ವಿಯೆಟ್ನಾಂನಲ್ಲಿ ವಿಶ್ವ ದಾಖಲೆ ಬರೆದ ಕೊಡಗಿನ ಚೆರಿಯಮನೆ ಸಂತೋಷ್

ಮಡಿಕೇರಿ ಜು.3: ಕೊಡಗು ಮೂಲದ ಚೆರಿಯಮನೆ ಸಂತೋಷ್ ನೇತೃತ್ವದ ತಂಡ ವಿಯೆಟ್ನಾಂನಲ್ಲಿ ಸತತ 7, 777 ಆವರ್ತ ಸೂರ್ಯ ನಮಸ್ಕಾರಗಳನ್ನು ಮಾಡಿ, ಪ್ರತಿ ಆವರ್ತದಲ್ಲಿ 10 ಯೋಗಾಸನಗಳಂತೆ ಒಟ್ಟು 77,770 ಆಸನಗಳನ್ನು ನಿರಂತರವಾಗಿ 60 ಗಂಟೆ 06 ನಿಮಿಷ 06 ಸೆಕೆಂಡ್ ಮಾಡುವ ಮೂಲಕ ವಿಶ್ವ ದಾಖಲೆಯ ಸಾಧನೆ ಮಾಡಿದ್ದಾರೆ.

ಹಿಂದೆ ಭಾರತದ ಯೋಗರಾಜ್ ಸತತ 40 ಗಂಟೆ 15 ನಿಮಿಷಗಳ ಯೋಗಾಸನದ ಮೂಲಕ ವಿಶ್ವದಾಖಲೆ ನಿರ್ಮಿಸಿದ್ದರು. ಇದನ್ನು ನೇಪಾಳದ ಯೋಗ ಶಿಕ್ಷಕ ಉತ್ತಮ್ ಯೋಗಿ ಅವರು 50 ಗಂಟೆ 15 ನಿಮಿಷಗಳ ಕಾಲ ಯೋಗ ಮಾಡುವುದರ ಮೂಲಕ ಹಳೆಯ ದಾಖಲೆಯನ್ನು ಅಳಿಸಿದ್ದರು. ಇದೀಗ ಚೆರಿಯಮನೆ ಸಂತೋಷ್ ಈ ಇಬ್ಬರ ದಾಖಲೆಯನ್ನು ಮುರಿದು ನೂತನ ದಾಖಲೆ ಬರೆದಿದ್ದಾರೆ.

 ಮೈಸೂರಿನಲ್ಲಿ ವಿದ್ಯಾಭ್ಯಾಸವನ್ನು ಪಡೆದು ಇಂಜಿಯನಿಯರಿಂಗ್ ಶಿಕ್ಷಣವನ್ನು ವರ್ಷದಲ್ಲಿ ಮೊಟಕುಗೊಳಿಸಿ ಯೋಗದ ಬಗ್ಗೆ ಆಸಕ್ತಿ ಬೆಳೆಸಿಕೊಂಡ ಅವರು, ಕನಕಪುರದ ಸಮೀಪ ಶಾಂತಿಧಾಮಕ್ಕೆ ಸೇರಿ ಯೋಗ ಶಿಕ್ಷಕರಾಗಿ ತನ್ನ ಪ್ರತಿಭೆಯನ್ನು ಕೆಲಕಾಲ ಸವೆಸಿದರು.

ಮೈಸೂರಿನ ವೇದವ್ಯಾಸ ಪ್ರತಿಷ್ಠಾನದ ವೇದ ಗುರು ರಾಘವೇಂದ್ರ ಪೈ ಅವರ ಮಾರ್ಗದರ್ಶನದ ಮೂಲಕ ವಿಯೆಟ್ನಾಂಗೆ ತೆರಳಿದ್ದ ಸಂತೋಷ್ ಕೇವಲ ಮೂರು ವರ್ಷಗಳಲ್ಲಿ ತನ್ನ ಯೋಗದ ಮೂಲಕ ಸಂಸ್ಥೆಯೊಂದರ ಸ್ಥಾಪನೆಗೆ ಕಾರಣರಾದರು.

ವಿಯೆಟ್ನಾಂನಲ್ಲಿ ಓಂ ಯೋಗಾ ವೆಲ್ನೆಸ್ ಹಬ್ ಎಂಬ ಸಂಸ್ಥೆಯ ಸ್ಥಾಪಕರಾಗಿ ಕಾರ್ಯನಿರ್ವಹಿಸುತ್ತಿದ್ದಾರೆ. ವಿಯೆಟ್ನಾಂ ಪ್ರಧಾನಿಯೇ ಇವರನ್ನು ಮೆಚ್ಚಿ ಪ್ರಶಂಶೆ ನೀಡಿದ್ದಾರೆ.ಅವರ ಸಾಧನೆಯ ಮುಂದುವರಿದ ದಾಖಲೆಯ ಆಯಾಮಗಳಾಗಿ ಏಷ್ಯ ಬುಕ್ ಆಫ್ ರೆಕಾರ್ಡ್ಸ್, ಲಿಮ್ಕಾ ಬುಕ್ ಆಫ್ ರೆಕಾರ್ಡ್ಸ್‌ಗಳೂ ಅವರ ಜೋಳಿಗೆಯಲ್ಲಿವೆ. ಅನೇಕ ಸಾಧನೆಗಳನ್ನು ಭವಿಷ್ಯದಲ್ಲಿ ಮಾಡಲು ಹೊರಟಿರುವ ಸಂತೋಷ್ ಕುಮಾರ್ ನಮ್ಮ ರಾಜ್ಯದ ರಾಜಕಾರಣಿಗಳಿಂದ ಹಿಡಿದು ದಸರಾ ಆನೆಗಳನ್ನು ಸಾಕುವ ಕಾವಾಡಿಗಳಿಗೂ ಯೋಗ ಶಿಕ್ಷಣ ನೀಡಿದ್ದಾರೆ ಎನ್ನುವುದು ವಿಶೇಷ.

 ಮೈಸೂರು ಜಿಲ್ಲೆ ಮಾತ್ರವಲ್ಲದೆ ರಾಜ್ಯಾದ್ಯಂತ ಅನೇಕ ಯೋಗ ಪ್ರದರ್ಶನಗಳನ್ನು ಇವರು ನೀಡಿದ್ದಾರೆ. ವಿಯೆಟ್ನಾಂಮ್‌ನ ಭಾಷೆ, ಸಂಸ್ಕೃತಿಯೊಂದಿಗೆ ಭಾರತೀಯ ಸಂಸ್ಕೃತಿಯ ಅವಿಭಾಜ್ಯ ಅಂಗವಾದ ಯೋಗವನ್ನು ಸಮೀಕರಿಸಿದ್ದಾರೆ.