ಇರಾಕ್ ಪಾಪಕ್ಕಾಗಿ ಬ್ಲೇರ್ ವಿಚಾರಣೆ ಎದುರಿಸಲೇಬೇಕು

ಲಂಡನ್, ಜು.9: ಇಂಗ್ಲೆಂಡನ್ನು ಇರಾಕ್ ಯುದ್ಧದ ಭಾಗವಾಗಿಸುವ ನಿರ್ಧಾರವನ್ನು ಕೈಗೊಂಡಿದ್ದ ಮಾಜಿ ಪ್ರಧಾನಿ ಟೋನಿ ಬ್ಲೇರ್ ವಿಚಾರಣೆ ಎದುರಿಸಲೇಬೇಕು ಎಂದು 2002 ರಲ್ಲಿ ಇರಾಕ್‌ಗೆ ಹೋದ ಪತ್ರಕರ್ತರ ತಂಡದಲ್ಲಿದ್ದ ಇವಾನ್ ರಿಡ್ಲಿ ತಿಳಿಸಿದರು.

ಈ ಯುದ್ಧದಲ್ಲಿ ಮಡಿದ ಬ್ರಿಟಿಷ್ ಸೈನಿಕರ ಕುಟುಂಬಗಳು ಈಗಲೂ ತಮ್ಮ ಪ್ರೀತಿಪಾತ್ರರನ್ನು ಕಳೆದುಕೊಂಡ ದುಃಖದಲ್ಲಿವೆಯೆಂದು ಹೇಳಿದ ಅವರು, ಒಬ್ಬ ವ್ಯಕ್ತಿಯ ಗುರಿ ಸಾಧನೆಗಾಗಿ ಹಲವರು ಬಲಿಯಾಗಬೇಕಾಗಿ ಬಂದಿದೆಯೆಂದಿದ್ದಾರೆ.

ಯುದ್ಧ ವಿಚಾರಣಾ ವರದಿಯಾದ ಚಿಲ್ಕೊಟ್ ವರದಿ ಬ್ಲೇರ್ ಅವರತ್ತ ಬೊಟ್ಟು ಮಾಡಿ ತೋರಿಸಿದ್ದರೂ ಅದು ನ್ಯಾಯ ಒದಗಿಸಲು ಅಸಮರ್ಥವಾಗಿದೆ ಎಂದು ಅವರು ತಿಳಿಸಿದ್ದಾರೆ.

ಚಿಲ್ಕೊಟ್ ವರದಿಯ ಹಿನ್ನೆಲೆಯಲ್ಲಿ ಎಲ್ಲರನ್ನೂ ವಿಶ್ವಾಸಕ್ಕೆ ತೆಗೆದುಕೊಳ್ಳದೆ ಯುದ್ಧದಲ್ಲಿ ಭಾಗಿಯಾಗುವ ನಿರ್ಧಾರ ಕೈಗೊಂಡ ಟೋನಿ ಬ್ಲೇರ್ ವಿರುದ್ಧ ಕಾನೂನು ಕ್ರಮ ಕೈಗೊಳ್ಳುವ ಬಗ್ಗೆ ಯೋಚಿಸುವ ಅಗತ್ಯವಿದೆಯೆಂದು ಸ್ಕಾಟ್‌ಲ್ಯಾಂಡ್‌ನ ಮಾಜಿ ಸಚಿವ ಅಲೆಕ್ಸ್ ಸಾಲ್ಮಂಡ್ ಅಭಿಪ್ರಾಯಪಟ್ಟಿದ್ದಾರೆ ಎಂದು ರಿಡ್ಲಿ ತಿಳಿಸಿದ್ದಾರೆ.

ತಾನು ಸೆಪ್ಟೆಂಬರ್ 2002ರಲ್ಲಿ ಇತರ ಪತ್ರಕರ್ತರೊಂದಿಗೆ ಇರಾಕ್‌ಗೆ ಭೇಟಿ ನೀಡಿದ್ದಾಗ, ಆಗಿನ ಬ್ರಿಟಿಷ್ ಪ್ರಧಾನಿ ಬ್ಲೇರ್ ಸದ್ದಾಂನ ಬಂಕರ್‌ಗಳಲ್ಲಿ ಎಲ್ಲೆಲ್ಲಾ ಸಾಮೂಹಿಕ ವಿನಾಶದ ಶಸ್ತ್ರಾಸ್ತ್ರಗಳನ್ನು ಇಡಲಾಗಿದೆಯೆಂದು ಹೇಳಲಿದ್ದಾರೆಂದು ನಮಗೆ ತಿಳಿಸಲಾಯಿತು ಎಂದು ರಿಡ್ಲಿ ಕಾಮನ್ ಪ್ರೆಸ್‌ನಲ್ಲಿ ಪ್ರಕಟವಾದ ಬರಹವೊಂದರಲ್ಲಿ ಹೇಳಿದ್ದಾರೆ.

ಆಶ್ಚರ್ಯವೆಂಬಂತೆ ಇರಾಕ್‌ನ ಆಡಳಿತ ಬ್ಲೇರ್ ಗುರುತಿಸಿದ ಸ್ಥಳಗಳನ್ನು ವೀಕ್ಷಿಸಲು ನಮಗೆ ಸಂಪೂರ್ಣ ಅವಕಾಶ ನೀಡುವುದಾಗಿ ಹೇಳಿತ್ತು. ಇದನ್ನು ಬ್ಲೇರ್ ಅವರ ಘೋಷಣೆಯ ಮುಂಚಿತವಾಗಿ ಹೇಳಲಾಗಿತ್ತು. ಹಾಗೂ ನಾವು ಸರಕಾರಿ ಹೆಲಿಕಾಪ್ಟರ್‌ಗಳ ಬಳಿ ನಿಂತು ಕಾದಿದ್ದೆವು ಎಂದು ಅವರು ನೆನಪಿಸಿಕೊಂಡಿದ್ದಾರೆ.

ಬ್ಲೇರ್ ಶಸ್ತ್ರಾಸ್ತ್ರಗಳು ಎಲ್ಲಿತ್ತು ಎಂದು ಹೌಸ್ ಆಫ್ ಕಾಮನ್ಸ್‌ನಲ್ಲಿ ಹೇಳಿದ ನಂತರ ನಾವು ಅವುಗಳನ್ನು ಹುಡುಕಿ ಹೊರಟರೂ ಅಲ್ಲಿ ಏನೂ ಕಾಣದೇ ಇದ್ದಾಗ, ವಿಶ್ವಸಂಸ್ಥೆಯ ಮುಖ್ಯ ಶಸ್ತ್ರಾಸ್ತ್ರ ಪರಿವೀಕ್ಷಕ ಹಾನ್ಸ್ ಬ್ಲಿಕ್ಸ್ ಅವರು ಅಭಿಪ್ರಾಯಪಟ್ಟಂತೆಯೇ ಸದ್ದಾಂ ಹುಸೇನ್ ಬಳಿ ಯಾವುದೇ ಸಾಮೂಹಿಕ ವಿನಾಶದ ಶಸ್ತ್ರಾಸ್ತ್ರಗಳಿಲ್ಲವೆಂದು ತಿಳಿದುಕೊಂಡೆವು, ಎಂದು ರಿಡ್ಲಿ ವಿವರಿಸಿದ್ದಾರೆ.

''ಸರಕಾರಿ ಪ್ರಯೋಗಾಲಯವೊಂದರಲ್ಲಿ, ಶೀತಲೀಕರಣ ಕೇಂದ್ರದಲ್ಲಿ, ಫ್ರಿಜ್ ಗಳಲ್ಲಿ ಹಾಗೂ ಅದರೊಳಗಿದ್ದ ದ್ರವಗಳಲ್ಲಿ ಹಾಗೂ ಬಂಕರ್‌ಗಳಲ್ಲಿ ಎಲ್ಲಿಯಾದರೂ ಈ ಶಸ್ತ್ರಾಸ್ತ್ರ ಇರಬಹುದೇ ಎಂದು ಹುಡುಕಿದೆವು. ಯಾವುದೇ ಹಂತದಲ್ಲಿಯೂ ಇರಾಕ್ ಆಡಳಿತ ನಮಗೆ ತಡೆಯೊಡ್ಡಲಿಲ್ಲ ಎಂದು ಅವರು ಹೇಳಿದ್ದಾರೆ.

''ಅಂತಿಮವಾಗಿ ಈ ಯುದ್ಧದಲ್ಲಿ ಸಾಮಾನ್ಯ ಇರಾಕ್ ನಾಗರಿಕರು, ಸೈನಿಕರು ಪ್ರಾಣ ಕಳೆದುಕೊಂಡರು. ಆದರೆ ಬ್ಲೇರ್ ತನ್ನ ದೇಶಕ್ಕೆ ಸುಳ್ಳು ಹೇಳಿ ಮಾಧ್ಯಮ ತನಗೆ ಬೇಕಾದಂತೆ ಕುಣಿಯುವಂತೆ ಮಾಡಿದ್ದರು ಎಂದು ಅವರು ಆರೋಪಿಸಿದ್ದಾರೆ. ಇದರ ಒಟ್ಟಾರೆ ಪರಿಣಾಮವಾಗಿ ಇಂದು ವೆಸ್ಟ್ ಮಿನಿಸ್ಟರ್‌ನಲ್ಲಿ ಪ್ರಜಾಪ್ರಭುತ್ವ ಪ್ರಕಿಯೆಯ ಮೇಲೆ ಬ್ರಿಟಿಷ್ ಮತದಾರರಿಗೆ ವಿಶ್ವಾಸ ಕುಂದಿದೆಯೆಂದು ಅವರು ತಿಳಿಸಿದರು.