ಝಿಂಬಾಬ್ವೆ ವಿರುದ್ಧ ಭಾರತಕ್ಕೆ ಕ್ಲೀನ್ ಸ್ವೀಪ್ ಗುರಿ

 ಹರಾರೆ, ಜೂ.17: ಏಕದಿನ ಕ್ರಿಕೆಟ್ ಸರಣಿಯಲ್ಲಿ 3-0 ಕ್ಲೀನ್ ಸ್ವೀಪ್ ಸಾಧಿಸಿರುವ ಭಾರತ ಶನಿವಾರ ಆರಂಭವಾಗಲಿರುವ ಮೂರು ಪಂದ್ಯಗಳ ಟ್ವೆಂಟಿ-20 ಸರಣಿಯಲ್ಲೂ ಇದೇ ರೀತಿಯ ಪ್ರದರ್ಶನ ಮುಂದುವರಿಸುವ ಯೋಜನೆಯಲ್ಲಿದೆ.
ಝಿಂಬಾಬ್ವೆ ವಿರುದ್ಧದ ಸರಣಿಗೆ ಅಷ್ಟೇನೂ ಬಲಿಷ್ಠವಲ್ಲದ ತಂಡವನ್ನು ಆಯ್ಕೆ ಮಾಡಲಾಗಿದ್ದರೂ, ಆ ತಂಡ ಚೆನ್ನಾಗಿ ಆಡಿ ಝಿಂಬಾಬ್ವೆ ವಿರುದ್ಧ ಸರಣಿ ಜಯಿಸಿದೆ.
ಇದೀಗ ಟ್ವೆಂಟಿ-20 ಸರಣಿಯಲ್ಲಿ ಟೀಮ್ ಇಂಡಿಯಾಕ್ಕೆ ಝಿಂಬಾಬ್ವೆ ತಂಡದ ಸವಾಲು ಎದುರಾಗಲಿದೆ.
ಕೇದಾರ್ ಜಾಧವ್, ಮನೀಷ್ ಪಾಂಡೆ ಕಳೆದ ಬಾರಿ ಇಲ್ಲಿಗೆ ಪ್ರವಾಸ ಕೈಗೊಂಡಿದ್ದರು. 2015ರಲ್ಲಿ ನಡೆದ ಸರಣಿಯಲ್ಲಿ ಭಾರತ ಮೊದಲ ಪಂದ್ಯದಲ್ಲಿ ಜಯ ಗಳಿಸಿತ್ತು. ಆದರೆ ಎರಡನೆ ಪಂದ್ಯದಲ್ಲಿ ಭಾರತ ಸೋಲು ಅನುಭವಿಸಿ ಸರಣಿಯನ್ನು 1-1 ಸಮಬಲ ಸಾಧಿಸಿತ್ತು. ಅಜಿಂಕ್ಯ ರಹಾನೆ ಈ ತಂಡದ ನಾಯಕರಾಗಿದ್ದರು.
 ಈ ಬಾರಿ ವಿಶ್ವದ ಅತ್ಯಂತ ಅನುಭವಿ ಟ್ವೆಂಟಿ-20 ತಂಡದ ನಾಯಕ ಮಹೇಂದ್ರ ಸಿಂಗ್ ಧೋನಿ ತಂಡವನ್ನು ಮುನ್ನಡೆಸುತ್ತಿರುವ ಹಿನ್ನೆಲೆಯಲ್ಲಿ ಭಾರತ ತಂಡ ಟ್ವೆಂಟಿ-20 ಸರಣಿಯನ್ನು ವಶಪಡಿಸಿಕೊಳ್ಳುವುದನ್ನು ನಿರೀಕ್ಷಿಸಲಾಗಿದೆ.
ಝಿಂಬಾಬ್ವೆ ಪ್ರವಾಸ ಕೈಗೊಂಡಿರುವ ಟೀಮ್ ಇಂಡಿಯಾದಲ್ಲಿರುವ 15 ಆಟಗಾರರಲ್ಲಿ 14 ಮಂದಿ ಆಟಗಾರರು ಐಪಿಎಲ್‌ನೊಂದಿಗೆ ಒಪ್ಪಂದ ಮಾಡಿಕೊಂಡವರು. ಈ ಕಾರಣದಿಂದಾಗಿ ಟೀಮ್ ಇಂಡಿಯಾದ ಎಲ್ಲರೂ ಟ್ವೆಂಟಿ-20 ಪಂದ್ಯದಲ್ಲಿ ಸಾಕಷ್ಟು ಅನುಭವ ಪಡೆದವರು.
ನಾಯಕ ಮಹೇಂದ್ರ ಸಿಂಗ್ ಅವರು ಈ ಪಂದ್ಯದಲ್ಲಿ ಹೊಸಬರ ಶಕ್ತಿ ಸಾಮರ್ಥ್ಯವನ್ನು ಪರೀಕ್ಷಿಸುವ ಯೋಜನೆಯಲಿದ್ದಾರೆ. ಮನ್‌ದೀಪ್ ಸಿಂಗ್, ಜಯಂತ್ ಯಾದವ್, ಜಯದೇವ್ ಉನದ್ಕಟ್ ಅವಕಾಶಕ್ಕಾಗಿ ಎದುರು ನೋಡುತ್ತಿದ್ದಾರೆ.
ಧೋನಿ ಟ್ವೆಂಟಿ-20ಪಂದ್ಯಕ್ಕೆ ಯುವ ಆಟಗಾರರಿಗೆ ಅವಕಾಶ ನೀಡುವ ಚಿಂತನೆ ನಡೆಸಿದ್ದರೂ, ಗೆಲುವಿನ ಸಾಮರ್ಥ್ಯ ಇರುವ ತಂಡವನ್ನು ಕಟ್ಟಲಿದ್ದಾರೆ. ಭಾರತದ ಬೆಂಬಲಿಗರು ಝಿಂಬಾಬ್ವೆಯಲ್ಲಿ ಕಡಿಮೆ ಹೀಗಿದ್ದರೂ, ಅವರೆಲ್ಲ ಧೋನಿಯ ಸ್ಫೋಟಕ ಬ್ಯಾಟಿಂಗ್‌ನ ಕಡೆಗೆ ನೋಡುತ್ತಿದ್ದಾರೆ.
ಕೆ.ಎಲ್.ರಾಹುಲ್, ಮನೀಷ್ ಪಾಂಡೆ, ಅಂಬಟಿ ರಾಯುಡು ಮತ್ತು ಧೋನಿ ಟ್ವೆಂಟಿ-20 ತಂಡದಲ್ಲಿರುತ್ತಾರೆ. ಆರಂಭಿಕ ದಾಂಡಿಗನ ಸ್ಥಾನಕ್ಕೆ ಕರುಣ್ ನಾಯರ್ ಮತ್ತು ಫೈಝ್ ಫಝಲ್ ಜತೆ ಪೈಪೋಟಿಗಿಳಿದಿದ್ದಾರೆ.
ನಾಯರ್‌ಗೆ ಏಕದಿನ ಸರಣಿಯ ಮೊದಲ ಎರಡು ಪಂದ್ಯಗಳಲ್ಲಿ ಅವಕಾಶ ನೀಡಲಾಗಿತ್ತು. ಆದರೆ ಅವರಿಗೆ ಸಮರ್ಥವಾಗಿ ಬಳಸಿಕೊಳ್ಳಲು ಸಾಧ್ಯವಾಗಲಿಲ್ಲ. ಈ ಕಾರಣದಿಂದಾಗಿ ಫೈಝ್ ಅವಕಾಶದ ನಿರೀಕ್ಷೆಯಲ್ಲಿದ್ದಾರೆ. ಎಡಗೈ ದಾಂಡಿಗ ಫಝಲ್ ಮೊದಲ ಏಕದಿನ ಅಂತಾರಾಷ್ಟ್ರೀಯ ಪಂದ್ಯದಲ್ಲಿ ಸೊಗಸಾದ ಅರ್ಧಶತಕ ದಾಖಲಿಸಿದ್ದರು. ಆದರೆ ನಾಯರ್ ಓರ್ವ ಉತ್ತಮ ಟ್ವೆಂಟಿ-20 ಆಟಗಾರ. ಅವರು ಅಮಾನತುಗೊಂಡ ರಾಜಸ್ಥಾನ ರಾಯಲ್ಸ್ ಮತ್ತು ಡೆಲ್ಲಿ ಡೇರ್ ಡೆವಿಲ್ಸ್ ತಂಡದಲ್ಲಿ ಆಡಿದ್ದರು.
ಪಂಜಾಬ್‌ನ ಮನ್‌ದೀಪ್ ಸೀನಿಯರ್ ಕ್ಯಾಪ್ ಧರಿಸಲು ನೋಡುತ್ತಿದ್ದಾರೆ. ಕೇದಾರ್ ಜಾಧವ್‌ಗೆ ಆಡಲು ಅವಕಾಶ ಸಿಕ್ಕಿಲ್ಲ. ಭಾರತ ಮೂರು ಏಕದಿನ ಪಂದ್ಯಗಳಲ್ಲಿ ಕ್ರಮವಾಗಿ 8 , 8 ಮತ್ತು 10 ವಿಕೆಟ್‌ಗಳ ಜಯ ಗಳಿಸಿತ್ತು.
ಲೋಕೇಶ್ ರಾಹುಲ್ ಏಕದಿನ ಕ್ರಿಕೆಟ್‌ನಲ್ಲಿ ಮಿಂಚುತ್ತಿದ್ದಾರೆ. ಟ್ವೆಂಟಿ-20 ಕ್ರಿಕೆಟ್‌ನಲ್ಲಿ ಅದೇ ಪ್ರದರ್ಶನವನ್ನು ಲೋಕೇಶ್ ರಾಹುಲ್ ಮುಂದುವರಿಸುವುದನ್ನು ನಿರೀಕ್ಷಿಸಲಾಗಿದೆ.
ಧವಳ್ ಕುಲಕರ್ಣಿ, ಜಸ್‌ಪ್ರೀತ್ ಬುಮ್ರಾ ಮತ್ತು ಬರೀಂದರ್ ಸ್ರಾನ್ ಬೌಲಿಂಗ್‌ನಲ್ಲಿ ಉತ್ತಮ ಪ್ರದರ್ಶನ ನೀಡಿದ್ದಾರೆ. ಚಾಮು ಚಿಭಾಭಾ ಮತ್ತು ಎಲ್ಟನ್ ಚಿಗುಂಬುರಾ ಝಿಂಬಾಬ್ವೆ ತಂಡದ ಅಸ್ತ್ರವಾಗಿದ್ದಾರೆ.

ಭಾರತ : ಮಹೇಂದ್ರ ಸಿಂಗ್ ಧೋನಿ(ನಾಯಕ), ಕೆ.ಎಲ್.ರಾಹುಲ್, ಫೈಝ್ ಫಝಲ್ , ಮನೀಶ್ ಪಾಂಡೆ, ಅಂಬಟಿ ರಾಯುಡು, ಕರುಣ್ ನಾಯರ್, ರಿಷಿ ಧವನ್, ಅಕ್ಷರ್ ಪಟೇಲ್, ಧವಳ್ ಕುಲಕರ್ಣಿ, ಜಸ್‌ಪ್ರೀತ್ ಬುಮ್ರಾ, ಬರಿಂದರ್ ಸ್ರಾನ್/ಜಯದೇವ್ ಉನದ್ಕಟ್, ಕೇದಾರ್ ಜಾಧವ್, ಯಜುವೇಂದ್ರ ಚಾಹಲ್, ಜಯಂತ ಯಾದವ್. ಝಿಂಬಾಬ್ವೆ: ಗ್ರೇಮ್ ಕ್ರೀಮರ್(ನಾಯಕ), ಸಿಬಾಂದ, ಸಿಕಂದರ್ ರಝಾ, ಚಿಭಾಭಾ, ಎಲ್ಟನ್ ಚಿ 
ಗುಂಬುರಾ, ಹ್ಯಾಮಿಲ್ಟನ್ ಮಸಕಝ, ವೆಲ್ಲಿಂಗ್ಟನ್ ಮಸಕಝ,ಟೆಂಡೈ ಚಟಾರ, ಚಾಮು ಚಿಭಾಭಾ, ಡೊನಾಲ್ಡ್ ಟಿರಿಪಾನೊ, ಮಾಲ್ಕಮ್ ವೋಲರ್, ಪೀಟರ್ ಮೊರ್, ತಾಪಿವಾ ಮುಫುಝಾ, ಟಿನೊಟೆಂಡಾ ಮುಟೊಮ್‌ಬೊಝಿ, ರಿಚ್ಮಂಡ್ ಮುತುಂಬನಿ(ವಿಕೆಟ್‌ಕೀಪರ್). 

ಪಂದ್ಯದ ಸಮಯ: ಸಂಜೆ 4:30