಹಣ ಗಳಿಸುವವರಾಗಿದ್ದರೆ ಅವರ ಆರ್ಥಿಕ ಸ್ಥಿತಿ ಬದಲಾಗಬೇಕಿತ್ತು ಎಂದರು.
ಬಾಳಿಗಾ ಸಲ್ಲಿಸಿದ್ದ ದೂರುಗಳಿಗೆ ಸಂಬಂಧಿಸಿ ಬಾಳಿಗಾ ಅವರ ಸಹಿತ ಪ್ರಕರಣದ ಪ್ರತಿವಾದಿಗಳಾದ ದಕ್ಷಿಣ ಕನ್ನಡ ದ್ರಾವಿಡ ಬ್ರಾಹ್ಮಣರ ಸಂಘ, ಎಂ.ಬಿ.ಪುರಾಣಿಕ್ ಅವರ ಶಾರದಾ ವಿದ್ಯಾಲಯಕ್ಕೆ ಸಂಬಂಧಪಟ್ಟವರು ಮಾರ್ಚ್ 24ರಂದು ಮಂಗಳೂರು ಮಹಾನಗರ ಪಾಲಿಕೆಯ ಆಯುಕ್ತರ ಮುಂದೆ ಹಾಜರಾಗಬೇಕಿತ್ತು. ಆಯುಕ್ತರ ಮುಂದೆ ಹಾಜರಾಗಬೇಕಾಗಿದ್ದ ದಿನದ ಮೂರು ದಿನಗಳ ಮುಂಚೆ ಅಂದರೆ ಮಾ.21ರಂದು ಬಾಳಿಗಾರವರು ಹತ್ಯೆಗೀಡಾಗಿರುವುದು ಹಲವು ಅನುಮಾನಗಳಿಗೆ ಎಡೆಮಾಡಿಕೊಟ್ಟಿದೆ ಎಂದರು.
ಅಲ್ಲದೆ, ಕಾರ್ಸ್ಟ್ರೀಟ್ನ ವೆಂಕಟರಮಣ ದೇವಸ್ಥಾನದ ಆಡಳಿತ ವ್ಯವಹಾರದ ಲೋಪಕ್ಕೆ ಸಂಬಂಧಿಸಿ ಹಿಂದಿನ ಟ್ರಸ್ಟಿಗಳ ಅಕ್ರಮಗಳ ಬಗ್ಗೆ ನ್ಯಾಯಾಲಯದ ಮೊರೆ ಹೋಗಿದ್ದರು. ನ್ಯಾಯಾಲಯವು ಲೆಕ್ಕಪರಿಶೋಧಕರ ನೇಮಕ ಮಾಡಿದೆ. ಒಟ್ಟಾರೆ, ಇಲ್ಲಿ ನಡೆದ ಅನ್ಯಾಯ, ಅವ್ಯವಹಾರವನ್ನು ಬಯಲಿಗೆಳೆದವರನ್ನು ಕೊಲೆ ಮಾಡಲಾಗಿದೆ. ಇದಕ್ಕೆ ಸಮಾಜದ ಮುಖಂಡರು ವೌನವಾಗಿರುವುದನ್ನು ತಾನು ಖಂಡಿಸುತ್ತೇನೆ ಎಂದರು.
ಪ್ರಕರಣದ ತನಿಖೆಯನ್ನು ನಡೆಸಿ ಬಾಳಿಗಾರವರ ಕುಟಂಬಕ್ಕೆ ನ್ಯಾಯ ಒದಗಿಸುವಂತೆ ಸರಕಾರವನ್ನು ಆಗ್ರಹಿಸಿರುವ ನರೇಂದ್ರ ನಾಯಕ್, ಸರಕಾರ ಪ್ರಕರಣವನ್ನು ಗಂಭೀರವಾಗಿ ಪರಿಗಣಿಸದಿದ್ದರೆ ಬೀದಿಗಿಳಿದು ಹೊರಾಟ ಮಾಡುವುದಾಗಿ ಎಚ್ಚರಿಕೆ ನೀಡಿದರಲ್ಲದೆ, ಅಗತ್ಯಬಿದ್ದರೆ ಈ ಹೋರಾಟವನ್ನು ಬೆಂಗಳೂರಿನವರೆಗೂ ಕೊಂಡೊಯ್ಯುವುದಾಗಿ ಹೇಳಿದರು.
ಡಿವೈಎಫ್ಐ ರಾಜ್ಯಾಧ್ಯಕ್ಷ ಮುನೀರ್ ಕಾಟಿಪಳ್ಳ ಮಾತನಾಡಿ, ಹತ್ಯೆ ಪ್ರಕರಣಕ್ಕೆ ಸಂಬಂಧಿಸಿ ಪೊಲೀಸರು ಇಬ್ಬರನ್ನು ಬಂಧಿಸಿದ್ದಾರೆ. ಸುಪಾರಿ ಹಂತಕರಿಂದ ಬಾಳಿಗಾರ ಕೊಲೆ ನಡೆದಿದೆ ಎನ್ನುವ ಪೊಲೀಸರು ಸುಪಾರಿ ನೀಡಿದವರು ಯಾರು ಮತ್ತು ಯಾಕಾಗಿ ಸುಪಾರಿ ನೀಡಿದ್ದಾರೆ ಎಂಬುದನ್ನು ಬಯಲಿಗೆಳೆಯಬೇಕು. ಆದ್ದರಿಂದ ಪ್ರಕರಣ ತನಿಖೆ ಉನ್ನತ ಮಟ್ಟದ ತನಿಖಾ ತಂಡದಿಂದ ಆಗಬೇಕು ಎಂದು ಒತ್ತಾಯಿಸಿದರು.
ಸುದ್ದಿಗೋಷ್ಠಿಯಲ್ಲಿ ವಿನಾಯಕ ಪಾಂಡುರಂಗ ಬಾಳಿಗಾರ ತಂದೆ ರಾಮಚಂದ್ರ ಬಾಳಿಗಾ, ತಾಯಿ ಜಯಂತಿ ಬಾಳಿಗಾ, ಸಮುದಾಯ ಸಂಘಟನೆಯ ವಾಸುದೇವ ಉಚ್ಚಿಲ, ದಲಿತ ಸಂಘರ್ಷ ಸಮಿತಿ(ಕೃಷ್ಣಪ್ಪ ಸ್ಥಾಪಿತ)ಯ ಎಂ.ದೇವದಾಸ್, ಎಸ್ಎಫ್ಐ ಜಿಲ್ಲಾಧ್ಯಕ್ಷ ನಿತಿನ್ ಕುತ್ತಾರ್, ದಲಿತ ಸಂಘರ್ಷ ಸಮಿತಿ (ಅಂಬೇಡ್ಕರ್ ವಾದ)ಯ ವಿಶು ಕುಮಾರ್ ಡಿವೈಎಫ್ಐ ಜಿಲ್ಲಾಧ್ಯಕ್ಷ ದಯಾನಂದ ಶೆಟ್ಟಿ ಮೊದಲಾದವರು ಉಪಸ್ಥಿತರಿದ್ದರು.
ದೇವಸ್ಥಾನದಲ್ಲಿ 7ರಿಂದ 8 ಕೋಟಿ ರೂ. ಅವ್ಯವಹಾರ
ಆರ್ಟಿಐ ಕಾರ್ಯಕರ್ತ ವಿನಾಯಕ ಪಾಂಡುರಂಗ ಬಾಳಿಗಾ ಅವರ ಪ್ರಕಾರ ಕಾರ್ಸ್ಟ್ರೀಟ್ನ ಶ್ರೀ ವೆಂಕಟರಮಣ ದೇವಸ್ಥಾನದಲ್ಲಿ ಸುಮಾರು 7ರಿಂದ 8 ಕೋ. ರೂ.ಗಳಷ್ಟು ಅವ್ಯವಹಾರ ನಡೆದಿದೆ ಎಂದು ಅವರ ಸ್ನೇಹಿತ ಹಾಗೂ ಪ್ರಕರಣಕ್ಕೆ ಸಂಬಂಧಿಸಿ ಅವರಿಗೆ ಸಹಕರಿಸುತ್ತಿದ್ದ ಗಣೇಶ್ ಬಾಳಿಗಾ ಹೇಳಿದ್ದಾರೆ.
ನಮಗೆ ವೈಯಕ್ತಿಕವಾಗಿ ಯಾರ ಮೇಲೂ ದ್ವೇಷ ಸಾಧಿಸಬೇಕಾದ ಅಗತ್ಯವಿರಲಿಲ್ಲ. ದೇವಸ್ಥಾನದ ಆಡಳಿತವು ಪಾರದರ್ಶಕವಾಗಿರಲಿಲ್ಲ. ಅಲ್ಲಿರುವ ಚಿನ್ನ, ಬೆಳ್ಳಿಗೆ ಸಂಬಂಧಿಸಿ ದಾಖಲೆಗಳಿಲ್ಲ. ಆಡಳಿತದಲ್ಲಿ ಲೋಪ ಎಸಗಿರುವುದು ನಿಜ. ದೇವರ ಹಣ ಪೋಲಾಗಬಾರದೆಂಬ ಉದ್ದೇಶದೊಂದಿಗೆ ಅವ್ಯವಹಾರ ನಡೆಸಿದವರನ್ನು ತನಿಖೆಗೊಳಪಡಿಸಬೇಕೆಂದು ಒತ್ತಾಯಿಸಿದ್ದೆವು. ಈ ಅಕ್ರಮವು ಮರು ಲೆಕ್ಕಪರಿಶೋಧನೆಯಿಂದ ಮಾತ್ರ ಬಯಲಾಗಬಹುದು ಎಂದು ಭಾವಿಸಿ ಮರು ಆಡಿಟ್ಗೆ ಒತ್ತಾಯಿಸಿದ್ದೆವು ಎಂದರು.
ಇಂತಹ ಅವ್ಯವಹಾಗಳನ್ನು ಬಯಲಿಗೆಳೆಯುವುದರಿಂದ ನಮಗೇನೂ ಲಾಭವಿಲ್ಲ. ಸಮಾಜಕ್ಕೆ ಇದರ ಲಾಭ ಇದೆ. ನಾವು ನಮ್ಮ ಕೆಲಸವನ್ನು ನಿಷ್ಠೆಯಿಂದ ಮಾಡಿದ್ದೇವೆ. ಮರು ಆಡಿಟ್ಗೆ ಅಪೀಲ್ ಮಾಡಿರುವುದರಿಂದ ನ್ಯಾಯಾಲಯವು ಲೆಕ್ಕಪರಿಶೋಧಕರನ್ನು ನೇಮಕ ಮಾಡಿದ್ದು, ಎಪ್ರಿಲ್ 2ರಂದು ಮರು ಲೆಕ್ಕಪರಿಶೋಧನೆ ನಡೆಯುವ ಸಂಭವ ಇದೆ. ಇದೀಗ ಬಾಳಿಗಾರವರ ಬರ್ಬರ ಹತ್ಯೆಯ ಬಳಿಕ ಇವೆಲ್ಲ ಹೇಗೆ ಮುಂದುವರಿಸಿಕೊಂಡು ಹೋಗಬೇಕೆಂಬ ಬಗ್ಗೆ ನಮಗೇ ಹೆದರಿಕೆಯಾಗುತ್ತಿದೆ ಎಂದು ಗಣೇಶ್ ಬಾಳಿಗ ನುಡಿದರು. ಬೆದರಿಕೆ ಇದೆ ಅಂದಿದ್ದರು
ಆರ್ಟಿಐ ಆ್ಯಕ್ಟ್ ಅಡಿ ಮಾಹಿತಿ ಕಲೆ ಹಾಕಿದ ಬಳಿಕ ತನಗೆ ಬೆದರಿಕೆ ಇರುವುದಾಗಿ ಪಾಂಡುರಂಗ ಬಾಳಿಗಾ ತನ್ನ ಬಳಿ ತಿಳಿಸಿದ್ದರು ಎಂದು ಗಣೇಶ್ ಬಾಳಿಗಾ ಹೇಳಿದ್ದಾರೆ.
ಇದಕ್ಕೆ ತಾನು ಜಾಗೃತರಾಗಿರುವಂತೆ ಅವರಿಗೆ ತಿಳಿ ಹೇಳಿದ್ದೆ. ‘‘ನಾನು ರಾತ್ರಿ ಎಲ್ಲಿಯೂ ಹೊರಗೆ ಹೋಗುತ್ತಿಲ್ಲ. 8 ಗಂಟೆಯ ಮೊದಲೇ ಮನೆ ಸೇರುತ್ತಿದ್ದೇನೆ’’ ಎಂದಿದ್ದರು ಎನ್ನುವ ಗಣೇಶ್ ಬಾಳಿಗಾ, ಪ್ರಕರಣಕ್ಕೆ ಸಂಬಂಧಿಸಿ ದುಷ್ಕರ್ಮಿಗಳು ಕೊಲೆಯಂತಹ ನೀಚ ಕೃತ್ಯಕ್ಕೆ ಕೈ ಹಾಕಬಹುದೆಂದು ತಾನು ಯಾವತ್ತೂ ಭಾವಿಸಿರಲಿಲ್ಲ ಎಂದರು.
ವಿನಾಯಕ ಪಾಂಡುರಂಗ ಬಾಳಿಗಾ ಅವರು ಸಮಾಜದ ಪರವಾಗಿ ಕೆಲಸ ಮಾಡಿದ್ದಾರೆ. ಆದ್ದರಿಂದ ಹತ್ಯೆಗೀಡಾಗಿರುವ ಬಾಳಿಗಾ ಅವರ ಕುಟುಂಬಕ್ಕೆ ಸರಕಾರ ಆರ್ಥಿಕ ಪರಿಹಾರ ಒದಗಿಸಬೇಕು. ಅಪರಾಧಿಗಳನ್ನು ಪತ್ತೆಹಚ್ಚಿ ಶಿಕ್ಷೆಗೆ ಗುರಿ ಪಡಿಸುವವರೆಗೆ ನಮ್ಮ ಹೋರಾಟವನ್ನು ಮುಂದುವರಿಸುತ್ತೇವೆ
-ಪ್ರೊ.ನರೇಂದ್ರ ನಾಯಕ್
ವಿಚಾರವಾದಿ ಸಂಘಟನೆಯ ರಾಷ್ಟ್ರೀಯ ಅಧ್ಯಕ್ಷ
