5 ಕೋಟಿ ಬಡವರಿಗೆ ಉಚಿತ ಅಡುಗೆ ಅನಿಲ ಸಂಪರ್ಕದ ಗುರಿ

ದಾವಣಗೆರೆ, ಮೇ 29: ಮುಂದಿನ 3 ವರ್ಷದಲ್ಲಿ ದೇಶದ 5 ಕೋಟಿ ಬಡವರಿಗೆ ಉಚಿತ ಅಡುಗೆ ಅನಿಲ ಸಂಪರ್ಕ ಕಲ್ಪಿಸುವ ಉದ್ದೇಶ ಹೊಂದಿದ್ದು, ಇದಕ್ಕೆ ದೇಶದ ಜನರು ನನ್ನ ಜೊತೆ ಕೈ ಜೋಡಿಸಬೇಕು ಎಂದು ಪ್ರಧಾನಿ ನರೇಂದ್ರ ಮೋದಿ ಮನವಿ ಮಾಡಿದರು. ರವಿವಾರ ಇಲ್ಲಿನ ಸರಕಾರಿ ಬಾಲಕರ ಪ್ರೌಢಶಾಲಾ ಮೈದಾನದ ಆವರಣದಲ್ಲಿ ಏರ್ಪಡಿಸಿದ್ದ ಸುಮಾರು 50 ನಿಮಿಷ ಹಿಂದಿಯಲ್ಲಿ ಭಾಷಣ ಮಾಡಿದ ಮೋದಿ ಅವರು, ತಮ್ಮ 2 ವರ್ಷ ಸಾಧನೆಗಳನ್ನು ಜನರ ಮುಂದಿಟ್ಟರು. ದೇಶದಲ್ಲಿ 50 ಕೋಟಿ ಕುಟುಂಬಗಳು ಇನ್ನು ಬಡತನದಲ್ಲಿವೇ, ಅದರಲ್ಲಿ 5 ಕೋಟಿ ಕುಟುಂಬಗಳ ಅಮ್ಮಂದಿರು ಕಟ್ಟಿಗೆಯಲ್ಲಿ ಅಡುಗೆ ಮಾಡಿ ತಮ್ಮ ಕುಟುಂಬವನ್ನು ಸಲುಹುತ್ತಿದ್ದಾರೆ. ಅಂತಹ ಕುಟುಂಬಗಳಿಗೆ ಉಚಿತ ಅಡುಗೆ ಅನಿಲ ಸಂಪರ್ಕ ಕಲ್ಪಿಸುವ ಉದ್ದೇಶ ಹೊಂದಲಾಗಿದೆ. ಆದ್ದರಿಂದ ನಿಮ್ಮ ಸಹಕಾರ, ಆಶೀರ್ವಾದ ನನಗೆ ಬೇಕಾಗಿದೆ. ಈ ದೇಶವನ್ನು ಉತ್ತುಂಗ ಸ್ಥಿತಿಗೆ ಕೊಂಡೊಯ್ಯಲು ಸಾಧ್ಯವಿದೆ. ಅದು ನನ್ನ ಕನಸು ಕೂಡ ಆಗಿದೆ ಎಂದರು. ಪಾಪದ ಕೆಲಸ ಮಾಡಲ್ಲ: ಮೋದಿ ಸರಕಾರ ಯಾವುದೇ ದೊಡ್ಡ ಕೆಲಸಗಳನ್ನು ಮಾಡುತ್ತಿಲ್ಲ ಎಂದು ಕೆಲವರು ದೂರುತ್ತಿದ್ದಾರೆ. ಅದರೆ, ಹಿಂದಿನ ಯುಪಿಎ ಸರಕಾರ ದೊಡ್ಡ ಕೆಲಸ ಮಾಡುವ ಮೂಲಕ ದೊಡ್ಡ ದೊಡ್ಡ ಹಗರಣಗಳಲ್ಲಿ ಸಿಲುಕಿದ್ದಾರೆ. ಅಂತಹ ಪಾಪದ ಕೆಲಸವನ್ನು ಎಂದಿಗೂ ಮಾಡುವುದಿಲ್ಲ. ನಿಮ್ಮ ಪ್ರೀತಿ ಆರ್ಶೀವಾದದಿಂದ ಅಂತಹ ದಾರಿಗೆ ಹೋಗುವುದೂ ಇಲ್ಲ. ಮಾತ್ರವಲ್ಲ ದೇಶವನ್ನು ಅಂತಹ ವಾಮಮಾರ್ಗಕ್ಕೆ ಹೋಗುವುದಕ್ಕೆ ಬಿಡುವುದೂ ಇಲ್ಲ ಎನ್ನುವ ಮೂಲಕ ಪರೋಕ್ಷವಾಗಿ ಕಾಂಗ್ರೆಸ್ ಪಕ್ಷವನ್ನು ಟೀಕಿಸಿದರು. ದೇಶದಲ್ಲಿ ಕೆಲವು ಜನರು ಕೇವಲ ರಾಜಕೀಯ ಮಾಡುವುದಕ್ಕಾಗಿಯೇ ರಾಜಕಾರಣಕ್ಕೆ ಬಂದಿದ್ದಾರೆ. ಅವರಿಗೆ ದೇಶದ ಅಭಿವೃದ್ದಿ ಬೇಕಾಗಿಲ್ಲ. ದೇಶದ ಜನರಿಂದ ಆಯ್ಕೆಯಾದ ಬಿಜೆಪಿ ಸರಕಾರವನ್ನು ಒಪ್ಪಿಕೊಳ್ಳಲು ಈಗಲೂ ಸಹ ಅವರಿಗೆ ಮನಸ್ಸಿಲ್ಲ. ಈತ ಎಲ್ಲಿಂದ ಬಂದ ಎನ್ನುತ್ತಿದ್ದಾರೆ. ಆದರೆ ನಾನು ಬೇರೆ ಎಲ್ಲಿಂದಲೋ ಬಂದ ವ್ಯಕ್ತಿಯಲ್ಲ. ಇದೇ ಮಣ್ಣಿನಲ್ಲಿ ಹುಟ್ಟಿದ ವ್ಯಕ್ತಿ. ದೇಶದ ಜನರಿಗಾಗಿಯೇ ಜನರ ಮಧ್ಯದಿಂದ ಬಂದಿದ್ದೇನೆ ಎಂದರು. ರೈತರು ಮತ್ತು ಜನಸಾಮಾನ್ಯರ ಅಭಿವೃದ್ದಿಯೇ ನಮ್ಮ ಸರಕಾರದ ಗುರಿಯಾಗಿದೆ. ಅದಕ್ಕಾಗಿ ನಾವು ಕೃಷಿ ಕ್ಷೇತ್ರಕ್ಕೆ ಹೆಚ್ಚಿನ ಆದ್ಯತೆ ನೀಡಿದ್ದೇವೆ. ಕೃಷಿ ಸಿಂಚನ, ಫಸಲ್ ಭೀಮಾ ಯೋಜನೆ, ಮಣ್ಣಿನ ಪರೀಕ್ಷೆ ಸೇರಿದಂತೆ ಹಲವಾರು ರೈತ ಪರ ಯೋಜನೆಗಳನ್ನು ಜಾರಿಗೆ ತರಲಾಗಿದೆ. ಅಲ್ಲದೇ ದೇಶದಲ್ಲಿನ ನಿರುದ್ಯೋಗದಲ್ಲಿರುವ ಯುವಪೀಳಿಗೆಗೆ ಅನುಕೂಲ ಆಗುವ ನಿಟ್ಟಿನಲ್ಲೂ ಹಲವಾರು ಯೋಜನೆಗಳನ್ನು ಜಾರಿಗೆ ತಂದು, ಕೌಲಶ್ಯ ಅಭಿವೃದ್ದಿ ನೀಡಲಾಗುತ್ತಿದೆ. ಸಾಲ ಸೌಲಭ್ಯ ನೀಡುವ ಮೂಲಕ ಅವರನ್ನು ಸ್ವಾವಲಂಬಿಗಳನ್ನಾಗಿಸುವುದು ನಮ್ಮ ಸರಕಾರದ ಗುರಿಯಾಗಿದೆ ಎಂದು ಹೇಳಿದರು. ವಿಕಾಸದ ಮಂತ್ರದ ಮೂಲ ಗುರಿಯೇ ಬಡವರಿಗೆ ಉತ್ತಮ ವಿದ್ಯಾಭ್ಯಾಸ, ಒಳ್ಳೇಯ ಆದಾಯ , ಬಡವರ ತಂದೆ ತಾಯಿಗಳಿಗೆ ಜೀವನಾವಶ್ಯಕ ಔಷಧಿ ನೀಡುವುದಾಗಿದೆ. ಈ ರೀತಿ ವಿದ್ಯಾಭ್ಯಾಸ, ಕೆಲಸ, ಔಷಧಿ ನೀಡುವಲ್ಲಿ ನಾವು ಸಫಲಾದರೆ ಈ ದೇಶದ ಪ್ರತಿಯೊಬ್ಬ ಬಡವರ ಮನೆ ತಲುಪಲು ಸಾಧ್ಯವಾಗುತ್ತದೆ. ಈ ರೀತಿಯಾದರೆ ನಮ್ಮ ದೇಶದ ಬಡವರು ಈ ದೇಶದ ಅಭಿವೃದ್ದಿಗೆ ಕೈ ಜೋಡಿಸುವಲ್ಲಿ ಯಾವತ್ತೂ ಹಿಂದೆ ಬೀಳುವುದಿಲ್ಲ. ಅವರೂ ನಮ್ಮ ಜೊತೆ ಧಾವಿಸಿ ದೇಶವನ್ನು ಅಭಿವೃದ್ದಿಯತ್ತ ತರಬಲ್ಲರು ಎನ್ನುವ ವಿಶ್ವಾಸವನ್ನು ವ್ಯಕ್ತಪಡಿಸಿದರು. ನಮ್ಮ ಸರಕಾರ ಕೇವಲ ಪದವಿಗಳನ್ನು ನೀಡುವ ಜೊತೆಯಲ್ಲಿ ಕೌಶಲ್ಯ ಅಭಿವೃದ್ದಿಗೆ ಹೆಚ್ಚಿನ ಗಮನ ನೀಡುತ್ತಿದೆ. ಅಲ್ಲದೇ ಕೇಂದ್ರ ಸರಕಾರದಲ್ಲಿ ಖಾಲಿ ಇರುವ ಹುದ್ದೆಗಳಿಗೆ ಇನ್ನು ಮುಂದೆ ಯಾವುದೇ ನೌಕರಿಗೆ ಮಧ್ಯವರ್ತಿಗಳ ಹಾವಳಿ ಇಲ್ಲದೇ, ಲಂಚವಿಲ್ಲದೇ ಉತ್ತಮ ಅಂಕ ಪಡೆದ ಪ್ರತಿಭಾವಂತರಿಗೆ ಅವರ ಮನೆ ಬಾಗಿಲಿಗೆ ಕೆಲಸ ನೀಡುವ ಕಾರ್ಯಕ್ಕೆ ನಮ್ಮ ಸರಕಾರ ಮುಂದಾಗಿದೆ. ಇದಕ್ಕಾಗಿ ದೇಶದ 125 ಕೋಟಿ ಜನರು ಸಹಕಾರ ನೀಡಬೇಕು ಎಂದು ಕರೆ ನೀಡಿದರು.  ಸುಡು ಬಿಸಿಲನ್ನು ಲೆಕ್ಕಿಸದೇ ಲಕ್ಷಾಂತರ ಜನರು ನನಗೆ ಪ್ರೀತಿ ಆಶೀರ್ವಾದ ನೀಡಲು ಬಂದಿದ್ದೀರಾ. ಇದು ನನ್ನ ಸೌಭಾಗ್ಯ. ಈಗ ಯಾವುದೇ ಚುನಾವಣೆ ಇಲ್ಲ. ಆಂದೋಲನ ಇಲ್ಲ. ಬೇಡಿಕೆಗಳು ಇಲ್ಲ ಆದರೆ ನಿಮ್ಮ ಮೇಲಿನ ಪ್ರೀತಿಯಿಂದ ನಾನು ಇಲ್ಲಿಗೆ ಬಂದಿದ್ದೇನೆ. ಈ ಭೂಮಿಗೆ ನಮಸ್ಕಾರ ಮಾಡುತ್ತೇನೆ. ಇಲ್ಲಿ ಸೇರಿರುವ ಜನರಿಗೆ ನಮಸ್ಕಾರ ಮಾಡುತ್ತೇನೆ. ನಿಮ್ಮ ಆಶೀರ್ವಾದ ಮತ್ತು ಪ್ರೋತ್ಸಾಹದಿಂದ ನಾನು ಅಧಿಕಾರಕ್ಕೆ ಬಂದಿದ್ದೇನೆ. ನಿಜಕ್ಕೂ ನಮ್ಮ ದೇಶ ಬದಲಾಗುತ್ತಿದೆ. ಅದಕ್ಕಾಗಿ ದೇಶದ ಜನತೆಗೆ ದನ್ಯವಾದಗಳು . ವಿಕಾಸದ ಯಾತ್ರೆಯಲ್ಲಿ ನನಗೆ ದೇಶದ ಜನತೆಯ ಸಹಕಾರ ಬೇಕಿದೆ. ಮೂಲಭೂತ ಸೌಲಭ್ಯಗಳನ್ನು ನೀಡಲು ನಾನು ಬದ್ದನಾಗಿದ್ದೇನೆ ಎಂದರು.