ವಿರೋಧ ಪಕ್ಷಗಳ ಮೌಲ್ಯಮಾಪನ ಯಾಕಿಲ್ಲ?
ಮಾನ್ಯರೆ,
ಇತ್ತೀಚೆಗೆ ಬೆಂಗಳೂರಿನ ಜಿ.ಕೆ.ವಿ.ಕೆ. ಸಭಾಂಗಣದಲ್ಲಿ ನಡೆದ ಜನಮನ ಕಾರ್ಯಕ್ರಮದಲ್ಲಿ ಸಾರ್ವಜನಿಕರಿಗೆ ಮುಕ್ತ ಅವಕಾಶವಿದ್ದುದರಿಂದ ನಾನೂ ಭಾಗಿಯಾಗಿದ್ದೆ. ಸರಕಾರ ಕಳೆದ ಮೂರು ವರ್ಷದಿಂದ ನಡೆದು ಬಂದ ಹಾದಿ ಮತ್ತು ರಾಜ್ಯದ ಜನತೆಗೆ ಕೊಟ್ಟ ಹಲವು ಭಾಗ್ಯಗಳನ್ನು ಭಾಗ್ಯಗಳ ಸರದಾರರಾದ ಮಾನ್ಯ ಮುಖ್ಯಮಂತ್ರಿಗಳು ಸಾರ್ವಜನಿಕರಿಗೆ ತಿಳಿಹೇಳಿ ಅಭಿಪ್ರಾಯ ಪಡೆದುಕೊಂಡ ಕಾರ್ಯಕ್ರಮ ಬಹಳ ಅರ್ಥಪೂರ್ಣ ಅನ್ನಿಸಿತ್ತು.ಕೆಲವೊಂದು ನ್ಯೂಸ್ ವಾಹಿನಿಗಳು ಕಾರ್ಯಕ್ರಮವನ್ನು ನೇರಪ್ರಸಾರ ಮಾಡಿದ್ದು ಬಿಟ್ಟರೆ ಇನ್ನಿತರ ಚಾನೆಲ್ಗಳು ಸರಕಾರಕ್ಕೆ ಹತ್ತರಲ್ಲಿ ಒಂದೆರಡು ಅಂಕ ಕೊಡುವುದರಲ್ಲಿ ಬ್ಯುಸಿಯಾಗಿದ್ದವು. ಅನೇಕ ಕನ್ನಡ ಸುದ್ದಿ ವಾಹಿನಿಗಳು ಆ ದಿನ ಸರಕಾರವನ್ನು ಟೀಕಿಸುವುದಕ್ಕಾಗಿ ಮೀಸಲಿಟ್ಟಿದ್ದವು ಎಂದೆನಿಸಿತು. ವಿರೋಧ ಪಕ್ಷಗಳನ್ನು ಸರಕಾರದ ‘ಕಾವಲು ನಾಯಿ’ ಎಂದು ಕರೆಯುತ್ತಾರೆ ಎಂದು ಓದಿದ ನೆನಪು. ಕಳೆದ ಮೂರು ವರ್ಷಗಳಲ್ಲಿ ಸರಕಾರ ಎಷ್ಟು ಎಡವಿದೆಯೋ ಅದಕ್ಕಿಂತ ಹೆಚ್ಚು ವಿರೋಧ ಪಕ್ಷ ಬಿಜೆಪಿ ಜನಸಾಮಾನ್ಯರಲ್ಲಿ ವಿಶ್ವಾಸಗಳಿಸುವುದರಲ್ಲಿ ಎಡವಿದೆ ಎಂದು ಹೇಳಲೇಬೇಕಾಗುತ್ತದೆ. ಶಿವಮೊಗ್ಗದಲ್ಲಿ ವಿದ್ಯಾರ್ಥಿನಿ ಆತ್ಮಹತ್ಯೆಯನ್ನು ರಾಜಕೀಯವಾಗಿ ಬಳಸಿಕೊಂಡು ಜನರ ಭಾವನಗಳೊಡನೆ ಚೆಲ್ಲಾಟವಾಡಿದ್ದನ್ನು ನಾಡಿನ ಜನತೆ ಮರೆಯಲಿಕ್ಕಿಲ್ಲ. ಮತ್ತೆ ಏನಾಯಿತು ಎಂಬುದು ಇತಿಹಾಸ. ಡಿ.ಕೆ. ರವಿ ಅವರ ಅಸಹಜ ಸಾವು ಕೂಡ ಈ ನಾಡಿಗೆ ತುಂಬಲಾರದ ನಷ್ಟ. ಅದರಲ್ಲೂ ರಾಜಕೀಯ ಮಾಡಿ ಇದೊಂದು ಕೊಲೆ ಎಂಬುದನ್ನು ವೈಭವೀಕರಿಸಿ ‘‘ಕೊಲೆ ಅಲ್ಲದಿದ್ದರೆ ರಾಜಕೀಯ ಸನ್ಯಾಸ ಮಾಡುತ್ತೇನೆ’’ ಎಂದು ವಿರೋಧ ಪಕ್ಷದ ನಾಯಕರೊಬ್ಬರು ಹೇಳಿದ್ದರು. ಕೊನೆಗೆ ಎಲ್ಲರ ಬೇಡಿಕೆಯನ್ನು ಮನಗಂಡ ಸರಕಾರ ತನಿಖೆಯನ್ನು ಸಿಬಿಐಗೆ ಒಪ್ಪಿಸಿತ್ತು. ಈಗ ಸರಕಾರ ಮತ್ತು ಬಿಜೆಪಿ ಈ ವಿಚಾರದಲ್ಲಿ ಮೌನವಾಗಿಬಿಟ್ಟಿದೆ.
ರಾಜ್ಯದಲ್ಲಿ ಅತ್ಯಾಚಾರ ಪ್ರಕರಣ ನಡೆದಾಗ ಮಾಧ್ಯಮದವರು ವಿರೋಧ ಪಕ್ಷದ ನಾಯಕರಲ್ಲಿ ಕೇಳಿದಾಗ ‘‘ಅತ್ಯಾಚಾರ ಆದರೆ ವಿರೋಧ ಪಕ್ಷ ಏನು ಮಾಡಲಿಕಾಗುತ್ತೆ’’ ಎಂದು ಹೇಳುವುದಾದರೆ ಇವರಿಂದ ನಾವು ಏನು ನಿರೀಕ್ಷಿಸಬಹುದು?
ಮುಖ್ಯಮಂತ್ರಿ ಅರ್ಕಾವತಿ ಡಿ ನೋಟಿಫಿಕೇಶನ್ ಮಾಡಿದ್ದಾರೆ ಎಂದು ಪ್ರತಿಭಟಿಸಿದ ಬಿಜೆಪಿ ಈಗ ಅದನ್ನು ಕೈ ಚೆಲ್ಲಿದೆ. ಹೀಗೆ ಇನ್ನೂ ಅನೇಕ ವಿಷಯಗಳಲ್ಲಿ ಬಿಜೆಪಿ ಎಡವಿದ್ದು ಈ ನಿಟ್ಟಿನಲ್ಲಿ ಇವರ ಮೌಲ್ಯಮಾಪನ ಮಾಡಿ ರಾಜ್ಯದ ಜನತೆಗೆ ಮಾಧ್ಯಮ ತಿಳಿಸಬೇಕಿತ್ತು. ಅಲ್ಲದೆ ಸರಕಾರ ಕೂಡ ಇನ್ನೂ ನಿದ್ರೆಯಿಂದ ಎಚ್ಚೆತ್ತುಕೊಳ್ಳಬೇಕು. ದಲಿತ ಮುಖ್ಯಮಂತ್ರಿ ಬೇಡಿಕೆಯನ್ನು ಚುನಾವಣೆ ಆಗುವ ತನಕ ಮುಂದಿಟ್ಟು ರಾಜ್ಯದ ಭೀಕರ ಸಮಸ್ಯೆಗಳ ಬಗ್ಗೆ ಗಮನಹರಿಸದಿದ್ದರೆ ಜನ ಮತ್ತೆ ಆಡಳಿತ ಪಕ್ಷದಲ್ಲಿರುವ ಜನಪ್ರತಿನಿಧಿಗಳನ್ನು ಮನೆಗೆ ಕಳಿಸುವುದರಲ್ಲಿ ಸಂದೇಹ ಬೇಡ.
