ವರ್ಷಕ್ಕೆ 12-18 ಉಪಗ್ರಹ ಉಡಾವಣೆ ಇಸ್ರೋ ಗುರಿ
ಶ್ರೀಹರಿಕೋಟಾ, ಜೂ.22: ಉಪಗ್ರಹ ಉಡಾವಣೆಗಳ ಸಂಖ್ಯೆಯನ್ನು ವರ್ಷಕ್ಕೆ 12-18ಕ್ಕೆ ಹೆಚ್ಚಿಸಲು ಇಸ್ರೋ ಉದ್ದೇಶಿಸಿದೆ. ಇದಕ್ಕಾಗಿ ಅಗತ್ಯ ತಂತ್ರಜ್ಞಾನದತ್ತ ಅದು ಗಮನ ಹರಿಸಿದೆ ಎಂದು ಇಸ್ರೋ ಅಧ್ಯಕ್ಷ ಎ.ಎಸ್.ಕಿರಣ ಕುಮಾರ್ ಅವರು ಬುಧವಾರ ಇಲ್ಲಿ ತಿಳಿಸಿದರು. ಇದೇ ವೇಳೆ ನೂತನ ವಾಹನ ಜೋಡಣೆ ಕಟ್ಟಡವನ್ನು ನಿರ್ಮಿಸುವ ಮೂಲಕ ಪಿಎಸ್ಎಲ್ವಿ ಸರಣಿಯ ಕಾರ್ಯಕ್ಷಮತೆಯನ್ನು ಹೆಚ್ಚಿಸುವ ಅಗತ್ಯಕ್ಕೆ ಅವರು ಒತ್ತು ನೀಡಿದರು.
ಅವರು ಇಲ್ಲಿ ಇಸ್ರೋ ಇಂದು ಸತೀಶ್ ಧವನ್ ಬಾಹ್ಯಾಕಾಶ ಕೇಂದ್ರದಿಂದ ತನ್ನ ಭೂ ವೀಕ್ಷಣಾ ಉಪಗ್ರಹ ಕಾರ್ಟೊಸ್ಯಾಟ್-2 ಸೇರಿದಂತೆ 20 ಉಪಗ್ರಹಗಳನ್ನು ತನ್ನ ಪಿಎಸ್ಎಲ್ವಿ ರಾಕೆಟ್ ಮೂಲಕ ಯಶಸ್ವಿಯಾಗಿ ಉಡಾವಣೆ ಗೊಳಿಸಿದ ಬಳಿಕ ಸುದ್ದಿಗಾರರೊಂದಿಗೆ ಮಾತನಾಡುತ್ತಿದ್ದರು.
ಮೂರು ಹಂತಗಳ ಪಿಎಸ್ಎಲ್ವಿ ಅಭಿವೃದ್ಧಿಗೊಳಿಸುವ ಕುರಿತಂತೆ ಅವರು,ಅದೇ ಅಂತ ಅಲ್ಲ.ಉಪಗ್ರಹ ಉಡಾವಣೆಯ ವೆಚ್ಚವನ್ನು ತಗ್ಗಿಸುವ ನಿಟ್ಟಿನಲ್ಲಿ ನಾವು ಸತತ ಪ್ರಯತ್ನಗಳನ್ನು ನಡೆಸುತ್ತಿದ್ದೇವೆ ಎಂದು ಹೇಳಿದರು.
ಪಿಎಸ್ಎಲ್ವಿ ವೈವಿಧ್ಯಪೂರ್ಣ ಉಡಾವಣಾ ವಾಹನ ವಾಗಿದ್ದು ವಿಭಿನ್ನ ಕಾರ್ಯಗಳನ್ನು ಅದು ನಿರ್ವಹಿಸಬಲ್ಲದು ಮತ್ತು ಉಪಗ್ರಹಗಳನ್ನು ಬೇರೆ ಬೇರೆ ಕಕ್ಷೆಗಳಲ್ಲಿರಿಸುವ ಸಾಮರ್ಥ್ಯವನ್ನು ಹೊಂದಿದೆ ಎಂದ ಅವರು,ಸುಧಾರಿತ ಸಾಮರ್ಥ್ಯಗಳೊಡನೆ ಅದರ ಕಾರ್ಯಾಚರಣೆಯನ್ನು ಸರಳಗೊಳಿಸುವ ಪ್ರಯತ್ನಗಳು ಪ್ರಗತಿಯಲ್ಲಿವೆ ಎಂದರು.
