ಸಮುದ್ರ ಮಟ್ಟ ಏರಿಕೆಯಿಂದ 4 ಕೋಟಿ ಭಾರತೀಯರಿಗೆ ಅಪಾಯ
ಹೊಸದಿಲ್ಲಿ, ಮೇ 20: ಏರುತ್ತಿರುವ ಸಮುದ್ರ ಮಟ್ಟದಿಂದಾಗಿ ಸುಮಾರು 4 ಕೋಟಿ ಭಾರತೀಯರು 2050 ರೊಳಗಾಗಿ ಅಪಾಯದಲ್ಲಿ ರಲಿದ್ದಾರೆ. ತ್ವರಿತ ನಗರೀಕರಣ ಹಾಗೂ ಆರ್ಥಿಕ ಬೆಳವಣಿಗೆಗಳಿಂದಾಗಿ ಭವಿಷ್ಯದಲ್ಲಿ ಮುಂಬೈ ಹಾಗೂ ಕೋಲ್ಕತಾಗಳ ಜನರು ಕರಾವಳಿಯ ನೆರೆಗೆ ಗರಿಷ್ಠವಾಗಿ ತೆರೆದುಕೊಳ್ಳಲಿದ್ದಾರೆಂದು ವಿಶ್ವಸಂಸ್ಥೆಯ ಪರಿಸರ ವರದಿಯೊಂದು ತಿಳಿಸಿದೆ.
ವಾತಾವರಣ ಬದಲಾವಣೆಯ ಅತಿ ಕೆಟ್ಟ ಪರಿಣಾಮವು ಪೆಸಿಫಿಕ್, ದಕ್ಷಿಣ ಹಾಗೂ ಆಗ್ನೇಯ ಏಶ್ಯಗಳಿಗೆ ಸಂಭವಿಸಲಿವೆ ಯೆಂದು ‘ಗ್ಲೋಬಲ್ ಎನ್ವಯರ್ನಮೆಂಟಲ್ ಔಟ್ಲುಕ್(ಜಿಇಒ-6): ರಿಜನಲ್ ಅಸೆಸೈಂಟ್ಸ್ ಹೇಳಿದೆ. 2050ರೊಳಗೆ ಸಮುದ್ರ ಮಟ್ಟ ಏರಿಕೆಯಿಂದ ಅಪಾಯಕ್ಕೊಳಗಾಗುವ ಹೆಚ್ಚು ಸಂಭಾವ್ಯ 10 ದೇಶಗಳಲ್ಲಿ 7 ದೇಶಗಳು ಏಶ್ಯ ಪೆಸಿಫಿಕ್ ವಲಯದಲ್ಲಿವೆ. ಇವುಗಳಲ್ಲಿ ಭಾರತವು ಅಗ್ರಸ್ಥಾನದಲ್ಲಿದ್ದು, ದೇಶದ 4 ಕೋಟಿ ಜನರು ಸಮುದ್ರ ಮಟ್ಟ ಏರಿಕೆಯ ಅಪಾಯಕ್ಕೊಳಗಾಗಬಹುದೆಂದು ಬಿಂಬಿಸಲಾಗಿದೆ.
ಆ ಬಳಿಕ, ಬಾಂಗ್ಲಾ ದೇಶದ 2.5 ಕೋಟಿಗೂ ಹೆಚ್ಚು, ಚೀನಾದ 2 ಕೋಟಿ ಹಾಗೂ ಫಿಲಿಪ್ಪೀನ್ಸ್ನ 1.5 ಕೋಟಿ ಜನರು ಈ ಅಪಾಯಕ್ಕೊಳಗಾಗಲಿದ್ದಾರೆಂದು ವರದಿ ತಿಳಿಸಿದೆ.
ಏಶ್ಯದಲ್ಲಿ ವಸಾಹತು ಮಾದರಿಯಲ್ಲಿ ಬದಲಾವಣೆ, ನಗರೀಕರಣ ಹಾಗೂ ಸಾಮಾಜಿಕ-ಆರ್ಥಿಕ ಸ್ಥಾನಮಾನಗಳು ಅಪಾಯ ಸಾಧ್ಯತೆ ಹಾಗೂ ವಾತಾವರಣದ ಅಪಾಯಗಳಿಗೆ ತೆರೆದುಕೊಳ್ಳುವಿಕೆಯ ಪ್ರವೃತ್ತಿಯ ಮೇಲೆ ಪ್ರಭಾವ ಬೀರಿವೆ. ಅನೇಕ ಕರಾವಳಿ ಪ್ರದೇಶಗಳಲ್ಲಿ ಹೆಚ್ಚುತ್ತಿರುವ ನಾಗರಿಕ ವಸಾಹತುಗಳು, ಅಪಾಯಕಾರಿ ವಾತಾವರಣ ಘಟನೆಗಳಿಗೆ ಪ್ರತಿಸ್ಪಂದಿಸುವ ಪ್ರಾಕೃತಿಕ ಕರಾವಳಿ ವ್ಯವಸ್ಥೆಯ ಸಾಮರ್ಥ್ಯವನ್ನು ಬಾಧಿಸಿವೆ. ಇದರಿಂದಾಗಿ ಅವು ಅಪಾಯಕ್ಕೊಳಗಾಗುವ ಸಾಧ್ಯತೆ ಹೆಚ್ಚಿದೆಯೆಂದು ಅದು ಹೇಳಿದೆ.
ಚೀನಾ, ಭಾರತ ಹಾಗೂ ಥಾಯ್ಲೆಂಟ್ಗಳಂತಹ ಕೆಲವು ದೇಶಗಳು ಭವಿಷ್ಯದಲ್ಲಿ ವಾತಾವರಣದ ಅಪಾಯಕ್ಕೆ ತೆರೆದುಕೊಳ್ಳುವ ಸಾಧ್ಯತೆ ಹೆಚ್ಚಿದೆ. ತ್ವರಿತ ನಗರೀಕರಣ ಹಾಗೂ ಆರ್ಥಿಕ ಬೆಳವಣಿಗೆಗಳಿಂದಾಗಿ ಭಾರೀ ನಗರೀಕರಣಗೊಂಡ ಪ್ರದೇಶಗಳಲ್ಲಿ ಇದು ಹೆಚ್ಚಾಗಿರುತ್ತದೆಂದು ವರದಿ ತಿಳಿಸಿದೆ.