ಆಂಧ್ರದಲ್ಲಿ ಸಿಂಧುಗೆ ಅಭಿನಂದನೆ

ವಿಜಯವಾಡ, ಆ.23: ರಿಯೋ ಗೇಮ್ಸ್‌ನಲ್ಲಿ ಬೆಳ್ಳಿ ಪದಕ ಜಯಿಸಿ ಐತಿಹಾಸಿಕ ಸಾಧನೆ ಮಾಡಿದ್ದ ಪಿ.ವಿ. ಸಿಂಧುಗೆ ಆಂಧ್ರ ಸರಕಾರ ಅಪೂರ್ವ ಸ್ವಾಗತ ನೀಡಿದೆ.

ತೆಲಂಗಾಣ ಸರಕಾರ ಸೋಮವಾರ ಸಿಂಧು ಹಾಗೂ ಅವರ ಕೋಚ್ ಗೋಪಿಚಂದ್‌ರನ್ನು ತೆರೆದ ಬಸ್ಸಿನಲ್ಲಿ ಮೆರವಣಿಗೆ ಮಾಡಿ ಸನ್ಮಾನಿಸಿತ್ತು. ತೆಲಂಗಾಣ ಸರಕಾರ ಸನ್ಮಾನಿಸಿದ ಮರುದಿನವೇ ಸ್ಪರ್ಧೆಗೆ ಬಿದ್ದವರಂತೆ ಆಂಧ್ರ ಸರಕಾರ ಕೂಡ ಸಿಂಧು ಹಾಗೂ ಅವರ ಕೋಚ್ ಗೋಪಿಚಂದ್‌ರನ್ನು ಗನ್ನಾವರಂ ಏರ್‌ಪೋರ್ಟ್‌ನಿಂದ ಇಂದಿರಾ ಗಾಂಧಿ ಸ್ಟೇಡಿಯಂನ ತನಕ ಶೃಂಗರಿಸಲ್ಪಟ್ಟ ತೆರೆದ ವಾಹನದಲ್ಲಿ ಮೆರವಣಿಗೆ ಮೂಲಕ ಕರೆ ತಂದಿತು. ವಿಜಯವಾಡ ಮಾರ್ಗದುದ್ದಕ್ಕೂ ನೆರೆದಿದ್ದ ಜನಸ್ತೋಮದತ್ತ ಕೈಬೀಸಿದರು.

ಬಿಳಿಬಟ್ಟೆ ಧರಿಸಿದ್ದ ಸಿಂಧು ಬೆಳ್ಳಿ ಪದಕವನ್ನು ಕೊರಳಿಗೆ ಧರಿಸಿಕೊಂಡು ತನ್ನನ್ನು ಸ್ವಾಗತಿಸಲು ಬಂದಿದ್ದ ತವರಿನ ಅಭಿಮಾನಿಗಳತ್ತ ಕೈಬೀಸಿದರು. ಕೋಚ್ ಗೋಪಿಚಂದ್ ಅಭಿಮಾನಿಗಳತ್ತ ತ್ರಿವರ್ಣ ಧ್ವಜವನ್ನು ಬೀಸಿದರು.

ತೆರೆದ ವಾಹನದಲ್ಲಿ ಬಿಎಐ ಕಾರ್ಯದರ್ಶಿ, ಆಂಧ್ರಪ್ರದೇಶ ಬ್ಯಾಡ್ಮಿಂಟನ್ ಅಸೋಸಿಯೇಶನ್‌ನ ಸಿಇಒ ಕೆ. ಪುಣೈಯ್ಯ ಚೌಧರಿ, ಸಿಂಧು ತಂದೆ ಪಿ.ವಿ. ರಮಣ ಉಪಸ್ಥಿತರಿದ್ದರು.

ಸನ್ಮಾನ ಸಮಾರಂಭದಲ್ಲಿ ಮುಖ್ಯಮಂತ್ರಿ ಎನ್. ಚಂದ್ರಬಾಬು ನಾಯ್ಡು ಅವರು ಸಿಂಧುಗೆ 3 ಕೋಟಿ ರೂ. ಹಾಗೂ 1000 ಚದರ ಅಡಿ ನಿವೇಶನವನ್ನು ಉಡುಗೊರೆಯಾಗಿ ನೀಡಿದರು.

ವಿಶ್ವ ಚಾಂಪಿಯನ್‌ಶಿಪ್‌ನಲ್ಲಿ ಎರಡು ಬಾರಿ ಕಂಚಿನ ಪದಕ ಜಯಿಸಿದ್ದ ಸಿಂಧು ರಿಯೋ ಒಲಿಂಪಿಕ್ಸ್ ಮಹಿಳೆಯರ ಸಿಂಗಲ್ಸ್ ಫೈನಲ್‌ನಲ್ಲಿ ಸ್ಪೇನ್‌ನ ವಿಶ್ವದ ನಂ.1 ಆಟಗಾರ್ತಿ ಕ್ಯಾರೊಲಿನಾ ಮರಿನ್ ವಿರುದ್ಧ ಸೋತು ಬೆಳ್ಳಿ ಪದಕಕ್ಕೆ ತೃಪ್ತಿಪಟ್ಟುಕೊಂಡಿದ್ದರು. ಒಲಿಂಪಿಕ್ಸ್‌ನಲ್ಲಿ ಬೆಳ್ಳಿ ಪದಕ ಜಯಿಸಿದ್ದ ಮೊದಲ ಬ್ಯಾಡ್ಮಿಂಟನ್ ಆಟಗಾರ್ತಿ ಎಂಬ ಕೀರ್ತಿಗೆ ಭಾಜನರಾಗಿದ್ದರು.

ಸಿಂಧು ನಮ್ಮ ಮಣ್ಣಿನ ಮಗಳು :ನಾಯ್ಡು
 ‘‘ ಸಿಂಧು ತಂದೆ ಊರು ಎಲ್ಲೂರು. ತಾಯಿಯ ಊರು ವಿಜಯವಾಡ. ವಾಲಿಬಾಲ್ ಆಟಗಾರರಾದ ಅವರಿಗೆ ಸಿಂಧು ಅವರ ಯಶಸ್ಸು ಸಲ್ಲಬೇಕು. ಅವರ ಪ್ರೋತ್ಸಾಹದಿಂದಾಗಿ ಸಿಂಧು ಈ ಮಟ್ಟಕ್ಕೆ ಬೆಳೆಯಲು ಸಾಧ್ಯವಾಯಿತು. ಸಿಂಧು ನಮ್ಮ ಮಣ್ಣಿನ ಮಗಳು ಎಂದು ’’ಆಂಧ್ರ ಪ್ರದೇಶದ ಮುಖ್ಯ ಮಂತ್ರಿ ಚಂದ್ರಬಾಬು ನಾಯ್ಡು ಹೇಳಿದ್ದಾರೆ.
 ಸಿಂಧು ತನಗೆ ಆಂಧ್ರ ಪ್ರದೇಶ ಸರಕಾರ ನೀಡಿದ ಅಭಿನಂದನೆಯನ್ನು ಸ್ವೀಕರಿಸಿ ಮಾತನಾಡಿ ಚಿಕ್ಕಂದಿನಲ್ಲಿ ಅಜ್ಜನ ಮನೆಗೆ ಬಂದಾಗ ಆಡಿದ ಕ್ಷಣಗಳನ್ನು ನೆನಪಿಸಿಕೊಂಡರು.
  ‘‘ ಚಿಕ್ಕಂದಿನಲ್ಲಿ ವಿಜಯವಾಡದಲ್ಲಿದ್ದ ಅಜ್ಜನ ಮನೆಗೆ ಆಗಾಗ ಬರುತ್ತಿದೆ. ಒಳಾಂಗಣ ಕ್ರೀಡಾಂಗಣದಲ್ಲಿ ಶಟ್ಲ್ ಆಡುತ್ತಿದ್ದೆ. ನಿಮ್ಮ ಆಶೀರ್ವಾದ ಮತ್ತು ಪ್ರಾರ್ಥನೆಗೆ ನಾನು ಚಿರಋಣಿ. ನನ್ನ ಹೆತ್ತವರು ಮತ್ತು ಕೋಚ್ ನೀಡಿದ ಪ್ರೋತ್ಸಾಹದಿಂದಾಗಿ ಈ ಮಟ್ಟಕ್ಕೆ ಬೆಳೆದಿರುವೆ. ನಾನು ಮಗುವಾಗಿದ್ದಾಗ ಗೋಪಿಚಂದ್ ಅವರ ಆಟದ ಪ್ರಭಾವಕ್ಕೊಳಗಾಗಿದ್ದೆ ಎಂದು ಸಿಂಧು ನುಡಿದರು.
ಮುಖ್ಯ ಮಂತ್ರಿ ಚಂದ್ರ ಬಾಬು ನಾಯ್ಡು ಅವರು ವೇದಿಕೆಯಲ್ಲಿ ಸಿಂಧು ಜೊತೆ ಶಟ್ಲ್ ಆಡುವ ಮೂಲಕ ಅಭಿನಂದನಾ ಕಾರ್ಯಕ್ರಮಕ್ಕೆ ಚಾಲನೆ ನೀಡಿದರು. ಸಿಂಧು ಅವರನ್ನು ‘‘ಡೈಮಂಡ್’’ ಎಂದು ಬಣ್ಣಿಸಿದ ಮುಖ್ಯ ಮಂತ್ರಿ ನಾಯ್ಡು ಅವರು‘‘ ಸಿಂಧು ಭಾರತದ ಕ್ರೀಡೆಗೆ ಹೊಸ ಚರಿತ್ರೆಯನ್ನು ಬರೆದಿದ್ದಾರೆ. ಅವರು ಇನ್ನು ಮುಂದೆ ಕ್ರೀಡಾ ಕ್ಷೇತ್ರಕ್ಕೆ ಹಲವು ಕೊಡುಗೆಗಳನ್ನು ನೀಡಲಿದ್ದಾರೆ’’ ಎಂದು ವಿವರಿಸಿದರು.
 ‘‘ ಒಲಿಂಪಿಕ್ ಗೇಮ್ಸ್ ಭಾರತದಲ್ಲಿ ನಡೆದರೆ ಭಾರತದ ಕ್ರೀಡಾ ಕ್ಷೇತ್ರ ಇನ್ನಷ್ಟು ಬೆಳೆಯಲು ಸಾಧ್ಯ. ನಾವು ಯಾರಿಗೂ ಕಡಿಮೆ ಇಲ್ಲ. ಚೀನಾ ಅಥವಾ ರಶ್ಯಕ್ಕಿಂತ ಉತ್ತಮವಾದ ಕ್ರೀಡಾ ಪ್ರತಿಭೆಗಳು ಭಾರತದಲ್ಲಿ ಇದ್ದಾರೆ. ಆಂಧ್ರ ಪ್ರದೇಶ ಸರಕಾರ ಅಮರಾವತಿಯಲ್ಲಿ ಒಲಿಂಪಿಕ್ಸ್‌ನ್ನು ಆಯೋಜಿಸುವ ಉದ್ದೇಶಕ್ಕಾಗಿ ಅಗತ್ಯದ ಸೌಲಭ್ಯಗಳನ್ನು ಕಲ್ಪಿಸುವ ಕಡೆಗೆ ಗಮನ ಹರಿಸಿದೆ. ಆಂಧ್ರಕ್ಕೆ ಒಲಂಪಿಕ್ಸ್ ಗೇಮ್ಸ್ ಆಯೋಜಿಸಲು ಕಷ್ಟವಾಗದು’’ ಎಂದು ನಾಯ್ಡು ಹೇಳಿದರು.
‘‘ ಗೋಪಿ ಚಂದ್ ಅಮರಾವತಿಯಲ್ಲಿ ವಿಶ್ವ ದರ್ಜೆಯ ಅಕಾಡಮಿಯನ್ನು ನಿರ್ಮಿಸುವುದಿದ್ದರೆ ಅಗತ್ಯದ ನೆರವನ್ನು ದಾನಿಗಳಿಂದ ದೊರಕಿಸಿಕೊಡುವುದಾಗಿ ಭರವಸೆ ನೀಡಿದ ಮುಖ್ಯ ಮಂತ್ರಿ ನಾಯ್ಡು ಅವರು ಸರಕಾರ ಸಾಧ್ಯವಿರುವಷ್ಟು ನೆರವು ನೀಡಲಿದೆ ಎಂದರು.
ಆಂಧ್ರ ವಿವಿಯು ಯುವ ಒಲಿಂಪಿಯನ್ ಸಿಂಧು ಅವರ ಕೋಚ್ ಪಿ.ಗೋಪಿಚಂದ್‌ಗೆ ಗೌರವ ಡಾಕ್ಟರೇಟ್ ಪ್ರಕಟಿಸಿದರು.
  ರಿಯೋ ಒಲಿಂಪಿಕ್ಸ್‌ನ ಆರಂಭಿಕ ಸುತ್ತಿನಲ್ಲಿ ನಿರ್ಗಮಿಸಿದ್ದ ಶಟ್ಲರ್ ಗುಂಟೂರಿನ ಕೆ.ಶ್ರೀಕಾಂತ್‌ಗೆ ಮತ್ತು ರಜನಿಗೆ ತಲಾ 25 ಲಕ್ಷ ರೂ. ನಗದು ಪುರಸ್ಕಾರ ಪ್ರಕಟಿಸಿರುವ ನಾಯ್ಡು ಅವರಿಗೆ ಗ್ರೂಪ್-2 ನೌಕರಿ ನೀಡುವುದಾಗಿ ಪ್ರಕಟಿಸಿದ್ದಾರೆ.
ಗ್ರಾಂಡ್ ಮಾಸ್ಟರ್ ಕೊನೆರು ಹಂಪಿ , ಗೋಪಿಚಂದ್ ಪತ್ನಿ ಹಾಗೂ ಮಾಜಿ ಬ್ಯಾಡ್ಮಿಂಟನ್ ಆಟಗಾರ್ತಿ ಶ್ರೀಲಕ್ಷ್ಮೀ ಅವರನ್ನು ಇದೇ ಸಂದರ್ಭದಲ್ಲಿ ಮುಖ್ಯ ಮಂತ್ರಿ ಸನ್ಮಾನಿಸಿದರು. ಸಿಂಧು ಮತ್ತು ಗೋಪಿಚಂದ್ ವಿಶೇಷ ವಿಮಾನದಲ್ಲಿ ವಿಜಯವಾಡಕ್ಕೆ ಆಗಮಿಸಿದ್ದರು. ಅವರಿಗೆ ಆಂದ್ರ ಪ್ರದೇಶದ ಸಚಿವರು, ಎಂಪಿ ಮತ್ತು ಶಾಸಕರು ೆ ವಿಮಾನ ನಿಲ್ದಾಣದಲ್ಲಿ ಭವ್ಯ ಸ್ವಾಗತ ನೀಡಿದರು.
,,,,,,,,,,,,,