ಪೊಲೀಸರು ಜನರೊಂದಿಗೆ ಸೌಹಾದರ್ ಸಂಬಂಧ ಬೆಳೆಸಿಕೊಳ್ಳಿ’

ಸಾಗರ,ಜು.4: ಹಬ್ಬವನ್ನು ಶಾಂತಿ ಹಾಗೂ ಸೌಹಾರ್ದದಿಂದ ಆಚರಿಸುವ ಮೂಲಕ ಸಮಾಜದಲ್ಲಿ ಸಾಮರಸ್ಯ ವಾತಾವರಣ ನಿರ್ಮಾಣ ಮಾಡಲು ಎಲ್ಲ ಕೋಮಿನವರು ಸಂಕಲ್ಪ ಮಾಡಬೇಕು ಎಂದು ಹೆಚ್ಚುವರಿ ಪೊಲೀಸ್ ಅಧೀಕ್ಷಕ ವಿನ್ಸಂಟ್ ಶಾಂತಕುಮಾರ್ ಹೇಳಿದ್ದಾರೆ.
ಇಲ್ಲಿನ ಶಾರದಾಂಬಾ ಕಲ್ಯಾಣ ಮಂಟಪದಲ್ಲಿ ಪೊಲೀಸ್ ಇಲಾಖೆ ವತಿಯಿಂದ ರವಿವಾರ ರಮಝಾನ್ ಹಬ್ಬದ ಅಂಗವಾಗಿ ಹಮ್ಮಿಕೊಳ್ಳಲಾಗಿದ್ದ ಶಾಂತಿಸಭೆಯಲ್ಲಿ ಜಿಲ್ಲಾ ಪೊಲೀಸ್ ಇಲಾಖೆ ವತಿಯಿಂದ ಹೊರಗೆ ತರಲಾದ ಪುಸ್ತಕವನ್ನು ಬಿಡುಗಡೆ ಮಾಡಿ ಅವರು ಮಾತನಾಡುತ್ತಿದ್ದರು. ರಮಝಾನ್ ಸಂದರ್ಭದಲ್ಲಿ ಎಲ್ಲ ಧಾರ್ಮಿಕ ಸ್ಥಳಗಳಿಗೆ ಪೊಲೀಸ್ ಭದ್ರತೆ ಒದಗಿಸಲಾಗುವುದು. ಕೆಲವೊಂದು ಧಾರ್ಮಿಕ ಕೇಂದ್ರಗಳು ಗುಣಮಟ್ಟವಲ್ಲದಿರುವ ಸಿಸಿ ಕ್ಯಾಮರಾ ಅಳವಡಿಸಿರುವ ಮಾಹಿತಿ ಇದ್ದು, ಅದನ್ನು ತೆರವುಗೊಳಿಸಿ ಗುಣಮಟ್ಟದ ಕ್ಯಾಮರಾ ಅಳವಡಿಸುವಂತೆ ಸೂಚನೆ ನೀಡಿದರು. ಸೊರಬ ರಸ್ತೆ ಹಾಗೂ ಜೋಗ ರಸ್ತೆಯಲ್ಲಿ ವಾಹನ ಸಂಚಾರ ಹೆಚ್ಚಿದೆ. ಈ ಬಗ್ಗೆ ಸಾರ್ವಜನಿಕರಿಂದ ಸಾಕಷ್ಟು ದೂರು ಇರುವ ಹಿನ್ನೆಲೆಯಲ್ಲಿ ಟ್ರಾಫಿಕ್ ವ್ಯವಸ್ಥೆ ಸುಧಾರಿಸುವ ನಿಟ್ಟಿನಲ್ಲಿ ಕ್ರಮ ತೆಗೆದುಕೊಳ್ಳಲಾಗುತ್ತದೆ. ಶಾಲಾಕಾಲೇಜು ಬಳಿ ಡ್ರಗ್ಸ್, ಗಾಂಜಾ ಹಾಗೂ ಹೆಣ್ಣುಮಕ್ಕಳನ್ನು ಚುಡಾಯಿಸುತ್ತಿರುವ ದೂರುಗಳಿದ್ದು, ಶಾಲಾಕಾಲೇಜು ಪ್ರಾರಂಭ ಹಾಗೂ ಬಿಡುವ ಸಂದರ್ಭದಲ್ಲಿ ಮಫ್ತಿಯಲ್ಲಿ ಪೊಲೀಸರನ್ನು ನೇಮಿಸಿ, ಇಂತಹ ಕೃತ್ಯದಲ್ಲಿ ತೊಡಗಿರುವವರ ವಿರುದ್ಧ ಕಟ್ಟುನಿಟ್ಟಿನ ಕ್ರಮ ಕೈಗೊಳ್ಳಲಾಗುತ್ತದೆ ಎಂದರು. ಪೊಲೀಸರು ಸಾರ್ವಜನಿಕರೊಂದಿಗೆ ಸೌಹಾರ್ದ ಸಂಬಂಧ ಹೊಂದಿರಬೇಕು. ಪ್ರತೀ ತಿಂಗಳು ನಾಗರಿಕ ಸಮಿತಿಯ ಸಭೆ ಕರೆದು, ದೂರುಗಳನ್ನು ಆಲಿಸಿ, ಅದನ್ನು ಪರಿಹರಿಸುವ ನಿಟ್ಟಿನಲ್ಲಿ ಕ್ರಮಕೈಗೊಳ್ಳುವಂತೆ ಎಎಸ್ಪಿ ನಿಶಾ ಜೇಮ್ಸ್ ಅವರಿಗೆ ಸೂಚನೆ ನೀಡಿದರು. ಉಪವಿಭಾಗಾಧಿಕಾರಿ ಡಿ.ಎಂ.ಸತೀಶಕುಮಾರ್ ಮಾತನಾಡಿ, ಮನೆ ನಿರ್ಮಾಣ ಮಾಡುವವರಿಗೆ ಮರಳು ಕೊಡಿಸುವ ಬಗ್ಗೆ ಅಗತ್ಯ ಕ್ರಮ ಕೈಗೊಳ್ಳಲಾಗುತ್ತದೆ. ಅನಗತ್ಯವಾಗಿ ಮರಳು ಸಂಗ್ರಹಣೆ ಮಾಡಿ ಕಾಳಸಂತೆಯಲ್ಲಿ ಮಾರಾಟ ಮಾಡುವವರ ವಿರುದ್ಧ ಕಾನೂನು ಕ್ರಮ ಜರಗಿಸಲಾಗುತ್ತದೆ. ಶಾಲಾವಾಹನಗಳಲ್ಲಿ ಮಕ್ಕಳನ್ನು ಕಳುಹಿಸುವ ಪೋಷಕರು ಜಾಗೃತೆಯಿಂದ ಇರಬೇಕು ಎಂದು ತಿಳಿಸಿದರು. ಎಎಸ್ಪಿ. ನಿಶಾ ಜೇಮ್ಸ್ ಮಾತನಾಡಿ, ಶೀಘ್ರದಲ್ಲೆ ಶಿವಮೊಗ್ಗ ಜಿಲ್ಲೆಗೆ 226 ಪೊಲೀಸ್ ಸಿಬ್ಬಂದಿ ನೇಮಕಾತಿಯಾಗಲಿದೆ. ಇದರಿಂದ ಸಾಗರ ತಾಲೂಕಿನಲ್ಲಿ ಕೊರತೆ ಇರುವ ಸಿಬ್ಬಂದಿ ಸಮಸ್ಯೆ ಬಗೆಹರಿಯಲಿದೆ. ಹೊಸದಾಗಿ ಬರುವ ಸಿಬ್ಬಂದಿಯಲ್ಲಿ 6 ಜನರನ್ನು ಟ್ರಾಫಿಕ್ ಸಮಸ್ಯೆ ನಿಯಂತ್ರಣಕ್ಕೆ ನಿಯೋಜಿಸಲಾಗುತ್ತದೆ ಎಂದರು. ಸಾಗರ ನಗರ ಠಾಣೆ ನಿರೀಕ್ಷಕ ದಿನೇಶ್ ಪಾಟೀಲ್, ಸಬ್ ಇನ್‌ಸ್ಪೆಕ್ಟರ್ ಪಿ.ವಿ.ಶಶಿಕಾಂತ್, ಟಿ.ಡಿ.ಮೇಘರಾಜ್, ಸೈಯದ್ ಮುನಾವರ್, ಆವಿನಹಳ್ಳಿ ಗ್ರಾಪಂ ಅಧ್ಯಕ್ಷೆ ನಾಗರತ್ನಾ, ತಾಹೀರ್, ಗ್ರೇಸಿ ಡಯಾಸ್, ರವಿ ಜಂಬಗಾರು ಮತ್ತಿತರರು ಉಪಸ್ಥಿತರಿದ್ದರು.
ಸರಕಾರಿ ಶಾಲೆಗೆ ಬೀಗ ಜಡಿದು ಗಾ್ರಮಸ್ಥರ ಧರಣಿ
ಶಿಕಾರಿಪುರ,ಜು.4: ಸರಕಾರಿ ಶಾಲೆಯ ಶಿಕ್ಷಕರಾಗಿ ಕಳೆದ 9 ವರ್ಷದಿಂದ ತಾಪಂನಲ್ಲಿ ಸೇವೆ ಸಲ್ಲಿಸುವ ಮೂಲಕ ಶಾಲಾ ಮಕ್ಕಳಿಗೆ ಅನ್ಯಾಯ ಎಸಗುತ್ತಿರುವ ಶಿಕ್ಷಕರನ್ನು ವರ್ಗಾವಣೆಗೊಳಿಸಿ, ಖಾಯಂ ಶಿಕ್ಷಕರನ್ನು ನೇಮಕಗೊಳಿಸುವಂತೆ ಆಗ್ರಹಿಸಿ, ತಾಲೂಕಿನ ಹೊಸೂರು ಗ್ರಾಮಸ್ಥರು ಹಾಗೂ ವಿವಿಧ ಸಂಘಟನೆಗಳ ವತಿಯಿಂದ ಗ್ರಾಮದ ಸರಕಾರಿ ಹಿರಿಯ ಪ್ರಾಥಮಿಕ ಶಾಲೆಗೆ ಸೋಮವಾರ ಬೀಗಜಡಿದು ಧರಣಿ ನಡೆಸಿದರು.
ಹೊಸೂರು ಗ್ರಾಮದ ಸರಕಾರಿ ಹಿರಿಯ ಪ್ರಾಥಮಿಕ ಶಾಲೆಯ ಶಿಕ್ಷಕರಾಗಿ ಕಳೆದ 9 ವರ್ಷಗಳಿಂದ ಸತತ ಶಾಲೆಯನ್ನು ತೊರೆದು ತಾಪಂನಲ್ಲಿ ಸೇವೆ ಸಲ್ಲಿಸುತ್ತಿರುವ ಸುರೇಶ್‌ರನ್ನು ತಾಪಂಯಲ್ಲಿಯೇ ಖಾಯಂಗೊಳಿಸಿ ಶಾಲೆಗೆ ಬದಲಿ ಶಿಕ್ಷಕರನ್ನು ನೇಮಕಗೊಳಿಸುವಂತೆ ಹಲವು ಬಾರಿ ಶಿಕ್ಷಣ ಇಲಾಖೆಯ ಹಿರಿಯ ಅಧಿಕಾರಿಗಳಿಗೆ ವೌಖಿಕವಾಗಿ ಹಾಗೂ ಲಿಖಿತವಾಗಿ ದೂರು ಸಲ್ಲಿಸಲಾಗಿದೆ ಎಂದು ತಾಲೂಕು ಬಣಜಾರ್ ಯುವಸೇನೆಯ ಅಧ್ಯಕ್ಷ ರಮೇಶ್ ನಾಯ್ಕ ದೂರಿದ್ದಾರೆ.
200 ಕ್ಕೂ ಅಧಿಕ ಮಕ್ಕಳಿರುವ ಶಾಲೆಗೆ ಕೇವಲ 7 ಶಿಕ್ಷಕರಿದ್ದು ತಾಪಂಗೆ ಶಾಲೆಯ ಶಿಕ್ಷಕ ಸುರೇಶ್ ನಿಯೋಜನೆಯಿಂದಾಗಿ ಮಕ್ಕಳು ಶಿಕ್ಷಣದಿಂದ ವಂಚಿತರಾಗುತ್ತಿದ್ದಾರೆ ಎಂದ ಅವರು ಈ ಬಗ್ಗೆ ಶಿಕ್ಷಣ ಇಲಾಖೆಗೆ ದೂರು ಸಲ್ಲಿಸಿದಾಗ ಕೆಲ ತಿಂಗಳು ಬದಲಿ ಶಿಕ್ಷಕರು ನಿಯೋಜನೆಗೊಂಡು ಯಥಾಪ್ರಕಾರ ತಮ್ಮ ಶಾಲೆಗೆ ಮರಳುತ್ತಿದ್ದಾರೆ.ಇಲಾಖೆಯಲ್ಲಿನ ಕೆಲ ಪ್ರಬಲ ಹಿತಾಸಕ್ತಿಗಳು ಶಿಕ್ಷಕರಿಗೆ ರಕ್ಷಣೆ ನೀಡುತ್ತಿದ್ದಾರೆ ಎಂದು ಆರೋಪಿಸಿದರು.
 ಮುಖ್ಯ ಶಿಕ್ಷಕರಿಗೆ ಬೋಧನೆ ಹೊರತಾದ ಇಲಾಖೆಯ ದಾಖಲಾತಿ ಮತ್ತಿತರ ಕಾರ್ಯ,ಇತರೆ ಕೆಲ ಶಿಕ್ಷಕರಿಗೆ ಬಿಸಿಯೂಟ ಪಠ್ಯೇತರ ಚಟುವಟಿಕೆ ಮತ್ತಿತರ ಒತ್ತಡದಿಂದ ಕೆಲ ಶಿಕ್ಷಕರು ಮಾತ್ರ ಬೋಧನೆಗೆ ಮೀಸಲಾಗಿ ಮಕ್ಕಳು ಶಿಕ್ಷಣದಿಂದ ಖಾಯಂ ವಂಚನೆಗೊಳಗಾಗುತ್ತಿದ್ದಾರೆ.ಹೊರ ಇಲಾಖೆಗೆ ನಿಯೋಜನೆಗೊಂಡಲ್ಲಿ ಶೈಕ್ಷಣಿಕ ವರ್ಷದ ಅಂತ್ಯದಲ್ಲಿ ಮಾತೃಇಲಾಖೆಗೆ ವಾಪಸ್ ತೆರಳಿ ನವೀಕರಣಗೊಳಿಸುವ ಸ್ಪಷ್ಟ ಆದೇಶವಿದ್ದು, ಎಲ್ಲವನ್ನು ಧಿಕ್ಕರಿಸುತ್ತಿರುವ ಶಿಕ್ಷಕ ಸುರೇಶ್ ಬಗ್ಗೆ ಇಲಾಖೆಯ ದಿವ್ಯ ವೌನ ಖಂಡಿಸಿ ಶಾಲೆಗೆ ಬೀಗ ಜಡಿಯುವ ಜೊತೆಗೆ ಬದಲಿ ಶಿಕ್ಷಕರನ್ನು ನೇಮಕಗೊಳಿಸುವವರೆಗೆ ಶಾಲೆಯಲ್ಲಿ ಪಾಠಪ್ರವಚನಕ್ಕೆ ಅವಕಾಶ ನೀಡುವುದಿಲ್ಲ.ಕೂಡಲೇ ಸ್ಪಂದಿಸದಿದ್ದಲ್ಲಿ ಬಿಇಒ ಕಚೇರಿ,ತಾಲೂಕು ಕಚೇರಿ ಮುಂಭಾಗ ಉಗ್ರ ಪ್ರತಿಭಟನೆ ಹಮ್ಮಿಕೊಳ್ಳುವುದಾಗಿ ತಾಲೂಕು ಬಣಜಾರ್ ಯುವಸೇನೆಯ ಸಂಘಟನಾ ಕಾರ್ಯದರ್ಶಿ ಚಂದ್ರು ಎಚ್ಚರಿಸಿದರು.
 ಶಾಲೆಯ ಮುಖ್ಯೋಪಾಧ್ಯಾಯ ಚನ್ನೇಶಪ್ಪ ಮಾತನಾಡಿ,ಕಳೆದ 9 ವರ್ಷಗಳಿಂದ ಶಿಕ್ಷಕರು ಶಾಲೆಗೆ ಗೈರಾಗಿ ತಾಪಂನಲ್ಲಿ ಸೇವೆ ಸಲ್ಲಿಸುತ್ತಿರುವ ಬಗ್ಗೆ ಇಲಾಖೆಯ ಮುಖ್ಯಸ್ಥರ ಗಮನ ಸೆಳೆಯಲಾಗಿದ್ದು ಶಾಲಾಭಿವೃದ್ಧಿ ಸಮಿತಿ ವತಿಯಿಂದ ಹಲವು ಬಾರಿ ಬದಲಿ ಖಾಯಂ ವ್ಯವಸ್ಥೆಗೆ ಮನವಿ ಸಲ್ಲಿಸಲಾಗಿದೆ ಎಂದು ತಿಳಿಸಿದರು.
  ಶಾಲಾಭಿವೃದ್ಧಿ ಸಮಿತಿ ಅಧ್ಯಕ್ಷೆ ಮಂಜುಳಮ್ಮ, ಪರೀಕ್ಷಾ ಸಮಯದಲ್ಲಿ ಕೆಲ ತಿಂಗಳ ಅವಧಿಗೆ ಬದಲಿ ಶಿಕ್ಷಕರನ್ನು ನಿಯೋಜಿಸುವ ಇಲಾಖೆಯ ಕಾರ್ಯದಿಂದ ಮಕ್ಕಳು ಕೆಲ ಸಮಯದಲ್ಲಿಯೇ ಪೂರ್ಣ ಪಾಠವನ್ನು ಅಭ್ಯಸಿಸುವ ಸಂಕಷ್ಟವನ್ನು ಎದುರಿಸುತ್ತಿದ್ದು, ಪರೀಕ್ಷೆ ಸಮೀಪಿಸುತ್ತಿದ್ದಂತೆ ವಾಪಸ್ ತೆರಳುವ ಶಿಕ್ಷಕರು ನಂತರದಲ್ಲಿ ಮಕ್ಕಳಿಗೆ ಗೊಂದಲ ಉಂಟುಮಾಡುತ್ತಿದ್ದಾರೆ ಎಂದರು.
 ಶಿಕ್ಷಕ ಸುರೇಶ್‌ರನ್ನು ಶಾಲೆಯಲ್ಲಿ ಮುಂದುವರಿಸುವಂತೆ ತಪ್ಪಿದಲ್ಲಿ ಬದಲಿ ಖಾಯಂ ವ್ಯವಸ್ಥೆಗೆ ಆಗ್ರಹಿಸಿ ಗ್ರಾಮಸ್ಥರು, ಪೋಷಕರು ಶಾಲೆಗೆ ಬೀಗ ಜಡಿದು ಪ್ರತಿಭಟಿಸಿದರು. ಸ್ಥಳಕ್ಕೆ ಸಮೂಹ ಸಂಪನ್ಮೂಲ ಕೇಂದ್ರದ ನಾಯಕ ಭೇಟಿ ನೀಡಿ ಹಿರಿಯ ಅಧಿಕಾರಿಗಳಿಗೆ ವರದಿ ಸಲ್ಲಿಸುವುದಾಗಿ ತಿಳಿಸಿದರು.
ಈ ಸಂದರ್ಭದಲ್ಲಿ ಗ್ರಾಪಂ ಅಧ್ಯಕ್ಷ ಕುಮಾರನಾಯ್ಕ, ಉಪಾಧ್ಯಕ್ಷೆ ಗೀತಾ,ಸದಸ್ಯ ವೆಂಕಟೇಶ, ಅನುಸೂಯಬಾಯಿ,ಶಾಲಾಭಿವೃದ್ಧಿ ಸಮಿತಿಯ ಮೂರ್ತಿ ನಾಯ್ಕ, ಸಕ್ರಾನಾಯ್ಕ,ರಾಧಾ,ದಾ ನ ಮ್ಮ,ರತ್ನಮ್ಮ,ಯಶೋಧಮ್ಮ,ಹೇಮರಾಜ್,ಕಿರಣನಾಯ್ಕ,ಗಣೇಶನಾಯ್ಕ ಮತ್ತಿತರರು ಉಪಸ್ಥಿರಿದ್ದರು.