ಆರ್ಟಿಇ ಪ್ರವೇಶ ನಿರಾಕರಣೆ: ಪೋಷಕರ ಆಕ್ರೋಶ
ಸುಳ್ಯ, ಜು.8: ಆರ್ಟಿಇ ಕಾಯ್ದೆಯಡಿ ಪ್ರವೇಶ ನೀಡಲು ಸುಳ್ಯದ ಸೈಂಟ್ ಜೋಫ್ ಶಾಲಾಡಳಿತ ನಿರಾಕರಿಸಿದ ಕುರಿತು ಆಯ್ಕೆಯಾದ ಫಲಾನುಭವಿಗಳ ಪೋಷಕರು ಆಕ್ರೋಶ ವ್ಯಕ್ತಪಡಿಸಿದ ಘಟನೆ ಶುಕ್ರವಾರ ನಡೆದಿದೆ.
ಈ ಶಾಲೆ ಅಲ್ಪಸಂಖ್ಯಾತ ವರ್ಗಕ್ಕೆ ಸೇರಿದ್ದಾಗಿದ್ದು, ಆರ್ಟಿಇ ಕಾಯ್ದೆಯಡಿ ಅದಕ್ಕೆ ವಿನಾಯಿತಿ ನೀಡಲಾಗಿತ್ತು. ಆದರೆ ಈ ವರ್ಷ ಅದನ್ನು ರದ್ದು ಮಾಡಿದ್ದು, ಅಲ್ಲಿ 28 ಮಕ್ಕಳಿಗೆ ಅವಕಾಶ ನೀಡಬೇಕೆಂದು ಶಿಕ್ಷಣ ಇಲಾಖೆ ಆದೇಶ ಹೊರಡಿಸಿತ್ತು. ಅದರಂತೆ ಸಾಕಷ್ಟು ವಿದ್ಯಾರ್ಥಿಗಳು ಅರ್ಜಿ ಸಲ್ಲಿಸಿದ್ದರು. ಮೊದಲ ಹಂತದಲ್ಲಿ ವಾರ್ಡ್ ಒಳಗಿನ 7 ವಿದ್ಯಾರ್ಥಿಗಳಿಗೆ ಶಾಲೆಯಲ್ಲಿ ಪ್ರವೇಶ ನೀಡಲಾಗಿತ್ತು. ಎರಡನೆ ಹಂತದ ಪಟ್ಟಿಯಲ್ಲಿ 12 ವಿದ್ಯಾರ್ಥಿಗಳನ್ನು ಆಯ್ಕೆ ಮಾಡಿ ಇಲಾಖೆ ಪಟ್ಟಿ ಬಿಡುಗಡೆ ಮಾಡಿದ್ದು, ಪ್ರವೇಶ ಪಡೆಯಲು ಜು.8 ಕೊನೆಯ ದಿನವಾಗಿತ್ತು. ಆದರೆ ಈ ಮಕ್ಕಳಿಗೆ ಪ್ರವೇಶ ನೀಡಲು ಆಡಳಿತ ಮಂಡಳಿ ನಿರಾಕರಿಸಿದೆ. ಶಾಲೆಯಲ್ಲಿ ಈಗಾಗಲೇ ಎಲ್ಕೆಜಿಗೆ 132 ಸೀಟು ಭರ್ತಿಯಾಗಿದೆ. ಹಾಗಿದ್ದೂ 7 ಆರ್ಟಿಇ ಸೀಟುಗಳನ್ನು ಸೇರ್ಪಡೆ ಮಾಡಲಾಗಿದೆ. ಕೊಠಡಿಗಳು ಸಣ್ಣವಾಗಿದ್ದು, ಶಿಕ್ಷಕರೂ ಸೀಮಿತವಾಗಿದ್ದಾರೆ. ಇದ್ದ ಕೊಠಡಿಯಲ್ಲೇ ಇನ್ನೂ 12 ಮಕ್ಕಳನ್ನು ಸೇರ್ಪಡೆ ಮಾಡಿದರೆ ಮಕ್ಕಳಿಗೆ ತೊಂದರೆಯಾಗಲಿದೆ. ಹಾಗಾಗಿ ಸೇರ್ಪಡೆ ಮಾಡಿಲ್ಲ ಎಂದು ಶಾಲಾ ಮುಖ್ಯ ಶಿಕ್ಷಕಿ ಹೇಳಿದ್ದಾರೆ.
ಈಗಾಗಲೇ ಸೀಟು ಭರ್ತಿಯಾಗಿದ್ದು, ಕೊಠಡಿ ಕೊರತೆ ಹಾಗೂ ಸೀಮಿತಿ ಶಿಕ್ಷಕಿಯರು ಇರುವುದರಿಂದ ಆರ್ಟಿಇ ಕಾಯ್ದೆಯಡಿ ಪ್ರವೇಶ ನೀಡಲು ಆಡಳಿತ ಮಂಡಳಿ ಸಿದ್ಧವಾಗಿಲ್ಲ. ಮಕ್ಕಳ ಪೋಷಕರಿಗೆ ಹಿಂಬರಹ ನೀಡುವಂತೆ ತಿಳಿಸಿದ್ದು, ಜಿಲ್ಲಾಧಿಕಾರಿಗೆ ವರದಿ ಮಾಡಲಾಗುತ್ತದೆ ಎಂದು ಕ್ಷೇತ್ರ ಶಿಕ್ಷಣಾಧಿಕಾರಿ ಬಿ.ಎಸ್.ಕೆಂಪಲಿಂಗಪ್ಪ ತಿಳಿಸಿದ್ದಾರೆ.
