ಭಟ್ಕಳ: ಚಿತ್ರಾಪುರದ ಆನಂದಾಶ್ರಮ ವಿದ್ಯಾಮಂದಿರದಲ್ಲಿ ಸಮುದಾಯದತ್ತ ಶಾಲೆ ಕಾರ್ಯಕ್ರಮ

ಭಟ್ಕಳ: ಸಮುದಾಯದತ್ತ ಶಾಲಾ ಕಾರ್ಯಕ್ರಮ ವಿದ್ಯಾರ್ಥಿ-ಶಿಕ್ಷಕರು-ಪಾಲಕರ ನಡುವಿನ ಕೊಂಡಿಯಾಗಿದ್ದು ಪರಸ್ಪರ ಅರಿತು ವಿದ್ಯಾರ್ಥಿಗಳ ಶಿಕ್ಷಣ ಗುಣಮಟ್ಟ ಸುಧಾರಣೆಗೆ ಮತ್ತು ವಿದ್ಯಾರ್ಥಿಗಳ ಭವಿಷ್ಯ ರೂಪಿಸಿಕೊಳ್ಳಲು ಸಹಕಾರಿಯಾಗಿದೆ ಎಂದು ತಾಲೂಕಾ ಪಂಚಾಯತ್ ಸದಸ್ಯೆ ಮಾಲತಿ ಮೋಹನ ದೇವಡಿಗ ಹೇಳಿದರು. ಅವರು ಇಲ್ಲಿನ ಚಿತ್ರಾಪುರದ ಶ್ರೀ ಆನಂದಾಶ್ರಮ ವಿದ್ಯಾಮಂದಿರ ಸರಕಾರಿ ಹಿರಿಯ ಪ್ರಾಥಮಿಕ ಶಾಲೆಯ ಸಮುದಾಯ ದತ್ತ ಶಾಲಾ ಕಾರ್ಯಕ್ರಮವನ್ನು ಉದ್ಘಾಟಿಸಿ ಮಾತನಾಡುತ್ತಿದ್ದರು. ಕಾರ್ಯಕ್ರಮದ ಅಧ್ಯಕ್ಷತೆಯನ್ನು ಶಾಲಾ ಎಸ್.ಡಿ.ಎಂ.ಸಿ. ಅಧ್ಯಕ್ಷ ಸುಭಾಷ ಕೊಪ್ಪಿಕರ್ ವಹಿಸಿದ್ದರು. ಸಂಪೂರ್ಣ ಬಹುಮಾನದ ಪ್ರಾಯೋಜಕತ್ವವನ್ನು ವಹಿಸಿದ್ದ ಹರೇನ ಹಟ್ಟಂಗಡಿ ಅವರು ಬಹುಮಾನ ವಿತರಕರಾಗಿ ಆಗಮಿಸಿ ಶುಭ ಹಾರೈಸಿದರು. ಮುಖ್ಯ ಅತಿಥಿಗಳಾಗಿ ಉಪಸ್ಥಿತರಿದ್ದ ಶಿರಾಲಿ ಗ್ರಾ. ಪಂ. ಅಧ್ಯಕ್ಷ ವೆಂಕಟೇಶ ನಾಯ್ಕ ಮಾತನಾಡಿ ಸಮುದಾಯ ದತ್ತ ಶಾಲಾ ಕಾರ್ಯಕ್ರಮ ಸರಕಾರದ ಕಾರ್ಯಕ್ರಮವಾಗಿದ್ದು ಇದು ಮಕ್ಕಳ ಪ್ರತಿಭೆಯನ್ನು ಪಾಲಕರು ನೋಡಲು ಸಹಕಾರಿಯಾಗಿದೆಯಲ್ಲದೇ ಶಾಲಾ ವಾತಾವರಣವನ್ನು ಪಾಲಕರು ನೋಡಲು ಸಹ ಅನುಕೂಲವಾಗಿದೆ ಎಂದರು.

ಇನ್ನೋರ್ವ ಮುಖ್ಯ ಅತಿಥಿ ಪತ್ರಕರ್ತ ರಾಧಾಕೃಷ್ಣ ಭಟ್ಟ ಮಾತನಾಡಿ ವಿದ್ಯಾರ್ಥಿಗಳು ಚಿಕ್ಕಂದಿನಿಂದಲೇ ಶಿಸ್ತು ಬೆಳೆಸಿಕೊಂಡರೆ ಮುಂದೆ ಜೀವನದಲ್ಲಿ ಉತ್ತಮವಾಗುವುದು. ಸರಕಾರಿ ಶಾಲೆಯೊಂದರಲ್ಲಿ ವಿದ್ಯಾರ್ಥಿಗಳ ಸಂಖ್ಯೆಯು ಶಾಲಾ ಕಲಿಕಾ ವಾತಾವರಣ, ಶಿಕ್ಷಕರ ಶ್ರಮ ಹಾಗೂ ಪಾಲಕರ ನಂಬಿಕೆಯ ದ್ಯೋತಕವಾಗಿದೆ. ವಿದ್ಯಾರ್ಥಿಗಳು ಕಲಿಯುವ ಶಾಲೆ ಮುಖ್ಯವಲ್ಲ. ಶಾಲೆಯಲ್ಲಿ ಕಲಿಕೆಯ ವಾತಾವರಣ, ಶಿಕ್ಷಕಣದ ಗುಣಮಟ್ಟ ಮತ್ತು ಶಿಕ್ಷಕರ ಶ್ರಮ ಮುಖ್ಯವಾಗಿರುತ್ತದೆ. ಈ ಶಾಲೆಯಲ್ಲಿ ಎಲ್ಲವೂ ಸಮ್ಮಿಳಿತವಾಗಿರುವುದೇ ವಿದ್ಯಾರ್ಥಿಗಳ ಸಂಖ್ಯೆ ಹೆಚ್ಚಿರಲು ಕಾರಣ ಎಂದರು. ಕಾರ್ಯಕ್ರಮದಲ್ಲಿ ಊರಿನ ಗಣ್ಯರಾದ ಬಿ.ವಿ.ನಾಯ್ಕ, ಮೋಹನ ದೇವಡಿಗ, ಎಸ್.ಡಿ.ಎಂ.ಸಿ. ಉಪಾಧ್ಯಕ್ಷೆ ಜ್ಯೋತಿ ನಾಯ್ಕ, ಮುಖ್ಯಾಧ್ಯಾಪಕ ವಾಮನ ಪಾವಸ್ಕರ್, ಗ್ರಾಮ ಪಂಚಾಯತ್ ಸದಸ್ಯರು, ಶಾಲಾ ಎಸ್.ಡಿ.ಎಂ.ಸಿ. ಸದಸ್ಯರು ಭಾಗವಹಿಸಿದ್ದರು. ಶಿಕ್ಷಕಿ ಆಶಾ ಭಟ್ಟ ಸ್ವಾಗತಿಸಿದರು. ದೈಹಿಕ ಶಿಕ್ಷಣ ಶಿಕ್ಷಕ ರಾಮದಾಸ ಅಗೇರ ನಿರ್ವಹಿಸಿದರು. ಶಿಕ್ಷಕ ಹನುಮಂತ ನಾಯ್ಕ ವಂದಿಸಿದರು.