ಮಂಗಳೂರು : 280 ಕೋಟಿರೂ. ವೆಚ್ಚದಲ್ಲಿ ದ್ವಿತೀಯ ಹಂತದ ಎಡಿಬಿ ಯೋಜನೆ

ಮಂಗಳೂರು, ಎ. 19: ಮನಪಾ ವ್ಯಾಪ್ತಿಯಲ್ಲಿ ಸುಮಾರು 280 ಕೋಟಿ ರೂ. ವೆಚ್ಚದ ದ್ವಿತೀಯ ಹಂತದ ಎಡಿಬಿ ಯೋಜನೆಯ ಕುರಿತಂತೆ ಸದ್ಯ ಪ್ರಾಥಮಿಕ ವಿನ್ಯಾಸ ವರದಿ (ಪಿಡಿಆರ್) ಮಾತ್ರವೇ ಸಿದ್ಧಗೊಂಡಿದ್ದು, ಅದು ಮನಪಾ ಸಭೆಯಲ್ಲಿ ಅನುಮೋದನೆಗೊಂಡ ಬಳಿಕ ವಿಸ್ತೃತ ಯೋಜನಾ ವರದಿ (ಡಿಪಿಆರ್) ಸಿದ್ಧಪಡಿಸಬೇಕಿದೆ. ಈ ಕಾರ್ಯದಲ್ಲಿ ಮನಪಾ ಸದಸ್ಯರೆಲ್ಲರ ಸಕ್ರಿಯ ಪಾಲ್ಗೊಳ್ಳುವಿಕೆಯನ್ನು ಎದುರು ನೋಡಲಾಗುತ್ತಿದೆ ಎಂದು ಕೆಐಯುಡಿಎಫ್‌ಸಿಯ ವ್ಯವಸ್ಥಾಪಕ ನಿರ್ದೇಶಕ ಪೊನ್ನುರಾಜ್ ಹೇಳಿದ್ದಾರೆ.

ಮನಪಾ ಸಭಾಂಣದಲ್ಲಿ ಇಂದು ಮೇಯರ್ ಹರಿನಾಥ್ ಅಧ್ಯಕ್ಷತೆಯಲ್ಲಿ ದ್ವಿತೀಯ ಹಂತದ ಎಡಿಬಿ ಯೋಜನೆಯ ಕುರಿತಂತೆ ಸದಸ್ಯರ ಅಭಿಪ್ರಾಯ ಸಂಗ್ರಹದ ವೇಳೆ ಅವರು ಈ ಸಲಹೆ ನೀಡಿದರು.

ಮಂಗಳೂರು ನಗರದ ಅಭಿವೃದ್ಧಿಯ ಉದ್ದೇಶದಿಂದ ಆರಂಭಿಸಲಾದ ಎಡಿಬಿ ಪ್ರಾಯೋಜಿತ ಒಳಚರಂಡಿ ಹಾಗೂ ನೀರು ಪೂರೈಕೆಯನ್ನೊಳಗೊಂಡ ಕಾಮಗಾರಿಯ ಸಂದರ್ಭ ಹಲವಾರು ಸಮಸ್ಯೆಗಳ ಬಗ್ಗೆ ನಿರೀಕ್ಷೆ ಮಾಡಿರಲಿಲ್ಲ. ಇದೀಗ ಹಿಂದೆ ಆಗಿರುವ ತಪ್ಪು ಸಮಸ್ಯೆಗಳನ್ನು ಸುಧಾರಿಸಿಕೊಂಡು ಮುಂದೆ ಸಾಗಬೇಕಾಗಿದೆ. ಅದಕ್ಕಾಗಿ ಈಗಾಗಲೇ ತಯಾರಿಸಲಾಗಿರುವ ಪ್ರಾಥಮಿಕ ವಿನ್ಯಾಸ ವರದಿಗೆ ಮನಪಾ ಸಾಮಾನ್ಯ ಸಭೆಯಲ್ಲಿ ಅನುಮೋದನೆ ದೊರೆಯಬೇಕಿದೆ. ಬಳಿಕ ಸಮಾಲೋಚನಾ ಸಂಸ್ಥೆಯ ಮೂಲಕ ಡಿಪಿಆರ್ ಸಿದ್ಧಪಡಿಸಬೇಕಿದೆ ಎಂದು ಪೊನ್ನುರಾಜ್ ಹೇಳಿದರು.

ಈಗಾಗಲೇ ಪ್ರಥಮ ಹಂತದಲ್ಲಿ ಒಳಚರಂಡಿ ವ್ಯವಸ್ಥೆಗೆ ಸಂಬಂಧಿಸಿ ಹಲವಾರು ಸಂಪರ್ಕಗಳು ಕಲ್ಪಿಸಲಾಗಿಲ್ಲ. ಕೆಲವೊಂದು ಪೈಪ್‌ಲೈನ್‌ಗಳನ್ನು ಬದಲಿಸಬೇಕಾದ ಅಗತ್ಯವಿದೆ. ಈ ಬಗ್ಗೆ ಎಲ್ಲಾ ವಾರ್ಡ್‌ಗಳ ಸದಸ್ಯರು ತಮ್ಮ ಅಗತ್ಯ ಬೇಡಿಕೆಗಳ ನೀಲಿನಕ್ಷೆ ತಯಾರು ಮಾಡಬೇಕು. ಅಧಿಕಾರಿಗಳು ವಾರ್ಡ್ ಮಟ್ಟದಲ್ಲಿ ಅದನ್ನು ಪರಿಶೀಲಿಸಲಿದ್ದಾರೆ ಎಂದು ಪೊನ್ನುರಾಜ್ ನುಡಿದರು.

ಯೋಜನೆಯ ಮೇಲ್ವಿಚಾರಣೆಗಾಗಿ ಸ್ಥಾಯಿ ಸಮಿತಿ ರಚನೆಗೆ ಸಲಹೆ

ಡಿಪಿಆರ್ ಸಿದ್ಧಪಡಿಸುವ ಮೊದಲು ಈವರೆಗೆ ಆಗಿರುವ ಕಾಮಗಾರಿಗಳ ನೀಲಿ ನಕಾಶೆ ತಯಾರಿಸಿ, ಅಳವಡಿಸಲಾದ ಪೈಪ್‌ಲೈನ್‌ಗಳನ್ನು ನಮೂದಿಸಲಾಗುವುದು. ಬಳಿಕ ಆರೋಗ್ಯ ನಿರೀಕ್ಷಕರು, ಜೂನಿಯರ್ ಇಂಜಿನಿಯರ್, ಕನ್ಸ್‌ಸಲ್ಟಂಟ್ ಸಂಸ್ಥೆ ಹಾಗೂ ಅಧಿಕಾರಿಗಳನ್ನು ಒಳಗೊಂಡ ತಂಡ ಸಮಗ್ರ ಆಸ್ತಿಯ ನಕ್ಷೆ ತಯಾರಿಸಬೇಕು. ಬಳಿಕ ಡಿಪಿಆರ್ ಸಿದ್ಧಪಡಿಸಿ, ತಳ ಮಟ್ಟದ ತೊಂದರೆ, ಸಮಸ್ಯೆಗಳನ್ನು ಕ್ರೋಢೀಕರಿಸಿಕೊಳ್ಳಬೇಕು. ಒಟ್ಟು ಯೋಜನೆಯ ಸಮಗ್ರ ಪರಿಶೀಲನೆ, ಯೋಜನೆ ಸಿದ್ಧಪಡಿಸುವ ನಿಟ್ಟಿನಲ್ಲಿ ಮನಪಾದಿಂದ ಸ್ಥಾಯಿ ಸಮಿತಿಯೊಂದನ್ನು ರಚಿಸುವುದು ಅಗತ್ಯ ಎಂದು ಪೊನ್ನುರಾಜ್ ಸಲಹೆ ನೀಡಿದರು.

ಯೋಜನೆ ಸಿದ್ಧಪಡಿಸುವುದರಂದ ಹಿಡಿದು ಅನುಷ್ಠಾನದವರೆಗೆ ಈ ಸಮಿತಿಯನ್ನು ಮುಂದುವರಿಸುವ ಬಗ್ಗೆಯೂ ಪರಿಗಣಿಸಬಹುದು. ಯೋಜನೆ ಅನುಷ್ಠಾನಗೊಳಿಸುವ ಸಂಸ್ಥೆಯ ಕಾರ್ಯ ನಿರ್ವಹಣೆ ಸರಿ ಇಲ್ಲ ಅನ್ನಿಸಿದಾಗ ಮುಲಾಜಿಲ್ಲದೆ ಅವರನ್ನು ಬದಲಾಯಿಸುವ ಅವಕಾಶವೂ ಇದೆ. ಅದಕ್ಕಾಗಿ ಸದಸ್ಯರೆಲ್ಲರೂ ಸಕ್ರಿಯವಾಗಿ ಪಾಲ್ಗೊಳ್ಳುವುದು ಬಹು ಮುಖ್ಯ ಎಂದು ಅವರು ಹೇಳಿದರು.

ಸಭೆಯಲ್ಲಿ ಉಪಸ್ಥಿತರಿದ್ದ ಶಾಸಕ ಜೆ.ಆರ್. ಲೋಬೋ ಮಾತನಾಡಿ, ಪ್ರಥಮ ಹಂತದ 380 ಕೋಟಿ ರೂ.ಗಳ ಒಳಚರಂಡಿ, ರಸ್ತೆಗಳ ಅಭಿವೃದ್ಧಿ ಹಾಗೂ ನೀರು ಸರಬರಾಜು ವ್ಯವಸ್ಥೆಯು ಪರಿಪೂರ್ಣಗೊಳ್ಳಬೇಕಾದರೆ ದ್ವಿತೀಯ ಹಂತದ ಕಾಮಗಾರಿಯನ್ನು ಕೈಗೆತ್ತಿಕೊಳ್ಳುವುದು ಅಗತ್ಯ ಎಂದರು.

ದ್ವಿತೀಯ ಹಂತದ 280 ಕೋಟಿರೂ.ಗಳಲ್ಲಿ ನೀರು ಸರಬರಾಜಿಗೆ 160 ಕೋಟಿ ರೂ. ಹಾಗೂ ಒಳಚರಂಡಿಗೆ 120 ಕೋಟಿ ರೂ.ಗಳನ್ನು ಬಳಕೆ ಮಾಡಲಾಗುವುದು ಎಂದರು.

ಸಭೆಯಲ್ಲಿ ಉಪ ಮೇಯರ್ ಸುಮಿತ್ರಾ ಕರಿಯ, ಸ್ಥಾಯಿ ಸಮಿತಿ ಅಧ್ಯಕ್ಷ ಲ್ಯಾನ್ಸಿ ಲೋಟ್ ಪಿಂಟೋ, ಆಯುಕ್ತ ಡಾ.ಎಚ್.ಎನ್. ಗೋಪಾಲಕೃಷ್ಣ ಉಪಸ್ಥಿತರಿದ್ದರು.

ಹಳೆಯ ತಪ್ಪುಗಳನ್ನು ಸರಿಪಡಿಸಲು ಸದಸ್ಯರ ಆಗ್ರಹ

ಪ್ರಥಮ ಹಂತದ ಎಡಿಬಿ ಯೋಜನೆಯಲ್ಲಿ ಹಲವಾರು ದೋಷಗಳಿರುವುದರಿಂದ ಯೋಜನೆಯಿಂದ ಸಾರ್ವಜನಿಕರಿಗೆ ಯಾವುದೇ ಪ್ರಯೋಜನವಾಗಿಲ್ಲ. ಹಾಗಾಗಿ ಹೊಸ ಯೋಜನೆ ಕೈಗೆತ್ತಿಕೊಳ್ಳುವ ಮುನ್ನ ಹಳೆಯ ಯೋಜನೆಯಡಿ ಒಳಚರಂಡಿಯಲ್ಲಿ ಬಿಟ್ಟು ಹೋಗಿರುವ ಸಂಪರ್ಕಗಳನ್ನು ಜೋಡಿಸುವುದು, ಹಳೆಯ ಪೈಪ್‌ಲೈನ್‌ಗಳನ್ನು ಬದಲಾಯಿಸುವುದು, ಭರವಸೆಯಂತೆ ವಾರದ ಏಳು ದಿನವೂ, ದಿನದ 24 ಗಂಟೆಯೂ ನೀರು ಪೂರೈಕೆಗೆ ಮುಂದಾಗುವ ಬಗ್ಗೆ ಕ್ರಮ ಕೈಗೊಳ್ಳುವುದು, ಕುಡಿಯುವ ನೀರಿನ ಪೈಪ್‌ನಲ್ಲಿ ಚರಂಡಿ ತ್ಯಾಜ್ಯ ಹರಿಯುತ್ತಿರುವುದನ್ನು ಪತ್ತೆಹಚ್ಚುವುದು ಮೊದಲಾದ ಕಾರ್ಯಗಳು ನಡೆಯಬೇಕು ಎಂಬ ಸಲಹೆಗಳು ಸದಸ್ಯರಾದ ಸುಧೀರ್ ಶೆಟ್ಟಿ, ಪ್ರೇಮಾನಂದ ಶೆಟ್ಟಿ, ರಾಜೇಂದ್ರ, ನವೀನ್ ಡಿಸೋಜಾ, ಅಶೋಕ್ ಡಿ.ಕೆ., ಪ್ರಕಾಶ್ ಸಾಲಿಯಾನ್, ಅಪ್ಪಿಲತಾ, ಮುಹಮ್ಮದ್, ಅಬ್ದುಲ್ ಲತೀಫ್, ಅಬ್ದುಲ್ ರವೂಫ್, ದಯಾನಂದ ಶೆಟ್ಟಿ, ಮಧುಕಿರಣ್, ರತಿಕಲಾ ಮೊದಲಾದವರಿಂದ ವ್ಯಕ್ತವಾಯಿತು. ಜತೆಗೆ ತಮ್ಮ ವಾರ್ಡ್‌ಗಳಲ್ಲಿನ ಒಳಚರಂಡಿ ಅವ್ಯವಸ್ಥೆಗಳ ಕುರಿತಂತೆಯೂ ಸದಸ್ಯರು ಸಭೆಯ ಗಮನ ಸೆಳೆದರು.

ಒಳಚರಂಡಿ ನಿರ್ವಹಣೆಗೆ ನುರಿತ ಇಂಜನಿಯರ್‌ಗಳ ತಂಡ ಒದಗಿಸಿ: ಹರಿನಾಥ್

ಪ್ರಥಮ ಹಂತದ ಎಡಿಬಿ ಯೋಜನೆಯಡಿ ಬಹುತೇಕವಾಗಿ ಒಳಚರಂಡಿ ಮ್ಯಾನ್‌ಹೋಲ್‌ಗಳನ್ನು ಕೆಂಪು ಕಲ್ಪಿನಿಂದ ನಿರ್ಮಿಸಲಾಗಿದೆ. ಇದರಿಂದಾಗಿ ಸೋರಿಕೆ, ಕುಸಿತ ಮೊದಲಾದ ತೊಂದರೆಗಳಿಂದ ಅಡೆತಡೆಗಳನ್ನು ಎದುರಿಸಬೇಕಾಗಿದೆ. ಮಾತ್ರವಲ್ಲದೆ ಮಳೆಗಾಲದಲ್ಲಿ ನೀರು ತುಂಬಿ ತಗ್ಗು ಪ್ರದೇಶಗಳಲ್ಲಿ ಒಳಚರಂಡಿ ನೀರು ಮನೆಗಳಿಗೂ ನುಗ್ಗುವ ಪರಿಸ್ಥಿತಿ ಇದೆ. ಹಾಗಾಗಿ ಕಾಂಕ್ರೀಟ್ ಮ್ಯಾನ್‌ಹೋಲ್‌ಗಳನ್ನು ನಿರ್ಮಿಸಬೇಕು. ಹಾಗೂ ಮನಪಾದಲ್ಲಿ ಒಳಚರಂಡಿ ವ್ಯವಸ್ಥೆಯ ನಿರ್ವಹಣೆಗೆ ನುರಿತ ಇಂಜನಿಯರ್‌ಗಳ ತಂಡವನ್ನು ಒದಗಿಸಬೇಕು. ಹಾಗೂ ಯೋಜನೆಗೆ ಟೆಂಡರ್ ಹಾಕುವವರ ಬಗ್ಗೆ ನಿಗಾ ವಹಿಸಬೇಕು ಎಂದು ಮೇಯರ್ ಹರಿನಾಥ್ ಅಭಿಪ್ರಾಯಿಸಿದರು.