ಇಂದು ಮುಂಬೈ-ಹೈದರಾಬಾದ್ ಮುಖಾಮುಖಿ

ವಿಶಾಖಪಟ್ಟಣ, ಮೇ 7: ಒಂದು ವಾರಗಳ ವಿಶ್ರಾಂತಿ ನಂತರ ಮೈಕೊಡವಿಕೊಂಡಿರುವ ಮುಂಬೈ ಇಂಡಿಯನ್ಸ್ ತಂಡ ರವಿವಾರ ಇಲ್ಲಿ ನಡೆಯಲಿರುವ ಐಪಿಎಲ್ ಪಂದ್ಯದಲ್ಲಿ ಸತತ ಗೆಲುವಿನ ಅಲೆಯಲ್ಲಿ ತೇಲುತ್ತಿರುವ ಸನ್‌ರೈಸರ್ಸ್ ಹೈದರಾಬಾದ್ ತಂಡವನ್ನು ಎದುರಿಸಲಿದೆ.

ಪಂಜಾಬ್, ಕೋಲ್ಕತಾ ಹಾಗೂ ಪುಣೆ ವಿರುದ್ಧ ಸತತ 3 ಗೆಲುವಿನ ನಂತರ ವಾರಗಳ ಕಾಲ ವಿಶ್ರಾಂತಿ ಪಡೆದಿದ್ದ ಮುಂಬೈ ತಂಡ ಸನ್‌ರೈಸರ್ಸ್ ತಂಡವನ್ನು ಎದುರಿಸಲು ಸಜ್ಜಾಗಿದೆ. ಸನ್‌ರೈಸರ್ಸ್ ಶುಕ್ರವಾರವಷ್ಟೇ ತವರು ನೆಲದಲ್ಲಿ ಗುಜರಾತ್ ಲಯನ್ಸ್ ತಂಡವನ್ನು 5 ವಿಕೆಟ್‌ಗಳ ಅಂತರದಿಂದ ಮಣಿಸಿತ್ತು.

ಹೈದರಾಬಾದ್ ಹಾಗೂ ಮುಂಬೈ ತಂಡಗಳು ಅಂಕಪಟ್ಟಿಯಲ್ಲಿ ತಲಾ 10 ಅಂಕ ಗಳಿಸಿವೆ. ಉಭಯ ತಂಡಗಳು ಕ್ರಮವಾಗಿ 8 ಹಾಗೂ 9 ಪಂದ್ಯಗಳನ್ನು ಆಡಿದ್ದು, ತಲಾ 5 ಪಂದ್ಯಗಳಲ್ಲಿ ಜಯ ಸಾಧಿಸಿವೆ. ಎ.18 ರಂದು ಎರಡೂ ತಂಡಗಳು ಕೊನೆಯ ಬಾರಿ ಮುಖಾಮುಖಿಯಾಗಿದ್ದು, ಆ ಪಂದ್ಯದಲ್ಲಿ ಸನ್‌ರೈಸರ್ಸ್ ತಂಡ ಮುಂಬೈ ವಿರುದ್ಧ 15 ಎಸೆತಗಳು ಬಾಕಿ ಇರುವಾಗಲೇ 7 ವಿಕೆಟ್‌ಗಳ ಅಂತರದಿಂದ ಜಯ ಸಾಧಿಸಿತ್ತು. ಮುಂಬೈ ಕಳೆದ ಪಂದ್ಯದ ಸೋಲಿಗೆ ಸೇಡು ತೀರಿಸಿಕೊಳ್ಳಲು ಎದುರು ನೋಡುತ್ತಿದೆ.

ಮುಂಬೈ ಹಾಗೂ ಹೈದರಾಬಾದ್ ತಂಡಗಳ ನಾಯಕರಾದ ರೋಹಿತ್ ಶರ್ಮ ಹಾಗೂ ಡೇವಿಡ್ ವಾರ್ನರ್ ತಂಡದ ರನ್ ಮಿಶನ್‌ಗಳಾಗಿದ್ದು, ಈ ಇಬ್ಬರು ಟೂರ್ನಿಯಲ್ಲಿ ಈ ತನಕ ಕ್ರಮವಾಗಿ ಒಟ್ಟು 383 ರನ್ ಹಾಗೂ 410 ರನ್ ಗಳಿಸಿದ್ದಾರೆ.

ಮುಂಬೈ ತಂಡದಲ್ಲಿ ನಾಯಕ ರೋಹಿತ್ ವಿಫಲರಾದರೆ, ಅಂಬಟಿ ರಾಯುಡು ಹಾಗೂ ಪಾರ್ಥಿವ್ ಪಟೇಲ್ ಆಡುತ್ತಾರೆ. ಹೈದರಾಬಾದ್ ತಂಡಕ್ಕೆ ಶಿಖರ ಧವನ್ ಜವಾಬ್ದಾರಿಯಿಂದ ಆಡುತ್ತಿದ್ದಾರೆ. ಆಸ್ಟ್ರೇಲಿಯದ ಆಲ್‌ರೌಂಡರ್ ಎಂ. ಹೆನ್ರಿಕ್ಸ್ ಹೈದರಾಬಾದ್‌ಗೆ ನಿರ್ಣಾಯಕ ಕೊಡುಗೆ ನೀಡುತ್ತಾ ಬಂದಿದ್ದಾರೆ.

ಮುಂಬೈ ಬೌಲಿಂಗ್ ವಿಭಾಗದಲ್ಲಿ ಮಿಚೆಲ್ ಮೆಕ್ಲಿನಘನ್ ಒಟ್ಟು 13 ವಿಕೆಟ್ ಪಡೆದಿದ್ದಾರೆ. ಹೈದರಾಬಾದ್ ಪರ ಭುವನೇಶ್ವರ್ ಕುಮಾರ್ 12 ವಿಕೆಟ್‌ಗಳನ್ನು ಉಡಾಯಿಸಿದ್ದಾರೆ. ಬಾಂಗ್ಲಾದೇಶದ ಮುಸ್ತಫಿಝುರ್ರಹ್ಮಾನ್(10 ವಿಕೆಟ್) ಹೈದರಾಬಾದ್‌ನ ಅಸ್ತ್ರವಾಗಿದ್ದಾರೆ.

ಸ್ಪಿನ್ ವಿಭಾಗದಲ್ಲಿ ಹೈದರಾಬಾದ್‌ಗಿಂತ ಮುಂಬೈ ಸ್ಪಿನ್ನರ್‌ಗಳ ಸಾಧನೆ ಗಮನಾರ್ಹವಾಗಿದೆ.

ಪಂದ್ಯದ ಸಮಯ: ಸಂಜೆ 4:00