ಕತ್ತಲಲ್ಲಿ ಮೊಬೈಲ್ ಫೋನ್ ಬಳಕೆ ಅಂಧತ್ವಕ್ಕೆ ಆಹ್ವಾನ!
ತಮ್ಮ ಮೊಬೈಲ್ ಫೋನ್ಗಳನ್ನು ಪಕ್ಕದಲ್ಲಿಟ್ಟು ಮಲಗುವವರಿಗೆ ಎಚ್ಚರಿಕೆಯನ್ನು ನೀಡಿದ್ದಾರೆ ಸಂಶೋಧಕರು. ತಮ್ಮ ಸ್ಮಾರ್ಟ್ಫೋನ್ಗಳನ್ನು ಬಳಿಯಲ್ಲಿಟ್ಟುಕೊಂಡು ಮಲಗಿದ ಇಬ್ಬರು ಮಹಿಳೆಯರಿಗೆ ಕುರುಡುತನ ಬಂದಿರುವುದನ್ನು ಸಂಶೋಧನೆ ಬಹಿರಂಗಪಡಿಸಿದೆ. ಕತ್ತಲಲ್ಲಿ ಸ್ಮಾರ್ಟ್ ಫೋನ್ ನೋಡಿದ ಕಾರಣ ಇವರ ಒಂದೊಂದು ಕಣ್ಣು ಕುರುಡಾಗಿದೆ.
22 ವರ್ಷದ ಇಂಗ್ಲೆಂಡಿನ ಮಹಿಳೆಗೆ ಮಲಗುವ ಮೊದಲು ಸ್ಮಾರ್ಟ್ ಫೋನ್ ನೋಡುವ ಅಭ್ಯಾಸವಿತ್ತು. ಆಕೆ ತನ್ನ ಎಡಭಾಗದಲ್ಲಿ ಮಲಗುತ್ತಿದ್ದಳು ಮತ್ತು ತನ್ನ ಬಲಕಣ್ಣಿನಿಂದ ಮೊಬೈಲ್ ಪರದೆಯ ಕಡೆಗೆ ನೋಡುತ್ತಿದ್ದಳು. ಆಕೆಯ ಎಡ ಕಣ್ಣು ದಿಂಬಿನ ಹಿಂದೆ ಇರುತ್ತಿತ್ತು ಎಂದು ವರದಿ ಹೇಳಿದೆ. ಮತ್ತೊಬ್ಬ 40 ವರ್ಷದ ಮಹಿಳೆಗೂ ಅದೇ ಸಮಸ್ಯೆ ಕಂಡುಬಂದಿದೆ. ಬೆಳಗಿನ ಜಾವಕ್ಕಿಂತ ಮೊದಲು ಏಳುತ್ತಿದ್ದ ಮಹಿಳೆ ಸ್ಮಾರ್ಟ್ಫೋನ್ನಲ್ಲಿ ಸುದ್ದಿಗಳನ್ನು ಓದಿಯೇ ಮಂಚದಿಂದ ಮೇಲೇಳುತ್ತಿದ್ದಳು. ವರ್ಷದವರೆಗೆ ಹೀಗೆ ಕತ್ತಲಲ್ಲೇ ಸ್ಮಾರ್ಟ್ ಫೋನ್ ನೋಡಿದ ಕಾರಣ ಆಕೆಯ ಕಾರ್ನಿಯಗೆ ಗಾಯವಾಗಿದೆ. ಸ್ಮಾರ್ಟ್ಫೋನ್ ಖರೀದಿಸಿ ಈ ಅಭ್ಯಾಸ ತಂದುಕೊಂಡ ನಂತರವೇ ಆಕೆಯ ಕಣ್ಣಿಗೆ ಸಮಸ್ಯೆಯಾಗಿರುವುದೆಂದು ಸಂಶೋಧನೆ ಹೊರಗೆಡವಿದೆ. ‘‘ಅವರು ತಮ್ಮ ಸ್ಮಾರ್ಟ್ಫೋನ್ಗಳನ್ನು ಮಂಚದ ಮೇಲೆ ಮಲಗಿಯೇ ನೋಡುತ್ತಿದ್ದರು. ಅಲ್ಲದೆ ಒಂದೇ ಕಣ್ಣಿನಲ್ಲಿ ನೋಡಿದ್ದರು’’ ಎಂದು ನೇತ್ರ ತಜ್ಞ ಓಮರ್ ಮಹ್ರೂ ಹೇಳುತ್ತಾರೆ. ‘‘ಎರಡೂ ಪ್ರಕರಣಗಳಲ್ಲಿ ಕಣ್ಣಿಗೆ ಬೇರಾವ ಸಮಸ್ಯೆಯೂ ಆಗಿಲ್ಲ. ಒಂದು ರೆಟಿನಾ ಬೆಳಕಿಗೆ ಹೊಂದಿಕೊಂಡಿದ್ದರೆ ಮತ್ತೊಂದು ಕತ್ತಲಿಗೆ ಹೊಂದಿಕೊಂಡಿದೆ. ರೆಟಿನಾ ಬಹಳ ವಿಶಿಷ್ಟವಾದುದು. ಅದು ವಿಭಿನ್ನ ಬೆಳಕಿನ ಮಟ್ಟಕ್ಕೆ ಹೊಂದಿಕೊಳ್ಳುತ್ತದೆ. ಅದು ಕ್ಯಾಮರಾಗಿಂತಲೂ ಹೆಚ್ಚಾಗಿ ಬೆಳಕಿಗೆ ಹೊಂದಿಕೊಳ್ಳುತ್ತದೆ’’ ಎಂದು ಮಹ್ರೂ ಹೇಳುತ್ತಾರೆ.
