ಅಬುಲ್ ಕಲಾಂ ಆಝಾದ್ರಂತಹವರು ಕೊನೆಯುಸಿರೆಳೆಯುವ ಮುನ್ನ ‘ಭಾರತ್ ಮಾತಾ ಕಿ ಜೈ’ ಎಂದು ಹೇಳಿ ಪ್ರಾಣ ಬಿಟ್ಟಿದ್ದಾರೆ
ಅಬುಲ್ ಕಲಾಂ ಆಝಾದ್ರಂತಹವರು ಕೊನೆಯುಸಿರೆಳೆಯುವ ಮುನ್ನ ‘ಭಾರತ್ ಮಾತಾ ಕಿ ಜೈ’ ಎಂದು ಹೇಳಿ ಪ್ರಾಣ ಬಿಟ್ಟಿದ್ದಾರೆ
- ರವಿಶಂಕರ್ ಪ್ರಸಾದ್, ಕೇಂದ್ರ ಸಚಿವ
ನಿಮ್ಮ ಕಿವಿಗೆ ಅದು ಕೇಳಿಸಬೇಕಾದರೆ, ಹಿಂದಿನಿಂದ ನೀವು ಅವರ ಕುತ್ತಿಗೆಗೆ ಚಾಕು ಹಿಡಿದು ನಿಂತಿದ್ದಿರೇ ಎಂದು ಭಾವಿಸಬೇಕಾಗುತ್ತದೆ.
---------------------
‘ಭಾರತ್ ಮಾತಾ ಕಿ ಜೈ’ ಎನ್ನದವರಿಗೆ ಈ ದೇಶದಲ್ಲಿರುವ ಹಕ್ಕಿಲ್ಲ
- ದೇವೇಂದ್ರ ಫಡ್ನವೀಸ್, ಮಹಾರಾಷ್ಟ್ರ ಮುಖ್ಯಮಂತ್ರಿ
ನಾವೆಲ್ಲ ಇಂಡಿಯಾಕ್ಕೆ ವಲಸೆ ಹೋಗಬೇಕೆಂದಿದ್ದೇವೆ.
---------------------
ಭಯೋತ್ಪಾದನೆ ಮಾನವೀಯತೆಯ ಶತ್ರು
- ನರೇಂದ್ರ ಮೋದಿ, ಪ್ರಧಾನಿ
ಮಾನವ ಹಕ್ಕು ಆಯೋಗದ ಮೇಲೆ ನಿಮಗಿರುವ ದ್ವೇಷದ ಕಾರಣ ಗೊತ್ತಾಯಿತು.
---------------------
ಬಂಡಾಯ ಧೋರಣೆಯ ಕವಿತೆಗಳು ರಚನೆಯಾಗುತ್ತಿರುವುದು ಉತ್ತಮ ಬೆಳವಣಿಗೆ
- ಡಾ.ಸಿದ್ದಲಿಂಗಯ್ಯ, ಹಿರಿಯ ಕವಿ
ಸಿದ್ದಲಿಂಗಯ್ಯ ವಿರುದ್ಧವೇ ದಲಿತರು ಬಂಡಾಯ ಕವಿತೆ ರಚಿಸುತ್ತಿರುವುದು ಕಾವ್ಯ ಲೋಕದ ಹೊಸ ಪ್ರಕಾರವಂತೆ.
---------------------
ಭ್ರಷ್ಟಾಚಾರ ನಿಗ್ರಹ ದಳ ವಿಚಾರದಲ್ಲಿ ಬಿಜೆಪಿಯವರಿಗೆ ಹೋರಾಟ ಮಾಡಲು ನೈತಿಕತೆಯಿಲ್ಲ
- ಎಚ್.ಡಿ.ದೇವೇಗೌಡ, ಮಾಜಿ ಪ್ರಧಾನಿ
ಆ ದಳಕ್ಕೆ ಜಾತ್ಯತೀತ ಎಂಬ ಹೆಸರು ಸೇರಿದರೆ ನಿಮ್ಮ ಒಪ್ಪಿಗೆ ಇದೆಯೇ?
---------------------
ನಾನು ಕಾನೂನನ್ನು ಗೌರವಿಸುತ್ತೇನೆ. ಇಲ್ಲದಿದ್ದರೆ ‘ಭಾರತ್ ಮಾತಾ ಕಿ ಜೈ’ ಕೂಗಲು ಒಲ್ಲದವರ ತಲೆ ಕಡಿಯುತ್ತಿದ್ದೆ
- ಬಾಬಾ ರಾಮ್ದೇವ್, ಯೋಗ ಗುರು
ಕಾನೂನನ್ನು ಗೌರವಿಸುವವರು ಚೂಡಿದಾರ ಧರಿಸಿ, ಮಹಿಳೆಯರ ಮಧ್ಯೆ ಅವಿತದ್ದು ದೇಶ ಮರೆತಿಲ್ಲ.
---------------------
ಕೇರಳದಲ್ಲಿ ತಾವರೆ ಅರಳಲಿದೆ
- ಕೃಷ್ಣ ಜೆ.ಪಾಲೆಮಾರ್, ಮಾಜಿ ಸಚಿವ
ಕರ್ನಾಟಕದಲ್ಲಿ ತಾವರೆಯನ್ನು ಮುದುಡಿಸಿದವರ ಮಾತುಗಳನ್ನು ನಂಬುವುದು ಹೇಗೇ?
---------------------
ಕರ್ನಾಟಕ ಗುಜರಾತ್ ಅಲ್ಲ
- ವೈ.ಎಸ್.ವಿ.ದತ್ತ, ಶಾಸಕ
ಆ ಬಗ್ಗೆ ನಿಮಗೆ ವಿಷಾದವಿದೆಯೇ?
---------------------
ಪ್ರಪಂಚ ಕೊಂಡಾಡುವುದು ಹೋರಾಟಗಾರರನ್ನೇ ಹೊರತು ಪಲಾಯನವಾದಿಗಳನ್ನಲ್ಲ
- ಹೇಮಾ ಮಾಲಿನಿ, ಬಾಲಿವುಡ್ ನಟಿ
ಯಾವ ಸಿನೆಮಾದ ಸಂಭಾಷಣೆ ಇದು?
---------------------
ಮೋದಿ ಭಾರತ ಮಾತೆಯ ಬೆನ್ನಿಗೆ ಚೂರಿ ಇರಿದಿದ್ದಾರೆ
- ಕೇಜ್ರಿವಾಲ್, ದಿಲ್ಲಿ ಮುಖ್ಯಮಂತ್ರಿ
ಪರವಾಗಿಲ್ಲ, ನೀವು ಹೊಟ್ಟೆಗೆ ಇರಿಯಿರಿ.
---------------------
ವಿಜ್ಞಾನ, ತಂತ್ರಜ್ಞಾನ ವಿದೇಶದ್ದಲ್ಲ
- ಡಾ.ವೀರೇಂದ್ರ ಹೆಗ್ಗಡೆ, ಧರ್ಮಾಧಿಕಾರಿ, ಧರ್ಮಸ್ಥಳ
ಎಲ್ಲ, ತಮ್ಮ ಎಸ್ಡಿಎಂ ಕಾಲೇಜಿನದ್ದು ಎಂದು ಪೇಟೆಂಟ್ ತೆಗೆದುಕೊಳ್ಳುವ ಯೋಚನೆಯೇ?
---------------------
ಕಳ್ಳನ ಕೈಗೆ ಕೀಲಿ ಕೊಡುವ ಕೆಲಸ ಸಿದ್ದರಾಮಯ್ಯ ಸರಕಾರ ಮಾಡುತ್ತಿದೆ
- ಪ್ರಹ್ಲಾದ್ ಜೋಷಿ, ಮಾಜಿ ಬಿಜೆಪಿ ರಾಜ್ಯಾಧ್ಯಕ್ಷ
ಯಡಿಯೂರಪ್ಪನ ಕೈಗೆ ಕೀಲಿ ಕೈ ಕೊಟ್ಟಿರುವುದರ ಬಗ್ಗೆ ಸಿದ್ದರಾಮಯ್ಯ ಕೂಡ ಇದನ್ನೇ ಹೇಳುತ್ತಿದ್ದಾರೆ.
---------------------
ಪಠಾಣ್ಕೋಟ್ ದಾಳಿ ಭಾರತದ ನಾಟಕ
- ಪಾಕಿಸ್ತಾನ್ ಟುಡೆ, ಪಾಕ್ ಪತ್ರಿಕೆ
ಆ ನಾಟಕದಲ್ಲಿ ತಮ್ಮ ಪಾತ್ರ ಏನಿತ್ತು ಎನ್ನುವುದಾದರೂ ತಿಳಿಸಿ.
---------------------
ಎಸಿಬಿ ಎಂದರೆ ಕೋಳಿ ಫಾರಂಗೆ ತೋಳವೇ ಮೇನೆಜರ್ ಆದಂತೆ
- ಎಸ್.ಆರ್.ಹಿರೇಮಠ್, ಸಾಮಾಜಿಕ ಹೋರಾಟಗಾರ
ನೀವು ಇಚ್ಛೆಪಟ್ಟರೆ, ನರಿಗಳನ್ನು ಮೇನೆಜರ್ ಮಾಡಲು ನಾವು ಸಿದ್ಧ ಎಂದರಂತೆ ಸಿದ್ದರಾಮಯ್ಯ.
---------------------
ಸಚಿವ ಸ್ಥಾನ ನಮ್ಮ ಕುಟುಂಬದ ಆಸ್ತಿಯಲ್ಲ
- ಯು.ಟಿ.ಖಾದರ್, ಆರೋಗ್ಯ ಸಚಿವ
ತಮ್ಮ ಕುಟುಂಬದ ಆಸ್ತಿಯೇನು ಎನ್ನುವುದನ್ನಾದರೂ ಘೋಷಿಸಬಹುದಲ್ಲ?
---------------------
25 ವರ್ಷಗಳಲ್ಲಿ ಬಿಜೆಪಿ ಎಲ್ಲಾ ಚುನಾವಣೆಗಳನ್ನೂ ಗೆಲ್ಲಬೇಕು
- ಅಮಿತ್ ಶಾ, ಬಿಜೆಪಿ ರಾಷ್ಟ್ರೀಯ ಅಧ್ಯಕ್ಷ
ಚುನಾವಣೆಗಳನ್ನೇ ನಡೆಸದೇ ಇರುವುದು ಅದಕ್ಕಿರುವ ಒಂದೇ ಮಾರ್ಗ.
--------------------
ಕೇಜ್ರಿವಾಲ್ ಪ್ರಧಾನಿ ಮೋದಿಯನ್ನು ಐಎಸ್ಐ ಏಜೆಂಟ್ ಎಂದು ಕರೆದದ್ದು ಖಂಡನೀಯ
- ರವಿಶಂಕರ್ ಪ್ರಸಾದ್, ಕೇಂದ್ರ ಸಚಿವ
ಆರೆಸ್ಸೆಸ್ ಏಜೆಂಟ್ ಎನ್ನುವುದಷ್ಟೇ ಅವರಿಗೆ ಶೋಭಿಸುತ್ತದೆ ಎನ್ನುತ್ತೀರಾ?
---------------------
ಗುಜರಾತ್ ಮಾದರಿಯಲ್ಲಿ ಎಸಿಬಿ ರಚನೆ ಮಾಡಲಾಗಿದೆ
- ರಮಾನಾಥ ರೈ, ಸಚಿವ
ನಿಮಗೆ ಗುಜರಾತ್ ರಾಜ್ಯ ಮಾದರಿಯೆ?
---------------------
ಈ ಪ್ರಪಂಚದ ಎಲ್ಲ ಪುರುಷರು-ಮಹಿಳೆಯರು ಕೆಟ್ಟವರು-ಒಳ್ಳೆಯವರು ಅಲ್ಲ
- ರಾಘವೇಶ್ವರ ಸ್ವಾಮೀಜಿ, ರಾಮಚಂದ್ರಾಪುರ ಮಠ
ಯಾವುದು ಒಳ್ಳೆಯದು, ಯಾವುದು ಕೆಟ್ಟದು ಎನ್ನುವುದನ್ನು ಪರೀಕ್ಷಿಸುವುದಕ್ಕೋಸ್ಕರ ರುಚಿ ನೋಡಿದ್ದೆಂದು ಕಾಣುತ್ತದೆ.
---------------------
ಹಸುಗಳನ್ನು ಸಾಕುತ್ತಿರುವ ಮನೆಗಳಿಗೆ ಹೆಣ್ಣು ಕೊಡದಿರುವ ಸಂಸ್ಕೃತಿ ಬೆಳೆಯುತ್ತಿದೆ
- ಡಾ.ವೀರೇಂದ್ರ ಹೆಗ್ಗಡೆ ಧರ್ಮಾಧಿಕಾರಿ, ಧರ್ಮಸ್ಥಳ
ಬದುಕು ಹಸುವಿಗಿಂತ ಕಡೆಯಾಗಿ ಹೋಗಬಾರದಲ್ಲ, ಅದಕ್ಕೆ.
--------------------
ಪಾಕಿಸ್ತಾನ ರಚನೆಯಲ್ಲಿ ಆರೆಸ್ಸೆಸ್ ಕೈವಾಡ ಇದೆ
- ಜಿ.ಕೆ.ಗೋವಿಂದರಾವ್, ಸಾಹಿತಿ
ಆರೆಸ್ಸೆಸ್ ರಚನೆಯಲ್ಲಿ ಪಾಕಿಸ್ತಾನದ ಕೈವಾಡವಿದೆ ಎನ್ನುವುದು ಭಾರತೀಯರ ಅನುಮಾನ.
---------------------
*ಸಾವಿಲ್ಲದ ಮನೆಯಿಲ್ಲ, ಭ್ರಷ್ಟಾಚಾರವಿಲ್ಲದ ಸಂಸ್ಥೆ ಇಲ್ಲ
- ಸಂತೋಷ್ ಹೆಗ್ಡೆ, ನಿವೃತ್ತ ನ್ಯಾಯಮೂರ್ತಿ
ಅಪರಾಧಿಗಳಿರುವ ಜೈಲಿಲ್ಲ.
