ಮಂಗಳೂರು: ದಕ್ಷಿಣ ಕನ್ನಡ ಸಹಕಾರಿ ಹಾಲು ಉತ್ಪಾದಕರ ಒಕ್ಕೂಟ ನಿಯಮಿತದಿಂದ ನೂತನ ಸ್ಥಾವರದ ಉದ್ಘಾಟನೆ

   ಮಂಗಳೂರು, ಏ.2: ದಕ್ಷಿಣ ಕನ್ನಡ ಸಹಕಾರಿ ಹಾಲು ಉತ್ಪಾದಕರ ಒಕ್ಕೂಟ ನಿಯಮಿತದಿಂದ ನೂತನ ಸ್ಥಾವರದ ಉದ್ಘಾಟನೆ ಮತ್ತು ನಂದಿನಿ ಪ್ಲೆಕ್ಸಿ ಪ್ಯಾಕ್ ಹಾಲು ಬಿಡುಗಡೆ ಸಮಾರಂಭವು ಎ.5 ರಂದು ಕುಲಶೇಖರದ ಮಂಗಳೂರು ಡೇರಿ ಆವರಣದಲ್ಲಿ ನಡೆಯಲಿದೆ ಎಂದು ದಕ್ಷಿಣ ಕನ್ನಡ ಸಹಕಾರಿ ಹಾಲು ಉತ್ಪಾದಕರ ಒಕ್ಕೂಟದ ಅಧ್ಯಕ್ಷ ರವಿರಾಜ ಹೆಗ್ಡೆ ಹೇಳಿದರು.

         ಕುಲಶೇಖರದಲ್ಲಿರುವ ಮಂಗಳೂರು ಡೇರಿ ಸಭಾಂಗಣದಲ್ಲಿ ನಡೆದ ಪತ್ರಿಕಾಗೋಷ್ಟಿಯಲ್ಲಿ ಮಾತನಾಡಿದ ಅವರು ನೂತನ ಉತ್ಪನ್ನ ಹಾಗೂ ಪ್ಲೆಕ್ಸಿ ಪ್ಯಾಕ್ ಕಟ್ಟಡದ ಉದ್ಘಾಟನೆಯನ್ನು ಧರ್ಮಸ್ಥಳದ ಧರ್ಮಾಧಿಕಾರಿ ಡಾ.ಡಿ.ವೀರೇಂದ್ರ ಹೆಗ್ಗಡೆಯವರು ,ಸಮಾರಂಭದ ಉದ್ಘಾಟನೆಯನ್ನು ದ.ಕ ಜಿಲ್ಲಾ ಉಸ್ತುವಾರಿ ಸಚಿವ ಬಿ.ರಮಾನಾಥ ರೈ , ಪ್ಲೆಕ್ಸಿ ಪ್ಯಾಕಿಂಗ್ ಘಟಕದ ಉದ್ಘಾಟನೆಯನ್ನು ಸಹಕಾರ ಮತ್ತು ಸಕ್ಕರೆ ಸಚಿವ ಹೆಚ್.ಎಸ್. ಮಹದೇವಪ್ರಸಾದ್, ನಂದಿನಿ ಉತ್ಪನ್ನ ಘಟಕ ಉದ್ಘಾಟನೆಯನ್ನು ಯು.ಟಿ.ಖಾದರ್, ನಂದಿನಿ ತೃಪ್ತಿ ಹಾಲು ಬಿಡುಗಡೆಯನ್ನು ನಗರಾಭಿವೃದ್ದಿ ಸಚಿವ ವಿನಯಕುಮಾರ್ ಸೊರಕೆ ,ನೂತನ ಶೈತ್ಯಾಗಾರದ ಕಟ್ಟಡದ ಉದ್ಘಾಟನೆಯನ್ನು ಪಶುಸಂಗೋಪನೆ ಮತ್ತು ರೇಷ್ಮೆ ಇಲಾಖೆ ಸಚಿವ ಎ.ಮಂಜು, ನಂದಿನಿ ಮಜ್ಜಿಗೆ ಅರ್ಧ ಲೀಟರ್‌ನಲ್ಲಿ ಬಿಡುಗಡೆಯನ್ನು ಯುವಜನ ಸೇವೆ, ಕ್ರೀಡೆ ಮತ್ತು ಮೀನುಗಾರಿಕಾ ಸಚಿವ ಕೆ.ಅಭಯಚಂದ್ರ ಜೈನ್,ಸ್ಟೆರಿಲೈಜರ್ ಘಟಕದ ಉದ್ಘಾಟನೆಯನ್ನು ಕರ್ನಾಟಕ ಸಹಕಾರಿ ಹಾಲು ಮಹಾಮಂಡಲಿಯ ಅಧ್ಯಕ್ಷ ಪಿ. ನಾಗರಾಜು ಮಾಡಲಿದ್ದಾರೆ ಎಂದು ಹೇಳಿದರು.

  ಜಿಲ್ಲೆಯಲ್ಲಿ ಕಳೆದ ಏಳು ತಿಂಗಳುಗಳಿಂದ ಬೇಡಿಕೆಗಿಂತ ಹೆಚ್ಚು ಹಾಲು ಸಂಗ್ರಹವಾಗುತ್ತಿದೆ. ರಾಜ್ಯದ ಇತರ ಒಕ್ಕೂಟಕ್ಕೆ ಹೋಲಿಸಿದರೆ ರೈತರಿಗೆ ಲೀಟರಿಗೆ 28.17 ಪೈಸೆ ಯನ್ನು ನೀಡುವ ಮೂಲಕ ರಾಜ್ಯದಲ್ಲಿ ಅತೀ ಹೆಚ್ಚು ದರವನ್ನು ನೀಡಲಾಗುತ್ತಿದೆ.ಉತ್ತಮ ಗುಣಮಟ್ಟದ ಹಾಲು ನೀಡುವ ಮೂಲಕ ರಾಜ್ಯದ 14 ಒಕ್ಕೂಟಗಳಲ್ಲಿ ದ.ಕ ಸಹಕಾರಿ ಹಾಲು ಉತ್ಪಾದಕರ ಒಕ್ಕೂಟ ನಿಯಮಿತ ಮೊದಲನೆಯ ಸ್ಥಾನದಲ್ಲಿದೆ. ಕ್ಲೌಡ್ ಟೆಕ್ನೋಲಜಿಯನ್ನು ಅಳವಡಿಸಿದ ಹೆಗ್ಗಳಿಕೆಗೆ ಪಾತ್ರವಾಗಿರುವ ಒಕ್ಕೂಟ ಇದೀಗ ರಾಜ್ಯದಲ್ಲಿಯೆ ಮೊದಲಿಗೆ 28 ಕೋಟಿ ವೆಚ್ಚ ಮಾಡಿ ಪ್ಲೆಕ್ಸಿ ಪ್ಯಾಕ್ ಘಟಕವನ್ನು ಆರಂಭಿಸುತ್ತಿದೆ. ಇದು ಹತ್ತು ಲಕ್ಷ ಲೀಟರ್ ಸಾಮರ್ಥ್ಯವಿರುವ ಘಟಕವಿದಾಗಿದೆ ಎಂದು ಹೇಳಿದರು.

 ಪತ್ರಿಕಾಗೋಷ್ಟಿಯಲ್ಲಿ ಡಾ.ಕೃಷ್ಣ ಭಟ್, ರಾಜಶೇಖರ ಮೂರ್ತಿ,ನಿತ್ಯಾನಂದ ಭಕ್ತ, ಸತ್ಯನಾರಯಣ ಉಪಸ್ಥಿತರಿದ್ದರು.

 90 ದಿನಗಳ ಕಾಲ ಬಳಕೆ ಮಾಡಬಹುದಾಗಿದೆ ಪ್ಲೆಕ್ಸಿ ಪ್ಯಾಕ್ ನಂದಿನಿ ‘ತೃಪ್ತಿ’ ಹಾಲು:

     ದಕ್ಷಿಣ ಕನ್ನಡ ಸಹಕಾರಿ ಹಾಲು ಉತ್ಪಾದಕರ ಒಕ್ಕೂಟ ನಿಯಮಿತದಿಂದ ಬಿಡುಗಡೆಯಾಗಲಿರುವ ಪ್ಲೆಕ್ಸಿ ಪ್ಯಾಕ್‌ನಲ್ಲಿರುವ ನಂದಿನಿ ‘ತೃಪ್ತಿ ’ ಹಾಲನ್ನು ಯಾವುದೇ ಶೀತಲಿಕರಣ ವ್ಯವಸ್ಥೆಯಲ್ಲಿಡದೆ 90 ದಿನಗಳ ಕಾಲ ಇದನ್ನು ಬಳಸಬಹುದಾಗಿದೆ. ಈ ಹಾಲಿಗೆ ಲೀಟರಿಗೆ ರೂ.40 ದರವನ್ನು ವಿಧಿಸಲಾಗಿದೆ ಎಂದು ದಕ್ಷಿಣ ಕನ್ನಡ ಸಹಕಾರಿ ಹಾಲು ಉತ್ಪಾದಕರ ಒಕ್ಕೂಟದ ಅಧ್ಯಕ್ಷ ರವಿರಾಜ್ ಹೇಳಿದರು.

 ಪ್ಲೆಕ್ಸಿ ಪ್ಯಾಕ್ ಘಟಕದ ಸಿವಿಲ್ ಕಾಮಗಾರಿ ಹಾಗೂ ಯಂತ್ರೋಪಕರಣಗಳ ಖರೀದಿ ಸೇರಿ ಒಟ್ಟು 28 ಕೋಟಿ ವೆಚ್ಚವಾಗಿದೆ. ಪ್ಲೆಕ್ಸಿ ಪ್ಯಾಕ್‌ನಲ್ಲಿ ‘ತೃಪ್ತಿ’ ಹಾಲನ್ನು ನೆರೆಯ ರಾಜ್ಯಗಳಾದ ಕೇರಳ, ಗೋವಾ , ಈಶಾನ್ಯ ರಾಜ್ಯ, ಮುಂಬಯಿ ನಗರ ಮತ್ತು ಜಮ್ಮು ಕಾಶ್ಮೀರದಲ್ಲಿಯೂ ಮಾರಾಟ ಮಾಡುವ ಯೋಜನೆ ಇದೆ ಎಂದು ಹೇಳಿದರು.

 ಯು.ಎಚ್.ಟಿ.ಪ್ಲೆಕ್ಸಿ ಹಾಲಿನಲ್ಲಿ ಶೇಕಡ 3.5 ರಷ್ಟು ಕೊಬ್ಬು ಮತ್ತು ಶೇಕಡ 8.5ರಷ್ಟು ಕೊಬ್ಬೇತರ ಅಂಶಗಳಿದ್ದು 139 ಡಿಗ್ರಿಯಿಂದ 140 ಡಿಗ್ರಿವರೆಗಿನ ಉಷ್ಣತೆಯಲ್ಲಿ 3 ಸೆಕೆಂಡ್‌ಗಳ ಕಾಲ ವೈಜ್ಞಾನಿಕವಾಗಿ ಸಂಸ್ಕರಣೆ ಮಾಡಿ 90 ದಿನಗಳ ಬಾಳಿಕೆ ಬರುವಂತೆ 5 ಪದರಗಳ ರಕ್ಷಣಾ ಫಿಲಂನಿಂದ ಪ್ಯಾಕ್ ಮಾಡಿ , ಹಾಲಿನ ಗುಣಮಟ್ಟವನ್ನು ಕಾಯ್ದುಕೊಳ್ಳುವುದರಿಂದ ಪುನಃ ಕಾಯಿಸುವ ಅವಶ್ಯಕತೆಯಿಲ್ಲದೆ ನೇರವಾಗಿ ಉಪಯೋಗಿಸಬಹುದಾಗಿರುತ್ತದೆ. ಈ ಯಂತ್ರದಲ್ಲಿ ಮೂರು ಹೆಡ್‌ಗಳ ಮೂಲಕ 100 ಮಿ.ಲೀ ನಿಂದ 500 ಮಿ.ಲೀ ವರೆಗೆ ಹಾಲಿನ ಪ್ರಮಾಣವನ್ನು ಪ್ಯಾಕ್ ಮಾಡಲು ಅವಕಾಶವಿದೆ ಎಂದು ಅವರು ಹೇಳಿದರು.