ಎಲ್ಲ 7 ಶಿಖರಗಳನ್ನು ಏರಿದ ಪ್ರಪ್ರಥಮ ಅರಬ್ ಮಹಿಳೆ

ಶಾರ್ಜಾ, ಜೂ. 28: ಫೆಲೆಸ್ತೀನ್ ಮೂಲದ ಸಾಹಸಿ ಸುಝಾನ್ ಅಲ್ ಹೂಬಿ ಇತ್ತೀಚೆಗೆ ಅಲಾಸ್ಕಾದ ವೌಂಟ್ ದೆನಾಲಿ ಶಿಖರದ ತುತ್ತ ತುದಿಯನ್ನು ತಲುಪಿದರು. ಆಗ ವೌಂಟ್ ಕಿಲಿಮಂಜಾರೋದಿಂದ ಹಿಡಿದು ವೌಂಟ್ ಎವರೆಸ್ಟ್ ತನಕದ ವಿಶ್ವದ ಎಲ್ಲ ಏಳು ಶಿಖರಗಳನ್ನು ಯಶಸ್ವಿಯಾಗಿ ಏರಿದ ಪ್ರಪ್ರಥಮ ಅರಬ್ ಮಹಿಳೆಯಾಗಿ ಅವರು ಇತಿಹಾಸ ಸೃಷ್ಟಿಸಿದರು.
ಶಾರ್ಜಾದಲ್ಲಿ ತನ್ನ ಸ್ವಂತ ಸಾಹಸ ಟ್ರಾವೆಲ್ ಕಂಪೆನಿಯೊಂದನ್ನು ಹೊಂದಿರುವ ಸುಝಾನ್ ತನ್ನಂತೆಯೇ ಇತರ ಮಹಿಳೆಯರು, ಅದರಲ್ಲೂ ಮುಖ್ಯವಾಗಿ ಅರಬ್ ಮಹಿಳೆಯರು ಇಂತಹ ಸಾಧನೆ ಮಾಡಲು ಮುಂದೆ ಬರಬೇಕೆಂದು ತಾನು ಬಯಸುತ್ತೇನೆ ಎಂದು ಹೇಳುತ್ತಾರೆ.
ಮೂರು ವಿಫಲ ಯತ್ನಗಳ ಬಳಿಕ ನಾಲ್ಕನೆ ಯತ್ನದಲ್ಲಿ ದೆನಾಲಿ ಶಿಖರವೇರಲು ಸಫಲರಾಗಿರುವ ಸುಝಾನ್ ತನ್ನ ಸಾಧನೆಯ ಬಗ್ಗೆ ಹೆಮ್ಮೆಯಿದೆ ಎಂದು ಹೇಳುತ್ತಾರೆ. ಹಿಂದಿನ ವೈಫಲ್ಯಗಳಿಂದ ತಾನು ಯಾವತ್ತೂ ಕಂಗೆಟ್ಟಿಲ್ಲವೆಂದು ಹೇಳುವ ಆಕೆ ತನ್ನ ಆತ್ಮವಿಶ್ವಾಸವೇ ತನ್ನ ಶಕ್ತಿಯಾಗಿದೆ ಎಂದು ಹೇಳಲು ಮರೆಯುವುದಿಲ್ಲ.
‘‘ಮೈನಸ್ 30 ಡಿಗ್ರಿ ಉಷ್ಣಾಂಶದಲ್ಲಿ ಮಲಗುವುದು ಯಾವತ್ತೂ ತಮಾಷೆಯಲ್ಲ; ಹಾಗೆಯೇ ಗಂಟೆಗೆ 120 ಕಿ.ಮೀ. ವೇಗದಲ್ಲಿ ಮುನ್ನುಗ್ಗುವ ಗಾಳಿಯಿಂದ ನಮ್ಮನ್ನು ರಕ್ಷಿಸಿಕೊಳ್ಳುವುದು ಹಾಗೂ ಬಿರುಗಾಳಿಯ ವಾತಾವರಣದಲ್ಲಿ ಟೆಂಟ್ ನಿರ್ಮಿಸುವುದು ಅಷ್ಟೇನೂ ಸುಲಭವಲ್ಲ. ಶೌಚಾಲಯವಿಲ್ಲದೆ ಹಾಗೂ ಸ್ನಾನ ಮಾಡದೆ ಇರುವುದೂ ಸುಲಭ ಸಾಧ್ಯವಲ್ಲ’’ ಎಂದು ತಮ್ಮ ಶಿಖರಾರೋಹಣದ ಅನುಭವವನ್ನು ಮೆಲುಕು ಹಾಕುತ್ತಾ ಅವರು ಹೇಳುತ್ತಾರೆ. ‘‘ನನ್ನ ಮೇಲೆ ನನಗಿದ್ದ ಬಲವಾದ ನಂಬಿಕೆಯೇ ಹಲವು ಪ್ರತಿಕೂಲ ವಾತಾವರಣಗಳಲ್ಲಿ ನನಗೆ ಸಹಾಯ ಮಾಡಿತು’’ ಎನ್ನುತ್ತಾರೆ ಸುಝಾನೆ. ಇಂತಹ ಸಾಹಸ ಕೃತ್ಯಗಳಲ್ಲಿ ನೋವಿನ ಬಳಿಕ ಸಿಗುವ ಆನಂದವನ್ನು ಅನುಭವಿಸುವುದೇ ಒಂದು ದೊಡ್ಡ ಸಂತೋಷ ಎಂದವರು ವಿವರಿಸುತ್ತಾರೆ. ‘‘ಏಳು ಶಿಖರಗಳನ್ನು ಏರಬೇಕೆಂದು ನಾನೇನೂ ಯೋಜನೆ ಹಾಕಿಕೊಂಡಿರಲಿಲ್ಲ. ಆದರೆ ಒಂದು ಶಿಖರದ ನಂತರ ಇನ್ನೊಂದು ಶಿಖರವನ್ನೇರಿದಾಗ ಹಾಗೂ ನಾನು ವೌಂಟ್ ಎವರೆಸ್ಟ್ ಏರಲು ಸಫಲಳಾದಾಗ ಎಲ್ಲ ಏಳು ಶಿಖರಗಳನ್ನು ಆರೋಹಣ ಮಾಡಬಾರದೇಕೆ ಎಂದು ಯೋಚಿಸಿದೆ. ಈಗ ನನ್ನ ಕನಸು ಸಾಕಾರಗೊಂಡಿದೆ’’ ಎನ್ನುತ್ತಾರೆ ಸುಝಾನ್.