ಅಮೆರಿಕ ಡ್ರೋನ್ ದಾಳಿಯಲ್ಲಿ ತಾಲಿಬಾನ್ ನಾಯಕ ಅಖ್ತರ್ ಮನ್ಸೂರ್ ಹತ್ಯೆ

    ಕಾಬೂಲ್, ಮೇ 22: ಅಫ್ಘಾನಿಸ್ತಾನ ತಾಲಿಬಾನ್‌ನ ನಾಯಕ ಮುಲ್ಲಾ ಅಖ್ತರ್ ಮನ್ಸೂರ್ ಅಮೆರಿಕ ಸೇನೆಯ ಡ್ರೋನ್ ದಾಳಿಯಲ್ಲಿ ಸಾವನ್ನಪ್ಪಿದ್ದಾನೆಂದು, ಉಗ್ರವಾದಿ ಗುಂಪಿನ ಹಿರಿಯ ಕಮಾಂಡರ್ ಒಬ್ಬಾತ ರವಿವಾರ ತಿಳಿಸಿದ್ದಾನೆ. ಅಫ್ಘಾನಿಸ್ತಾನ-ಪಾಕ್ ಗಡಿ ಪ್ರದೇಶದಲ್ಲಿ ಈ ದಾಳಿ ನಡೆದಿರುವುದಾಗಿ ಅಫ್ಘಾನ್ ತಾಲಿಬಾನ್‌ನ ಕಮಾಂಡರ್ ಮುಲ್ಲಾ ರವೂಫ್ ತಿಳಿಸಿದ್ದಾರೆ. ದಾಳಿ ನಡೆದಿರುವುದನ್ನು ಅಫ್ಘಾನ್ ಅಧ್ಯಕ್ಷ ಅಶ್ರಫ್ ಗನಿ ಅವರ ಕಾರ್ಯಾಲಯ ದೃಢಪಡಿಸಿದೆಯಾದರೂ, ಮನ್ಸೂರ್ ಸಾವನ್ನು ದೃಢಪಡಿಸಲು ಅದು ನಿರಾಕರಿಸಿದೆ. ಆದಾಗ್ಯೂ, ಅಧ್ಯಕ್ಷ ಕಾರ್ಯಾಲಯದ ಮುಖ್ಯ ಕಾರ್ಯನಿರ್ವಹಣಾಧಿಕಾರಿ ಅಬ್ದುಲ್ಲಾ ಅಬ್ದುಲ್ಲಾ ಅವರು ಮನ್ಸೂರ್ ಸಾವನ್ನಪ್ಪಿರುವ ಸಾಧ್ಯತೆ ಅಧಿಕವಾಗಿದೆ ಎಂದಿದ್ದಾರೆ.

  ಅಫ್ಘಾನಿಸ್ತಾನದ ಗಡಿಗೆ ತಾಗಿಕೊಂಡಿರುವ ಪಾಕಿಸ್ತಾನದ ಭಾಗದಲ್ಲಿ ಮುಲ್ಲಾ ಅಖ್ತರ್ ವಿರುದ್ಧ ಶನಿವಾರ ಅಮೆರಿಕ ಸೇನೆ ಡ್ರೋನ್ ಆಕ್ರಮಣ ನಡೆಸಿತ್ತು.ಅಮೆರಿಕ ಅಧ್ಯಕ್ಷ ಬರಾಕ್ ಒಬಾಮ ಅನುಮತಿಯ ಪಡೆದು ಈ ಸೇನಾ ಕಾರ್ಯಾಚರಣೆ ನಡೆದಿದೆ. ಮುಲ್ಲಾ ಅಖ್ತರ್ ಮನ್ಸೂರ್‌ನ ಹತ್ಯೆಯಿಂದ, ತಾಲಿಬಾನ್ ಇನ್ನಷ್ಟು ದುರ್ಬಲಗೊಳ್ಳಲಿದೆ. ಆದರೆ ಇದೇ ವೇಳೆ ಬಹಳಕಾಲದಿಂದ ನೆನೆಗುದಿಯಲ್ಲಿರುವ ಶಾಂತಿ ಮಾತುಕತೆಯಲ್ಲಿ ತಾಲಿಬಾನ್ ಬಂಡುಕೋರರು ಪಾಲ್ಗೊಳ್ಳುವ ಸಾಧ್ಯತೆಯೂ ಕ್ಷೀಣಿಸಲಿದೆಯೆಂದು ತಜ್ಞರು ಅಭಿಪ್ರಾಯಿಸಿದ್ದಾರೆ.

ಅಮೆರಿಕದಿಂದ ಸ್ಪಷ್ಟೀಕರಣ ಕೇಳಿದ ಪಾಕ್

  ಅಫ್ಘಾನ್ ತಾಲಿಬಾನ್ ನಾಯಕ ಮುಲ್ಲಾ ಅಖ್ತರ್ ಮನ್ಸೂರ್ ವಿರುದ್ಧ ನಡೆದ ಡ್ರೋನ್ ದಾಳಿಯ ಬಗ್ಗೆ ಪಾಕಿಸ್ತಾನವು ಅಮೆರಿಕದಿಂದ ಸ್ಪಷ್ಟೀಕರಣವನ್ನು ಕೇಳಲಿದೆಯೆಂದು, ಪಾಕ್ ವಿದೇಶಾಂಗ ಸಚಿವಾಲಯದ ವಕ್ತಾರರು ರವಿವಾರ ತಿಳಿಸಿದ್ದಾರೆ. ಪಾಕಿಸ್ತಾನದ ನೆಲದಲ್ಲಿ ನಡೆಸಿದ ವಾಯುದಾಳಿಯೊಂದರಲ್ಲಿ ಮನ್ಸೂರ್ ಮೃತಪಟ್ಟಿರುವ ಸಾಧ್ಯತೆಯಿದೆಯೆಂದು ಅಮೆರಿಕ ಅಧಿಕಾರಿಗಳು ಪ್ರಕಟಿಸಿದ ಬೆನ್ನಲ್ಲೇ ಪಾಕ್ ಈ ಹೇಳಿಕೆ ನೀಡಿದೆ.

    ‘‘ಅಮೆರಿಕದ ಡ್ರೋನ್ ಕುರಿತಾದ ವರದಿಗಳನ್ನು ನಾವು ನೋಡಿದ್ದೇವೆ. ಈ ಬಗ್ಗೆ ಸ್ಪಷ್ಟೀಕರಣವನ್ನು ಕೋರಿದ್ದೇವೆ’’ ಎಂದು ಪಾಕ್ ವಿದೇಶಾಂಗ ವಕ್ತಾರ ನಫೀಸ್ ಝಕಾರಿಯಾ ತಿಳಿಸಿದ್ದಾರೆ. ಅಫ್ಘಾನಿಸ್ತಾನದ ದೀರ್ಘಾವಧಿಯ ಯುದ್ಧವನ್ನು ಕೊನೆಗೊಳಿಸಲು ತಾಲಿಬಾನ್ ಮಾತುಕತೆಯ ಮೇಜಿಗೆ ಬರಬೇಕೆಂದು ಪಾಕ್ ಬಯಸುತ್ತಿದೆ’. ಅಫ್ಘಾನ್ ಸಮಸ್ಯೆಗೆ ಮಿಲಿಟರಿ ಕಾರ್ಯಾಚರಣೆ ಪರಿಹಾರವಲ್ಲ ಎಂದವರು ಹೇಳಿದ್ದಾರೆ. ಆದರೆ ಅಮೆರಿಕದ ವಿದೇಶಾಂಗ ಕಾರ್ಯದರ್ಶಿ ಜಾನ್ ಕೆರ್ರಿ ಅವರು ಶನಿವಾರ ನಡೆದ ವಾಯುದಾಳಿಯ ಬಗ್ಗೆ ಪಾಕ್ ಪ್ರಧಾನಿ ನವಾಝ್ ಶರೀಫ್ ಅವರಿಗೆ ಅಧಿಸೂಚನೆಯೊಂದನ್ನು ಕಳುಹಿಸಲಾಗಿತ್ತೆಂದು ತಿಳಿಸಿದ್ದಾರೆ.