ನಗರ, ಗ್ರಾಮೀಣ ಪ್ರದೇಶಗಳಲ್ಲಿಬಸ್ ಅತ್ಯಂತ ಜನಪ್ರಿಯ ಸಾರಿಗೆ

ಹೊಸದಿಲ್ಲಿ, ಜೂ.29: ಗ್ರಾಮೀಣ ಹಾಗೂ ನಗರ ಪ್ರದೇಶಗಳೆರಡರಲ್ಲೂ ಬಸ್ ಅತ್ಯಂತ ಜನಪ್ರಿಯವಾದ ಸಾರಿಗೆ ವಾಹನವಾಗಿದ್ದು, ಆಟೋ ರಿಕ್ಷಾ ಆನಂತರದ ಸ್ಥಾನದಲ್ಲಿದೆಯೆಂದು ರಾಷ್ಟ್ರೀಯ ಸ್ಯಾಂಪಲ್ ಸರ್ವೆ ಆರ್ಗನೈಸೇಶನ್ (ಎನ್‌ಎಸ್‌ಎಸ್‌ಓ)ನ ವರದಿಯೊಂದು ತಿಳಿಸಿದೆ. ಗ್ರಾಮೀಣ ಪ್ರದೇಶಗಳ ಜನತೆ ವಾಯು ಸಾರಿಗೆಗಾಗಿ ಮಾಡುವ ವೆಚ್ಚ ಅತ್ಯಂತ ಕಡಿಮೆಯಾಗಿದ್ದರೆ, ನಗರಪ್ರದೇಶಗಳ ಜನರ ವಾಯುಸಾರಿಗೆ ವೆಚ್ಚವು ಒಟ್ಟು ಸಾರಿಗೆ ವೆಚ್ಚದ ಶೇ.2.53ರಷ್ಟೆಂದು ಅದು ತಿಳಿಸಿದೆ.

ಬಸ್/ಟ್ರಾಮ್ ಸಾರಿಗೆ ನಗರ ಹಾಗೂ ಗ್ರಾಮೀಣ ಪ್ರದೇಶಗಳಲ್ಲಿ ಅತಿ ಹೆಚ್ಚು ಬಳಕೆಯಲ್ಲಿರುವ ಸಾರಿಗೆ ವ್ಯವಸ್ಥೆಯಾಗಿದೆ. ಗ್ರಾಮೀಣ ಪ್ರದೇಶಗಳ ಶೇ.66ರಷ್ಟು ಕುಟುಂಬಗಳು ಹಾಗೂ ನಗರ ಪ್ರದೇಶಗಳ ಶೇ.62ರಷ್ಟು ಕುಟುಂಬಗಳು, ಬಸ್ ಸಾರಿಗೆಯನ್ನು ಅತ್ಯಧಿಕ ಪ್ರಮಾಣದಲ್ಲಿ ಬಳಸಿಕೊಳ್ಳುತ್ತವೆಯೆಂದು ವರದಿ ಹೇಳಿದೆ.
         ಈ ಸಮೀಕ್ಷೆಯ ಪ್ರಕಾರ, ಶೇ.38ರಷ್ಟು ಗ್ರಾಮೀಣ ಹಾಗೂ ಶೇ.47ರಷ್ಟು ನಗರ ಪ್ರದೇಶಗಳ ಕುಟುಂಬಗಳು ಅಟೋರಿಕ್ಷಾಗಳನ್ನು ಉಪಯೋಗಿಸುತ್ತಿವೆ. ಟ್ಯಾಕ್ಸಿ, ರೈಲ್ವೆ ಹಾಗೂ ರಿಕ್ಷಾಗಳು ನಗರ ಹಾಗೂ ಗ್ರಾಮೀಣ ಪ್ರದೇಶಗಳ ಇತರ ಪ್ರಮುಖ ಸಾರಿಗೆ ವಿಧಾನಗಳೆಂದು ಸಮೀಕ್ಷೆ ಹೇಳಿದೆ. ಗ್ರಾಮೀಣ ಹಾಗೂ ನಗರ ಪ್ರದೇಶಗಳೆರಡರಲ್ಲೂ ಬಸ್/ಟ್ರಾಮ್, ಅಟೋರಿಕ್ಷಾ, ಟ್ಯಾಕ್ಸಿ ಹಾಗೂ ರೈಲು ಪ್ರಯಾಣಕ್ಕೆ ಮಾಡುವ ವೆಚ್ಚವು ಅವರ ಒಟ್ಟು ಸಾರಿಗೆ ವೆಚ್ಚದ ಶೇ.90ರಷ್ಟಿದೆ. 72ನೆ ಸುತ್ತಿನ ರಾಷ್ಟ್ರೀಯ ಮಾದರಿ ಸಮೀಕ್ಷೆಯ ಅಂಗವಾಗಿ 2014ರ ಜುಲೈ ಹಾಗೂ 2015ರ ಜೂನ್ ಅವಧಿಯಲ್ಲಿ ಸಂಗ್ರಹಿಸಲಾದ ಮಾಹಿತಿಯನ್ನು ಆಧರಿಸಿ ಈ ವರದಿಯನ್ನು ರಚಿಸಲಾಗಿದೆ. 14 ಪ್ರಮುಖ ಆವಶ್ಯಕ ಸೇವೆಗಳಿಗೆ ಜನರು ಮಾಡುವ ವೆಚ್ಚವನ್ನು ಅಂದಾಜಿಸಲು ಈ ಸಮೀಕ್ಷೆಯನ್ನು ನಡೆಸಲಾಗಿತ್ತು. ಈ ಸಮೀಕ್ಷೆಯಲ್ಲಿ 7,969 ಹಳ್ಳಿಗಳು ಹಾಗೂ 6,048 ನಗರ ವಿಭಾಗಗಳಲ್ಲಿ ಈ ಸಮೀಕ್ಷೆಯನ್ನು ನಡೆಸಲಾಗಿತ್ತು. ಗ್ರಾಮೀಣ ಪ್ರದೇಶದ 47,535 ಕುಟುಂಬಗಳು ಹಾಗೂ ನಗರಪ್ರದೇಶಗಳ 36,065 ಕುಟುಂಬಗಳು ಈ ಸಮೀಕ್ಷೆಯಲ್ಲಿ ಪಾಲ್ಗೊಂಡಿದ್ದವು. ದೇಶೀಯ ಸೇವೆಗಳು, ಸಲೂನ್ ಹಾಗೂ ಬ್ಯೂಟಿ ಪಾರ್ಲರ್‌ಗಳು, ಟಿವಿ ಹಾಗೂ ರೇಡಿಯೋ ಸೇವೆ, ಧಾರ್ಮಿಕ ಸೇವೆ, ಟೈಲರಿಂಗ್, ಒಳಚರಂಡಿ ನಿರ್ವಹಣೆ ಹಾಗೂ ನೈರ್ಮಲ ಸೇವೆಗಳ ಬಳಕೆಯ ಕುರಿತೂ ಸಮೀಕ್ಷೆಯನ್ನು ನಡೆಸಲಾಗಿತ್ತು.