ನೆಲ್ಯಾಡಿ: ಮರಳು ಲಾರಿಯ ರಾದ್ಧಾಂತಕ್ಕೆ ಮಹಿಳೆ ಬಲಿ

ನೆಲ್ಯಾಡಿ, ಜೂ.15: ಮರಳು ಸಾಗಾಟಕ್ಕೆಂದು ಬೆಂಗಳೂರಿನಿಂದ ಮಂಗಳೂರಿಗೆ ಬರುತ್ತಿದ್ದ ಲಾರಿಯೊಂದು ಢಿಕ್ಕಿ ಹೊಡೆದ ಪರಿಣಾಮ ಪಾದಚಾರಿ ಮಹಿಳೆಯೋರ್ವರು ಸ್ಥಳದಲ್ಲೇ ಮೃತಪಟ್ಟ ದಾರುಣ ಘಟನೆ ಜೂ.15ರಂದು ಬೆಳಿಗ್ಗೆ ರಾಷ್ಟ್ರೀಯ ಹೆದ್ದಾರಿ 75ರ ಗೋಳಿತ್ತೊಟ್ಟಿನಲ್ಲಿ ನಡೆದಿದೆ.

ಗೋಳಿತ್ತೊಟ್ಟು ಸರಕಾರಿ ಉನ್ನತ ಹಿ.ಪ್ರಾ.ಶಾಲೆಯಲ್ಲಿ ಮುಖ್ಯ ಅಡುಗೆಯವರಾಗಿದ್ದ ಕೊಣಾಲು ಗ್ರಾಮದ ನೆಕ್ಕರೆ ನಿವಾಸಿ ಜಾನಕಿ(40)ಮೃತಪಟ್ಟವರು.

ಇವರು ಎಂದಿನಂತೆ ಬೆಳಗ್ಗೆ ತನ್ನ ಕಿರಿಯ ಪುತ್ರಿ ಪಲ್ಲವಿ ಜೊತೆಗೆ ಗೋಳಿತ್ತೊಟ್ಟು ಶಾಲೆಗೆ ಬಿಸಿಯೂಟ ತಯಾರಿಕೆಯ ಕೆಲಸಕ್ಕೆ ಹೊರಟಿದ್ದು ಈ ವೇಳೆ ಬೆಂಗಳೂರಿನಿಂದ ಮಂಗಳೂರಿಗೆ ಮರಳು ಸಾಗಾಟಕ್ಕೆಂದು ಬರುತ್ತಿದ್ದ ಲಾರಿ(ಕೆಎ 52-1617)ಗೋಳಿತ್ತೊಟ್ಟು-ಕೋಲ್ಪೆಮಧ್ಯೆ ಇರುವ ಗೋಳಿತ್ತೊಟ್ಟು ಸೇತುವೆ ಬಳಿ ಡಿಕ್ಕಿ ಹೊಡೆದಿದೆ. ಪರಿಣಾಮ ಜಾನಕಿಯವರು ಸ್ಥಳದಲ್ಲೇ ಮೃತಪಟ್ಟಿದ್ದಾರೆ ಎಂದು ವರದಿಯಾಗಿದೆ.

ಈ ವೇಳೆ ಜಾನಕಿ ಜೊತೆಗಿದ್ದ ಆಕೆಯ ಮಗಳು ಪಲ್ಲವಿ ಲಾರಿ ವೇಗವಾಗಿ ಬರುತ್ತಿದುದ್ದನ್ನು ಗಮನಿಸಿ ಹಿಂದೆ ಸರಿದಿರುವುದರಿಂದ ಅಪಾಯದಿಂದ ಪಾರಾಗಿದ್ದಾರೆ. ತಾಯಿಗೆ ಲಾರಿ ಢಿಕ್ಕಿ ಹೊಡೆದುದ್ದನ್ನು ಗಮನಿಸಿದ ಪಲ್ಲವಿ ಬೊಬ್ಬೆ ಹೊಡೆಯುತ್ತ ಮತ್ತೆ ಮನೆ ಕಡೆಗೆ ಓಡಿದ್ದಾರೆ. ಘಟನಾ ಸ್ಥಳದಿಂದ ತುಸು ಮುಂದೆ ಬೈಕ್‌ನಲ್ಲಿದ್ದ ಕೋಲ್ಪೆನಿವಾಸಿ ಇಸ್ಮಾಯೀಲ್ ಎಂಬವರು ತಕ್ಷಣ ಸ್ಥಳಕ್ಕೆ ಬಂದಿದ್ದು ಲಾರಿ ಚಾಲಕ ಲಾರಿ ನಿಲ್ಲಿಸದೇ ಪರಾರಿಯಾಗೆಲೆತ್ನಿಸುತ್ತಿರುವುದನ್ನು ಗಮನಿಸಿ ತಡೆಯೊಡ್ಡಿದ್ದಾರೆ. ಈ ವೇಳೆ ಲಾರಿ ಚಾಲಕ ಹಾಗೂ ನಿರ್ವಾಹಕ ಲಾರಿ ಬಿಟ್ಟು ಸ್ಥಳದಿಂದ ಪರಾರಿಯಾಗಿದ್ದಾರೆ ಎಂದು ವರದಿಯಾಗಿದೆ. ಘಟನೆಯಿಂದಾಗಿ ಹೆದ್ದಾರಿಯಲ್ಲಿ ವಾಹನ ಸಂಚಾರದಲ್ಲೂ ಅಡಚಣೆ ಉಂಟಾಗಿತ್ತು. ಬಳಿಕ ಮೃತದೇಹವನ್ನು ಉಪ್ಪಿನಂಗಡಿ ಸಮುದಾಯ ಆರೋಗ್ಯ ಕೇಂದ್ರದಲ್ಲಿ ಮರಣೋತ್ತರ ಪರೀಕ್ಷೆ ನಡೆಸಿ ಸಂಬಂಧಿಕರಿಗೆ ಬಿಟ್ಟುಕೊಡಲಾಗಿದೆ.

ಮೃತ ಜಾನಕಿಯವರು ತಾಯಿ ಗಂಗಮ್ಮ, ಪುತ್ರ ಪ್ರವೀಣ್, ಪುತ್ರಿಯರಾದ ಪವಿತ್ರಾ, ಪಲ್ಲವಿ, ಸಹೋದರರಾದ ಶೀನಪ್ಪ, ಕುಶಾಲಪ್ಪ, ಹರೀಶ್‌ರನ್ನು ಅಗಲಿದ್ದಾರೆ. ಘಟನಾ ಸ್ಥಳಕ್ಕೆ ಹಾಗೂ ಮೃತರ ಮನೆಗೆ ನೆಲ್ಯಾಡಿ ಜಿ.ಪಂ.ಸದಸ್ಯ ಸರ್ವೋತ್ತಮ ಗೌಡ, ತಾ.ಪಂ.ಸದಸ್ಯೆ ತೇಜಸ್ವಿನಿ ಶೇಖರ ಗೌಡ, ಡಿಸಿಸಿ ಸದಸ್ಯ ಕೆ.ಪಿ.ತೋಮಸ್, ಗೋಳಿತ್ತೊಟ್ಟು ಗ್ರಾ.ಪಂ.ಅಧ್ಯಕ್ಷೆ ಶಾಲಿನಿ ಶೇಖರ ಪೂಜಾರಿ, ಉಪಾಧ್ಯಕ್ಷ ಪ್ರಸಾದ್ ಕೆ.ಪಿ., ಸದಸ್ಯರುಗಳಾದ ವಿಶ್ವನಾಥ ಕುಲಾಲ್, ಮುತ್ತಪ್ಪ, ನೇಮಣ್ಣ ಪೂಜಾರಿ ಕಲಾಯಿ, ಡೀಕಯ್ಯ ಪೂಜಾರಿ, ಗ್ರಾ.ಪಂ.ಮಾಜಿ ಉಪಾಧ್ಯಕ್ಷ ಅಬ್ದುಲ್ ನಾಸಿರ್ ಹೊಸಮನೆ, ಗೋಳಿತ್ತೊಟ್ಟು ಸರಕಾರಿ ಹಿ.ಪ್ರಾ.ಶಾಲಾ ಎಸ್‌ಡಿಎಂಸಿ ಅಧ್ಯಕ್ಷ ರಾಮಕೃಷ್ಣ ಭಟ್, ಮಾಜಿ ಅಧ್ಯಕ್ಷ ಕುಶಾಲಪ್ಪ ಗೌಡ ಅನಿಲ, ಸತೀಶ್ ರೈ ಕೊಣಾಲುಗುತ್ತು, ಹಿಂಜಾವೇ ಮುಖಂಡ ರವಿಪ್ರಸಾದ್ ಶೆಟ್ಟಿ ನೆಲ್ಯಾಡಿ, ಗೋಳಿತ್ತೊಟ್ಟು ಶಾಲಾ ಮುಖ್ಯಶಿಕ್ಷಕ ಶೀನಪ್ಪ ನಾಕ್, ಶಿಕ್ಷಕರುಗಳಾದ ಅನ್ನಮ್ಮ, ಜಾನ್ ಕೆ.ಪಿ., ತೇಜಸ್ವಿನಿ, ಸೀಮಾ, ವತ್ಸಲಾ, ಲತೀಫ್ ಸೇರಿದಂತೆ ಹಲವು ಮಂದಿ ಭೇಟಿ ನೀಡಿ ಸಂತಾಪ ಸೂಚಿಸಿದ್ದಾರೆ. ಮೃತರ ಗೌರವಾರ್ಥ ಗೋಳಿತ್ತೊಟ್ಟು ಶಾಲೆಗೆ ರಜೆ ಸಾರಲಾಗಿತ್ತು. ಘಟನಾ ಸ್ಥಳಕ್ಕೆ ಉಪ್ಪಿನಂಗಡಿ ಎಸ್.ಐ.ತಿಮ್ಮಪ್ಪ ನಾಯ್ಕ ಭೇಟಿ ನೀಡಿ ಪ್ರಕರಣ ದಾಖಲಿಸಿಕೊಂಡಿದ್ದಾರೆ.

ಲಾರಿ ಜಖಂ

ಘಟನೆ ಸುದ್ದಿ ತಿಳಿಯುತ್ತಿದ್ದಂತೆ ನೂರಾರು ಮಂದಿ ಸ್ಥಳದಲ್ಲಿ ನೆರೆದಿದ್ದು ಅಪಘಾತಕ್ಕೆ ಕಾರಣವಾದ ಲಾರಿಯನ್ನು ಜಖಂಗೊಳಿಸಿದ್ದಾರೆ. ಜನರ ಆಕ್ರೋಶಕ್ಕೆ ಲಾರಿಯ ಮುಂಭಾಗದ ಗ್ಲಾಸು ಪುಡಿಯಾಗಿದೆ. ರಾಷ್ಟ್ರೀಯ ಹೆದ್ದಾರಿಯಲ್ಲಿ ಹಗಲು, ರಾತ್ರಿ ಎನ್ನದೆ ಮರಳು ಸಾಗಾಟದ ಲಾರಿಗಳು ನಿರಂತರ ಓಡಾಟ ನಡೆಸುತ್ತಿದ್ದು ಇದರ ಚಾಲಕರ ಅತಿವೇಗ ಹಾಗೂ ನಿರ್ಲಕ್ಷ್ಯದ ಚಾಲನೆಯಿಂದಾಗಿ ಪದೇ ಪದೇ ಅಪಘಾತಗಳು ನಡೆಯುತ್ತಲೇ ಇವೆ. ಮರಳು ಸಾಗಾಟದ ಲಾರಿಗಳ ಅಪರಿಮಿತ ವೇಗದಿಂದಾಗಿ ರಾಷ್ಟ್ರೀಯ ಹೆದ್ದಾರಿಯಲ್ಲಿ ಬೈಕ್ ಹಾಗೂ ಇನ್ನಿತರ ಲಘು ವಾಹನಗಳಲ್ಲಿ ಓಡಾಟ ನಡೆಸುವವರು ಜೀವ ಭಯದಿಂದಲೇ ಹೋಗಬೇಕಾಗಿದೆ. ಪೊಲೀಸರು ಮರಳು ಸಾಗಾಟದ ಲಾರಿಗಳ ಅಪರಿಮಿತ ವೇಗಕ್ಕೆ ಕಡಿವಾಣ ಹಾಕುವ ನಿಟ್ಟಿನಲ್ಲಿ ಕ್ರಮ ಕೈಗೊಳ್ಳುವಂತೆಯೂ ಸಾರ್ವಜನಿಕರು ಆಗ್ರಹಿಸಿದ್ದಾರೆ.

ಅಪಾಯಕಾರಿ ತಿರುವು

ಜಾನಕಿಯವರನ್ನು ಬಲಿತೆಗೆದುಕೊಂಡ ಸ್ಥಳ ಅಪಾಯಕಾರಿ ತಿರುವಾಗಿದೆ. ಇಲ್ಲಿ ಪದೇ ಪದೇ ಅಪಘಾತಗಳು ನಡೆಯುತ್ತಲೇ ಇವೆ. ಕೋಲ್ಪೆಯಿಂದ ಗೋಳಿತ್ತೊಟ್ಟು ನಡುವೆ ಕಡಿದಾದ ಇಳಿಜಾರು ಹಾಗೂ ತಿರುವುಗಳ ನಡುವೆ ಈ ಸೇತುವೆ ಇದ್ದು ಇಲ್ಲಿ ಅಪಘಾತಗಳು ಪದೇ ಪದೇ ನಡೆಯುತ್ತಲೇ ಇವೆ. ಸೇತುವೆಯೂ ಶಿಥಿಲಗೊಂಡಿದ್ದು ಸೇತುವೆಯ ತಡೆಗೋಡೆಗೆ ವಾಹನಗಳು ಪದೇ ಪದೇ ಢಿಕ್ಕಿ ಹೊಡೆಯುತ್ತಿರುವುದರಿಂದ ಸೇತುವೆಯ ತಡೆಗೋಡೆಯೂ ಮುರಿದುಹೋಗಿದೆ. ಇತ್ತೀಚೆಗೆ ನಡೆದ ಗೋಳಿತ್ತೊಟ್ಟು ಗ್ರಾಮ ಪಂಚಾಯತ್ ಸಾಮಾನ್ಯ ಸಭೆಯಲ್ಲೂ ಇಲ್ಲಿನ ಅಪಾಯಕಾರಿ ತಿರುವಿನ ಬಗ್ಗೆ ಚರ್ಚೆ ನಡೆದಿದ್ದು ಈ ಬಗ್ಗೆ ಹೆದ್ದಾರಿ ಇಲಾಖೆಗೆ ಬರೆಯಲು ನಿರ್ಣಯ ಕೈಗೊಳ್ಳಲಾಗಿತ್ತು. ಇನ್ನಾದರೂ ಹೆದ್ದಾರಿ ಇಲಾಖೆಯವರು ಎಚ್ಚೆತ್ತುಕೊಂಡು ಇಲ್ಲಿನ ಅಪಾಯಕಾರಿ ತಿರುವಿನ ಬಗ್ಗೆ ಎಚ್ಚರಿಕೆ ಪಲಕ ಇಲ್ಲವೇ ಇನ್ನಿತರ ಶಾಶ್ವತ ಕ್ರಮ ಕೈಗೊಳ್ಳಬೇಕೆಂದು ಸಾರ್ವಜನಿಕರು ಒತ್ತಾಯಿಸಿದ್ದಾರೆ.

ಅನಾಥರಾದ ಮೂವರು ಮಕ್ಕಳು

ಗೋಳಿತ್ತೊಟ್ಟು ಗ್ರಾಮದ ನೆಕ್ಕರೆ ಗುರುವ ಹಾಗೂ ಗಂಗಮ್ಮ ದಂಪತಿ ಪುತ್ರಿಯಾದ ಜಾನಕಿಯವರನ್ನು ಕಡಬ ಗ್ರಾಮದ ಮಜ್ಜಗುಡ್ಡೆಯ ಶೀನಪ್ಪ ಎಂಬವರಿಗೆ ಮದುವೆ ಮಾಡಿಕೊಡಲಾಗಿದ್ದು ಶೀನಪ್ಪ ಹಾಗೂ ಜಾನಕಿ ದಂಪತಿಗೆ ಓರ್ವ ಪುತ್ರ ಹಾಗೂ ಇಬ್ಬರು ಪುತ್ರಿಯರಿದ್ದಾರೆ. ಪತಿ ಶೀನಪ್ಪ 5 ವರ್ಷಗಳ ಹಿಂದೆ ಇಲಿಜ್ವರ ಹಾಗೂ ಹಳದಿರೋಗಕ್ಕೆ ತುತ್ತಾಗಿ ಮೃತಪಟ್ಟಿದ್ದು, ಬಳಿಕ ಜಾನಕಿ ತವರು ಮನೆಯಾದ ಗೋಳಿತ್ತೊಟ್ಟು ಗ್ರಾಮದ ನೆಕ್ಕರೆಗೆ ಬಂದಿದ್ದು ಮೂವರು ಮಕ್ಕಳೊಂದಿಗೆ ತಾಯಿ ಗಂಗಮ್ಮ, ಸಹೋದರ ಹರೀಶ್ ಜೊತೆಯಲ್ಲಿ ಒಂದೇ ಮನೆಯಲ್ಲಿ ವಾಸವಾಗಿದ್ದರು.

ಜಾನಕಿಯವರು ಸುಮಾರು 4 ವರ್ಷಗಳಿಂದ ಗೋಳಿತ್ತೊಟ್ಟು ಶಾಲೆಯಲ್ಲಿ ಮುಖ್ಯ ಅಡುಗೆಯವರಾಗಿ ಕೆಲಸ ಮಾಡಿಕೊಂಡು ಮಕ್ಕಳಿಗೆ ವಿದ್ಯಾಭ್ಯಾಸ ಮಾಡಿಸುತ್ತಿದ್ದರು. ಇವರ ಹಿರಿಯ ಮಗ ಪ್ರವೀಣ್ 9ನೇ ತರಗತಿಗೆ ಕಲಿಕೆ ಮೊಟಕುಗೊಳಿಸಿ ಮನೆಯಲ್ಲೇ ಇದ್ದಾರೆ. ಪುತ್ರಿ ಪವಿತ್ರಾ ಕೊಣಾಲು ಸರಕಾರಿ ಪ್ರೌಢಶಾಲೆಯಲ್ಲಿ 10ನೆ ತರಗತಿಯಲ್ಲಿ ಕಲಿಯುತ್ತಿದ್ದು ಇನ್ನೋರ್ವ ಪುತ್ರಿ ಪಲ್ಲವಿ ಗೋಳಿತ್ತೊಟ್ಟು ಸರಕಾರಿ ಉನ್ನತ ಹಿ.ಪ್ರಾ.ಶಾಲೆಯಲ್ಲಿ 8ನೆ ತರಗತಿಯಲ್ಲಿ ಕಲಿಯುತ್ತಿದ್ದಾರೆ. ತಂದೆಯನ್ನು ಕಳೆದುಕೊಂಡು ತಾಯಿಯ ಆಸರೆಯಲ್ಲಿ ಬೆಳೆಯುತ್ತಿದ್ದ ಮೂವರು ಮಕ್ಕಳು ಇದೀಗ ತಾಯಿಯನ್ನು ಕಳೆದುಕೊಂಡು ಅನಾಥರಾಗಿದ್ದಾರೆ.