ಎನ್‌ಎಸ್‌ಜಿಗೆ ಭಾರತದ ಪ್ರವೇಶ ಅಣ್ವಸ್ತ್ರಕ್ಕಾಗಿಯಲ್ಲ

ಹೊಸದಿಲ್ಲಿ, ಮೇ 28: ಭಾರತವು ಪರಮಾಣು ಪೂರೈಕೆ ಗುಂಪಿನ (ಎನ್‌ಎಸ್‌ಜಿ) ಸದಸ್ಯನಾಗುತ್ತಿರುವುದು ಶಸ್ತ್ರಾಸ್ತ್ರ ಪೈಪೋಟಿಗಲ್ಲ ಬದಲಿಗೆ ನಾಗರಿಕ ಉದ್ದೇಶಕ್ಕಾಗಿ ಅಣು ಶಕ್ತಿ ಬಳಸುವುದಕ್ಕಾಗಿದೆಯೆಂದು ಸ್ವಷ್ಪಪಡಿಸುವ ಮೂಲಕ ಅಮೆರಿಕವು ಈ ಬಗ್ಗೆ ಪಾಕಿಸ್ತಾನದ ವಿರೋಧಕ್ಕೆ ಅಸಮಾಧಾನ ವ್ಯಕ್ತಪಡಿಸಿದೆ.

ಇದು ಶಸ್ತ್ರಾಸ್ತ್ರ ಪೈಪೋಟಿಗಲ್ಲ ಹಾಗೂ ಅಣ್ವಸ್ತ್ರ ತಯಾರಿಕೆಗಾಗಿಯೂ ಅಲ್ಲ. ಇದು ನಾಗರಿಕ ಉದ್ದೇಶಕ್ಕಾಗಿ ಶಾಂತಿಯುತ ಪರಮಾಣು ಬಳಕೆಗಾಗಿದೆ. ಪಾಕಿಸ್ತಾನ ಇದನ್ನು ಅರ್ಥ ಮಾಡಿಕೊಳ್ಳುತ್ತದೆಂದು ತಾವು ಖಂಡಿತವಾಗಿಯೂ ಆಶಿಸುತ್ತೆವೆಂದು ರಾಜ್ಯಾಂಗ ಇಲಾಖೆಯ ಸಹಾಯಕ ವಕ್ತಾರ ಮಾರ್ಕ್ ಟೋನರ್ ನಿನ್ನೆ ವಾಶಿಂಗ್ಟನ್‌ನಲ್ಲಿ ದೈನಂದಿನ ಪತ್ರಿಕಾಗೋಷ್ಠಿಯಲ್ಲಿ ಪತ್ರಕರ್ತರಿಗೆ ತಿಳಿಸಿದ್ದಾರೆ.

ಎನ್‌ಎಸ್‌ಜಿಗೆ ಭಾರತದ ಸದಸ್ಯತ್ವ ಅರ್ಜಿ ಹಾಗೂ ಅದರಿಂದ ವಯಲದಲ್ಲಿ ಅಣ್ವಸ್ತ್ರ ಪೈಪೋಟಿಗೆ ಕಾರಣವಾಗಬಹುದೆಂಬ ನೆಲೆಯಲ್ಲಿ ಪಾಕಿಸ್ತಾನದ ವಿರೋಧದ ಕುರಿತಾದ ಪ್ರಶ್ನೆಯೊಂದಕ್ಕೆ ಅವರು ಈ ರೀತಿ ಉತ್ತರಿಸಿದ್ದಾರೆ.

ಆದಾಗ್ಯೂ, 48 ರಾಷ್ಟ್ರಗಳ ಎನ್‌ಎಸ್‌ಜಿಯ ನಿರ್ಣಾಯಕ ಸಭೆಯ ಪೂರ್ವದಲ್ಲಿ ಅಮೆರಿಕವು ಅನಿಶ್ಚಿತತೆಯನ್ನು ವ್ಯಕ್ತಪಡಿಸಿದೆ.

‘‘ನೋಡಿ, 2015ರಲ್ಲಿ ಭಾರತಕ್ಕೆ ಭೇಟಿ ನೀಡಿದ್ದ ವೇಳೆ ಅಧ್ಯಕ್ಷ ಬರಾಕ್ ಒಬಾಮ ಭಾರತವು ಕ್ಷಿಪಣಿ ತಂತ್ರಜ್ಞಾನ ನಿಯಂತ್ರಣ ಒಪ್ಪಂದದ ಅಗತ್ಯವನ್ನು ಪೂರೈಸಿದೆ ಹಾಗೂ ಸದಸ್ಯತ್ವಕ್ಕೆ ಸಿದ್ಧವಾಗಿದೆಯೆಂದು ಅಮೆರಿಕದ ಅಭಿಪ್ರಾಯವನ್ನು ಖಚಿತಪಡಿಸಿದ್ದರು. ಆದರೆ, ಇದೊಂದು ಸರ್ವಾನುಮತಿಯ ಗುಂಪಾಗಿದೆ. ಆದುದರಿಂದ ಮತದಾನದ ಫಲಿತಾಂಶ ಏನಾಗುತ್ತದೆಂಬುದನ್ನು ನಾವು ಕಾದು ನೋಡಬೇಕಾಗಿದೆ ಎಂದಷ್ಟೇ ನಾನು ಹೇಳಬಲ್ಲೆ’’ ಎಂದು ಟೋನರ್ ತಿಳಿಸಿದ್ದಾರೆ.

ಪರಮಾಣು ಪೂರೈಕೆ ಗುಂಪಿಗೆ ಹೊಸ ಸದಸ್ಯರ ಸೇರ್ಪಡೆಯ ಸಾಧ್ಯತೆಯ ಕುರಿತಾದ ಚರ್ಚೆಯ ಹಾಲಿ ಸದಸ್ಯರ ಆಂತರಿಕ ವಿಚಾರವಾಗಿದೆ. ಅವರು ನಿಯಮಿತವಾಗಿ ಭೇಟಿಯಾಗುತ್ತಿದ್ದಾರೆಂಬುರ ಹೊರತು ತಾನು ಹೆಚ್ಚು ಹೇಳುವುದೇನೂ ಇಲ್ಲವೆಂದು ಅವರು ಹೇಳಿದ್ದಾರೆ.

ಮುಂದಿನ ಎನ್‌ಎಸ್‌ಜಿ ಸಭೆ ನಿರ್ದಿಷ್ಟವಾದ ಸಭೆಯಲ್ಲ. ಮುಖ್ಯವಾಗಿ ಈ ವಿಷಯವನ್ನು ಮಾತನಾಡಲೆಂದೇ ನಡೆಯುವ ಸಭೆಯಲ್ಲವೆಂಬುದು ತನ್ನ ಭಾವನೆಯಾಗಿದೆ.

ಪಾಕಿಸ್ತಾನವು ತನ್ನ ಹಿತಾಸಕ್ತಿಯನ್ನು ಬಹಿರಂಗಪಡಿಸಿದೆ. ಖಂಡಿತವಾಗಿಯೂ ಯಾವುದೇ ದೇಶವೂ ಸದಸ್ಯತ್ವಕ್ಕಾಗಿ ಅರ್ಜಿ ದಾಖಲಿಸಬಹುದಾಗಿದೆ. ತಾವದನ್ನು ಸರ್ವಾನುಮತದ ನಿರ್ಣಯದ ಮೇಲೆ ಪರಿಗಣಿಸುತ್ತೇವೆಂದು ಟೋನರ್ ತಿಳಿಸಿದ್ದಾರೆ.