ಕಾಶ್ಮೀರಿಗಳ ದೂರುಗಳ ನಿವಾರಣೆಗೆ ಸರಕಾರ ಸಿದ್ಧ: ಪ್ರಧಾನಿ ಮೋದಿ

ಹೊಸದಿಲ್ಲಿ,ಆ.12: ಜಮ್ಮು-ಕಾಶ್ಮೀರದ ಎಲ್ಲ ವರ್ಗಗಳ ಜನತೆಯ ದೂರುಗಳನ್ನು ಸಂವಿಧಾನಕ್ಕನುಗುಣವಾಗಿ ಬಗೆಹರಿಸಲು ಸರಕಾರವು ಸಿದ್ಧವಿದೆ ಎಂದು ಶುಕ್ರವಾರ ಇಲ್ಲಿ ಹೇಳಿದ ಪ್ರಧಾನಿ ನರೇಂದ್ರ ಮೋದಿ ಅವರು, ಆದರೆ ರಾಷ್ಟ್ರದ ಅಖಂಡತೆಯೊಂದಿಗೆ ಯಾವುದೇ ರಾಜಿ ಮಾಡಿಕೊಳ್ಳುವುದಿಲ್ಲ ಎಂದು ಸ್ಪಷ್ಟಪಡಿಸಿದರು. ಜಮ್ಮು-ಕಾಶ್ಮೀರದಲ್ಲಿ ತನ್ನ ಆಡಳಿತ ಪಾಲುದಾರನಾಗಿರುವ ಪಿಡಿಪಿ ಮತ್ತು ಪ್ರತಿಪಕ್ಷಗಳು ಪಾಲ್ಗೊಂಡಿದ್ದ ಸರ್ವಪಕ್ಷ ಸಭೆಯ ಅಧ್ಯಕ್ಷತೆಯನ್ನು ವಹಿಸಿ ಮಾತನಾಡಿದ ಮೋದಿ, ಪಾಕಿಸ್ತಾನ ಬೆಂಬಲಿತ ಗಡಿಯಾಚೆಯ ಭಯೋತ್ಪಾದನೆಯು ಕಾಶ್ಮೀರ ಕಣಿವೆಯಲ್ಲಿನ ಕ್ಷೋಭೆಗೆ ಮೂಲಕಾರಣವಾಗಿದೆ ಎಂದು ಬಣ್ಣಿಸಿದರು.

  ಜು.8ರಂದು ಹಿಝ್ಬುಲ್ ಮುಜಾಹಿದೀನ್ ಕಮಾಂಡರ್ ಬುರ್ಹಾನ್ ವಾನಿಯ ಹತ್ಯೆಯ ಬಳಿಕ ಕಾಶ್ಮೀರದಲ್ಲಿ ನಿರಂತರ ಅಶಾಂತಿಯ ಹಿನ್ನೆಲೆಯಲ್ಲಿ ಕರೆಯಲಾಗಿದ್ದ ಸಭೆಯು ಸುದೀರ್ಘ ನಾಲ್ಕು ಗಂಟೆಗಳ ಕಾಲ ನಡೆದಿದ್ದು, ಪೆಲೆಟ್ ಗನ್‌ಗಳ ಬಳಕೆಯ ಅಂತ್ಯ ಮತ್ತು ಕಣಿವೆಯ ಕೆಲವು ಭಾಗಗಳಲ್ಲಿ ಸಶಸ್ತ್ರ ಪಡೆಗಳ ವಿಶೇಷಾಧಿಕಾರ ಕಾಯ್ದೆಯ ಸಡಿಲಿಕೆಯಂತಹ ತಕ್ಷಣದ ವಿಶ್ವಾಸ ನಿರ್ಮಾಣ ಕ್ರಮಗಳನ್ನು ತೆಗೆದುಕೊಳ್ಳುವಂತೆ ಕೆಲವು ಪ್ರತಿಪಕ್ಷಗಳು ಸರಕಾರಕ್ಕೆ ಸೂಚಿಸಿದವು.
ಪರಿಸ್ಥಿತಿಯ ಪರಿಶೀಲನೆಗಾಗಿ ಸರ್ವಪಕ್ಷ ನಿಯೋಗವೊಂದು ಕಾಶ್ಮೀರಕ್ಕೆ ಭೇಟಿ ನೀಡಬೇಕು ಎಂಬ ಸಲಹೆ ಸಭೆಯಲ್ಲಿ ಮೂಡಿಬಂದಿತಾದರೂ ಸರಕಾರವು ಪ್ರತಿಪಕ್ಷಗಳ ಯಾವುದೇ ಬೇಡಿಕೆಗಳ ಈಡೇರಿಕೆಗೆ ಬದ್ಧತೆಯನ್ನು ವ್ಯಕ್ತಪಡಿಸಲಿಲ್ಲ.
ಸಂವಿಧಾನದ ಮೂಲತತ್ತ್ವಗಳಂತೆ ಶಾಶ್ವತ ಮತ್ತು ಶಾಂತಿಯುತ ಪರಿಹಾರವನ್ನು ಕಂಡುಕೊಳ್ಳಲು ಕೇಂದ್ರವು ಬದ್ಧವಾಗಿದೆ ಎಂದು ಮೋದಿ ಹೇಳಿದರು.
 ಇದೇ ವೇಳೆ ಪಾಕ್ ಆಕ್ರಮಿತ ಕಾಶ್ಮೀರ(ಪಿಒಕೆ) ಮತ್ತು ಬಲೂಚಿಸ್ತಾನದಲ್ಲಿ ಮಾನವ ಹಕ್ಕುಗಳ ಉಲ್ಲಂಘನೆಗಾಗಿ ಪಾಕಿಸ್ತಾನದ ವಿರುದ್ಧ ತೀವ್ರ ದಾಳಿ ನಡೆಸಿದ ಅವರು, ಈ ಪ್ರದೇಶಗಳಲ್ಲಿ ತಾನು ನಡೆಸುತ್ತಿರುವ ದೌರ್ಜನ್ಯಗಳಿಗಾಗಿ ಅದು ಅಂತಾರಾಷ್ಟ್ರೀಯ ಸಮುದಾಯಕ್ಕೆ ಉತ್ತರಿಸಬೇಕಾಗುತ್ತದೆ ಎಂದರು.
ತನ್ನ ಸರಕಾರದ ಕಾಶ್ಮೀರ ನೀತಿಯ ಪ್ರಮುಖ ಅಂಶಗಳನ್ನು ಹಂಚಿಕೊಂಡ ಅವರು, ಪಿಒಕೆಯಲ್ಲಿನ ದಯನೀಯ ಸ್ಥಿತಿಯ ವಿವರಗಳನ್ನು ಅರಿಯಲು ವಿಶ್ವದ ಬೇರೆ ಬೇರೆ ಕಡೆಗಳಲ್ಲಿ ವಾಸವಾಗಿರುವ ಪಾಕ್ ಆಕ್ರಮಿತ ಕಾಶ್ಮೀರದ ಪ್ರಜೆಗಳನ್ನು ಭೇಟಿಯಾಗಲು ಪ್ರಯತ್ನಿಸುವಂತೆ ಮತ್ತು ಆ ವಿವರಗಳನ್ನು ಅಂತಾರಾಷ್ಟ್ರೀಯ ಸಮುದಾಯದೊಂದಿಗೆ ಹಂಚಿಕೊಳ್ಳುವಂತೆ ವಿದೇಶಾಂಗ ವ್ಯವಹಾರಗಳ ಸಚಿವಾಲಯಕ್ಕೆ ಸೂಚಿಸಿದರು.
ಸರಕಾರದ ಪ್ರಯತ್ನಗಳಿಗೆ ಎಲ್ಲ ರಾಜಕೀಯ ಪಕ್ಷಗಳ ಬೆಂಬಲವನ್ನು ಕೋರಿದ ಅವರು, ವಿಶ್ವಾದ್ಯಂತ ಭಯೋತ್ಪಾದನೆಯು ಹೆಚ್ಚುತ್ತಿರುವ ಮತ್ತು ನೆರೆ ರಾಷ್ಟ್ರ ಪ್ರಾಯೋಜಿತ ಭಯೋತ್ಪಾದನೆಯ ಸುಳಿಯಲ್ಲಿ ನಾವು ಸಿಲುಕಿರುವ ಈ ಸಂದರ್ಭ ಹೋರಾಟದಲ್ಲಿ ನಾವು ಒಗ್ಗಟ್ಟಾಗಿರಬೇಕು. ಈ ವಿಷಯದಲ್ಲಿ ಎಲ್ಲ ಪ್ರತಿಪಕ್ಷಗಳ ರಚನಾತ್ಮಕ ಬೆಂಬಲವನ್ನು ಸರಕಾರವು ನಿರೀಕ್ಷಿಸುತ್ತಿದೆ ಎಂದರು.
ಜಮ್ಮು-ಕಾಶ್ಮೀರದಲ್ಲಿಯ ಘಟನೆಗಳಿಂದಾಗಿ ಪ್ರತಿಯೊಬ್ಬ ಭಾರತೀಯನಂತೆ ನನಗೂ ತೀವ್ರ ನೋವಾಗಿದೆ ಎಂದ ಮೋದಿ, ಕೊಲ್ಲಲ್ಪಟ್ಟವರು ನಾಗರಿಕರಿರಲಿ ಅಥವಾ ಭದ್ರತಾ ಪಡೆಗಳ ಸಿಬ್ಬಂದಿಗಳಿರಲಿ....ಅವರ ಕುಟುಂಬಗಳಿಗೆ ನನ್ನ ಸಂಪೂರ್ಣ ಸಹಾನುಭೂತಿಯಿದೆ. ಗಾಯಾಳುಗಳಿಗೆ ಉತ್ತಮ ವೈದ್ಯಕೀಯ ಸೇವೆ ಒದಗಿಸಲು ಮತ್ತು ಕಣಿವೆಯಲ್ಲಿ ಸಹಜ ಜನಜೀವನ ನಡೆಯುವಂತಾಗಲು ಶಾಂತಿಯ ಮರುಸ್ಥಾಪನೆಗೆ ನಾವು ಬದ್ಧರಾಗಿದ್ದೇವೆ ಎಂದು ಹೇಳಿದರು.
ಮಾಜಿ ಪ್ರಧಾನಿ ಅಟಲ್ ಬಿಹಾರಿ ವಾಜಪೇಯಿಯವರನ್ನು ಉಲ್ಲೇಖಿಸಿದ ಮೋದಿಯವರು ಇನ್ಸಾನಿಯತ್(ಮಾನವೀಯತೆ),ಜಮ್ಹೂರಿಯತ್(ಪ್ರಜಾಪ್ರಭುತ್ವ) ಮತ್ತು ಕಾಶ್ಮೀರಿಯತ್(ಕಾಶ್ಮೀರಿ ವೌಲ್ಯ) ಇವುಗಳ ಚೌಕಟ್ಟಿನಡಿ ಮಾತುಕತೆಯ ಅವರ ಕೊಡುಗೆಯನ್ನು ಪ್ರಸ್ತಾಪಿಸಿ, ಅವರು ತೋರಿಸಿರುವ ಮಾರ್ಗವನ್ನು ತನ್ನ ಸರಕಾರವು ಅನುಸರಿಸುತ್ತದೆ ಎಂದರು.