ಉತ್ತರಾಖಂಡ: ಕಾಂಗ್ರೆಸ್‌ಗೆ ಗೆಲುವು?

ಇಂದು ಸುಪ್ರೀಂನಲ್ಲಿ ಫಲಿತಾಂಶ

ವಿಜಯ ನನ್ನದೇ: ಹರೀಶ್ ರಾವತ್

ಹೊಸದಿಲ್ಲಿ,ಮೇ 10: ಪದಚ್ಯುತ ಕಾಂಗ್ರೆಸ್ ಮುಖ್ಯಮಂತ್ರಿ ಹರೀಶ್ ರಾವತ್ ಅವರು ಇನ್ನೂ ಸದನದಲ್ಲಿ ಬಹುಮತ ಹೊಂದಿದ್ದಾರೆಯೇ ಎನ್ನುವುದನ್ನು ಖಚಿತಪಡಿಸಿಕೊಳ್ಳಲು ಮಂಗಳವಾರ ಬಿಗಿಭದ್ರತೆಯ ನಡುವೆ ಉತ್ತರಾಖಂಡ ವಿಧಾನಸಭೆಯಲ್ಲಿ ಬಲಾಬಲ ಪರೀಕ್ಷೆಯನ್ನು ನಡೆಸ ಲಾಯಿತು.

ವಿಜಯ ತನ್ನದಾಗಿದೆ ಎಂದು ವಿಶ್ವಾಸಮತದ ಬಳಿಕ ಖುಷಿಯಿಂದ ಬೀಗುತ್ತಿದ್ದ ರಾವತ್ ಹೇಳಿದರು. ರಾವತ್ ಮತ್ತೆ ಮುಖ್ಯಮಂತ್ರಿ ಹುದ್ದೆಗೆ ಮರಳಲಿದ್ದಾರೆ ಎಂದು ಪ್ರತಿಪಕ್ಷ ಬಿಜೆಪಿಯ ಶಾಸಕರೋರ್ವರು ಸಹ ಹೇಳಿದರು.ಸದನದಲ್ಲಿ ಬಹುಮತ ಸಾಬೀತು ಪಡಿಸಲು ರಾವತ್‌ಗೆ ಕನಿಷ್ಠ 31 ಶಾಸಕರ ಬೆಂಬಲ ಅಗತ್ಯವಿದೆ.

61 ಶಾಸಕರ ಪೈಕಿ 33 ಶಾಸಕರು ರಾವತ್ ಪರ ಮತ ಚಲಾಯಿಸಿದ್ದಾರೆನ್ನಲಾಗಿದೆ. 61 ಸದಸ್ಯ ಬಲದ ಸದನದಲ್ಲಿ ಕೇವಲ 28 ಸದಸ್ಯರು ಬಿಜೆಪಿ ಪರವಾಗಿ ಮತ ಚಲಾಯಿಸಿದ್ದಾರೆ ಎಂದು ಆ ಪಕ್ಷದ ಶಾಸಕರೋರ್ವರು ಹೇಳಿದರು.
ಇಬ್ಬರು ಬಿಎಸ್‌ಪಿ, ಓರ್ವ ಯುಕೆಡಿ ಮತ್ತು ಮೂವರು ಪಕ್ಷೇತರ ಶಾಸಕರು ಸೇರಿದಂತೆ ಪ್ರಗತಿಪರ ಪ್ರಜಾಸತ್ತಾತ್ಮಕ ರಂಗ (ಪಿಡಿಎಫ್)ದ ಎಲ್ಲ ಆರೂ ಶಾಸಕರು ರಾವತ್ ಪರವಾಗಿ ಮತಗಳನ್ನು ಚಲಾಯಿಸಿದ್ದಾರೆ ಎಂದು ಪಕ್ಷೇತರ ಶಾಸಕ ಹರೀಶ ಚಂದ್ರ ದುರ್ಗಾಪಾಲ್ ತಿಳಿಸಿದರು.
 ಇಂದಿನ ವಿಶ್ವಾಸಮತದ ಫಲಿತಾಂಶದ ಅಧಿಕೃತ ಘೋಷಣೆಗೆ ಬುಧವಾರದವರೆಗೆ ಕಾಯಬೇಕಾಗಿದೆ. ಫಲಿತಾಂಶವನ್ನು ಸೀಲ್ ಮಾಡಿದ ಲಕೋಟೆಯಲ್ಲಿ ಸರ್ವೋಚ್ಚ ನ್ಯಾಯಾಲಯಕ್ಕೆ ಸಲ್ಲಿಸಲಾಗುವುದು.
ಉತ್ತರಾಖಂಡದ ಮೇಲೆ ಕವಿದಿರುವ ಅನಿಶ್ಚಿತತೆಯ ಮೋಡ ಬುಧವಾರ ಕರಗಲಿದೆ ಎಂದು ರಾವತ್ ಸದನದಲ್ಲಿ ಮತದಾನದ ಬಳಿಕ ಸುದ್ದಿಗಾರರಿಗೆ ತಿಳಿಸಿದರು.

ಮತದಾನ ಆರಂಭಗೊಳ್ಳುವ ಕೆಲವೇ ಕ್ಷಣಗಳ ಮುನ್ನ ಬಿಎಸ್‌ಪಿ ನಾಯಕಿ ಮಾಯಾವತಿ ಅವರು ತನ್ನ ಪಕ್ಷವು ಕಾಂಗ್ರೆಸ್‌ನ್ನು ಬೆಂಬಲಿಸಲಿದೆ ಎಂದು ತಿಳಿಸಿದರು. ತಾನು ಬಿಜೆಪಿಯನ್ನು ಬೆಂಬಲಿಸುವುದಾಗಿ ಕಾಂಗ್ರೆಸ್ ಶಾಸಕಿ ರೇಖಾ ಆರ್ಯ ಹೇಳಿದರೆ, ತಾನು ಕಾಂಗ್ರೆಸ್‌ನ್ನು ಬೆಂಬಲಿಸುವುದಾಗಿ ಬಿಜೆಪಿ ಶಾಸಕ ಭೀಮಲಾಲ್ ಆರ್ಯ ತಿಳಿಸಿದರು. ಉತ್ತರಾಖಂಡ ಸರಕಾರದ ಪ್ರಧಾನ ಕಾರ್ಯದರ್ಶಿ(ವಿಧಾನಸಭೆ ಮತ್ತು ಸಂಸದೀಯ ವ್ಯವಹಾರಗಳು)ಗಳು ವಿಶ್ವಾಸಮತ ಕಲಾಪದ ಉಸ್ತುವಾರಿ ವಹಿಸಿದ್ದರು. ಇದಕ್ಕಾಗಿ ರಾಜ್ಯದಲ್ಲಿ ಜಾರಿಯಲ್ಲಿರುವ ರಾಷ್ಟ್ರಪತಿ ಆಡಳಿತವನ್ನು ಬೆಳಗ್ಗೆ 10:30ರಿಂದ ಎರಡೂವರೆ ಗಂಟೆಗಳ ಕಾಲ ಅಮಾನತುಗೊಳಿಸಲಾಗಿತ್ತು. ಸಂಪೂರ್ಣ ಕಲಾಪವನ್ನು ವೀಡಿಯೊ ಚಿತ್ರೀಕರಿಸಲಾಗಿದೆ.

 ಉತ್ತರಾಖಂಡವು ಇಂದು ಗೆಲ್ಲಲಿದೆ ಎಂದು ಬಲಾಬಲ ಪರೀಕ್ಷೆಗೆ ಮುನ್ನ ರಾವತ್ ಹೇಳಿದರೆ, ನಮಗೆ ಸಂಪೂರ್ಣ ಬಹುಮತವಿದೆ. ನಮ್ಮ ಬಳಿ ಅಗತ್ಯ ಶಾಸಕರಿದ್ದಾರೆ. ನಾವು ಬಹುಮತವನ್ನು ಸಾಬೀತು ಮಾಡಲಿದ್ದೇವೆ ಎಂದು ಇನ್ನೋರ್ವ ಕಾಂಗ್ರೆಸ್ ನಾಯಕಿ ಇಂದಿರಾ ಹೃದಯೇಶ ಹೇಳಿದರು.

ಅನರ್ಹಗೊಂಡಿರುವ ಒಂಬತ್ತು ಬಂಡುಕೋರ ಶಾಸಕರಿಗೆ ಬಲಾಬಲ ಪರೀಕ್ಷೆಯಲ್ಲಿ ಮತದಾನಕ್ಕೆ ಅವಕಾಶ ನೀಡಲಾಗಿರಲಿಲ್ಲ. ತಮ್ಮ ಅನರ್ಹತೆಯನ್ನು ಎತ್ತಿಹಿಡಿದು ಸೋಮವಾರ ಉತ್ತರಾಖಂಡ ಉಚ್ಚ ನ್ಯಾಯಾಲಯವು ನೀಡಿದ್ದ ತೀರ್ಪನ್ನು ಪ್ರಶ್ನಿಸಿ ಈ ಶಾಸಕರು ಸವೋಚ್ಚ ನ್ಯಾಯಾಲಯದಲ್ಲಿ ಅರ್ಜಿಯನ್ನು ಸಲ್ಲಿಸಿದ್ದರಾದರೂ ಅದು ತಿರಸ್ಕರಿಸಲ್ಪಟ್ಟಿತ್ತು.

ಮುಂಗಡಪತ್ರ ಅಧಿವೇಶನದಲ್ಲಿ ಮಾ.18ರಂದು ಧನವಿನಿಯೋಗ ವಿಧೇಯಕದ ಮೇಲಿನ ಚರ್ಚೆಯ ವೇಳೆ ಮಾಜಿ ಮುಖ್ಯಮಂತ್ರಿ ವಿಜಯ ಬಹುಗುಣ ಸೇರಿದಂತೆ ಒಂಬತ್ತು ಕಾಂಗ್ರೆಸ್ ಶಾಸಕರು ತಮ್ಮದೇ ಸರಕಾರದ ವಿರುದ್ಧ ಬಂಡೆದ್ದಾಗ ಉತ್ತರಾಖಂಡ ರಾಜಕೀಯ ಬಿಕ್ಕಟ್ಟಿಗೆ ಸಿಲುಕಿತ್ತು. ಮಾ.27ರಂದು ಕೇಂದ್ರ ಸರಕಾರವು ಮುಖ್ಯಮಂತ್ರಿ ರಾವತ್ ಬಹುಮತವನ್ನು ಕಳೆದುಕೊಂಡಿದ್ದಾರೆ ಎಂಬ ಕಾರಣವನ್ನೊಡ್ಡಿ ಉತ್ತರಾಖಂಡದಲ್ಲಿ ರಾಷ್ಟ್ರಪತಿ ಆಡಳಿತವನ್ನು ಹೇರಿತ್ತು. ಆಬಳಿಕ ಒಂಬತ್ತು ಬಂಡುಕೋರ ಕಾಂಗ್ರೆಸ್ ಶಾಸಕರನ್ನು ಪಕ್ಷಾಂತರ ನಿಗ್ರಹ ಕಾಯ್ದೆಯಡಿ ಸ್ಪೀಕರ್ ಅನರ್ಹಗೊಳಿಸಿದ್ದರು.