ಕಂದಾಯ ಭೂಮಿಯಲ್ಲಿನ ಆಕ್ರಮ ಮನೆಗಳನ್ನು ಡಿಸೆಂಬರೊಳಗೆ ಸಕ್ರಮಗೊಳಿಸುವುದು ಅಗತ್ಯ : ಕಾಗೋಡು ತಿಮ್ಮಪ್ಪ

ಬೆಂಗಳೂರು,ಜುಲೈ,4: ನಗರ ಮತ್ತು ಗ್ರಾಮೀಣ ಪ್ರದೇಶಗಳಲ್ಲಿ ಕಂದಾಯ ಭೂಮಿಯಲ್ಲಿ ಆಕ್ರಮವಾಗಿ ಕಟ್ಟಿಕೊಂಡಿರುವ ಮನೆಗಳನ್ನು ಡಿಸೆಂಬರ್ ಒಳಗಾಗಿ ಸಕ್ರಮಗೊಳಿಸಲು ಅಗತ್ಯ ಕ್ರಮ ಕೈಗೊಳ್ಳುವುದಾಗಿ ಎಂದು ಕಂದಾಯ ಸಚಿವ ಕಾಗೋಡು ತಿಮ್ಮಪ್ಪ ವಿಧಾನಸಭೆಗಿಂದು ಭರವಸೆ ನೀಡಿದರು.

ಪ್ರಶ್ನೋತ್ತರ ಕಲಾಪದಲ್ಲಿ ಬಿಜೆಪಿ ಸದಸ್ಯ ಸುನೀಲ್ ಕುಮಾರ್ ಅವರ ಪ್ರಶ್ನೆಗೆ ಉತ್ತರಿಸಿದ ಅವರು, 94 (ಸಿ) ಅಡಿಯಲ್ಲಿ ಗ್ರಾಮಾಂತರ ಪ್ರದೇಶಗಳಲ್ಲಿ ಕಂದಾಯ ಭೂಮಿಯಲ್ಲಿ ಆಕ್ರಮವಾಗಿ ಕಟ್ಟಿರುವ ಮನೆಗಳನ್ನು ಸಕ್ರಮಗೊಳಿಸಲು ಕ್ರಮ ಕೈಗೊಳ್ಳಲಾಗಿದೆ. ಗ್ರಾಮೀಣ ಪ್ರದೇಶದಲ್ಲಿನ 50-80 ರವರೆಗಿನ ನಿವೇಶನಗಳಲ್ಲಿ ಅಕ್ರಮವಾಗಿ ಮನೆಗಳನ್ನು ನಿರ್ಮಿಸಿಕೊಂಡಿರುವರಿಗೆ ಮಾತ್ರ ಅಕ್ರಮ ಸಕ್ರಮ ಅನ್ವಯವಾಗುತ್ತದೆ. ಇಲ್ಲಿ ಎಪಿಎಲ್ ಮತ್ತು ಬಿಪಿಎಲ್ ಕಾರ್ಡದಾರರು ಎಂಬ ಯಾವುದೇ ಬೇಧಭಾವ ಮಾಡುವುದಿಲ್ಲ. ಅದೇ ರೀತಿ ನಗರ ಪ್ರದೇಶಗಳಲ್ಲಿ 25-30 ಅಳತೆಯ ನಿವೇಶನಗಳಲ್ಲಿ ಅಕ್ರಮವಾಗಿ ಮನೆ ಕಟ್ಟಿಕೊಂಡಿರುವವರು ಮಾತ್ರ ಅಕ್ರಮ ಸಕ್ರಮ ವ್ಯಾಪ್ತಿಗೆ ಬರುತ್ತಾರೆ. ನಗರ ಪ್ರದೇಶಗಳಲ್ಲಿ ಸ್ಥಳಾವಭಾವ ಇರುವುದರಿಂದ ಅಕ್ರಮ-ಸಕ್ರಮ ನಿವೇಶಗಳನ ವಿಸ್ತೀರ್ಣ ಮಿತಿ ಹೆಚ್ಚಳ ಸಾಧ್ಯವಿಲ್ಲ ಎಂದೂ ಕಾಗೋಡು ತಿಮ್ಮಪ್ಪ ಸ್ಪಷ್ಟ ಪಡಿಸಿದ್ರು.

ಈ ಕೆಲಸಕ್ಕೆ ವಿಶೇಷವಾಗಿ ಸರ್ವೇಯರ್‌ಗಳನ್ನು ನೇಮಕ ಮಾಡಬೇಕು ಎಂಬ ಭ್ರಮೆ ಬೇಡ. ಮೊದಲು ಗ್ರಾಮ ಲೆಕ್ಕಿಗರು ಹಾಗೂ ಪಿಡಿಓಗಳ ಮೂಲಕ ಗ್ರಾಮಾಂತರ ಪ್ರದೇಶಗಳ ಪ್ರತಿ ಸರ್ವೇ ನಂಬರ್‌ಗೂ ಪ್ರತ್ಯೇಕ ಕಡತ ರೂಪಿಸುವಂತೆ ಸೂಚಿಸಲಾಗಿದೆ. ಹೀಗೆ ಪ್ರತಿ ಸರ್ವೇ ನಂಬರ್‌ಗಳಿಗೂ ಪ್ರತ್ಯೇಕ ಕಡತ ರೂಪಿಸುವುದರಿಂದ ಆಯಾ ಸರ್ವೇ ನಂಬರುಗಳ ಕಂದಾಯ ಭೂಮಿಯಲ್ಲಿ ಯಾರು ಮನೆ ಕಟ್ಟಿಕೊಂಡಿದ್ದಾರೋ?ಅವರನ್ನು ಗುರುತಿಸಬಹುದು ಎಂದು ಹೇಳಿದರು.

ಗ್ರಾಮ ಲೆಕ್ಕಾಧಿಕಾರಿಗಳ ಮೂಲಕ, ಪಂಚಾಯ್ತಿ ಅಭಿವೃದ್ಧಿ ಅಧಿಕಾರಿಗಳ ಮೂಲಕ ಕಡತ ರೂಪಿಸಿದ ಮೂಲಕ ಅದನ್ನು ತರಿಸಿಕೊಂಡು ತ್ವರಿತವಾಗಿ ಆಕ್ರಮ ಮನೆಗಳನ್ನು ಸಕ್ರಮಗೊಳಿಸುವ ಕೆಲಸ ಮಾಡುತ್ತೇವೆ. ಇನ್ನು 94 (ಸಿ) (ಸಿ) ಅಡಿ ನಗರ ಪ್ರದೇಶಗಳಲ್ಲಿ ಆಕ್ರಮವಾಗಿ ಕಟ್ಟಿರುವ ಮನೆಗಳನ್ನು ಸಕ್ರಮಗೊಳಿಸುವ ಕೆಲಸವನ್ನೂ ತ್ವರಿತಗತಿಯಲ್ಲಿ ಪೂರ್ಣಗೊಳಿಸೋಣ.ಅವರಿಗೆ ಮೊದಲು ಹಕ್ಕು ಪತ್ರ ಕೊಡೋಣ.ಭೂಮಿಯಲ್ಲಿ ಹುಟ್ಟಿದ ಮೇಲೆ ಮನುಷ್ಯ ಸ್ವಂತ ಸೂರು ಹೊಂದಬೇಕು. ಆ ಕೆಲಸ ಮಾಡುವುದರಲ್ಲಿ ನಾವು ಸಫಲರಾದರೆ ಹುಟ್ಟಿದ್ದಕ್ಕೂ ಸಾರ್ಥಕ ಎಂದು ನುಡಿದ ಅವರು,94 (ಸಿ) ಹಾಗೂ 94 (ಸಿ) (ಸಿ) ಯೋಜನೆಯಡಿ ಆಕ್ರಮ ಮನೆಗಳನ್ನು ಸಕ್ರಮಗೊಳಿಸಲು ಅರ್ಜಿ ಸ್ವೀಕಾರ ಕಾರ್ಯ ತಡವಾಗುತ್ತಿರುವುದು ನನ್ನ ಗಮನಕ್ಕೆ ಬಂದಿದೆಎಂದರು. 

ಹೀಗಾಗಿ ಅಗತ್ಯ ಬಿದ್ದಲ್ಲಿ ಹೆಚ್ಚುವರಿ ಕಂಪ್ಯೂಟರುಗಳನ್ನು ಒದಗಿಸಲಾಗುವುದು ಎಂದ ಅವರು,ಆಕ್ರಮ ಕಟ್ಟಡಗಳನ್ನು ಸಕ್ರಮಗೊಳಿಸುವ ವಿಷಯದಲ್ಲಿ ವಿಧಿಸಲಾಗುವ ದಂಡದ ಪ್ರಮಾಣವನ್ನು ಕಡಿಮೆ ಮಾಡಬೇಕು ಎಂಬ ವಾದಕ್ಕೆ ನನ್ನ ಸಹಮತವಿದೆ ಎಂದರು. ಪರಿಶಿಷ್ಟ ಜಾತಿ,ಪಂಗಡದವರಿಗೆ ಉಚಿತವಾಗಿ ಹಾಗೂ ಇತರರಿಗೆ ಕಡಿಮೆ ದರದ ಶುಲ್ಕ ವಿಧಿಸಬೇಕು ಎಂಬುದು ನನ್ನ ಬಯಕೆ.ಹೀಗಾಗಿ ಆ ಕುರಿತು ಚರ್ಚಿಸಿ ಅದನ್ನು ಅಂತಿಮಗೊಳಿಸುತ್ತೇನೆ ಎಂದು ವಿವರಿಸಿದರು. ಹಾಗೆಯೆ ಆಕ್ರಮ ಕಟ್ಟಡಗಳನ್ನು ಸಕ್ರಮಗೊಳಿಸುವ ಕೆಲಸ ಸಮರ್ಪಕವಾಗಿ ನಡೆಯಬೇಕು.ಹೀಗಾಗಿ ಪಂಚಾಯ್ತಿ ವ್ಯಾಪ್ತಿಗಳಲ್ಲಿ ಯಾರೊಬ್ಬರೂ ಅರ್ಜಿ ಸಲ್ಲಿಸುವುದು ತಪ್ಪದಂತೆ ನೋಡಿಕೊಳ್ಳಿ.ಯೋಜನೆಯ ಅನುಷ್ಟಾನದ ವಿಷಯದಲ್ಲಿ ನಿಮ್ಮ ಉಸ್ತುವಾರಿ ಇರಲಿ ಎಂದು ಶಾಸಕರಿಗೆ ಹೇಳಿದರು. ಇದಕ್ಕೂ ಮುನ್ನ ಮಾತನಾಡಿದ ಸುನೀಲ್ ಕುಮಾರ್,ಶಿವಮೊಗ್ಗದ ಪ್ರಸನ್ನ ಕುಮಾರ್ ಮತ್ತಿತರರು ವಿಷಯ ಪ್ರಸ್ತಾಪಿಸಿ,ಗ್ರಾಮೀಣ ಹಾಗೂ ನಗರ ಪ್ರದೇಶಗಳಲ್ಲಿ ಆಕ್ರಮವಾಗಿ ನಿರ್ಮಿಸಿರುವ ಮನೆಗಳನ್ನು ಸಕ್ರಮಗೊಳಿಸಲು ವಿಳಂಬ ಮಾಡಲಾಗುತ್ತಿದೆ ಎಂದರು.

ಅರ್ಜಿ ಸ್ವೀಕರಿಸಲು ಪೂರಕವಾಗಿ ಕಂಪ್ಯೂಟರುಗಳೇ ಕೆಲಸ ಮಾಡುತ್ತಿಲ್ಲ.ಅದೇ ರೀತಿ ಆಕ್ರಮ ಕಟ್ಟಡಗಳನ್ನು ಸಕ್ರಮಗೊಳಿಸಲು ಪೂರಕವಾಗಿ ಅವನ್ನು ಗುರುತಿಸುವ ಸರ್ವೇಯರ್‌ಗಳ ಕೊರತೆ ಇದೆ.ಹೀಗಾಗಿ ಒಂದೊಂದು ತಾಲ್ಲೂಕಿಗೆ ಕನಿಷ್ಟ ನಾಲ್ಕು ಮಂದಿ ಸರ್ವೇಯರ್‌ಗಳನ್ನು ನೀಡಬೇಕು ಎಂದು ಒತ್ತಾಯಿಸಿದರು.

ಇವತ್ತು ಸರ್ವೇಯರ್‌ಗಳ ಕೊರತೆ ವ್ಯಾಪಕವಾಗಿರುವುದರಿಂದ ಆಕ್ರಮ ಕಟ್ಟಡಗಳನ್ನು ಸಕ್ರಮಗೊಳಿಸುವ ಕೆಲಸ ಸರಿಯಾಗಿ ನಡೆಯುತ್ತಿಲ್ಲಎಂದು ಇದೇ ಸಂದರ್ಭದಲ್ಲಿ ಅವರು ದೂರಿದರು.

ನಗರ ಪ್ರದೇಶಗಳಲ್ಲಿ 20*30 ನಿವೇಶನದಲ್ಲಿ ಕಟ್ಟಿದ ಮನೆಗಳನ್ನು ಮಾತ್ರವೇ ಸಕ್ರಮಗೊಳಿಸುತ್ತೇವೆ ಎನ್ನುವ ಬದಲು 30*40 ನಿವೇಶನದಲ್ಲಿ ಕಟ್ಟಿರುವ ಮನೆಗನ್ನು ಸಕ್ರಮಗೊಳಿಸಬೇಕು ಎಂದು ಮನವಿ ಮಾಡಿಕೊಂಡರು.

ಕಳೆದ ವಿಧಾನಮಂಡಲ ಅಧಿವೇಶನದ ಸಂದರ್ಭದಲ್ಲಿ ಗ್ರಾಮಾಂತರ ಪ್ರದೇಶಗಳಲ್ಲಿ 50*80 ಅಳತೆಯ ನಿವೇಶನದಲ್ಲಿ ಕಟ್ಟಲಾದ ಆಕ್ರಮ ಕಟ್ಟಡಗಳನ್ನೂ ಸಕ್ರಮಗೊಳಿಸುವುದಾಗಿ ಭರವಸೆ ನೀಡಲಾಗಿತ್ತು.ಇದೇ ರೀತಿ ನಗರ ಪ್ರದೇಶಗಳಲ್ಲೂ 20*30 ರ ಬದಲು 30*40 ನಿವೇಶನದಲ್ಲಿ ಕಟ್ಟಿದ ಮನೆಗಳನ್ನು ಸಕ್ರಮಗೊಳಿಸುವುದಾಗಿ ಸರ್ಕಾರ ಒಪ್ಪಿಗೆ ನೀಡಿತ್ತು.

ಆದರೆ ಇದುವರೆಗೆ ಆ ಕುರಿತು ಕೆಲಸವೇ ಆಗಿಲ್ಲ.ಅರ್ಜಿ ಸಲ್ಲಿಸುವ ಸಂದರ್ಭದಲ್ಲಿ ಕೊಡಬೇಕಾದ ಶುಲ್ಕದ ಪ್ರಮಾಣವನ್ನು ಕಡಿಮೆ ಮಾಡಲು ಒಪ್ಪಿಕೊಳ್ಳಲಾಗಿದ್ದರೂ ಅದನ್ನು ಈಡೇರಿಸಿಲ್ಲ ಎಂದು ಆರೋಪಿಸಿದರು.

ಈ ಮಧ್ಯೆ ಮಂಗಳೂರಿನ ಸುತ್ತ ಮುತ್ತ ಆಗಿರುವ ಸಮಸ್ಯೆಯನ್ನು ವಿವರಿಸಿದ ಶಾಸಕರು, ಮಂಗಳೂರು ನಗರದ ಹದಿನೈದು ಕಿಲೋಮೀಟರ್ ವ್ಯಾಪ್ತಿಯ ಸುತ್ತ ಇರುವ 20*30 ನಿವೇಶನಗಳಲ್ಲಿ ಕಟ್ಟಿರುವ ಮನೆಗಳನ್ನು ಸಕ್ರಮಗೊಳಿಸಲು ಹೇಳಿದೆ.ಆದರೆ ಆ ವ್ಯಾಪ್ತಿಯಲ್ಲಿ ಹಲವು ಗ್ರಾಮ ಪಂಚಾಯ್ತಿಗಳೂ ಬರುತ್ತವೆ.

ಅವರು ಗ್ರಾಮಪಂಚಾಯ್ತಿ ವ್ಯಾಪ್ತಿಯಲ್ಲೇ ಇದ್ದರೆ 50*80 ನಿವೇಶನವನ್ನು ಪಡೆಯಬಹುದು.ಆದರೆ ನಗರ ಪ್ರದೇಶದ ಮಿತಿ ನಿಗದಿಗೊಳಿಸಿದ ಪರಿಣಾಮವಾಗಿ ಒದ್ದಾಡಬೇಕಾದ ಸ್ಥಿತಿ ಬಂದಿದೆ ಎಂದರು.