ದ.ಕ.: ಮತ್ತೆ ಆತಂಕ ಸೃಷ್ಟಿಸಿದೆ ಡೆಂಗ್ ಮಹಾಮಾರಿ

ಮಂಗಳೂರು, ಜೂ.15: ದ.ಕ ಜಿಲ್ಲೆಯಲ್ಲಿ ಪ್ರತಿವರ್ಷ ಭಯ ಹುಟ್ಟಿಸುತ್ತಿರುವ ಡೆಂಗ್ ಜ್ವರ ಈ ಬಾರಿ ಮತ್ತೆ ಆತಂಕವನ್ನು ಸೃಷ್ಟಿಮಾಡಿದೆ. ಕಳೆದ ವರ್ಷಕ್ಕೆ ಹೋಲಿಸಿದರೆ ಜಿಲ್ಲೆಯಲ್ಲಿ ಡೆಂಗ್ ಜ್ವರ ಹೆಚ್ಚಿದ್ದು ಜನ ಹೆಚ್ಚಿನ ಸಂಖ್ಯೆಯಲ್ಲಿ ಡೆಂಗ್ ಜ್ವರದಿಂದ ಬಳಲುತ್ತಿದ್ದಾರೆ.

ಕಳೆದ ವರ್ಷದಲ್ಲಿ ಡೆಂಗ್ ಪ್ರಕರಣದಲ್ಲಿ ಮೂವರು ಸಾವನ್ನಪ್ಪಿದ್ದರೆ, ಈ ವರ್ಷ ಈಗಾಗಲೆ 4 ಮಂದಿ ಡೆಂಗ್ ಜ್ವರದಿಂದಾಗಿ ಸಾವನ್ನಪ್ಪಿರುವ ಬಗ್ಗೆ ಶಂಕೆಯಿದೆ. ಸುಳ್ಯದ ಗುತ್ತಿಗಾರು, ಕಾಣಿಯೂರು, ಪುತ್ತೂರು, ಬಂಟ್ವಾಳದಲ್ಲಿ ಡೆಂಗ್ ಜ್ವರ ಹೆಚ್ಚಿದೆ. ಡೆಂಗ್ ಜ್ವರ ಪುತ್ತೂರು ತಾಲೂಕಿನಲ್ಲಿ ಆತಂಕಿತ ರೀತಿಯಲ್ಲಿ ಹೆಚ್ಚಳವಾಗಿದೆ. 2015ರಲ್ಲಿ ಇಡೀ ವರ್ಷದಲ್ಲಿ 434 ಡೆಂಗ್ ಪ್ರಕರಣಗಳು ವರದಿಯಾಗಿದ್ದರೆ, 2016ರಲ್ಲಿ ಈವರೆಗೆ 341 ಡೆಂಗ್ ಪ್ರಕರಣಗಳು ವರದಿಯಾಗಿವೆ. 

ಈ ವರ್ಷದ ಜನವರಿಯಲ್ಲಿ 17, ಫೆಬ್ರವರಿಯಲ್ಲಿ 7, ಮಾರ್ಚ್‌ನಲ್ಲಿ 15, ಎಪ್ರಿಲ್‌ನಲ್ಲಿ 26, ಮೇ ತಿಂಗಳಲ್ಲಿ 68 ಪ್ರಕರಣಗಳು ಪತ್ತೆಯಾದರೆ ಜೂನ್ 10ರವರೆಗೆ 208 ಪ್ರಕರಣಗಳು ವರದಿಯಾಗಿವೆ. ಕಳೆದ ವರ್ಷ ಜೂನ್ ತಿಂಗಳಲ್ಲಿ 209 ಡೆಂಗ್ ಪ್ರಕರಣಗಳು ವರದಿಯಾಗಿತ್ತು. ಕಳೆದ ವರ್ಷದ ಅಂಕಿ ಅಂಶವನ್ನು ಹೋಲಿಸಿದರೆ ಈ ವರ್ಷದಲ್ಲಿ ಡೆಂಗ್ ಪ್ರಕರಣಗಳು ಹೆಚ್ಚಿರುವುದು ಕಂಡುಬಂದಿದೆ.

ಮಂಗಳೂರು ಮಹಾನಗರಪಾಲಿಕೆ ವ್ಯಾಪ್ತಿಯಲ್ಲಿ 19, ಮಂಗಳೂರು ತಾಲೂಕಿನಲ್ಲಿ 19, ಬಂಟ್ವಾಳ ತಾಲೂಕಿನಲ್ಲಿ 40, ಬೆಳ್ತಂಗಡಿ ತಾಲೂಕಿನಲ್ಲಿ 34, ಸುಳ್ಯ ತಾಲೂಕಿನಲ್ಲಿ 46, ಪುತ್ತೂರು ತಾಲೂಕಿನಲ್ಲಿ 50 ಡೆಂಗ್ ಪ್ರಕರಣಗಳು ಕೇವಲ ಜೂನ್ ತಿಂಗಳಲ್ಲಿ ವರದಿಯಾಗಿದ್ದು, ಇದು ಇನ್ನಷ್ಟು ಹೆಚ್ಚುವ ಸಾಧ್ಯತೆಯಿದೆ.

ಇದಕ್ಕಿದ್ದಂತೆ ತೀವ್ರ ಜ್ವರ, ಹಣೆಯ ಭಾಗದಲ್ಲಿ ನೋವು, ಕಣ್ಣುಗಡ್ಡೆಗಳಲ್ಲಿ ನೋವು, ಮಾಂಸಖಂಡಗಳಲ್ಲಿ ತೀವ್ರ ನೋವು ಇದ್ದಲ್ಲಿ ಡೆಂಗ್ ಜ್ವರವೆಂದು ತಿಳಿಯಬಹುದು. ಮೈಮೇಲೆ ಕೆಂಪು ಗುಳ್ಳೆಗಳು, ಕಣ್ಣು ಕೆಂಪಾಗುವುದು, ಒಸಡು, ಮೂಗಿನಲ್ಲಿ ರಕ್ತಸ್ರಾವದ ಲಕ್ಷಣ, ಕೆಂಪಾದ ಮೂತ್ರ, ಮಲ ಕಪ್ಪಾಗಿದ್ದಲ್ಲಿ ಆಸ್ಪತ್ರೆಯಲ್ಲಿ ತಪಾಸಣೆ ಮಾಡುವುದು ಅತೀ ಅಗತ್ಯವಾಗಿದೆ. ಡೆಂಗ್ ಜ್ವರದ ಪ್ರಾಥಮಿಕ ಪರೀಕ್ಷೆಯನ್ನು ಎಲ್ಲಾ ಆರೋಗ್ಯ ಕೇಂದ್ರಗಳಲ್ಲಿ ಮಾಡಲಾಗುತ್ತಿದ್ದು ಬೇಗನೆ ಪತ್ತೆ ಹಚ್ಚಿ ಸರಿಯಾದ ರೀತಿಯಲ್ಲಿ ನಿರ್ವಹಣೆ ಮಾಡಿದರೆ ಮರಣದ ಅಪಾಯವನ್ನು ತಪ್ಪಿಸಬಹುದು ಎಂದು ಆರೋಗ್ಯ ಇಲಾಖೆ ಪ್ರಚಾರ ಮಾಡುತ್ತಿದೆ.

ಆರೋಗ್ಯ ಇಲಾಖೆಯು ಸಾರ್ವಜನಿಕರು ಈ ರೀತಿಯ ಮುನ್ನೆಚ್ಚರಿಕೆ ತೆಗೆದುಕೊಳ್ಳುವಂತೆ ಸೂಚಿಸಿದೆ.

• ನೀರು ಸಂಗ್ರಹಿಸುವಾಗ ಭದ್ರವಾದ ಮುಚ್ಚಳ ಅಳವಡಿಸಿ ಅಥವಾ ವಾರದಲ್ಲಿ ಒಂದು ಸಲ ನೀರು ಖಾಲಿ ಮಾಡಿ ತಿಕ್ಕಿ ತೊಳೆದು, ಒಣಗಿಸಿ ಬಳಿಕ ನೀರು ತುಂಬಿಸಬೇಕು.
• ಎಳನೀರು ಚಿಪ್ಪು, ಗೆರಟೆ, ಟಯರ್, ಬಾಟ್ಲಿ ಇತ್ಯಾದಿ ಘನತ್ಯಾಜ್ಯ ವಸ್ತುಗಳಲ್ಲಿ ನೀರು ನಿಲ್ಲದಂತೆ ಸೂಕ್ತ ರೀತಿಯಲ್ಲಿ ವಿಲೇವಾರಿ ಮಾಡಬೇಕು. *ಬಾವಿಗಳಲ್ಲಿ ಗಪ್ಪಿ, ಗಂಬೂಶಿಯಾ ಮೀನುಗಳನ್ನು ಸಾಕಬೇಕು.
• ಮನೆಯ ಪರಿಸರದಲ್ಲಿ ನೀರು ನಿಲ್ಲದಂತೆ ಕ್ರಮ ಕೈಗೊಳ್ಳಬೇಕು.
• ಯಾವುದೇ ಜ್ವರವಿದ್ದರೂ ಹತ್ತಿರದ ಸರಕಾರಿ ಆಸ್ಪತ್ರೆ ಅಥವಾ ಆರೋಗ್ಯ ಕೇಂದ್ರಕ್ಕೆ ಭೇಟಿ ನೀಡಬೇಕು. 

ಡೆಂಗ್ ಜ್ವರವನ್ನು ತಡೆಗಟ್ಟಲು ಬೇಕಾದ ಕ್ರಮಗಳನ್ನು ಇಲಾಖೆಯು ಕೈಗೊಳ್ಳುತ್ತಿದೆ. ಮಳೆ ಬಿಟ್ಟು ಬಿಟ್ಟು ಬರುತ್ತಿರುವ ಈ ವಾತಾವರಣದಲ್ಲಿ ಡೆಂಗ್ ಪ್ರಕರಣಗಳು ಹೆಚ್ಚು ವರದಿಯಾಗುತ್ತವೆ. ನಿರಂತರ ಮಳೆ ಬಂದರೆ ಡೆಂಗ್ ಪ್ರಕರಣಗಳು ಕಡಿಮೆಯಾಗಲಿವೆ. ಜಿಲ್ಲೆಯ ಎಲ್ಲ ಪ್ರಾಥಮಿಕ ಆರೋಗ್ಯ ಕೇಂದ್ರಗಳು ಸೇರಿದಂತೆ ಇಲಾಖೆಯು ಡೆಂಗ್ ನಿಯಂತ್ರಣಕ್ಕೆ ಶ್ರಮಿಸುತ್ತಿವೆ.

- ಡಾ.ರಾಮಕೃಷ್ಣ ರಾವ್, ದ.ಕ ಜಿಲ್ಲಾ ಆರೋಗ್ಯಾಧಿಕಾರಿ.