ಚೀನಾದ ಒತ್ತಡದಿಂದ ಭಾರತ ವೀಸಾ ನಿರಾಕರಿಸಿದೆ: ಜಿಂಘುವಾ

ಹೊಸದಿಲ್ಲಿ, ಎ.29: ಭಾರತವು ತನಗೆ ವೀಸಾ ನಿರಾಕರಿಸಿರುವ ಎರಡನೆ ರಾಷ್ಟ್ರವಾಗಿದೆ. ಈ ಹಿಂದೆ ಚೀನಾ ತನಗೆ ವೀಸಾ ನಿರಾಕರಿಸಿತ್ತು. ಸೋಮವಾರ ತಾನು ನ್ಯೂಯಾರ್ಕ್‌ನ ಜೆಎಫ್‌ಕೆ ವಿಮಾನ ನಿಲ್ದಾಣದಲ್ಲಿ ಹೊಸದಿಲ್ಲಿಯ ವಿಮಾನವನ್ನು ಏರುವುದರಲ್ಲಿದ್ದಾಗ ತನ್ನ ವೀಸಾವನ್ನು ರದ್ದುಗೊಳಿಸಲಾಗಿದೆಯೆಂದು ತನಗೆ ತಿಳಿಸಲಾಯಿತೆಂದು ಚೀನಾದ ಕಾರ್ಯಕರ್ತೆ ಲು ಜಿಂಘುವಾ ಆರೋಪಿಸಿದ್ದಾರೆ.

ಇದಕ್ಕೆ ಭಾರತದ ಮೇಲೆ ಚೀನಾ ಸರಕಾರದ ಒತ್ತಡವೇ ಕಾರಣವೆಂದು ತಾನು ಶೇ.100ರಷ್ಟು ನಂಬಿದ್ದೇನೆ. ಬದಲಿಗೆ ಚೀನಾವು ಭಾರತಕ್ಕೆ ಆರ್ಥಿಕ ವ್ಯವಹಾರದ ಕೊಡುಗೆಯನ್ನು ನೀಡಿದೆಯೆಂಬುದು ತನ್ನ ಶಂಕೆಯಾಗಿದೆ. 7 ಮಂದಿ ಕಾರ್ಯಕರ್ತರಿಗೆ ವೀಸಾ ನಿರಾಕರಣೆಯೆಂದರೆ ಭಾರತ-ಚೀನಾ ಸಂಬಂಧದಲ್ಲಿ ಬದಲಾವಣೆಯಾಗಿದೆಯೆಂದೇ ಅರ್ಥವೆಂದು 55ರ ಹರೆಯದ ಜಿಂಘುವಾ ಎನ್‌ಡಿಟಿವಿಗೆ ತಿಳಿಸಿದ್ದಾರೆ.

ತಿಯನಾನ್ಮೆನ್ ಚೌಕ ವಿದ್ಯಾರ್ಥಿ ಪ್ರತಿಭಟನೆಯ ಓರ್ವ ನಾಯಕಿಯಾಗಿರುವ ಅವರಲ್ಲಿ ಅಮೆರಿಕದ ಪಾಸ್‌ಪೋರ್ಟ್ ಇದೆ. ತನಗೆ ಯಾವುದೇ ದೇಶವು ಈವರೆಗೆ ವೀಸಾ ನಿರಾಕರಿಸಿಲ್ಲವೆಂದು ಜಿಂಘುವಾ ಹೇಳಿದ್ದಾರೆ.

ತನ್ನ ವೀಸಾವನ್ನು ರದ್ದುಪಡಿಸಲಾಗಿದೆಯೆಂದು ವಿಮಾನ ನಿಲ್ದಾಣದಲ್ಲಿ ಏರ್ ಇಂಡಿಯ ತನಗೆ ಮಾಹಿತಿ ನೀಡಿತೆಂದು ಅವರು ತಿಳಿಸಿದ್ದಾರೆ.

ಜಿಂಘುವಾರ ದಾಖಲೆಗಳು ಓದಲಾಗದಂತಿದ್ದವು. ಅವರು ಭಾರತ ಭೇಟಿಗೆ ನೀಡಿದ್ದ ಕಾರಣವು ಸಂಗತವಾಗಿಲ್ಲವೆಂಬುದು ತಿಳಿದು ಬಂದಿತು. ಆದುದರಿಂದ ಅವರಿಗೆ ವೀಸಾ ನೀಡಿಯೇ ಇರಲಿಲ್ಲವೆಂದು ಸರಕಾರಿ ಮೂಲಗಳು ನಿನ್ನೆ ಹೇಳಿದ್ದವು.

ಅರ್ಜಿಯು ತಪ್ಪಾಗಿತ್ತೆಂಬುದು ಸುಳ್ಳು. ತಾನು ಎಲ್ಲ ನಿರ್ದೇಶನಗಳನ್ನು ಪಾಲಿಸಿದ್ದೆ. ತನಗೆ ಯಾವುದೇ ಕಾರಣ ನೀಡಲಾಗಿಲ್ಲವೆಂದು ಜಿಂಘುವಾ ಪ್ರತಿಕ್ರಿಯಿಸಿದ್ದಾರೆ.

ತಾನು ಭಾರತೀಯ ಕಾನ್ಸುಲೇಟ್ ಹಾಗೂ ವೀಸಾ ಕಚೇರಿಗಳನ್ನು ಸಂಪರ್ಕಿಸಲು ಪ್ರಯತ್ನಿಸಿದ್ದೆ. ಅದಕ್ಕವು ಪ್ರತಿಕ್ರಿಯಿಸಿಲ್ಲ. ವೀಸಾ ಅರ್ಜಿಯಲ್ಲಿ ಕೊಟ್ಟಿದ್ದ ದೂರವಾಣಿ ಸಂಖ್ಯೆಗಳು ವಾಯ್ಸೆಮೇಲ್ ಹೋದವೆಂದು ಅವರು ಹೇಳಿದ್ದಾರೆ. ಭಾರತ ಇತರ ಇಬ್ಬರು ಕಾರ್ಯಕರ್ತರಿಗೂ ವೀಸಾ ನಿರಾಕರಿಸಿದೆ. ಜಿಂಘವಾರಂತೆಯೇ ಅವರು ಸಹ ಧರ್ಮಶಾಲಾದಲ್ಲಿ ಈ ವಾರಾಂತ್ಯದಲ್ಲಿ ನಡೆಯಲಿರುವ ಅಂತರ್ಮತೀಯ ಸಮ್ಮೇಳನವೊಂದರಲ್ಲಿ ಭಾಗವಹಿಸುವವರಿದ್ದರು.

ಚೀನಾವು ಭಯೋತ್ಪಾದಕನೆಂದು ಬ್ರಾಂಡ್ ಮಾಡಿರುವ ದೇಶಭ್ರಷ್ಟ ಉಯಿಗುರ್ ಬಂಡುಕೋರ ಡೋಲ್ಕುನ್ ಇಸಾ ಹಾಗೂ ಹಾಂಕಾಂಗ್ ಮೂಲದ ರೇವೋಂಗ್ ಇತರ ಇಬ್ಬರು ಕಾರ್ಯಕರ್ತರಾಗಿದ್ದಾರೆ.

ಭಾರತವು ಮುಕ್ತ ದೇಶವೆಂದು ಭಾವಿಸಿದ್ದೆ. ಬೇರೆ ಯಾವ ದೇಶದಲ್ಲೂ ತನಗೆ ಇಂತಹ ಸಮಸ್ಯೆಯಾಗಿಲ್ಲ. ತಾವು ಕೇವಲ ದಲಾಯಿ ಲಾಮಾರನ್ನು ಭೇಟಿಯಾಗಿ, ಗೌರವ ಸಲ್ಲಿಸಬಯಸಿದ್ದೆ. ಚೀನಾವು ಭಾರತದ ಮೇಲೆ ಒತ್ತದ ಹೇರಿದೆ. ಟಿಬೆಟ್‌ನ ನೂತನ ದೇಶಭ್ರಷ್ಟ ಪ್ರಧಾನಿ ಲೊಬ್ಸಂಗ್ ಸಂಗಾಯಿಯವರ ಹೆಚ್ಚುತ್ತಿರುವ ಶಕ್ತಿಯ ಬಗ್ಗೆ ಅದು ಹೆದರುತ್ತಿದೆಯೆಂದು ಜಿಂಘುವಾ ಆರೋಪಿಸಿದ್ದಾರೆ.