ಅಬ್ಬಕ್ಕನ ಜೀವನಚರಿತ್ರೆ ಪಠ್ಯರೂಪದಲ್ಲಿ ಹೊರಬರಲಿ :ಅಬ್ಬಕ್ಕ ಉತ್ಸವ ಸಮಾರೋಪ ಸಮಾರಂಭದಲ್ಲಿ ನಳಿನ್ ಅಭಿಮತ

ಉಳ್ಳಾಲ: ಅರ್ಹ ಮಹಿಳಾ ಸಾಧಕರನ್ನು ಪುರಸ್ಕರಿಸುವ ಮೂಲಕ ಅಬ್ಬಕ್ಕ ಉತ್ಸವದ ಘನತೆ ಹೆಚ್ಚಿದೆ. ಅಬ್ಬಕ್ಕ ರಾಣಿಯ ಜೀವನ ಚರಿತ್ರೆ ಮುಂದಿನ ದಿನಗಳಲ್ಲಿ ಶಾಲೆಯಲ್ಲಿ ಪಠ್ಯವಾಗಿ ಮೂಡಿಬಂದರೆ ಯುವಪೀಳಿಗೆಗೆ ಅಬ್ಬಕ್ಕ ಚರಿತ್ರೆ ತಿಳಿಸಲು ಸಾಧ್ಯ ಎಂದು ಲೋಕಸಭಾ ಸದಸ್ಯ ನಳಿನ್ ಕುಮಾರ್ ಕಟೀಲ್ ಅಭಿಪ್ರಾಯಪಟ್ಟರು.

ಕರ್ನಾಟಕ ಸರ್ಕಾರದ ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ ವತಿಯಿಂದ ವೀರರಾಣಿ ಅಬ್ಬಕ್ಕ ಉತ್ಸವ ಸಮಿತಿ ಸಹಕಾರದಲ್ಲಿ ತೊಕ್ಕೊಟ್ಟು ಖಾಸಗಿ ಸಭಾಂಗಣದಲ್ಲಿ ಎರಡು ದಿನ ನಡೆದ ವೀರರಾಣಿ ಅಬ್ಬಕ್ಕ ಉತ್ಸವ-2016ದ ಸಮಾರೋಪ ಸಮಾರಂಭದಲ್ಲಿ ಅವರು ಮಾತನಾಡಿದರು.

  ಅಬ್ಬಕ್ಕ ಉತ್ಸವ ನಾಡ ಉತ್ಸವವನ್ನಾಗಿಸುವ ನಿಟ್ಟಿನಲ್ಲಿ ಪ್ರಯತ್ನ ಮುಂದುವರಿದಿದ್ದು, ಸರ್ಕಾರದ ಸಹಕಾರವೂ ಸಿಕ್ಕಿದೆ. ಆದರೆ ಜನರ ಸಹಕಾರದ ಕೊರತೆಯಿದ್ದು ಅವರನ್ನು ಆಕರ್ಷಿಸುವ ಕೆಲಸ ಆಗಬೇಕು ಎಂದು ಹೇಳಿದರು. ಮಕ್ಕಳ ಹಕ್ಕುಗಳ ಸಂರಕ್ಷಣಾ ಅಯೋಗದ ಅಧ್ಯಕ್ಷೆ ಕೃಪಾ ಆಳ್ವ ಮಾತನಾಡಿ, ನಮ್ಮಲ್ಲಿನ ಸ್ವಾರ್ಥದಿಂದ ಮನುಷ್ಯತ್ವ ಕುಂಠಿತವಾಗುತ್ತಿದೆ, ಮಹಿಳೆಯರ ಮೇಲೆ ಮಾತ್ರವಲ್ಲದೆ, ಎರಡು, ಆರು ವರ್ಷದ ಬಾಲಕಿಯರ ಮೇಲೆಯೂ ಅತ್ಯಾಚಾರ ನಡೆಯುತ್ತಿದೆ. ಈ ಬಗ್ಗೆ ಧ್ವನಿ ಎತ್ತುವುದು ನಮ್ಮ ಕೆಲಸ ಅಲ್ಲ ಎನ್ನುವ ಭಾವನೆ ನಮ್ಮಲ್ಲಿದೆ. ಈ ಭಾವನೆ ನಮ್ಮ ಮನದಿಂದ ದೂರವಾಗಬೇಕು. ಮಕ್ಕಳ ಮನದಲ್ಲಿ ಪ್ರೀತಿ ಬೆಳೆಸಿ ಹೆತ್ತವರನ್ನು ವೃದ್ಧಾಶ್ರಮಕ್ಕೆ ಸೇರಿಸುವುದನ್ನು ತಪ್ಪಿಸಿ ಎಂದು ಹೇಳಿದರು.

 ಸಮಾರಂಭದಲ್ಲಿ ಆರೋಗ್ಯ ಸಚಿವ ಯು.ಟಿ.ಖಾದರ್ ಅಧ್ಯಕ್ಷತೆ ವಹಿಸಿದ್ದರು. ವಿಧಾನಪರಿಷತ್ ಸದಸ್ಯ ಕ್ಯಾ.ಗಣೇಶ್ ಕಾರ್ಣಿಕ್, ಜಿಲ್ಲಾ ಪಂಚಾಯಿತಿ ಅಧ್ಯಕ್ಷೆ ಮೀನಾಕ್ಷಿ ಶಾಂತಿಗೂಡು, ಉಪಾಧ್ಯಕ್ಷೆ ಕಸ್ತೂರಿ ಪಂಜ, ಮೂಡಾ ಅಧ್ಯಕ್ಷ ಇಬ್ರಾಹಿಂ ಕೋಡಿಜಾಲ್, ಬ್ಯಾರಿ ಸಾಹಿತ್ಯ ಅಕಾಡೆಮಿ ಅಧ್ಯಕ್ಷ ಬಿ.ಎ.ಮಹಮ್ಮದ್ ಹನೀಫ್, ತುಳು ಸಾಹಿತ್ಯ ಅಕಾಡೆಮಿ ಅಧ್ಯಕ್ಷೆ ಜಾನಕಿ ಬ್ರಹ್ಮಾವರ, ರಾಜ್ಯ ಕನ್ನಡ ಸಾಹಿತ್ಯ ಪರಿಷತ್ ಮಾಜಿ ಅಧ್ಯಕ್ಷ ಹರಿಕೃಷ್ಣ ಪುನರೂರು, ನಗರಸಭೆ ಸದಸ್ಯರಾದ ಫಾರೂಕ್ ಯು.ಎಚ್, ಮಹಮ್ಮದ್ ಮುಕಚ್ಚೇರಿ, ಉಳ್ಳಾಲ ಚೀರುಂಭ ಭಗವತೀ ಕ್ಷೇತ್ರದ ಅಧ್ಯಕ್ಷ ಗಂಗಾಧರ್ ಉಳ್ಳಾಲ್, ಬಿಜೆಪಿ ಕ್ಷೇತ್ರಾಧ್ಯಕ್ಷ ಚಂದ್ರಶೇಖರ್ ಉಚ್ಚಿಲ್, ಸಿಪಿಐಎಂ ಕ್ಷೇತ್ರ ಕಾರ್ಯದರ್ಶಿ ಕೃಷ್ಣಪ್ಪ ಸಾಲ್ಯಾನ್, ಅಂಗನವಾಡಿ ಮೇಲ್ವಿಚಾರಕಿ ಗಟ್ರೂಡ್ ವೇಗಸ್, ಮೊಗವೀರ ಸಮಾಜದ ಮಾಜಿ ಅಧ್ಯಕ್ಷ ಸದಾನಂದ ಬಂಗೇರ ಮೊದಲಾದವರು ಉಪಸ್ಥಿತರಿದ್ದರು.

ಹಿರಿಯ ಲೇಖಕಿ ಬಿ.ಎಂ.ರೋಹಿಣಿ ಅವರಿಗೆ ‘ವೀರರಾಣಿ ಅಬ್ಬಕ್ಕ ಪ್ರಶಸ್ತಿ’, ಕನ್ನಡ ಚಿತ್ರನಟಿ ಹರಿಣಿ ಹಾಗೂ ಅಂತಾರಾಷ್ಟ್ರೀಯ ಕ್ರೀಡಾಪಟು ಲಲಿತಾ ಜಯರಾಂ ಅವರಿಗೆ ‘ರಾಣಿ ಅಬ್ಬಕ್ಕ ಪುರಸ್ಕಾರ’ ಪ್ರದಾನ ಮಾಡಲಾಯಿತು. ಅಬ್ಬಕ್ಕ ಉತ್ಸವ ಸಮಿತಿ ಅಧ್ಯಕ್ಷ ದಿನಕರ್ ಉಳ್ಳಾಲ್ ಸ್ವಾಗತಿಸಿದರು. ಸ್ವಾಗತಾಧ್ಯಕ್ಷ ಕೆ.ಜಯರಾಮ ಶೆಟ್ಟಿ ಪ್ರಾಸ್ತಾವಿಕವಾಗಿ ಮಾತನಾಡಿದರು. ಸಮಾಜಸೇವಕಿ ಸುವಾಸಿನಿ ಬಬ್ಬುಕಟ್ಟೆ, ದೇವಕಿ ಉಳ್ಳಾಲ್ ಹಾಗೂ ನಮಿತಾ ಶ್ಯಾಂ ಪುರಸ್ಕಾರ ಪತ್ರ ಓದಿದರು. ಜಿ.ಪಂ.ಸದಸ್ಯೆ ಧನಲಕ್ಷ್ಮಿ ಹಾಗೂ ಭಾಸ್ಕರ ರೈ ಕುಕ್ಕುವಳ್ಳಿ ಕಾರ್ಯಕ್ರಮ ನಿರೂಪಿಸಿದರು.

 ಉತ್ಸವಕ್ಕೆ ಜನರಿಂದ ನೀರಸ ಪ್ರತಿಕ್ರಿಯೆ ತೊಕ್ಕೊಟ್ಟು ಸಮೀಪದ ಕಲ್ಲಾಪು ಬಳಿಯ ಖಾಸಗಿ ಸಭಾಂಗಣ ನಾಲ್ಕು ತಿಂಗಳ ಹಿಂದೆಯೇ ಕಾರ್ಯಕ್ರಮಕ್ಕೆಂದು ಗುರುತಿಸಲಾಗಿತ್ತು. ಆದರೆ ಈ ಸಭಾಂಗಣದಲ್ಲಿ ಪ್ರತಿಧ್ವನಿ ಹೊಡೆಯುವ ಕಾರಣ ಕಾರ್ಯಕ್ರಮ ನಡೆಸುವುದು ಕಷ್ಟ ಎಂದು ಎರಡು ದಿನಗಳ ಹಿಂದೆಯಷ್ಟೇ ಅಬ್ಬಕ್ಕ ಉತ್ಸವ ಸಮಿತಿಯ ಸಂಘಟಕರು ತಿಳಿದುಕೊಂಡಿದ್ದರು. ಈ ನಿಟ್ಟಿನಲ್ಲಿ ಸಭಾಂಗಣದ ಮೇಲ್ಭಾಗದಲ್ಲಿ ವಸ್ತುಗಳನ್ನು ದಾಸ್ತಾನು ಇಡುವ ಜಾಗದಲ್ಲಿ ಉತ್ಸವ ನಡೆಸಲು ಸಭಾಂಗಣದವರು ಒಪ್ಪಿದರು. ನೆಲಕ್ಕೆ ಕಾರ್ಪೆಟ್, ಸಭಾಂಗಣ, ವಿದ್ಯುತ್ ದೀಪ ಎಲ್ಲಾ ವ್ಯವಸ್ಥೆ ಸರ್ಕಾರದ ಹಣದಲ್ಲೇ ಮಾಡಲಾಗಿದ್ದು, ಹೊರಾಂಗಣದಲ್ಲಿ ಆಗುತ್ತಿದ್ದಷ್ಟೇ ಖರ್ಚು ಮಾಡಲಾಗಿದೆ. ಉಳ್ಳಾಲ ಪರಿಸರದಲ್ಲಿ ಕೆಲವೊಂದು ಘಟನೆಗಳಿಂದ ಸೆಕ್ಷನ್ ಮುಗಿದ ಪ್ರಥಮ ಕಾರ್ಯಕ್ರಮ ಇದಾಗಿದೆ, ಈ ನಿಟ್ಟಿನಲ್ಲಿ ಹೆಚ್ಚಿನ ಜನರು ಭಯದಿಂದ ಕಾರ್ಯಕ್ರಮದಲ್ಲಿ ಭಾಗವಹಿಸಿಲ್ಲ. ಈ ಬಗ್ಗೆ ಅತಿಥಿಗಳು ತಪ್ಪು ತಿಳಿಯಬಾರದು ಎಂದು ಉತ್ಸವ ಸಮಿತಿ ಕಾರ್ಯಾಧ್ಯಕ್ಷ ದಿನಕರ್ ಉಳ್ಳಾಲ್ ಸ್ವಾಗತ ಭಾಷಣದಲ್ಲಿ ಸಮರ್ಥಿಸಿದರು. ಒಟ್ಟಿನಲ್ಲಿ ಎರಡು ದಿನಗಳ ಕಾರ್ಯಕ್ರಮವು ಜನರ ಪಾಲ್ಗೊಳ್ಳುವಿಕೆಯ ಉತ್ಸಾಹ ಕಡಿಮೆ ಇದ್ದುದರಿಂದ ಈ ಬಾರಿಯ ಅಬ್ಬಕ್ಕ ಉತ್ಸವಕ್ಕೆ ನೀರಸ ಪ್ರತಿಕ್ರಿಯೆ ವ್ಯಕ್ತವಾಗಿದೆ.

ಅಬ್ಬಕ್ಕ ಮ್ಯೂಸಿಯಂಗೆ ಪ್ರಶಸ್ತಿ ಹಣ

ಚಿತ್ರನಟಿ ಹರಿಣಿಯವರು ತಮಗೆ ಪುರಸ್ಕಾರ ರೂಪದಲ್ಲಿ ನೀಡಲಾದ 20 ಸಾವಿರ ರೂಪಾಯಿ ಹಣವನ್ನು ಬಿ.ಸಿ.ರೋಡಿನಲ್ಲಿ ತುಕಾರಾಮ ಎಂಬವರು ನಿರ್ಮಿಸಿರುವ ಅಬ್ಬಕ್ಕ ಹಾಗೂ ತುಳು ಸಂಶೋಧನೆಗೆ ಸಂಬಂಧಪಟ್ಟ ಸಂಗ್ರಹಾಲಯಕ್ಕೆ ದೇಣಿಗೆಯಾಗಿ ನೀಡಿ ಸಾರ್ಥಕತೆ ಮೆರೆದರು.

‘ಇಷ್ಟು ವರ್ಷದಿಂದ ಅಬ್ಬಕ್ಕ ಉತ್ಸವ ಅದ್ಧೂರಿಯಾಗಿ ನಡೆಸುತ್ತಾ ಬಂದಿದ್ದರೂ ಅದರ ಪರಿಣಾಮ ಉಳ್ಳಾಲದಲ್ಲಿ ಬೀರಿಲ್ಲ, ಇಲ್ಲಿ ಇತ್ತೀಚಿನ ದಿನಗಳಲ್ಲಿ ವಾತಾವರಣ ಕಲುಶಿತಗೊಂಡಿದೆ, ಅಬ್ಬಕ್ಕ ಪೋರ್ಚುಗೀಸರ ವಿರುದ್ಧ ಹೋರಾಡಿದ್ದರೂ ಚರಿತ್ರಾಕಾರರು ಎಲ್ಲೂ ಆಕೆಯ ಬಗ್ಗೆ ದಾಖಲಿಸದೆ ಇಷ್ಟು ವರ್ಷ ಮರೆಯಲ್ಲಿಡಲಾಗಿದೆ, ಆಕೆಯ ಚರಿತ್ರೆಯೇ ಮಾಯವಾಗಿರುವುದು ವಿಚಿತ್ರ ಪ್ರಶ್ನೆಯಾಗಿ ಉಳಿದಿದೆ’

ಬಿ.ಎಂ.ರೋಹಿಣಿ, ಹಿರಿಯ ಲೇಖಕಿ.