ಕಡತ ಹಸ್ತಾಂತರಿಸದ ನಿವೃತ್ತ ಅಧಿಕಾರಿ: ಕಾನೂನು ಕ್ರಮಕ್ಕೆ ನಗರಸಭಾಧ್ಯಕ್ಷೆ ಸೂಚನೆ

ಪುತ್ತೂರು, ಮೇ 10: ಪುತ್ತೂರು ನಗರಸಭೆಯ ಕಂದಾಯ ನಿರೀಕ್ಷಕ ವಿಜಯ ಕೆ. ಎ.30ರಂದು ಸೇವಾ ನಿವೃತ್ತಿ ಹೊಂದಿದ್ದು, ಈ ಸಂದಭರ್ ತಮ್ಮಲ್ಲಿದ್ದ ಜಮೀನು ಖಾತಾ ಸಂಬಂಧಿತ ಅರ್ಜಿ ಹಾಗೂ ಕಡತಗಳನ್ನು ನಗರಸಭೆಗೆ ಹಸ್ತಾಂತರಿಸಿಲ್ಲ ಎಂದು ನಗರಸಭೆ ಅಧ್ಯಕ್ಷೆ ಜಯಂತಿ ಬಲ್ನಾಡ್ ತಿಳಿಸಿದ್ದಾರೆ.

ಕಡತಗಳನ್ನು ಹಸ್ತಾಂತರಿಸುವಂತೆ ವೌಖಿಕವಾಗಿ ನೀಡಿದ ಸೂಚನೆಗೆ ಅವರು ಮನ್ನಣೆ ನೀಡದೇ ಇರುವ ಕಾರಣ ಮೇ 11ರ ಸಂಜೆಯ ಒಳಗೆ ಸಂಬಂಧಪಟ್ಟ ಎಲ್ಲ ಕಡತಗಳನ್ನು ಸಂಬಂಧಪಟ್ಟ ಅಭಿಯಂತರರಿಗೆ ಹಸ್ತಾಂತರಿಸುವಂತೆ ಆದೇಶ ನೀಡಬೇಕು. ಅದಕ್ಕೂ ಅವರು ತಪ್ಪಿದಲ್ಲಿ ಅವರ ವಿರುದ್ಧ ಕಾನೂನು ಕ್ರಮ ಕೈಗೊಳ್ಳಬೇಕು ಎಂದು ಪುತ್ತೂರು ನಗರಸಭೆಯ ಪೌರಾಯುಕ್ತರಿಗೆ ಲಿಖಿತ ಸೂಚನೆ ನೀಡಿದ್ದಾರೆ.

ಕಂದಾಯ ವಿಭಾಗದಲ್ಲಿ ಖಾತಾ ನಕಲಿಗೆ ಸಲ್ಲಿಸಿದ ಅರ್ಜಿಗಳು ಬಾಕಿ ಇರುವುದರಿಂದ ಜನರಿಗೆ ಸಮಸ್ಯೆ ಉಂಟಾಗಿದೆ. ಕಂದಾಯ ನಿರೀಕ್ಷಕ ವಿಜಯ ಕೆ. ನಿವೃತ್ತಿಯಾಗುವಾಗ ಕಡತಗಳನ್ನು ಹಸ್ತಾಂತರ ಮಾಡದೇ ಇರುವುದರಿಂದ ಸಮಸ್ಯೆ ಉಂಟಾಗಿದೆ. ಖಾತೆಗೆ ಸಂಬಂಧಪಟ್ಟ ವಿಷಯಗಳನ್ನು ಆನ್‌ಲೈನ್ ಮೂಲಕ ನೀಡಬೇಕಾಗಿದೆ. ಈ ಸಮಸ್ಯೆ ನಿವಾರಿಸಲು ನಗರಸಭೆಯ ಆಡಳಿತವು ಎಲ್ಲ ವ್ಯವಸ್ಥೆಗೆ ಮಂಜೂರಾತಿ ನೀಡಿದೆ. ಈಗ ನಿವೃತ್ತ ಕಂದಾಯ ನಿರೀಕ್ಷಕರ ಈ ವರ್ತನೆಯು ಸಮಸ್ಯೆ ಉಂಟು ಮಾಡಿದೆ.

ಹೀಗಾಗಿ ಮೇ 11ರ ಸಂಜೆಯ ಒಳಗೆ ಅವರು ಕಡತಗಳನ್ನು ಹಸ್ತಾಂತರಿಸುವಂತೆ ಸೂಚಿಸಬೇಕು. ಅದಕ್ಕೂ ಅವರು ತಪ್ಪಿದಲ್ಲಿ ಕಾನೂನು ಕ್ರಮ ಕೈಗೊಳ್ಳಬೇಕು. ಕಚೇರಿಯಲ್ಲಿ ನಿವೃತ್ತಗೊಳ್ಳುವ ನೌಕರರು ತಮ್ಮಲ್ಲಿರುವ ಎಲ್ಲ ಕಡತಗಳನ್ನು ಸಂಬಂಧಪಟ್ಟವರಿಗೆ ಹಸ್ತಾಂತರಿಸುವ ಮೊದಲು ಅವರಿಗೆ ಬೀಳ್ಕೊಡುಗೆ ಸಮಾರಂಭ ಏರ್ಪಡಿಸಬಾರದು ಎಂದು ಅಧ್ಯಕ್ಷರು ಪೌರಾಯುಕ್ತರಿಗೆ ಸೂಚನೆ ನೀಡಿದ್ದಾರೆ.