ಮಾಜಿ ಒಲಿಂಪಿಯನ್ ಆಶಿಕ್‌ರನ್ನು ಮರೆತ ಪಾಕಿಸ್ತಾನ

  ಲಾಹೋರ್, ಆ.3: ಪಾಕಿಸ್ತಾನದ ಮಾಜಿ ಒಲಿಂಪಿಯನ್ ಮುಹಮ್ಮದ್ ಆಶಿಕ್ ತಾನು ಗೆದ್ದಂತಹ ಪದಕಗಳನ್ನು ಪ್ರತಿ ದಿನ ನೋಡುತ್ತಿರುತ್ತಾರೆ. ತನ್ನೊಂದಿಗೆ ಹಸ್ತಲಾಘವ ಮಾಡಿದ್ದ ಪಾಕಿಸ್ತಾನದ ಮಾಜಿ ಪ್ರಧಾನಮಂತ್ರಿಗಳು, ಅಧ್ಯಕ್ಷರು, ಮುಖ್ಯ ಕಾರ್ಯಾಧ್ಯಕ್ಷರನ್ನು ಆಶಿಕ್ ಈಗಲೂ ನೆನಪಿಸಿಕೊಳ್ಳುತ್ತಾರೆ. ದೇಶದ ಜನರು, ರಾಜಕಾರಣಿಗಳು ತಾನು ಸತ್ತೇ ಹೋಗಿದ್ದಾಗಿ ಭಾವಿಸಿದ್ದಾರೆ ಎಂದು ಅವರು ಹೇಳುತ್ತಾರೆ.

 ದೇಶಕ್ಕೆ ಇಷ್ಟೊಂದು ಕೀರ್ತಿ ತಂದಿರುವ ತನ್ನನ್ನು ಎಲ್ಲರೂ ಏಕೆ ಮರೆತ್ತಿದ್ದಾರೆ ಎಂದು ನನಗೆ ಗೊತ್ತಾಗುತ್ತಿಲ್ಲ. ಆದಾಗ್ಯೂ, ನಾನು ತುಂಬಾ ಸಂತೋಷವಾಗಿರುವೆ...ಒಲಿಂಪಿಕ್ಸ್‌ನಲ್ಲಿ ಪಾಕಿಸ್ತಾನವನ್ನು ಪ್ರತಿನಿಧಿಸಿರುವುದು ನನ್ನ ಅದೃಷ್ಟವೆಂದೇ ಭಾವಿಸಿದ್ದೇನೆ ಎಂದು 81ರ ಹರೆಯದ ಆಶಿಕ್ ಹೇಳುತ್ತಾರೆ.

1960 ಹಾಗೂ 1964ರ ಒಲಿಂಪಿಕ್ಸ್‌ನಲ್ಲಿ ಪಾಕಿಸ್ತಾನವನ್ನು ಪ್ರತಿನಿಧಿಸಿದ್ದ ಆಶಿಕ್ ಇದೀಗ ಜೀವನ ನಿರ್ವಹಣೆಗಾಗಿ ಲಾಹೋರ್‌ನಲ್ಲಿ ರಿಕ್ಷಾ ಚಾಲಕನಾಗಿದ್ದಾರೆ. ರಿಕ್ಷಾದಲ್ಲಿ ತಾನು ಗೆದ್ದಂತಹ ಪದಕಗಳನ್ನು ನೇತು ಹಾಕಿದ್ದಾರೆ. ರಿಕ್ಷಾದಲ್ಲಿ ಬರುವ ಪ್ರಯಾಣಿಕರು ತಮಗೆ ಸಂದೇಶವೊಂದನ್ನು ನೀಡಿ ಎಂದು ಹೇಳಿದರೆ, ತನ್ನ ಜೀವನ ಕಥೆಯನ್ನು ಹೇಳುವ ಅವರು, ನನ್ನ ಕಥೆ ಬಡವರಿಗೆ ಒಂದು ಎಚ್ಚರಿಕೆಯ ಗಂಟೆ. ಬಡವರು ಕ್ರೀಡೆಯಲ್ಲಿ ತೊಡಗಿಸಿಕೊಳ್ಳಬಾರದು ಎಂದು ಕಿವಿ ಮಾತು ಹೇಳುತ್ತಾರೆ.

ಬಾಕ್ಸರ್ ಆಗಿ ವೃತ್ತಿ ಜೀವನ ಆರಂಭಿಸಿದ್ದ ಆಶಿಕ್ 1950ರಲ್ಲಿ ಸೈಕ್ಲಿಂಗ್‌ನತ್ತ ತನ್ನ ಗಮನ ಹರಿಸಿದರು. 1960ರಲ್ಲಿ ರೋಮ್ ಹಾಗೂ 1964ರಲ್ಲಿ ಟೋಕಿಯೊದಲ್ಲಿ ನಡೆದಿದ್ದ ಒಲಿಂಪಿಕ್ಸ್ ಗೇಮ್ಸ್‌ನಲ್ಲಿ ಪಾಕ್‌ನ್ನು ಪ್ರತಿನಿಧಿಸಿದ್ದಾರೆ. ಒಲಿಂಪಿಕ್ಸ್‌ನಲ್ಲಿ ಪದಕ ಗೆಲ್ಲದಿದ್ದರೂ ಆ ಕಾಲದಲ್ಲಿ ಪಾಕಿಸ್ತಾನದಲ್ಲಿ ಹೀರೋವಾಗಿ ಮಿಂಚಿದ್ದರು. ಸೈಕ್ಲಿಂಗ್ ವೃತ್ತಿಜೀವನ ಕೊನೆಗೊಂಡ ಬಳಿಕ ಪಿಆರ್ ಹುದ್ದೆ ಗಿಟ್ಟಿಸಿಕೊಂಡಿದ್ದರು. ಆದರೆ, 1977ರಲ್ಲಿ ಅನಾರೋಗ್ಯದ ಕಾರಣ ಆ ಹುದ್ದೆ ತೊರೆದರು.

ಲಾಹೋರ್‌ನಲ್ಲಿ ಪ್ರಯಾಣಿಕರು ಸಿಗದ ಕಾರಣ ಕಳೆದ 6 ವರ್ಷಗಳಿಂದ ರಿಕ್ಷಾ ಓಡಿಸುವುದನ್ನು ಕಡಿಮೆ ಮಾಡಿದ್ದಾರೆ. ಸಣ್ಣ ಮನೆಯೊಂದರಲ್ಲಿ ವಾಸಿಸುವ ಆಶಿಕ್ ಪತ್ನಿಯನ್ನು ಕಳೆದುಕೊಂಡಿದ್ದಾರೆ. ನಾಲ್ವರು ಮಕ್ಕಳು ಅವರೊಂದಿಗೆ ನೆಲೆಸಿಲ್ಲ. ನಾನು ಮಕ್ಕಳನ್ನು ಅವಲಂಬಿಸಿಲ್ಲ ಎಂದು ಆಶಿಕ್ ಹೇಳುತ್ತಾರೆ.

ವೃದ್ದಾಪ್ಯದಲ್ಲಿರುವ ಆಶಿಕ್, ತನ್ನನ್ನೂ ಪತ್ನಿ ಸೇರಿರುವ ಜಾಗಕ್ಕೆ ಕೊಂಡೊಯ್ಯು ದೇವರೇ ಎಂದು ಪ್ರಾರ್ಥಿಸುತ್ತಿದ್ದಾರೆ.