ಪಂಚರಾಜ್ಯ ವಿಧಾನಸಭಾ ಚುನಾವಣೆಗಳಲ್ಲಿ 3,526 ಪಕ್ಷೇತರರಲ್ಲಿ 9 ಮಂದಿಗಷ್ಟೇ ಯಶ
ಹೊಸದಿಲ್ಲಿ, ಮೇ 22: ನಾಲ್ಕು ರಾಜ್ಯಗಳು ಹಾಗೂ ಪುದುಚೇರಿ ಕೇಂದ್ರಾಡಳಿತ ಪ್ರದೇಶದ ವಿಧಾನಸಭೆಗಳಿಗೆ ಇತ್ತೀಚೆಗೆ ನಡೆದ ಚುನಾವಣೆಗಳು 3,500ಕ್ಕೂ ಹೆಚ್ಚು ಪಕ್ಷೇತರ ಅಭ್ಯರ್ಥಿಗಳಿಗೆ ಒಳ್ಳೆಯ ಸುದ್ದಿಯನ್ನೇನೂ ತಂದಿಲ್ಲ. ಚುನಾವಣೆಗಳಲ್ಲಿ ಕೇವಲ 9 ಮಂದಿ ಸ್ವತಂತ್ರ ಅಭ್ಯರ್ಥಿಗಳಷ್ಟೇ ಗೆದ್ದಿದ್ದಾರೆ.
ಯಶಸ್ವಿಯಾದವರಲ್ಲಿ ಗರಿಷ್ಠ 6 ಮಂದಿ ಕೇರಳದಲ್ಲಿ, ಪಶ್ಚಿಮಬಂಗಾಳ, ಅಸ್ಸಾಂ ಹಾಗೂ ಪುದುಚೇರಿಗಳಲ್ಲಿ ವಿಜಯಿಗಳಾಗಿದ್ದಾರೆ. ನಾಲ್ಕು ರಾಜ್ಯಗಳಲ್ಲೇ ಅತಿ ಹೆಚ್ಚು(1,566) ಪಕ್ಷೇತರ ಅಭ್ಯರ್ಥಿಗಳು ತಮಿಳುನಾಡಿನಲ್ಲಿ ಸ್ಪರ್ಧಿಸಿದ್ದು, ಅವರಲ್ಲೊಬ್ಬನೂ ಗೆದ್ದಿಲ್ಲ.
ವಿಧಾನಸಭಾ ಚುನಾವಣೆಗಳಲ್ಲಿ ಒಟ್ಟು 3,526 ಪಕ್ಷೇತರ ಅಭ್ಯರ್ಥಿಗಳು ಸ್ಪರ್ಧಿಸಿದ್ದರು. ಅವರಲ್ಲಿ ಕೇರಳದಲ್ಲಿ 782, ಅಸ್ಸಾಂನಲ್ಲಿ 711, ಪಶ್ಚಿಮಬಂಗಾಳದಲ್ಲಿ 371 ಹಾಗೂ ಪುದುಚೇರಿಯಲ್ಲಿ 96 ಮಂದಿ ಕಣದಲ್ಲಿದ್ದರೆ, ಉಳಿದವರು ತಮಿಳುನಾಡಿನಲ್ಲಿ ಅದೃಷ್ಟ ಪರೀಕ್ಷಿಸಿದ್ದರು ಎಂದು ಚುನಾವಣಾ ಆಯೋಗದ ಅಂಕಿ-ಅಂಶಗಳ ವಿಶ್ಲೇಷಣೆಯಿಂದ ತಿಳಿದುಬಂದಿದೆ.
ಪಶ್ಚಿಮಬಂಗಾಳದ 294, ತಮಿಳುನಾಡಿನ 232, ಕೇರಳದ 140, ಅಸ್ಸಾಂನ 126 ಹಾಗೂ ಪುದುಚೇರಿಯ 30 ಸೇರಿದಂತೆ ಒಟ್ಟು 822 ಕ್ಷೇತ್ರಗಳಿಗೆ ಎ.4ರಿಂದ ಮೇ 16ರ ನಡುವೆ ಮತದಾನ ನಡೆದಿತ್ತು. ತಮಿಳುನಾಡಿನ 2 ಕ್ಷೇತ್ರಗಳ ಚುನಾವಣೆ ಮುಂದೂಡಲ್ಪಟ್ಟಿದೆ. ಚುನಾವಣೆಗಳಿಗೆ ಸುಮಾರು 8,873 ಅಭ್ಯರ್ಥಿಗಳು ಸ್ಪರ್ಧಿಸಿದ್ದರು. ತಮಿಳುನಾಡಿನಲ್ಲಿ ಗರಿಷ್ಠ 3,776, ಪಶ್ಚಿಮಬಂಗಾಳದಲ್ಲಿ 1,961, ಅಸ್ಸಾಂನಲ್ಲಿ 1,581, ಕೇರಳದಲ್ಲಿ 1,203 ಹಾಗೂ ಪುದುಚೇರಿಯಲ್ಲಿ 344 ಹುರಿಯಾಳುಗಳಿದ್ದರು.
ತಮಿಳುನಾಡಿನಲ್ಲಿ 320, ಪಶ್ಚಿಮಬಂಗಾಳದಲ್ಲಿ 200, ಅಸ್ಸಾಂನಲ್ಲಿ 111, ಕೇರಳದಲ್ಲಿ 109 ಹಾಗೂ ಪುದುಚೇರಿಯಲ್ಲಿ 21 ಮಂದಿ ಸೇರಿದಂತೆ ಒಟ್ಟು 761 ಮಹಿಳೆಯರು ಕಣದಲ್ಲಿದ್ದರು.
ಪಕ್ಷೇತರರು ಪಶ್ಚಿಮಬಂಗಾಳದಲ್ಲಿ ಒಟ್ಟು ಮತಗಳ ಶೇ.2.2(11,84,047), ತಮಿಳುನಾಡಿನಲ್ಲಿ ಶೇ.1.4 (6,17,907), ಕೇರಳದಲ್ಲಿ ಶೇ.5.3(10,66,995), ಅಸ್ಸಾಂನಲ್ಲಿ ಶೇ. 11(18,67532) ಹಾಗೂ ಪುದುಚೇರಿಯಲ್ಲಿ ಶೇ. 7.9(62,884) ಮತಗಳನ್ನು ಪಡೆದಿದ್ದಾರೆ. ಪಶ್ಚಿಮಬಂಗಾಳದಲ್ಲಿ 6,55,46,101, ತಮಿಳುನಾಡಿನಲ್ಲಿ 5,79,15,075, ಕೇರಳದಲ್ಲಿ 2,56,08,720, ಅಸ್ಸಾಂನಲ್ಲಿ 1,98,66,496 ಹಾಗೂ ಪುದುಚೇರಿಯಲ್ಲಿ 9,27,034 ಒಟ್ಟು ಮತದಾರರಿದ್ದರು.
ಈ ರಾಜ್ಯಗಳಲ್ಲಿ ಕಳೆದ 2011ರ ವಿಧಾನಸಭಾ ಚುನಾವಣೆಗಳಲ್ಲಿ 7 ಮಂದಿ ಪಕ್ಷೇತರರು ವಿಜಯ ಸಾಧಿಸಿದ್ದರು. ಅವರಲ್ಲಿ ಪಶ್ಚಿಮಬಂಗಾಳ, ಅಸ್ಸಾಂ ಹಾಗೂ ಕೇರಳಗಳ ತಲಾ ಇಬ್ಬರು ಹಾಗೂ ಪುದುಚೇರಿಯ ಒಬ್ಬರಾಗಿದ್ದರು. ಈ ಸಲವೂ ತಮಿಳುನಾಡಿನಲ್ಲಿ ಯಾವನೇ ಸ್ವತಂತ್ರ ಅಭ್ಯರ್ಥಿ ಗೆದ್ದಿರಲಿಲ್ಲ.
2011ರಲ್ಲಿ ತಮಿಳುನಾಡಿನಲ್ಲಿ ಗರಿಷ್ಠ 1,504, ಪಶ್ಚಿಮಬಂಗಾಳದಲ್ಲಿ 401, ಕೇರಳದಲ್ಲಿ 309, ಅಸ್ಸಾಂನಲ್ಲಿ 263 ಹಾಗೂ ಪುದುಚೇರಿಯಲ್ಲಿ 79 ಸೇರಿದಂತೆ ಒಟ್ಟು 2,556 ಮಂದಿ ಪಕ್ಷೇತರರು ಸ್ಪರ್ಧಿಸಿದ್ದರು.