ನೆಡುತೋಪು ಭೂಮಿ ವರ್ಗಾವಣೆಗೆ ಒತ್ತಾಯಿಸಿ ಮನವಿ

 ಸೊರಬ, ಜು.19: ರಾಜ್ಯ ಅರಣ್ಯ ಇಲಾಖೆಗೆ 70 ಸಾವಿರ ಎಕರೆ ಎಂಪಿಎಂ ನೆಡುತೋಪು ಭೂಮಿ ವರ್ಗಾವಣೆ ಆಗಬೇಕು ಹಾಗೂ ಎಂಪಿಎಂ ಜೊತೆ 2020ರವರೆಗೆ ಇದ್ದ ಲೀಸ್ ರದ್ದಾಗಬೇಕು ಎಂದು ಒತ್ತಾಯಿಸಿ ಇಲ್ಲಿನ ಪರಿಸರ ಜಾಗೃತಿ ಟ್ರಸ್ಟ್ ಹಾಗೂ ಸಾರ್ವಜನಿಕ ಹಿತರಕ್ಷಣಾ ಹೋರಾಟ ಸಮಿತಿ ವತಿಯಿಂದ ಅರಣ್ಯ ಸಚಿವರಿಗೆ ಅರಣ್ಯ ಇಲಾಖೆ ವಲಯ ಅರಣ್ಯಾಧಿಕಾರಿ ಅಜಯ್‌ಕುಮಾರ್ ಮುಖಾಂತರ ಮನವಿ ಸಲ್ಲಿಸಿದರು.

   ಮನವಿಯಲ್ಲಿ ಭದ್ರಾವತಿಯಲ್ಲಿರುವ ಮೈಸೂರು ಕಾಗದ ಕಾರ್ಖಾನೆ ಅಸ್ತಿತ್ವ ಕಳೆದುಕೊಳ್ಳ್ಳುತ್ತಿರುವ ಹಿನ್ನೆಲೆಯಲ್ಲಿ 2014-2015ರಿಂದ 500 ಹೆಕ್ಟೇರ್ ಎಂಪಿಎಂ ನೆಡುತೋಪು ಕಟಾವಾದ ಭೂಮಿ ಖಾಲಿ ಇದ್ದು, 2,500 ಹೆಕ್ಟೇರ್ ನೆಡುತೋಪು ಕಟಾವಾಗದೆ 2 ವರ್ಷಗಳಿಂದ ಹಾಗೇ ಇದೆ. ನೆಡುತೋಪು ನಿರ್ಮಾಣಕ್ಕೆ ಸಿದ್ಧವಾದ 2ಲಕ್ಷ ಗಿಡಗಳಿವೆ. ಆದರೆ, ನೆಡುವವರಿಲ್ಲ. ಈ ಹಂತದಲ್ಲಿ ಎಂಪಿಎಂ ಅರಣ್ಯ ವಿಭಾಗ ಅತಂತ್ರ ಸ್ಥಿತಿಯಲ್ಲಿ ಇದೆ. ಎಂಪಿಎಂನ 70,000 ಎಕರೆ ನೆಡುತೋಪು ಭೂಮಿಯಿಂದ ಸರಕಾರಕ್ಕೆ 500ಕೋಟಿ ರೂ. ಆದಾಯ ಬರಲಿದೆ. ಇಷ್ಟು ದೊಡ್ಡ ಮೊತ್ತದ ಆರ್ಥಿಕ ಸಂಪನ್ಮೂಲ ಅರಣ್ಯ ಅಭಿವೃದ್ಧಿಯಿಂದ ಸಿಗಲಿದೆ. ಹಾಗಾಗಿ ಆದಾಯ ಬಳಸಿ ಅರಣ್ಯಾಭಿವೃದ್ಧಿಗೆ ಪ್ರಾತಿನಿಧ್ಯ ನೀಡಬೇಕು. ರೈತರಿಗೆ ಉಪಯುಕ್ತವಾಗುವ ಸಸ್ಯ ಜಾತಿಗಳನ್ನು ಬೆಳೆಸಬೇಕು. ಗ್ರಾಮ ಅರಣ್ಯ ಸಮಿತಿಗಳ ಮೂಲಕ 70,000 ಎಕರೆ ಅರಣ್ಯ ಬೆಳೆಸುವ ಕಾರ್ಯವನ್ನು ಹಂತ ಹಂತವಾಗಿ ಆರಂಭಿಸಬೇಕು. ಜನಸಹಭಾಗಿತ್ವ ಇರುವ ವಿಶೇಷ ಅರಣ್ಯ ಅಭಿವೃದ್ಧಿ ಯೋಜನೆಯನ್ನು ಅರಣ್ಯ ಇಲಾಖೆ ಇದಕ್ಕಾಗಿ ರೂಪಿಸಬೇಕು.

  

ಶಿವಮೊಗ್ಗ ಜಿಲ್ಲೆ ಈಗಾಗಲೇ ಮುಳುಗಡೆ, ಗಣಿಗಾರಿಕೆ, ಕೃಷಿಗಾಗಿ ಅರಣ್ಯ ಅತಿಕ್ರಮಣ ಇತ್ಯಾದಿಯಿಂದ 1ಲಕ್ಷ ಎಕರೆ ಕಾಡು ಕಳೆದುಕೊಂಡಿದೆ. ಸಾಗರ, ತೀರ್ಥಹಳ್ಳಿ, ಹೊಸನಗರ, ಸೊರಬ, ಭದ್ರಾವತಿ ತಾಲೂಕುಗಳಲ್ಲಿ ಎಂಪಿಎಂ ನೆಡುತೋಪು ನಿರ್ಮಾಣದಿಂದ ಸ್ವಾಭಾವಿಕ ಅರಣ್ಯ ನಾಶವಾಗಿದೆ. ಈ ಕಾರಣಕ್ಕಾಗಿ ನೆಡುತೋಪು ನಿರ್ಮಾಣಕ್ಕೆ ವೃಕ್ಷ ಲಕ್ಷ ಆಂದೋಲನದ ಕಾರ್ಯಕರ್ತರು ಪ್ರತಿಭಟನೆ ನಡೆಸಿದ್ದರು. ಸ್ಥಳೀಯ ನ್ಯಾಯಾಲಯಗಳು ಹನ್ನೆರಡು ಸ್ಥಳಗಳಲ್ಲಿ ತಡೆ ನೀಡಿ ಸ್ವಾಭಾವಿಕ ಅರಣ್ಯ ನಾಶ ಮಾಡಬಾರದು ಎಂದು ಆದೇಶ ನೀಡಿದೆ. ಏಕಜಾತಿ ನೆಡುತೋಪುಗಳಿಂದ ಜಲಮೂಲ ನಾಶವಾಗಿದೆ, ಸೊಪ್ಪು, ಕಟ್ಟಿಗೆ ಸಿಗುತ್ತಿಲ್ಲ. ಜೀವ ಕಳೆದುಕೊಂಡ ನೈಸರ್ಗಿಕ ಅರಣ್ಯ ಬೆಳೆಸಲು ಸಮಾರೋಪಾದಿಯ ಪ್ರಯತ್ನ ಆಗಬೇಕು. ಅದಿಲ್ಲವಾದರೆ ನೆಡುತೋಪುಗಳು, ಬೆಲೆಬಾಳುವ ಮರಗಳು ಕಳ್ಳ ಸಾಗಣೆಗೆ ಅವಕಾಶವಾಗುತ್ತದೆ. ಖಾಸಗಿಯವರ ಅತಿಕ್ರಮಣವಾಗುತ್ತದೆ. ಮಲೆನಾಡಿನ ಅಮೂಲ್ಯ ಸರಕಾರಿ ಭೂಮಿ ಖಾಸಗಿಯವರ ಪಾಲಾಗಬಹುದು. ಈ ಹಿನ್ನೆಲೆಯಲ್ಲಿ ಸರಕಾರ ಪಶ್ಚಿಮ ಘಟ್ಟದ ಅಮೂಲ್ಯ ಭೂಮಿಯನ್ನು ಎಂಪಿಎಂನಿಂದ ಹಿಂದಕ್ಕೆ ಪಡೆಯಬೇಕು ಎಂದು ಮನವಿಯಲ್ಲಿ ಒತ್ತಾಯಿಸಿದ್ದಾರೆ.

ಟ್ರಸ್ಟ್‌ನ ಉಪಾಧ್ಯಕ್ಷ ಶ್ರೀಪಾದ ಬಿಚ್ಚುಗತ್ತಿ, ಪ್ರಧಾನ ಕಾರ್ಯದರ್ಶಿ ಗುರುಕುಮಾರ್ ಪಾಟೀಲ್, ಕಾರ್ಯದರ್ಶಿ ವೀರಪ್ಪಗೌಡ, ನಿರ್ದೇಶಕ ಎಂ.ನಾಗಪ್ಪ ವಕೀಲ್, ಸಮಿತಿಯ ಅಧ್ಯಕ್ಷ ಜೆ.ಎಸ್.ಚಿದಾನಂದಗೌಡ, ಕಾರ್ಯದರ್ಶಿ ವೀರೇಂದ್ರಗೌಡ, ಯೋಗೇಶ್, ನೆಮ್ಮದಿ ಸುಬ್ಬು, ಪ್ರವೀಣ್, ವಿಜಯಗೌಳಿ ಮತ್ತಿತರರು ಹಾಜರಿದ್ದರು.