ಅಸ್ಪಶ್ಯತೆ ನಿವಾರಣೆ ಸವರ್ಣೀಯರಿಂದ ಆರಂಭವಾಗಲಿ: ನಿಡುಮಾಮಿಡಿ ಶ್ರೀ

ಬೆಂಗಳೂರು, ಎ. 18: ಹೆರಿಗೆಯ ನೋವು ಅನುಭವಿಸಿದ ತಾಯಿಗೆ ಮಾತ್ರ ನೋವಿನ ಅನುಭವವಾಗುತ್ತದೆ. ಹಾಗೆಯೇ ಅಸ್ಪಶ್ಯತೆ ಎಂಬ ಘೋರ ನೋವನ್ನು ದಲಿತರೇ ಅರ್ಥ ಮಾಡಿಕೊಳ್ಳಲು ಸಾಧ್ಯ. ಈ ಘೋರ ಆಚರಣೆಯನ್ನು ಕಡೆಗಾಣಿಸಲು ಸವರ್ಣೀಯರು ಮನಸ್ಸು ಮಾಡಬೇಕು ಎಂದು ನಿಡುಮಾಮಿಡಿ ಮಠದ ವೀರಭದ್ರ ಚನ್ನಮಲ್ಲ ಸ್ವಾಮೀಜಿ ಹೇಳಿದ್ದಾರೆ.
ಸೋಮವಾರ ನಗರದ ರವೀಂದ್ರ ಕಲಾಕ್ಷೇತ್ರದಲ್ಲಿ ದಲಿತ ಸಂಘರ್ಷ ಸಮಿತಿ ಆಯೋಜಿಸಿದ್ದ ಸಂವಿಧಾನ ಶಿಲ್ಪಿ ಡಾ.ಬಿ.ಆರ್.ಅಂಬೇಡ್ಕರ್‌ರವರ 125ನೆ ಜನ್ಮ ದಿನಾಚರಣೆ ಮತ್ತು ಡಿಎಸ್‌ಎಸ್ ಫೌಂಡರ್ ವಾಯ್ಸಿ ಪತ್ರಿಕೆಯ ಲೋಕಾರ್ಪಣೆ ಕಾರ್ಯಕ್ರಮದಲ್ಲಿ ಪಾಲ್ಗೊಂಡು ಅವರು ಮಾತನಾಡಿದರು.
 ಕಾಲ ಬದಲಾಗಿದೆ. ದಲಿತರು ಇಂದು ವಿದ್ಯಾವಂತರಾಗಿದ್ದಾರೆ, ಅಧಿಕಾರದಲ್ಲಿದ್ದಾರೆ, ಸಮಾಜದ ಪ್ರಮುಖ ಸ್ಥಾನಗಳನ್ನು ಅಲಂಕರಿಸಿದ್ದಾರೆ. ಆದರೆ ಇನ್ನು ಮುಂದೆ ದಲಿತರನ್ನು ತಿರಸ್ಕಾರ ಮನೋಭಾವದಿಂದ ನೋಡುವುದು ಸರಿಯಲ್ಲ. ಹೀಗಾಗಿ ಸವರ್ಣೀುರ ವರ್ಗಗಳ ಜನರ ಮನಸ್ಸು ಬದಲಾಗಬೇಕು. ಅವರನ್ನು ಮನುಷ್ಯರಂತೆ ಗೌರವದಿಂದ ನೋಡಬೇಕು. ಈ ಬಗ್ಗೆ ಸವರ್ಣೀಯರು ಗಂಭೀರ ಚಿಂತನೆ ಮಾಡಬೇಕು ಎಂದು ಹೇಳಿದರು.
ಅಸ್ಪಶ್ಯತೆ ಕೇವಲ ಕಾನೂನಿನಲ್ಲಿ ಮಾತ್ರ ನಿಷೇಧವಾಗಿದೆ. ಆದರೆ ಮನಸ್ಸಿನಲ್ಲಿ ಅಸ್ಪಶ್ಯತೆಯ ಬೇರು ಹಾಗೇ ಇದೆ. ಗ್ರಾಮೀಣ ಭಾಗಗಳಲ್ಲಿ ಇನ್ನೂ ದಲಿತರಿಗೆ ಪ್ರವೇಶವಿಲ್ಲ. ಅಷ್ಟೇ ಯಾಕೆ ಸರಕಾರ ನಿರ್ಮಾಣ ಮಾಡಿರುವ ಸಮುದಾಯ ಭವನಗಳಿಗೂ ಪ್ರವೇಶಿಸದಂತೆ ನಿರ್ಬಂಧ ಹೇರಲಾಗುತ್ತಿದೆ. ಈ ಮನಸ್ಥಿತಿ ಪರಿವರ್ತನೆಯಾಗಬೇಕು ಎಂದು ಹೇಳಿದರು.
ಬಹುಪಾಲು ರಾಜಕೀಯ ಪಕ್ಷಗಳು ಮೇಲ್ವರ್ಗದ ಕೈಯಲ್ಲಿವೆ. ಮೇಲ್ವರ್ಗದ ನಾಯಕರು ದಲಿತರನ್ನು ಕೇವಲ ಮತಕ್ಕಾಗಿ ಮೀಸಲಾಗಿಟ್ಟು ಶೋಷಣೆ ಮಾಡುತ್ತಿದ್ದಾರೆ. ದಲಿತರು ಯಾವಾಗಲೂ ಮೇಲ್ವರ್ಗಕ್ಕೆ ವಿನಯತೆಯಿಂದಿರಬೇಕು ಅಷ್ಟೆ. ಆದರೆ ದಲಿತರು ಸ್ವಾಭಿಮಾನದಿಂದ ವರ್ತಿಸಿದರೆ, ಕಂಡರೆ ಅವರ ಮೇಲೆ ಆಕ್ರಮಣ, ಹಲ್ಲೆ ನಡೆಯುತ್ತವೆ. ಇದರಲ್ಲಿ ರಾಜಕೀಯ ಹೊರತಲ್ಲ ಎಂದು ಕಳವಳ ವ್ಯಕ್ತಪಡಿಸಿದರು.
ಕಾರ್ಯಕ್ರಮದಲ್ಲಿ ರಾಜ್ಯಸಭಾ ಸದಸ್ಯ ಬಿ.ಕೆ.ಹರಿಪ್ರಸಾದ್ ಮಾತನಾಡಿ, ಅಂಬೇಡ್ಕರ್ ಅವರನ್ನು ಕೇವಲ ದಲಿತ ನಾಯಕರನ್ನಾಗಿ ಬಿಂಬಿಸಿರುವುದು ದೊಡ್ಡ ದುರಂತ. ಅಂಬೇಡ್ಕರ್ ಅವರ ತತ್ವಾದರ್ಶಗಳನ್ನು ದಲಿತ ಸಮುದಾಯದವರಷ್ಟೇ ಅಲ್ಲ, ಉಳಿದ ಸಮುದಾಯದವರು ಪಾಲಿಸಬೇಕು ಎಂದು ಹೇಳಿದರು.
ಡಾ.ಬಿ.ಆರ್. ಅಂಬೇಡ್ಕರ್‌ರವರು ಹಿಂದೂರಾಷ್ಟ್ರ ನಿರ್ಮಾಣದ ಪರಿಕಲ್ಪನೆ ಹೊಂದಿರಲಿಲ್ಲ. ಬದಲಾಗಿ ಜಾತೀಯತೆ ಮುಕ್ತ ಭಾರತ ರಾಷ್ಟ್ರ ನಿರ್ಮಾಣದ ಕನಸು ಕಂಡಿದ್ದರು ಎಂದು ಹೇಳಿದ ಅವರು, ದಲಿತ ಸಮುದಾಯಕ್ಕೆ ರಕ್ಷಣೆ ನೀಡುತ್ತಿರುವ ಮೇಲ್ವರ್ಗದವರಿಂದಲೇ ಅಸ್ಪೃಶ್ಯತೆ, ದೌರ್ಜನ್ಯ, ಶೋಷಣೆ ನಡೆಯುತ್ತಿದೆ. ಈ ಶೋಷಣೆಗಳ ವಿರುದ್ಧ ದಲಿತರು ಹೋರಾಟ ಮಾಡಬೇಕು. ಈ ಕುರಿತು ಜಾಗೃತಿ ಮೂಡಿಸಬೇಕು ಎಂದು ಹೇಳಿದರು.
 ಕಾರ್ಯಕ್ರಮದಲ್ಲಿ ಡಿ.ಎಸ್.ಎಸ್. ಫೌಂಡರ್ ವಾಯ್ಸ್ ಪತ್ರಿಕೆ ಬಿಡುಗಡೆ ಮಾಡಲಾಯಿತು. ಮಾಜಿ ಕೇಂದ್ರ ಸಚಿವ ಎಂ.ವಿ. ರಾಜಶೇಖರನ್ ಆಹಾರ ಸಚಿವ ದಿನೇಶ್ ಗುಂಡೂರಾವ್, ಶೂದ್ರ ಸೇನೆಯ ಅಧ್ಯಕ್ಷ ಮುರಳೀಧರ ಹಾಲಪ್ಪ, ಡಿಎಸ್‌ಎಸ್ ರಾಜ್ಯಾಧ್ಯಕ್ಷ ಜೀವನಹಳ್ಳಿ ನಾರಾಯಣ್ ಸೇರಿದಂತೆ ಇತರರು ಉಪಸ್ಥಿತರಿದ್ದರು.

ಬಹುಪಾಲು ಪಕ್ಷಗಳು ಮೇಲ್ವರ್ಗವದವರ ಹಿಡಿತದಲ್ಲಿರುವುದರಿಂದ ರಾಜ್ಯದಲ್ಲಿ ಇನ್ನೂ ದಲಿತರೊಬ್ಬರು ಮುಖ್ಯಮಂತ್ರಿಯಾಗಲು ಸಾಧ್ಯವಾಗಿಲ್ಲ. ದಲಿತ ನಾಯಕರೊಬ್ಬರು ಮುಖ್ಯಮಂತ್ರಿಯಾಗದೇ ಇರುವುದಕ್ಕೆ ರಾಜಕೀಯ ಪ್ರಜ್ಞೆ ಮತ್ತು ಸಮರ್ಥ ನಾಯಕತ್ವದ ಕೊರತೆಯೂ ಕಾರಣ.
-ನಿಡುಮಾಮಿಡಿ ಮಠದ ವೀರಭದ್ರ ಚನ್ನಮಲ್ಲ ಸ್ವಾಮೀಜಿ.