ಕುಸಿದು ಬೀಳುವ ಸ್ಥಿತಿಯಲ್ಲಿ ನೆಲ್ಲಿಕುಂಜೆ ಶಾಲಾ ಕಟ್ಟಡ
ಆತಂಕದಲ್ಲಿ ವಿದ್ಯಾರ್ಥಿಗಳು, ಅಧ್ಯಾಪಕರು
![ಕುಸಿದು ಬೀಳುವ ಸ್ಥಿತಿಯಲ್ಲಿ ನೆಲ್ಲಿಕುಂಜೆ ಶಾಲಾ ಕಟ್ಟಡ ಕುಸಿದು ಬೀಳುವ ಸ್ಥಿತಿಯಲ್ಲಿ ನೆಲ್ಲಿಕುಂಜೆ ಶಾಲಾ ಕಟ್ಟಡ](https://www.varthabharati.in/sites/default/files/images/articles/2016/06/25/school-[16881998]-(2).gif)
ಕಾಸರಗೋಡು, ಜೂ.25: ನಗರದ ನೆಲ್ಲಿಕುಂಜೆ ಗರ್ಲ್ಸ್ ಹಯರ್ ಸೆಕೆಂಡರಿ ಶಾಲೆಯು ಶಿಥಿಲಾವಸ್ಥೆ ಯಲ್ಲಿದ್ದು, ವಿದ್ಯಾರ್ಥಿಗಳು, ಅಧ್ಯಾಪಕರು ಹಾಗೂ ಸಿಬ್ಬಂದಿ ಆತಂಕದಿಂದ ಕಾಲ ಕಳೆಯುವ ಪರಿಸ್ಥಿತಿ ಎದುರಾಗಿದೆ. ಯಾವುದೇ ಸಂದರ್ಭದಲ್ಲೂ ದುರಂತಕ್ಕೀಡಾ ಗಬಹುದಾದ ಈ ಶಾಲೆಯ ಬಗ್ಗೆ ಅಧಿಕಾರಿಗಳು ಕಿಂಚಿತ್ತೂ ಗಮನಹರಿಸಿಲ್ಲ. ಶಾಲಾ ಕಟ್ಟಡ ಅಲ್ಲಲ್ಲಿ ಬಿರುಕು ಬಿಟ್ಟಿದ್ದು, ಸಮೀಪವೇ ಇರುವ ಮತ್ತೊಂದು ಕಟ್ಟಡ ಜೀರ್ಣಾವಸ್ಥೆಗೆ ತಲುಪಿದೆ. ಶಾಲೆಯ ಪ್ರವೇಶದ್ವಾರ ಯಾವ ಸಂದರ್ಭದಲ್ಲಾದರೂ ನೆಲಕಚ್ಚುವ ಸ್ಥಿತಿಯಲ್ಲಿದೆ. ಇದರ ಆಧಾರ ಕಂಬಗಳು ಮುರಿದು ಬಿದ್ದಿದ್ದು, ಮೇಲ್ಛಾವಣಿ ಮಾತ್ರ ಉಳಿದುಕೊಂಡಿದೆ.
ಬಿಡುವಿಲ್ಲದೆ ಸುರಿಯುತ್ತಿರುವ ಮಳೆಯಿಂದ ಆತಂಕ ಮತ್ತಷ್ಟು ಹೆಚ್ಚಿದ್ದು, ಈ ಬಗ್ಗೆ ನಗರಸಭೆ ಮತ್ತು ಅಧಿಕಾರಿಗಳ ಗಮನಕ್ಕೆ ತಂದಿದ್ದರೂ ಎಚ್ಚೆತ್ತುಕೊಂಡಿಲ್ಲ ಎನ್ನಲಾಗಿದೆ. ದುರ್ಘಟನೆಗಳು ಸಂಭವಿಸಿದ ಸಂದರ್ಭಗಳಲ್ಲಿ ಮಾತ್ರ ಎಚ್ಚೆತ್ತುಕೊಂಡು ಕಾಳಜಿವಹಿಸುವ ಸರಕಾರ, ಸ್ಥಳೀಯಾಡಳಿತ ದುರಂತಗಳು ಸಂಭವಿಸುವ ಮೊದಲು ನಿರ್ಲಕ್ಷ ವಹಿಸುವುದು ವಿಪರ್ಯಾಸ.
ದುರವಸ್ಥೆ ಬಗ್ಗೆ ಶಾಲಾ ಮುಖ್ಯಸ್ಥರು ಈ ಹಿಂದೆಯೇ ಕಾಸರಗೋಡು ನಗರಸಭಾ ಅಧಿಕಾರಿಗಳಿಗೆ ಮನವಿ ಸಲ್ಲಿಸಿದ್ದರು. ಆದರೆ ಯಾವುದೇ ಕ್ರಮ ತೆಗೆದುಕೊಳ್ಳದ ಹಿನ್ನೆಲೆಯಲ್ಲಿ ಜಿಲ್ಲಾ ಶಿಕ್ಷಣ ಇಲಾಖಾಧಿಕಾರಿಗಳಿಗೆ ಮನವಿ ಸಲ್ಲಿಸಿದರೂ ಗಮನ ಹರಿಸಿಲ್ಲ. ಸುಮಾರು 600ರಷ್ಟು ಮಕ್ಕಳು ಈ ಶಾಲೆಯಲ್ಲಿ ಕಲಿಯುತ್ತಿದ್ದಾರೆ. ಹೆಣ್ಮಕ್ಕಳ ಸಬಲೀಕರಣದ ಉದ್ದೇಶದೊಂದಿಗೆ ರಚಿಸಲಾದ ಸೊಸೈಟಿಯ ಕಟ್ಟಡ ಶಾಲೆಯ ಪ್ರವೇಶ ದ್ವಾರದಲ್ಲಿದೆ. ಹೊಲಿಗೆ ಸೇರಿದಂತೆ ಹಲವು ರೀತಿಯ ಉದ್ಯೋಗ ತರಬೇತಿಗಳನ್ನು ಈ ಕಟ್ಟಡದಲ್ಲಿ ನೀಡಲಾಗುತ್ತಿತ್ತು.
ಆದರೆ ಕೆಲ ವರ್ಷಗಳ ಹಿಂದೆ ಈ ತರಬೇತಿ ಸ್ಥಗಿತಗೊಂಡಿದೆ. ಯಾವುದೇ ದುರಸ್ತಿ ನಡೆಸದೆ ಇರುವುದರಿಂದ ಈ ಕಟ್ಟಡ ಜೀರ್ಣಾವಸ್ಥೆಗೆ ತಲುಪಿದ್ದು, ಭಾಗಶಃ ಕುಸಿದಿದೆ. ಈ ಹಿಂದೆ ಕಟ್ಟಡ ತೆರವುಗೊಳಿಸಲು ಆದೇಶ ನೀಡಲಾಗಿತ್ತು. ಆದರೆ ಸೊಸೈಟಿ ಇದಕ್ಕೆ ತಡೆ ನೀಡಿತ್ತು. ಆದರೆ ಹೊಸ ಕಟ್ಟಡ ನಿರ್ಮಾಣ ಅಥವಾ ಹಳೆಯ ಕಟ್ಟಡ ತೆರವುಗೊಳಿಸಲು ಸೊಸೈಟಿ ಅಧಿಕಾರಿಗಳು ಮುಂದೆ ಬಂದಿಲ್ಲ.
ವಿದ್ಯಾರ್ಥಿಗಳ ಹಿತದೃಷ್ಟಿಯಿಂದ ಇನ್ನಾದರೂ ಸಂಬಂಧಪಟ್ಟವರು ಶಾಲೆ ಕಟ್ಟಡದ ದುರಸ್ತಿಗೆ ಕ್ರಮಕೈಗೊಳ್ಳಬೇಕು ಎನ್ನುವುದು ಸಾರ್ವಜನಿಕರ ಆಗ್ರಹ.