ಉನ್ನತ ಶಿಕ್ಷಣಕೆ್ಕ 600 ಬೋಧಕರ ಶೀಘ್ರ ನೇಮಕಾತಿ: ಪ್ರಕಾಶ್ ಜಾವಡೇಕರ್

ಧಾರವಾಡ, ಆ.28: ಐಐಟಿಯಲ್ಲಿ ಸ್ಥಾನ ಪಡೆದಿರುವ ಪ್ರತಿಭಾವಂತರು ದೇಶಕ್ಕೆ ಹೊಸ ಮಾರ್ಗ ತೋರಿಸುವ ತಂತ್ರಜ್ಞರಾಗಬೇಕು. ಉನ್ನತ ಶಿಕ್ಷಣದಲ್ಲಿ ಹೊಸದಾಗಿ 600 ಬೋಧಕರ ನೇಮಕಾತಿ ಶೀಘ್ರ ಆರಂಭವಾಗಲಿದೆ ಎಂದು ಕೇಂದ್ರ ಮಾನವ ಸಂಪನ್ಮೂಲ ಅಭಿವೃದ್ಧಿ ಸಚಿವ ಪ್ರಕಾಶ್ ಜಾವಡೇಕರ್ ಹೇಳಿದ್ದಾರೆ.
ನಗರದ ಬೆಳಗಾವಿ ರಸ್ತೆಯಲ್ಲಿರುವ ವಾಲ್ಮಿ ಕಟ್ಟಡದಲ್ಲಿನ ಐಐಟಿಯ ತಾತ್ಕಾಲಿಕ ಕ್ಯಾಂಪಸನ್ನು ಉದ್ಘಾಟಿಸಿದ ಅವರು, ನಂತರ ಕೃಷಿ ವಿಶ್ವವಿದ್ಯಾನಿಲಯದಲ್ಲಿ ಹಮ್ಮಿಕೊಂಡಿದ್ದ ಬೃಹತ್ ಸಾರ್ವಜನಿಕ ಸಮಾರಂಭವನ್ನು ಉದ್ದೇಶಿಸಿ ಮಾತನಾಡಿದರು.
ಕಳೆದ 65 ವರ್ಷಗಳಲ್ಲಿ ದೇಶದಲ್ಲಿ 16 ಐಐಟಿಗಳು ಆರಂಭವಾಗಿದ್ದವು. ಪ್ರಧಾನಿ ನರೇಂದ್ರ ಮೋದಿ ಅಧಿಕಾರಕ್ಕೆ ಬಂದ ಮೇಲೆ ಹೊಸದಾಗಿ 7 ಐಐಟಿಗಳು ಸ್ಥಾಪನೆಯಾಗಿವೆ. ಶಿಕ್ಷಣವು ರಾಷ್ಟ್ರೀಯ ಕಾರ್ಯಸೂಚಿಯಾಗಬೇಕು ಎಂದು ಅವರು ಹೇಳಿದರು.
 ಧಾರವಾಡ ಐಐಟಿಗೆ ರಾಜ್ಯ ಸರಕಾರವು ಕೋಟ್ಯಂತರ ರೂ.ವೌಲ್ಯದ 470 ಎಕರೆ ಭೂಮಿಯನ್ನು ಸುಂದರವಾದ ಪರಿಸರದಲ್ಲಿ ಒದಗಿಸಿರುವುದಕ್ಕೆ ರಾಜ್ಯದ ಮುಖ್ಯಮಂತ್ರಿ ಸಿದ್ದರಾಮಯ್ಯಗೆ ಕೃತಜ್ಞತೆಯನ್ನು ಸಲ್ಲಿಸುತ್ತೇನೆ ಎಂದು ಅವರು ತಿಳಿಸಿದರು.
 ಸಮಾರಂಭದ ಅಧ್ಯಕ್ಷತೆ ವಹಿಸಿದ್ದ ಮುಖ್ಯಮಂತ್ರಿ ಸಿದ್ದರಾಮಯ್ಯ ಮಾತನಾಡಿ, ಐಐಟಿ ಉದ್ಘಾಟನೆಯಾಗಿರುವ ಈ ದಿನ ಧಾರವಾಡದ ಇತಿಹಾಸಲ್ಲಿ ಒಂದು ಸ್ಮರಣೀಯ ದಿನವಾಗಿದೆ. ಕೇಂದ್ರ ಸರಕಾರ ಪ್ರಸಕ್ತ ಆರ್ಥಿಕ ವರ್ಷದಲ್ಲಿ ಈ ಸಂಸ್ಥೆಯನ್ನು ಮಂಜೂರು ಮಾಡಿತ್ತು. ಅದಕ್ಕಾಗಿ ರಾಜ್ಯ ಸರಕಾರ ಕೃತಜ್ಞವಾಗಿದೆ ಎಂದರು.
  1956ರಲ್ಲಿ ಅಂದಿನ ಪ್ರಧಾನಿ ಜವಾಹರಲಾಲ್ ನೆಹರು ಹಾಗೂ ಮುಂಬೈ ಸರಕಾರದ ಮುಖ್ಯಮಂತ್ರಿಯಾಗಿದ್ದ ಮೊರಾರ್ಜಿ ದೇಸಾಯಿ ಧಾರವಾಡದ ಕೃಷಿ ಕಾಲೇಜನ್ನು ಉದ್ಘಾಟಿಸಿದ್ದರು. ಇಂದು ಅದು ವಿಶ್ವದ್ಯಾನಿಲಯವಾಗಿ ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಹೆಸರು ಗಳಿಸಿದೆ. ಇಂದು ಉದ್ಘಾಟನೆಯಾಗಿರುವ ಐಐಟಿಯೂ ಅದೆ ಎತ್ತರಕ್ಕೆ ಬೆಳೆಯಬೇಕು ಎಂದು ಅವರು ಹಾರೈಸಿದರು.
ಐಐಟಿ ಸ್ಥಾಪನೆಗಾಗಿ ರಾಜ್ಯದಿಂದ ಮೂರು ಜಿಲ್ಲೆಗಳ ಹೆಸರು ಕಳುಹಿಸುವಾಗ ಧಾರವಾಡದ ಹೆಸರು ಸೇರಿಸಿದ್ದರಿಂದಲೆ ಇಲ್ಲಿ ಐಐಟಿ ಸ್ಥಾಪನೆ ಸಾಧ್ಯವಾಗಿದೆ. ಅಮೂಲ್ಯವಾದ 470 ಎಕರೆ ಭೂಮಿಯನ್ನು ರಾಜ್ಯ ಸರಕಾರ ಉಚಿತವಾಗಿ ಒದಗಿಸಿದೆ. ಮುಂಬರುವ ದಿನಗಳಲ್ಲಿ ಕೇಂದ್ರ ಸರಕಾರವು ಯಾವುದೇ ವಿದ್ಯಾಸಂಸ್ಥೆಗಳನ್ನು ನಮ್ಮ ರಾಜ್ಯಕ್ಕೆ ನೀಡಿದರೂ ಉಚಿತವಾಗಿ ಭೂಮಿ ಕೊಡಲು ರಾಜ್ಯ ಸರಕಾರ ಸಿದ್ಧವಿದೆ ಎಂದು ಅವರು ಹೇಳಿದರು.

ಉನ್ನತ ಶಿಕ್ಷಣ ಸಚಿವ ಬಸವರಾಜ ರಾಯರೆಡ್ಡಿ ಮಾತನಾಡಿ, ದೇಶದಲ್ಲಿ ಶೇ.20 ರಷ್ಟು ಜನ ಕಾಲೇಜು ಶಿಕ್ಷಣ ಪಡೆಯುತ್ತಿದ್ದರೆ ಕರ್ನಾಟಕದಲ್ಲಿ ಶೇ.26ರಷ್ಟು ಜನ ಹಾಗೂ ಹಿಂದುಳಿದ ಹೈದರಾಬಾದ್ ಕರ್ನಾಟಕ ಪ್ರದೇಶದಲ್ಲಿ ಕೇವಲ ಶೇ.10ರಷ್ಟು ಜನ ಪದವಿ ಶಿಕ್ಷಣ ಪಡೆಯುತ್ತಿದ್ದಾರೆ. ಹಿಂದುಳಿದ ಪ್ರದೇಶದ ಅಭಿವೃದ್ಧಿಗಾಗಿ ರಾಯಚೂರಿನಲ್ಲಿ ಭಾರತೀಯ ಮಾಹಿತಿ ತಂತ್ರಜ್ಞಾನ ಸಂಸ್ಥೆ(ಐಐಟಿ) ಸ್ಥಾಪಿಸಬೇಕು ಎಂದು ಮನವಿ ಮಾಡಿದರು. ಸಮಾರಂಭದಲ್ಲಿ ಕೇಂದ್ರ ಸಚಿವ ಅನಂತಕುಮಾರ್ ಮಾತನಾಡಿದರು. ಸಚಿವರಾದ ವಿನಯ್‌ಕುಲಕರ್ಣಿ, ಆರ್.ವಿ. ದೇಶಪಾಂಡೆ, ಸಂತೋಷ್‌ಲಾಡ್, ಎಚ್.ಕೆ.ಪಾಟೀಲ್, ರುದ್ರಪ್ಪ ಲಮಾಣಿ, ಸಂಸದ ಪ್ರಹ್ಲಾದ್‌ಜೋಶಿ, ಜಗದೀಶ್‌ಶೆಟ್ಟರ್, ಬಸವರಾಜ ಹೊರಟ್ಟಿ, ಶಾಸಕರಾದ ಸಿ.ಎಸ್.ಶಿವಳ್ಳಿ, ಅರವಿಂದ ಬೆಲ್ಲದ್, ಪ್ರಸಾದ್ ಅಬ್ಬಯ್ಯ, ಎನ್.ಎಚ್.ಕೋನರೆಡ್ಡಿ, ಬಿ.ಆರ್.ಯಾವಗಲ್, ಕುಲಪತಿ ಡಾ.ಡಿ.ಪಿ.ಬಿರಾದರ್, ಜಿಲ್ಲಾಧಿಕಾರಿ ಎಸ್.ಬಿ.ಬೊಮ್ಮನಹಳ್ಳಿ ಮೊದಲಾದವರು ಉಪಸ್ಥಿತರಿದ್ದರು.