ಐಆರ್ಎನ್ಎಸ್ಎಸ್-1ಜಿ ಉಪಗ್ರಹ ಯಶಸ್ವಿ ಉಡಾವಣೆ
ಇಸ್ರೋದಿಂದ ಮಹತ್ವದ ಸಾಧನೆ
ಭಾರತದ ಸ್ವಂತ ಜಿಪಿಎಸ್ ಕನಸು ನನಸು
ಶ್ರೀಹರಿಕೋಟಾ,ಎ.28: ಭಾರತವು ಗುರುವಾರ ತನ್ನ ಏಳನೆ ಮತ್ತು ಅಂತಿಮ ಪಥದರ್ಶಕ ಉಪಗ್ರಹ ಐಆರ್ಎನ್ಎಸ್ಎಸ್-1ಜಿ ಅನ್ನು ಇಲ್ಲಿಯ ಸತೀಶ್ ಧವನ್ ಉಡಾವಣಾ ಕೇಂದ್ರದಿಂದ ತನ್ನ ಹೆಮ್ಮೆಯ ಪಿಎಸ್ಎಲ್ವಿ ರಾಕೆಟ್ನ ಮೂಲಕ ಯಶಸ್ವಿಯಾಗಿ ಬಾಹ್ಯಾಕಾಶ ಕಕ್ಷೆಗೆ ಸೇರಿಸಿತು. ಇದರೊಂದಿಗೆ ಭಾರತವು ತನ್ನದೇ ಆದ ಪ್ರಾದೇಶಿಕ ಪಥದರ್ಶಕ ಉಪಗ್ರಹ ವ್ಯವಸ್ಥೆ(ಐಆರ್ಎನ್ಎಸ್ಎಸ್)ಯನ್ನು ಪೂರ್ಣಗೊಳಿಸಲು ಎಲ್ಲ ಏಳೂ ಉಪಗ್ರಹಗಳನ್ನು ಕಕ್ಷೆಗೆ ಸೇರಿಸುವಲ್ಲಿ ಯಶಸ್ಸು ಸಾಧಿಸಿದೆ.ಇದರೊಂದಿಗೆ ಸ್ವಂತ ಪಥ ನಿರ್ದೇಶಕ ವ್ಯವಸ್ಥೆಗಳನ್ನು ಹೊಂದಿರುವ ರಾಷ್ಟ್ರಗಳ ಗುಂಪಿಗೆ ಭಾರತವು ಸೇರಲು ಇನ್ನೊಂದೇ ಹೆಜ್ಜೆ ಬಾಕಿಯುಳಿದಿದೆ.
ಮಧ್ಯಾಹ್ನ ಸರಿಯಾಗಿ 12:50ಕ್ಕೆ ಕಿತ್ತಳೆ ಬಣ್ಣದ ಜ್ವಾಲೆಗಳನ್ನುಗುಳುತ್ತ ನಭಕ್ಕೇರಿದ 44.4 ಮೀ.ಎತ್ತರ ಮತ್ತು 320 ಟನ್ ತೂಕದ ಪಿಎಸ್ಎಲ್ವಿ ಉಡಾವಣಾ ಕೇಂದ್ರದಲ್ಲಿ ನೆರೆದಿದ್ದ ಇಸ್ರೋ ಅಧಿಕಾರಿಗಳ ಹರ್ಷದ ನಡುವೆಯೇ ಪ್ರತೀ ಸೆಕೆಂಡ್ಗೂ ವೇಗವನ್ನು ವರ್ಧಿಸಿಕೊಳ್ಳುತ್ತ ತನ್ನ ಗಮ್ಯದತ್ತ ಸಾಗಿದರೆ ಇತ್ತ ನಿಯಂತ್ರಣ ಕೇಂದ್ರದಲ್ಲಿ ತಮ್ಮ ಕಂಪ್ಯೂಟರ್ ಪರದೆಗಳಿಗೆ ಅಂಟಿಕೊಂಡಿದ್ದ ವಿಜ್ಞಾನಿಗಳು ಅದು ಭೂಮಿಯ ಗುರುತ್ವಾಕರ್ಷಣೆಯ ಸೆಳೆತದಿಂದ ಪಾರಾಗುವುದನ್ನೇ ಕಾಯುತ್ತಿದ್ದರು. 20 ನಿಮಿಷಗಳಾಗುತ್ತಿದಂತೆ ರಾಕೆಟ್ನಿಂದ ಉಪಗ್ರಹ ಬೇರ್ಪಟ್ಟಿತು. ತಕ್ಷಣ ಉಪಗ್ರಹದ ಸೌರ ರೆಕ್ಕೆಗಳನ್ನು ಕಾರ್ಯಾರಂಭಗೊಳಿಸಿದ್ದು, ಕರ್ನಾಟಕದ ಹಾಸನದಲ್ಲಿರುವ ನಿಯಂತ್ರಣ ಕೇಂದ್ರ(ಎಂಸಿಎಫ್)ವು ಉಪಗ್ರಹವನ್ನು ತನ್ನ ನಿಯಂತ್ರಣಕ್ಕೆ ತೆಗೆದುಕೊಂಡಿತು.
ಉಪಗ್ರಹದಲ್ಲಿರುವ ಮೋಟಾರ್ಗಳನ್ನು ಉರಿಸುವ ಮೂಲಕ ಎಂಸಿಎಫ್ ಅದನ್ನು ಇನ್ನೆರಡು ದಿನಗಳಲ್ಲಿ ನಿಗದಿತ ಕಕ್ಷೆಗೆ ಸೇರಿಸಲಿದೆ.
‘ಭಾರತೀಯ ಜಿಪಿಎಸ್’ ಎಂದು ಕರೆಯಬಹುದಾದ ಭಾರತೀಯ ಪ್ರಾದೇಶಿಕ ಪಥ ದರ್ಶಕ ಉಪಗ್ರಹ ವ್ಯವಸ್ಥೆಯು ಭೂಮಿ,ವಾಯು ಮತ್ತು ಸಮುದ್ರ ಪಥ ನಿರ್ದೇಶನ,ವಾಹನಗಳ ಗುರುತಿಸುವಿಕೆ,ಚಾರಣಿಗರು ಮತ್ತು ಪ್ರವಾಸಿಗಳಿಗೆ ಮಾರ್ಗದರ್ಶನ,ವಿಪತ್ತು ನಿರ್ವಹಣೆ,ಮೊಬೈಲ್ ಫೋನ್ಗಳೊಂದಿಗೆ ಸಮನ್ವಯತೆ, ನಕಾಶೆ ರೂಪಿಸುವಿಕೆ,ಹವಾಮಾನ ಮುನ್ಸೂಚನೆ,ನಾಗರಿಕ ಮತು ್ತಮಿಲಿಟರಿ ಚಟುವಟಿಕೆ ಇತ್ಯಾದಿಗಳಿಗೆ ನೆರವಾಗಲಿದೆ.
ಉಡಾವಣೆ ಯಶಸ್ವಿಯಾಗಿದೆ ಎಂದು ಇಸ್ರೋ ಅಧ್ಯಕ್ಷ ಎ.ಎಸ್.ಕಿರಣ್ಕುಮಾರ್ ಹರ್ಷ ವ್ಯಕ್ತಪಡಿಸಿದರು.
12 ವರ್ಷಗಳ ಜೀವಿತಾವಧಿಯನ್ನು ಹೊಂದಿರುವ ಉಪಗ್ರಹವು ನೇವಿಗೇಷನ್ ಮತ್ತು ರೇಂಜಿಂಗ್ ಹೀಗೆ ಎರಡು ಪೇ ಲೋಡ್ಗಳನ್ನು ಹೊಂದಿದೆ.
ಯುದ್ಧ ಅಥವಾ ಯುದ್ಧಸದೃಶ ಸಂದರ್ಭಗಳಲ್ಲಿ ಇಂತಹುದೇ ವ್ಯವಸ್ಥೆಗಳನ್ನು ಹೊಂದಿರುವ ರಾಷ್ಟ್ರಗಳು ನಿಖರವಾದ ಸ್ಥಿತಿಗತಿ ಮಾಹಿತಿಯನ್ನು ನೀಡಲು ನಿರಾಕರಿಸಬಹುದಾದ್ದರಿಂದ ಭಾರತದ ಸ್ವಂತ ಪಥ ನಿರ್ದೇಶಕ ವ್ಯವಸ್ಥೆ ನಿರ್ಣಾಯಕವಾಗಿದೆ.
ಐಆರ್ಎನ್ಎಸ್ಎಸ್ ದೇಶಾದ್ಯಂತ ಯಾವುದೇ ವಸ್ತುವಿನ ನಿಖರ ಇರುವಿಕೆ ಮಾಹಿತಿಯನ್ನು ತನ್ನ ಬಳಕೆದಾರರಿಗೆ ನೀಡಲಿದೆ. ಈಗಾಗಲೇ ತಮ್ಮ ನಿಗದಿತ ಕಕ್ಷೆಯನ್ನು ಸೇರಿರುವ ಸರಣಿಯ ಆರು ಉಪಗ್ರಹಗಳು 20 ಮೀ.ವ್ಯತ್ಯಾಸದಷ್ಟು ಮಾಹಿತಿಯನ್ನು ನಿಖರವಾಗಿ ನೀಡುತ್ತಿದ್ದು, ಏಳನೆ ಮತ್ತು ಅಂತಿಮ ಉಪಗ್ರಹ ತನ್ನ ನಿಗದಿತ ಕಕ್ಷೆಯನ್ನು ಸೇರಿಕೊಂಡು ವ್ಯವಸ್ಥೆಯು ಪೂರ್ಣಗೊಂಡ ನಂತರ ಈ ವ್ಯತ್ಯಾಸ ಕೇವಲ 10 ಮೀ.ಗಿಳಿಯಲಿದೆ.
ಉಪಗ್ರಹ ಉಡಾವಣೆಗಳು
ಐಆರ್ಎನ್ಎಸ್ಎಸ್-1ಎ - ಜುಲೈ 2013, ಐಆರ್ಎನ್ಎಸ್ಎಸ್-1ಬಿ - ಎಪ್ರಿಲ್,2014 ಐಆರ್ಎನ್ಎಸ್ಎಸ್-1ಸಿ - ಅಕ್ಟೋಬರ್,2014 ಐಆರ್ಎನ್ಎಸ್ಎಸ್-1ಡಿ - ಮಾರ್ಚ್ 2015 ಐಆರ್ಎನ್ಎಸ್ಎಸ್-1ಇ - ಜನವರಿ,2016 ಐಆರ್ಎನ್ಎಸ್ಎಸ್-1ಎಫ್ - ಮಾರ್ಚ್,2016 ಐಆರ್ಎನ್ಎಸ್ಎಸ್-1ಜಿ - ಎಪ್ರಿಲ್ 28,2016
***
ಮಧ್ಯಾಹ್ನ ಸರಿಯಾಗಿ 12:50ಕ್ಕೆ ಕಿತ್ತಳೆ ಬಣ್ಣದ ಜ್ವಾಲೆಗಳನ್ನುಗುಳುತ್ತ ನಭಕ್ಕೇರಿದ 44.4 ಮೀ.ಎತ್ತರ ಮತ್ತು 320 ಟನ್ ತೂಕದ ಪಿಎಸ್ಎಲ್ವಿ.
20 ನಿಮಿಷಗಳ ನಂತರ 488.9 ಕಿ.ಮೀ.ಎತ್ತರದಲ್ಲಿ ರಾಕೆಟ್ನಿಂದ ಬೇರ್ಪಟ್ಟ 1425 ಕೆ.ಜಿ.ತೂಕದ ಐಆರ್ಎನ್ಎಸ್ಎಸ್-1ಜಿ.
ಅಮೆರಿಕದ ಜಿಪಿಎಸ್, ರಷ್ಯದ ಗ್ಲೋನಾಸ್, ಯುರೋಪಿನ ಗೆಲಿಲಿಯೋ ಮತ್ತು ಚೀನಾದ ಬೀಡೊಕ್ಕೆ ಸರಿಸಮನಾಗಿ ಕಾರ್ಯ ನಿರ್ವಹಿಸಲಿರುವ ಸ್ವದೇಶಿ ಐಆರ್ಎನ್ಎಸ್ಎಸ್.
ಸರಣಿಯಲ್ಲಿನ ಏಳು ಉಪಗ್ರಹಗಳ ತಲಾ ವೆಚ್ಚ 150 ಕೋ.ರೂ., ಪಿಎಸ್ಎಲ್ವಿ-ಎಕ್ಸ್ಎಲ್ ಆವೃತ್ತಿಯ ವೆಚ್ಚ 130 ಕೋ.ರೂ., ಯೋಜನೆಯ ಒಟ್ಟು ವೆಚ್ಚ 1,420 ಕೋ.ರೂ. ವಿಶ್ವದ ಇತರ ವ್ಯವಸ್ಥೆಗಳು 20ಕ್ಕೂ ಅಧಿಕ ಉಪಗ್ರಹಗಳನ್ನು ಹೊಂದಿದ್ದರೆ ಭಾರತದ ಐಆರ್ಎನ್ಎಸ್ಎಸ್ ಕೇವಲ ಏಳು ಉಪಗ್ರಹಗಳನ್ನು ಹೊಂದುವ ಮೂಲಕ ವೈಶಿಷ್ಟವನ್ನು ಮೆರೆದಿದೆ.
