ಚಿಕ್ಕಮಗಳೂರು: ಡೆಂಗ್, ಚಿಕುನ್ಗುನ್ಯ ನಿಯಂತ್ರಣ ಕ್ರಮಕ್ಕೆ ಒತ್ತಾಯ
ಚಿಕ್ಕಮಗಳೂರು, ಜೂ.17: ಜಿಲ್ಲೆಯಾದ್ಯಂತ ಮಾರಣಾಂತಿಕ ಕಾಯಿಲೆಗಳಾದ ಡೆಂಗ್ ಜ್ವರ ಹಾಗೂ ಚಿಕುನ್ಗುನ್ಯ ಇತ್ತೀಚೆಗೆ ವ್ಯಾಪಿಸುತ್ತಿದ್ದು, ನೂರಾರು ಮಂದಿ ಸರಕಾರಿ ಆಸ್ಪತ್ರೆಗಳಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ. ಈ ಬಗ್ಗೆ ಸಂಬಂಧಿಸಿದವರು ತಕ್ಷಣ ಕ್ರಮ ಜರಗಿಸಿ ಜ್ವರದ ನಿಯಂತ್ರಣಕ್ಕೆ ಮುಂದಾಗಬೇಕು ಎಂದು ಜನಪರ ಹೋರಾಟಗಾರ ರವೀಶ್ ಕ್ಯಾತನಬೀಡು ಮತ್ತು ಮಲೆನಾಡು ಗ್ರಾಹಕರ ಹಕ್ಕು ಹಿತರಕ್ಷಣಾ ವೇದಿಕೆ ಕಾರ್ಯದರ್ಶಿ ಎಸ್.ಪ್ರಭು ಪತ್ರಿಕಾ ಪ್ರಕಟನೆಯ ಮೂಲಕ ಒತ್ತಾಯಿಸಿದ್ದಾರೆ.
ಜಿಲ್ಲಾಡಳಿತ ಇಂತಹ ಮಾರಣಾಂತಿಕ ರೋಗದ ಬಗ್ಗೆ ಜನ ಜಾಗೃತಿ ಮೂಡಿಸಿ ಜಿಲ್ಲೆಯಾದ್ಯಂತ ರೋಗ ನಿಯಂತ್ರಣಕ್ಕೆ ಮುಂದಾಗಬೇಕು. ಆದರೆ ಇಂತಹ ಕೆಲಸಕ್ಕೆ ಚುನಾಯಿತ ಪ್ರತಿನಿಧಿಗಳು ಹಾಗೂ ಸ್ಥಳೀಯ ಆಡಳಿತಗಳು ಹಾಗೂ ಜಿಲ್ಲಾಡಳಿತ ಮುಂದಾಗದಿರುವುದು ವಿಷಾದನೀಯ. ಜಿಲ್ಲೆಯಲ್ಲಿ ಈಗಾಗಲೇ ಎಲ್ಲಾ ಸರಕಾರಿ ಹಾಗೂ ಖಾಸಗಿ ಆಸ್ಪತ್ರೆಗಳಲ್ಲಿ ರೋಗಿಗಳು ಚಿಕಿತ್ಸೆಪಡೆಯಲು ಪರದಾಡುತ್ತಿದ್ದಾರೆ. ಸಂಬಂಧಿತ ರೋಗಕ್ಕೆ ಔಷಧಿ ಸಾಮಗ್ರಿಗಳು ಹಾಗೂ ರಕ್ತ ಪರೀಕ್ಷೆಯ ಲ್ಯಾಬ್ಗಳು ಸಮರ್ಪಕವಾಗಿಲ್ಲದಿರುವುದು ರೋಗಿಗಳಲ್ಲಿ ಆತಂಕವನ್ನುಂಟು ಮಾಡಿದೆ ಎಂದು ಹೇಳಿದ್ದಾರೆ.
ಹೆಚ್ಚುವರಿ ಚಿಕಿತ್ಸೆಗಾಗಿ ಪಕ್ಕದ ಜಿಲ್ಲೆಗಳನ್ನು ಆಶ್ರಯಿಸುತ್ತಿರುವುದು ಸ್ಥಳೀಯ ಆಡಳಿತದ ವೈಫಲ್ಯವನ್ನು ತೋರಿಸುತ್ತಿದೆ. ನಗರದಲ್ಲಿ ಸ್ವಚ್ಛತೆಯನ್ನು ಕಾಪಾಡುವಂತಹ ಸಿಬ್ಬಂದಿಯೇ ಡೆಂಗ್ ಜ್ವರಕ್ಕೆ ತುತ್ತಾಗಿ ಸರಕಾರಿ ಆಸ್ಪತ್ರೆಗಳಲ್ಲಿ ಚಿಕಿತ್ಸೆ ಪಡೆಯಲು ಪರದಾಡುತ್ತಿದ್ದಾರೆ. ಜಿಲ್ಲಾಡಳಿತ ಇಂತಹ ಸಂದರ್ಭಗಳಲ್ಲಿ ಅಭಿವೃದ್ಧಿ ಕೆಲಸಗಳನ್ನ್ನು ತಾತ್ಕಾಲಿಕವಾಗಿ ಕಡಿಮೆಮಾಡಿ ಆರೋಗ್ಯದ ವಿಚಾರದ ಕಡೆ ಗಮನ ಹರಿಸಬೇಕು ಎಂದು ತಿಳಿಸಿದ್ದಾರೆ.
ನಗರದೊಳಗಿನ ರಾಜ ಕಾಲುವೆಗೆ ಸಂಪೂರ್ಣವಾಗಿ ಯುಜಿಡಿ ಯ ಕಲುಷಿತ ನೀರನ್ನು ಕೆಲವರು ನೇರವಾಗಿ ಬಿಡುತ್ತಿದ್ದಾರೆ, ಇದರ ಜೊತೆಯಲ್ಲಿ ನಗರದ ಕೆಲವು ಪ್ರಮುಖ ಬೀದಿಗಳಲ್ಲೇ ಯುಜಿಡಿ ಯ ಸಂಪರ್ಕವನ್ನು ಪಡೆಯದೇ ನೇರವಾಗಿ ರಸ್ತೆ ಮಗ್ಗಲಿನ ಚರಂಡಿಗಳಲ್ಲಿ ಹರಿಯುತ್ತಿರುವುದರಿಂದ ಇಂತಹ ಮಾರಣಾಂತಿಕ ಕಾಯಿಲೆಗಳಿಗೆ ಜನ ತುತ್ತಾಗುತ್ತಿದ್ದಾರೆ.
ಡೆಂಗ್ ರೋಗ ಹೆಚ್ಚಲು ಕಾರಣವಾಗುವ ಸೊಳ್ಳೆ ನಿಯಂತ್ರಣಮಾಡುವ ಫಿನಾಯಿಲ್, ಬ್ಲೀಚಿಂಗ್ಪೌಡರ್, ಹಾಗೂ ನೀರನ್ನು ಶುದ್ಧೀಕರಿಸುವ ಆಲಂ ಹಾಗೂ ಔಷಧಿ ಸಿಂಪಡಣೆ ಮಾಡುವುದನ್ನು ಬಿಟ್ಟು, ಅಧಿಕಾರಿಗಳು ಮತ್ತು ಚುನಾಯಿತ ಪ್ರತಿನಿಧಿಗಳು ಆಸ್ಪತ್ರೆಗಳಲ್ಲಿ ದಾಖಲಾಗಿರುವ ರೋಗಿಗಳ ಮುಂದೆ ಫೋಟೊ ತೆಗೆಸಿ ಪ್ರಚಾರದ ಅಣಕಮಾಡುತ್ತಿರುವುದು ಇವರ ಆಡಳಿತ ವೈಖರಿಯನ್ನು ಎತ್ತಿತೋರಿಸುತ್ತಿದೆ. ಇನ್ನಾದರು ಜಿಲ್ಲಾಡಳಿತ ಹಾಗೂ ಚುನಾಯಿತ ಪ್ರತಿನಿಧಿಗಳು ರೋಗನಿಯಂತ್ರಣಕ್ಕೆ ಪ್ರಾಮಾಣಿಕ ಪ್ರಯತ್ನಮಾಡಬೇಕೆಂದು ಒತ್ತಾಯಿಸಿದ್ದಾರೆ.
