ಹಜ್ಜಾಜ್ ಗಳ ಆಪತ್ಬಾಂಧವ ಡಾ. ಖಾಸಿಂ

ಡಾ. ಅಬಸದುಲ್ ಖಾಸಿಂ ಮೂಲತಃ ಕೇರಳ ಕರ್ನಾಟಕ ಗಡಿಪ್ರದೇಶವಾದ ಕನ್ಯಾನ-ಕರೋಪಾಡಿ ಸಮೀಪದ ಪೈವಳಿಕೆ ಪಂಚಾಯತ್ ಗೊಳಪಟ್ಟ ಕಾಡೂರು ನಿವಾಸಿ. ಒಂದು ಕಾಲದಲ್ಲಿ ಕರೋಪಾಡಿ ಗ್ರಾ.ಪಂ. ಉಪಾಧ್ಯಕ್ಷರಾಗಿ ಸೇವೆ ಸಲ್ಲಿಸಿದ್ದ ಕೃಷಿಕ ಅಹ್ಮದ್ ಅಲಿ ಕಂಬಾರ್ ಎಂಬವರ ಪುತ್ರ. ಖಾಸಿಂ ಬಳಿಕ ಉಪ್ಪಳದ ಕೈಕಂಬದಲ್ಲಿ ನಂತರ ಮಂಗಳೂರಿನ ಫಳ್ನೀರ್ ನಲ್ಲಿ ವಾಸ್ತವ್ಯ ಹೂಡಿದರು.

ಡಾ. ಖಾಸಿಂ ಕಮರ್ಷಿಯಲ್ ವೈದ್ಯರಲ್ಲ. ತನ್ನ ಹಿರಿಯರಿಂದ ಬಂದ ಸಮಾಜ ಸೇವೆ ಇವರನ್ನೂ ಆವರಿಸಿತು. ಉಪ್ಪಳದಲ್ಲಿ ಸೊಸೈಟಿ ಆಸ್ಪತ್ರೆ ಕೂಡಾ ಇವರ ಸಹಭಾಗಿತ್ವದ್ದೆ. ಮಂಗಳೂರಿನಲ್ಲಿ 2000 ದಿಂದ 2014 ರ ತನಕ ವೈದ್ಯ ಸೇವೆ ಮಾಡಿದರು. ಅವರ ಮಾನವೀಯತೆಯನ್ನು ಗುರುತಿಸಿದ ಮಂಗಳೂರಿನ "ಎಂ.ಫ್ರೆಂಡ್ಸ್" ತಂಡ ತನ್ನ ಗ್ರಾಮೀಣ ಪ್ರದೇಶದ ಮೆಡಿಕಲ್ ಸರ್ವೆಗೆ ಬಳಸಿಕೊಂಡಿತು. ನಂತರ ಎಂ.ಫ್ರೆಂಡ್ಸ್ ನ ವೈದ್ಯಕೀಯ ಸಲಹೆಗಾರರಾಗಿ ಅದರ ಟ್ರಸ್ಟಿಯೂ ಆದರು. ಹಲವು ಸಂಘಟನೆಗಳಲ್ಲಿ ಗುರುತಿಸಿಕೊಂಡರು.

ಡಾ. ಖಾಸಿಂ ಮೃದುಸ್ವಭಾವದ ನಗುಮುಖದ ವ್ಯಕ್ತಿ. ಅಶಕ್ತರ ಪಾಲಿನ ಆಶಾಕಿರಣ. ಸಮಸ್ಯೆ ಇದ್ದಲ್ಲಿಗೆ ಧಾವಿಸಿ ಉಚಿತ ಚಿಕಿತ್ಸೆ ನೀಡುವುದಲ್ಲದೆ ಅದರ ಫಾಲೋಅಪ್ ಕೂಡಾ ಮಾಡುವ ಅಪರೂಪದ ವೈದ್ಯ. ರೋಗಿ ಅಸಹಾಯಕತನ ತೋರ್ಪಡಿಸಿದರೆ ತನ್ನ ಕಿಸೆಯಿಂದ ಹಣಕೊಟ್ಟು ಸಂತೈಸುವ ಕಾರುಣ್ಯಮೂರ್ತಿ. ಕಳೆದ ಎರಡೂವರೆ ವರ್ಷಗಳಿಂದ ಡಾ. ಖಾಸಿಂ ಸೌದಿ ಅರೇಬಿಯಾದ ಪವಿತ್ರ ಮಕ್ಕಾ ಸಮೀಪದ ಝಹರತ್ ಕುದಾಯಿಯ ಏಷಿಯನ್ ಪಾಲಿಕ್ಲಿನಿಕ್ ಆಸ್ಪತ್ರೆಯಲ್ಲಿ ವೈದ್ಯ ವೃತ್ತಿಯಲ್ಲಿದ್ದಾರೆ. ಅಲ್ಲಿ ವೃತ್ತಿ ಮಾಡುತ್ತಲೇ ಮಕ್ಕಾ ಪ್ರವಾಸಿಗರ ಉಚಿತ ಸೇವೆಯಲ್ಲೂ ತೊಡಗಿಸಿಕೊಂಡಿದ್ದಾರೆ. ಅಲ್ಲಿ "ನವೋದಯ" ಎನ್ನುವ ಹಜ್ ಸೇವಕರ ತಂಡವಿದೆ. ಮಕ್ಕಾದಲ್ಲಿ 100 ಸೇವಕರು ಹಜ್ಜಾಜ್ ಗಳ ಸೇವೆಯಲ್ಲಿ ತೊಡಗಿಸಿಕೊಂಡಿದ್ದಾರೆ. ಅನ್ವರ್ ತಿರುವನಂತಪುರ ಟೀಂ ಕ್ಯಾಪ್ಟನ್. ಡಾ. ಖಾಸಿಂ ಮುಖ್ಯ ಸಲಹೆಗಾರರು ಅಲ್ಲದೆ ತಂಡದ ಏಕಮಾತ್ರ ವೈದ್ಯ ಮತ್ತು ಸ್ವಯಂ ಸೇವಕರ ತರಬೇತುದಾರ. ಪ್ರತಿನಿತ್ಯ ಆಸ್ಪತ್ರೆ ಕೆಲಸದ ಮಧ್ಯೆಯೂ ಒಂದಷ್ಟು ತಾಸುಗಳನ್ನು ಹಗಲು-ರಾತ್ರಿ ನಿದ್ದೆಗೆಟ್ಟು ಹಾಜಿಗಳ ಸೇವೆಗೆ ಮುಡಿಪಾಗಿರಿಸಿದ್ದಾರೆ. ಕಳೆದ ವರ್ಷ ಕೂಡಾ ನೂರಾರು ಹಜ್ ಪ್ರವಾಸಿಗರ ಸೇವೆಯನ್ನು ಮಾಡಿದ್ದ ಡಾ. ಖಾಸಿಂ ಈ ಬಾರಿಯ ಹಜ್ ನಲ್ಲೂ ತನ್ನನ್ನು ತೊಡಗಿಸಿಕೊಂಡಿದ್ದಾರೆ.

ಮಕ್ಕಾದಲ್ಲಿ ತುರ್ತು ಆವಶ್ಯಕತೆ ಇದ್ದಲ್ಲಿ ಡಾ. ಖಾಸಿಂ ಅವರ ಮೊಬೈಲ್ ನಂಬ್ರ; +9665 82249909 ಸಂಪರ್ಕಿಸಬಹುದು. ಅಕಸ್ಮಾತ್ ಅವರು ತುರ್ತು ಕೆಲಸದಲ್ಲಿರುವಾಗ ಫೋನ್ ಎತ್ತದೇ ಇದ್ದಲ್ಲಿ ಅವರಿಗೆ ವಾಟ್ಸ್ ಆ್ಯಪ್ ಸಂದೇಶ ಕಳುಹಿಸಬಹುದು. ಅಥವಾ "ನವೋದಯ" ಸ್ವಯಂ ಸೇವಕರ ತಂಡದ ಕ್ಯಾಪ್ಟನ್ ಅನ್ವರ್ +9665 57910005, ಶಿಹಾಬ್ ಏಷಿಯನ್ +9665 59164445, ಶಬೀರ್ ಏಷಿಯನ್ +9665 36973895 ಅವರನ್ನು ಸಂಪರ್ಕಿಸಬಹುದು. ಡಾ.ಖಾಸಿಂ ಮತ್ತು ತಂಡದ ಸೇವೆಯನ್ನು ಅಲ್ಲಾಹನು ಸ್ವೀಕರಿಸಲಿ.