ಭಾರತದ ಪ್ರಪ್ರಥಮ ಯುದ್ಧವಿಮಾನ

ಹೈದರಾಬಾದ್, ಜೂ.18: ಫ್ಲೈಯಿಂಗ್ ಅಧಿಕಾರಿಣಿಯರಾದ ಅವನಿ ಚತುರ್ವೇದಿ, ಭಾವನಾ ಕಾಂತ್ ಹಾಗೂ ಮೋಹನಾ ಸಿಂಗ್ ಶನಿವಾರ ಭಾರತದ ಪ್ರಥಮ ಮೂವರು ಯುದ್ಧ ವಿಮಾನ ಚಾಲಕಿಯರಾಗಿ ಸೇವೆಗೆ ನಿಯೋಜನೆಗೊಂಡಿದ್ದಾರೆ.
ಹೈದರಾಬಾದ್‌ನ ಹೊರವಲಯದ ದುಂಡಿಗಲ್‌ನ ವಾಯುಪಡೆ ಅಕಾಡಮಿಯಲ್ಲಿ ಯಶಸ್ವಿ ತರಬೇತಿ ಮುಗಿಸಿದ ಬಳಿಕ ಅವರನ್ನು ರಕ್ಷಣಾ ಸಚಿವ ಮನೋಹರ ಪಾರಿಕ್ಕರ್ ಔಪಚಾರಿಕವಾಗಿ ಭಾರತೀಯ ವಾಯು ದಳಕ್ಕೆ(ಐಎಎಫ್) ನಿಯೋಜಿಸಿದ್ದಾರೆ. ಸಂಯುಕ್ತ ಪದವಿ ಪೆರೇಡ್‌ನಲ್ಲಿ ಅವರು ಆಕರ್ಷಣೆಯ ಕೇಂದ್ರ ಬಿಂದುವಾಗಿದ್ದರು.

ಎಲ್ಲ ಅಡೆತಡೆಗಳನ್ನು ದಾಟಿ ಐಎಎಫ್‌ನ ಚರಿತ್ರೆಯಲ್ಲಿ ತಮ್ಮ ಹೆಸರುಗಳನ್ನು ದಾಖಲಿಸಿರುವ ಈ ಮಹಿಳೆಯರು, ಕರ್ನಾಟಕದ ಬಿದರೆಯಲ್ಲಿ ಮೂರನೆ ಹಂತದ ತರಬೇತಿ ಪೂರ್ಣಗೊಳಿಸಿದ ಬಳಿಕ, ಮುಂದಿನ ವರ್ಷ ಯುದ್ಧ ವಿಮಾನಗಳನ್ನು ಹಾರಿಸಲಿದ್ದಾರೆ.
ಈವರೆಗೆ ಪೈಲಟನ್ ಹಾಗೂ ಕಿರಣ್ ತರಬೇತಿ ವಿಮಾನಗಳನ್ನು ಹಾರಿಸಿರುವ ಅವರು, ಒಂದು ವರ್ಷ ಹಾಕ್ ಅತ್ಯಾಧುನಿಕ ತರಬೇತಿ ವಿಮಾನದಲ್ಲಿ ತರಬೇತಿ ಪಡೆದ ಬಳಿಕ, ಶಬ್ದಾತೀತ ವೇಗದ ಯುದ್ಧ ವಿಮಾನ ಚಾಲನೆಯ ಅವಕಾಶ ಪಡೆಯಲಿದ್ದಾರೆ.
ಐಎಎಫ್‌ಗೆ ಔಪಚಾರಿಕವಾಗಿ ನಿಯೋಜಿಸಲು ರಕ್ಷಣಾ ಸಚಿವರು ಮಹಿಳೆಯರಿಗೆ ‘ರಾಷ್ಟ್ರಪತಿ ಆದೇಶವನ್ನು’ ಪ್ರದಾನಿಸಿದ ಬಳಿಕ ಅವರು ಆನಂದ ತುಂದಿಲರಾದರು ಹಾಗೂ ರೋಮಾಂಚನಗೊಂಡರು.

ಬಳಿಕ ಪತ್ರಕರ್ತರೊಡನೆ ಮಾತನಾಡಿದ ಅವರು, ಯುದ್ಧ ವಿಮಾನ ಚಾಲಕಿಯರ ಮೊದಲ ತಂಡದಲ್ಲಿರುವುದು ತಮಗೆ ದೊರೆತ ಮಹಾನ್ ಗೌರವವಾಗಿದೆ. ದೇಶ ಸೇವೆಗೆ ಈ ಅವಕಾಶ ಸಿಕ್ಕಿದುದಕ್ಕಾಗಿ ಸಂತೋಷವಾಗಿದೆ ಎಂದರು.