ಕರ್ನಾಟಕದ ವನಿತೆಯರಿಂದ ಗಿನ್ನೀಸ್ ದಾಖಲೆ: ತಂಡದಲ್ಲಿ ಬಂಟ್ವಾಳದ ತಾಯಿ, ಮಗಳು

ಬಂಟ್ವಾಳ, ಮೇ 7: ಜಗತ್ತಿನಲ್ಲೇ ಅತಿ ದೊಡ್ಡ ಕ್ರೋಶೆ ಹೊದಿಕೆಯನ್ನು ನಿರ್ಮಿಸುವುದರ ಮೂಲಕ ಕರ್ನಾಟಕ ರಾಜ್ಯದ ’ಮದರ್ ಇಂಡಿಯಾ ಕ್ರೋಶೆ ಕ್ವೀನ್ಸ್’ (ಎಂಐಸಿಕ್ಯು) ತಂಡ ಗಿನ್ನೀಸ್ ದಾಖಲೆಯನ್ನು ನಿರ್ಮಿಸಿದೆ.

ಈ ತಂಡದಲ್ಲಿ ಬಂಟ್ವಾಳ ತಾಲೂಕಿನ ತಾಯಿ ಮಗಳು ಸೇರಿದ್ದು ಬಂಟ್ವಾಳಕ್ಕೆ ಕೀರ್ತಿಯನ್ನು ತಂದಿದ್ದಾರೆ.

ಬಂಟ್ವಾಳ ತ್ಯಾಗರಾಜ ರಸ್ತೆಯ ನಿವಾಸಿ ರಾಮಪ್ರಸಾದ್ ಪ್ರಭು ಎಂಬವರ ಪತ್ನಿ ಅನುರಾಧ ಆರ್. ಪ್ರಭು ಹಾಗೂ ಅವರ ಪುತ್ರಿ ಅನುಷ ಆರ್. ಪ್ರಭು ಗಿನ್ನೀಸ್ ದಾಖಲೆಗೆ ಸೇರಿದ ಹೊದಿಕೆ ತಯಾರಿಯ ತಂಡದಲ್ಲಿದ್ದ ಬಂಟ್ವಾಳದ ತಾಯಿ ಮಗಳು.

ಗಿನ್ನೀಸ್ ದಾಖಲೆಗೆಂದೇ ಚೆನ್ನೈನ ತೊರೈಪಕ್ಕಂ ಎಮ್‌ಎನ್‌ಎಮ್ ಎಂಜಿನಿಯರಿಂಗ್ ಕಾಲೇಜಿನಲ್ಲಿ ಜನವರಿ 31ರಂದು ನಡೆದ ಈ ಸ್ಪರ್ದೆಯಲ್ಲಿ ಜಗತ್ತಿನ 14 ದೇಶಗಳ 2,500 ಕ್ಕೂ ಹೆಚ್ಚು ಮಂದಿ ಮಹಿಳೆಯರು ಭಾಗವಹಿಸಿದ್ದರು. ಕ್ರೋಶೆ ಹೊದಿಕೆ ತಯಾರಿಕೆಯಲ್ಲಿ ಭಾಗವಹಿಸಿದ ಕರ್ನಾಟಕ ಮೂಲದ ’ಮದರ್ ಇಂಡಿಯಾ ಕ್ರೋಶೆ ಕ್ವೀನ್ಸ್’ ತಂಡದ ಮಹಿಳೆಯರು ಫೇಸ್‌ಬುಕ್ ಮೂಲಕ ತಂಡ ರಚಿಸಿದ್ದರು. ಈ ತಂಡದಲ್ಲಿ ಬಂಟ್ವಾಳದ ಅನುರಾಧ ಆರ್. ಪ್ರಭು, ಇವರ ಪುತ್ರಿ ಅನುಷ ಆರ್. ಪ್ರಭು ಹಾಗೆಯೇ ಮಂಗಳೂರಿನ ಅಶ್ವಿನಿ, ಪುತ್ತೂರಿನ ದುರ್ಗಾದೇವಿ ಎಂಬವರು ಕೂಡಾ ಹೆಸರು ನೋಂದಾಯಿಸಿದ್ದರು. ಈ ತಂಡ 11,148 ಚದರ ಮೀಟರ್‌ನಷ್ಟು ವಿಸ್ತೀರ್ಣದ ಬೃಹತ್ ಕ್ರೋಶೆ ಹೊದಿಕೆಯನ್ನು ನಿರ್ಮಿಸುವ ಮೂಲಕ ಗಿನ್ನೀಸ್ ದಾಖಲೆ ಬರೆದಿದೆ. ಈ ಹಿಂದೆ ದಕ್ಷಿಣ ಆಫ್ರಿಕಾದ ಗ್ರೂಪ್ 3,348 ಚದರ ಮೀಟರ್ ವಿಸ್ತೀರ್ಣದ ಕ್ರೋಶೆ ಹೊದಿಕೆಯನ್ನು ನಿರ್ಮಿಸಿ ದಾಖಲೆ ಮಾಡಿತ್ತು. ಈ ದಾಖಲೆಯನ್ನು ಮದರ್ ಇಂಡಿಯಾ ಕ್ರೋಶೆ ಕ್ವೀನ್ಸ್ ತಂಡ ಮುರಿದು ಹಾಕಿದೆ.

ಸಂತಸ ತಂದಿದೆ:

’ಮದರ್ ಇಂಡಿಯಾ ಕ್ರೋಶೆ ಕ್ವೀನ್ಸ್ ತಂಡದಲ್ಲಿ ಕರ್ನಾಟಕ ರಾಜ್ಯದ ಸುಮಾರು 200ಕ್ಕೂ ಹೆಚ್ಚು ಮಂದಿ ಮಹಿಳೆಯರಿದ್ದು ನಮ್ಮ ತಂಡ ಕ್ರೋಶೆ ಹೊದಿಕೆ ತಯಾರಿಕೆಯಲ್ಲಿ ಗಿನ್ನೀಸ್ ದಾಖಲೆ ಪಡೆದಿರುವುದು ಸಂತಸ ತಂದಿದೆ ಎಂದು ಗ್ರೂಪ್‌ನ ಸದಸ್ಯೆ ಅನುರಾಧ ಆರ್. ಪ್ರಭು ಪ್ರತಿಕ್ರಿಯಿಸಿದ್ದಾರೆ.

ಗಿನ್ನೀಸ್ ದಾಖಲೆ ಬರೆದ ಹೊದಿಕೆಯನ್ನು ನಿರ್ಮಿಸಲು ನಮ್ಮ ತಂಡಕ್ಕೆ ಆರು ತಿಂಗಳ ಕಾಲ ತಗಲಿದೆ. ಇದಕ್ಕೆ ಹಲವಾರು ಮಂದಿ ಸಹಕಾರವನ್ನು ನೀಡಿದ್ದಾರೆ. ಅವರಿಗೆಲ್ಲರಿಗೂ ನಮ್ಮ ಗ್ರೂಪ್‌ನ ಕೃತಜ್ಞತೆಗಳು. ದಾಖಲೆ ನಿರ್ಮಿಸಿದ ಕುರಿತಾಗಿ ಪ್ರಮಾಣ ಪತ್ರ ಇತ್ತೀಚೆಗಷ್ಟೇ ನಮ್ಮ ಕೈ ಸೇರಿದೆ. ಇದರಿಂದ ನಾವು ಇನ್ನಷ್ಟು ಸಂತೋಷಗೊಂಡಿದ್ದೇವೆ ಎಂದು ಅವರು ತಿಳಿಸಿದ್ದಾರೆ.