ಪ್ರಧಾನಿ ಸ್ವಾತಂತ್ರ್ಯ ದಿನಾಚರಣೆ ಭಾಷಣದಲ್ಲಿ 'ಸುಳ್ಳು' : ಒಪ್ಪಿಕೊಂಡ ವಿದ್ಯುತ್ ಇಲಾಖೆ

ಹೊಸದಿಲ್ಲಿ, ಆ.17: ಪ್ರಧಾನಿ ನರೇಂದ್ರ ಮೋದಿ ತಮ್ಮ ಸ್ವಾತಂತ್ರ ದಿನದ ಭಾಷಣದಲ್ಲಿ ಎಂದಿನಂತೆ ವಾಕ್ಚಾತುರ್ಯ ಮೆರೆದಿರಬಹುದು. ಆದರೆ ಈ ಭಾಷಣದಲ್ಲಿ ಅವರು ವಿದ್ಯುತ್ ಸಂಪರ್ಕದ ವಿಚಾರದಲ್ಲಿ ಕೆಲವು ‘ಸುಳ್ಳು’ ಮಾಹಿತಿಗಳನ್ನು ನೀಡಿದ್ದಾರೆಂದು ವಿದ್ಯುತ್ ಇಲಾಖೆಯೇ ಒಪ್ಪಿಕೊಂಡಿದೆ.

ತಮ್ಮ ಸರಕಾರ ಹೆಚ್ಚು ಹೆಚ್ಚು ಗ್ರಾಮಗಳಿಗೆ ವಿದ್ಯುತ್ ಸಂಪರ್ಕ ಕಲ್ಪಿಸುವಲ್ಲಿ ಪ್ರಮುಖ ಪಾತ್ರ ವಹಿಸಿದೆಯೆಂದು ಪ್ರಧಾನಿ ತಮ್ಮ ಭಾಷಣದಲ್ಲಿ ಹೇಳಿದ್ದರು. ‘‘ವಿದ್ಯುತ್ ಸಂಪರ್ಕವಿಲ್ಲದ ಒಟ್ಟು 18,000 ಗ್ರಾಮಗಳಲ್ಲಿ 10,000ಕ್ಕೂ ಹೆಚ್ಚು ಗ್ರಾಮಗಳಿಗೆ ವಿದ್ಯುತ್ ಸಂಪರ್ಕ ಒದಗಿಸಲಾಗಿದೆ. ನಗ್ಲಾ ಫಟೇಲಾ ಎಂಬ ಗ್ರಾಮಕ್ಕೆ ದಿಲ್ಲಿಯಿಂದ ಕೇವಲ ಮೂರು ಗಂಟೆಗಳ ಪ್ರಯಾಣ ಸಾಕು. ಆದರೆ ಈ ಗ್ರಾಮಕ್ಕೆ ವಿದ್ಯುಚ್ಛಕ್ತಿ ಸೌಲಭ್ಯ ಸಿಗಲು 70 ವರ್ಷಗಳಿಗಿಂತಲೂ ಹೆಚ್ಚು ಸಮಯ ಬೇಕಾಯಿತು. ಈ ಹಳ್ಳಿಯ ಗ್ರಾಮಸ್ಥರು ಈ ಸ್ವಾತಂತ್ರ ದಿನದ ಕಾರ್ಯಕ್ರಮವನ್ನು ಟಿವಿಯಲ್ಲಿ ನೋಡುತ್ತಿದ್ದಾರೆಂದು ನನಗೆ ಹೇಳಲಾಗಿದೆ’’ಎಂದು ಪ್ರಧಾನಿ ನುಡಿದಿದ್ದರು.

ಪ್ರಧಾನಿಯ ಅಧಿಕೃತ ಟ್ವಿಟ್ಟರ್ ಹ್ಯಾಂಡಲ್‌ನಲ್ಲಿ ಈ ಗ್ರಾಮದ ಜನರು ಟಿವಿಯಲ್ಲಿ ತಮ್ಮ ಭಾಷಣ ಆಲಿಸುತ್ತಿರುವ ಫೋಟೊ ಒಂದನ್ನು ಅಪ್‌ಲೋಡ್ ಮಾಡಲಾಗಿತ್ತು. ಇದರಿಂದ ಉತ್ತೇಜಿತರಾದ ಇಂಧನ ಸಚಿವ ಪಿಯುಷ್ ಗೋಯೆಲ್, ತಮ್ಮ ಟ್ವಿಟ್ಟರ್ ಹ್ಯಾಂಡಲ್‌ನಲ್ಲೂ ಈ ಸಂಬಂಧ ಹಲವಾರು ಫೋಟೊಗಳನ್ನು ಅಪ್‌ಲೋಡ್ ಮಾಡಿ ಹೊಸದಾಗಿ ವಿದ್ಯುತ್ ಸಂಪರ್ಕ ಪಡೆದ ಹಳ್ಳಿಗಳ ಜನರು ಸ್ವಾತಂತ್ರ ದಿನದ ಕಾರ್ಯಕ್ರಮಗಳನ್ನು ವೀಕ್ಷಿಸುತ್ತಿದ್ದಾರೆ ಎಂದು ಟ್ವೀಟ್ ಮಾಡಿದ್ದರು.

Nagla Phatela village is just 3 hours from Delhi, but Delhi took 70 years to send electricity to it #IndiaIndependenceDay

— Piyush Goyal (@PiyushGoyal) August 15, 2016

ಆದರೆ ಈ ವಿಚಾರ ನಗ್ಲ ಫಟೇಲಾ ಗ್ರಾಮಸ್ಥರ ಗಮನಕ್ಕೆ ಬಂದಿದ್ದು ಗ್ರಾಮದ ಮುಖ್ಯಸ್ಥ ತಮ್ಮ ಗ್ರಾಮದಲ್ಲಿ ಇಂತಹ ಕಾರ್ಯಕ್ರಮ ಆಯೋಜಿಸಲಾಗಿಲ್ಲ ಹಾಗೂ ವಿದ್ಯುತ್ ಕಂಬಗಳನ್ನು ಸ್ಥಾಪಿಸಿ ಮನೆಗಳಿಗೆ ಮೀಟರ್ ಅಳವಡಿಸಲಾಗಿದೆಯಾದರೂ ವಿದ್ಯುತ್ ಸಂಪರ್ಕ ಇನ್ನೂ ಸಿಕ್ಕಿಲ್ಲವೆಂದು ಹೇಳಿದರು.
ಇದನ್ನರಿತ ವಿದ್ಯುತ್ ಸಚಿವಾಲಯ ಕೂಡಲೇ ಸ್ಪಷ್ಟೀಕರಣವೊಂದನ್ನು ನೀಡಿದ್ದು, ಇದು ಕೇಂದ್ರ ಸರಕಾರಕ್ಕೆ ಮತ್ತಷ್ಟು ಮುಜುಗರ ಸೃಷ್ಟಿಸಿತಲ್ಲದೆ ಮತ್ತೇನೂ ಮಾಡಿಲ್ಲ. ಈ ಸೃಷ್ಟೀಕರಣದಲ್ಲಿ ಸಂಬಂಧಿತ ಗ್ರಾಮದ ವಿದ್ಯುತ್ತೀಕರಣವನ್ನು ಉತ್ತರ ಪ್ರದೇಶದ ಅಖಿಲೇಶ್ ಯಾದವ್ ಸರಕಾರ ಕೈಗೊಳ್ಳಲಿತ್ತು ಹಾಗೂ ಈ ಬಗ್ಗೆ ವಿಸ್ತತ ಯೋಜನಾ ವರದಿಯನ್ನು ಯುಪಿಎ ಸರಕಾರ ಡಿಸೆಂಬರ್ 2013 ರಲ್ಲಿ ಅನುಮೋದಿಸಿತ್ತು. ಈ ಸ್ಪಷ್ಟೀಕರಣದಲ್ಲಿ ಆರ್‌ಇಸಿ ಈ ಯೋಜನೆಗೆ ಅನುಮತಿ ಪತ್ರವನ್ನು ಜನವರಿ 6, 2014 ರಲ್ಲಿ ನೀಡಿತ್ತು ಎಂದು ಬರೆದಿತ್ತು.

ಈ ಸ್ಪಷ್ಟೀಕರಣದ ಹೊರತಾಗಿಯೂ ಪ್ರಧಾನಿ ತಮ್ಮ ಭಾಷಣದಲ್ಲಿ ಸುಳ್ಳು ಹೇಳಿದ್ದಾರೆಂಬುದು ಸ್ಪಷ್ಟವಾಗಿದೆ.