ಜಗತ್ತಿನ ಟಾಪ್ ಮೂರು ಅತ್ಯಂತ ಸುರಕ್ಷಿತ ದೇಶಗಳಲ್ಲಿ ಎರಡು ಗಲ್ಫ್ ರಾಷ್ಟ್ರಗಳು

ಜಿದ್ದಾ, ಸೆ.5: ವಿಶ್ವದ ಮೂರು ಅತ್ಯಂತ ಸುರಕ್ಷಿತ ದೇಶಗಳಲ್ಲಿಸೌದಿ ಅರೇಬಿಯಾ ಮೂರನೆ ಸ್ಥಾನ ಪಡೆದಿದೆ. ಈ ದೇಶದಲ್ಲುಂಟಾಗುವ ಕೆಲವೇ ಕೆಲವು ಪ್ರಾಕೃತಿಕ ವಿಕೋಪಗಳು ಹಾಗೂ ಆರೋಗ್ಯ, ಸುರಕ್ಷತೆ ಹಾಗೂ ಮೂಲ ಸೌಕರ್ಯಾಭಿವೃದ್ಧಿಗೆ ಅಲ್ಲಿನ ಸರಕಾರ ಮಾಡುತ್ತಿರುವ ಸತತ ಪ್ರಯತ್ನಗಳೇ ಇದಕ್ಕೆ ಕಾರಣವಾಗಿದೆ.
ವಿಶ್ವ ಸಂಸ್ಥೆ ವಿಶ್ವವಿದ್ಯಾಲಯದ ದಿ ಇನ್ಸ್ಟಿಟ್ಯೂಟ್ ಫಾರ್ ಎನ್ವಿರಾನ್ಮೆಂಟ್ ಆ್ಯಂಡ್ ಹ್ಯೂಮನ್ ಸೆಕ್ಯುರಿಟಿ ವರದಿಯ ಪ್ರಕಾರ ಪ್ರಥಮ ಎರಡು ಸ್ಥಾನಗಳು ಮಾಲ್ಟಾ ಹಾಗೂ ಕತರ್‌ಗೆ ಹೋಗಿವೆ.
ಆದರೆ ಆಶ್ಚರ್ಯಕರವಾಗಿ ಅಮೆರಿಕಾ ಈ ಪಟ್ಟಿಯಲ್ಲಿ ಪ್ರಥಮ ನೂರು ದೇಶಗಳಲ್ಲಿಯೂ ಸ್ಥಾನ ಪಡೆದಿಲ್ಲವಾಗಿದ್ದು, ಅದು 116ನೆ ಸ್ಥಾನದಲ್ಲಿದೆ. ಅದೇ ಸಮಯ ವನುಆಟು ಹಾಗೂ ಟೋಂಗಾ, ಫಿಲಿಪೈನ್ಸ್, ಗಾಟೆಮಾಲ ಹಾಗೂ ಬಾಂಗ್ಲಾದೇಶ ವಿಶ್ವದ ಅತ್ಯಂತ ಅಪಾಯಕಾರಿ ದೇಶಗಳೆಂದು ಈ ವರದಿ ತಿಳಿಸಿದೆ.
ಇನ್ಸ್ಟಿಟ್ಯೂಟ್ ಫಾರ್ ಎನ್ವಿರಾನ್ಮೆಂಟ್ ಆ್ಯಂಡ್ ಹ್ಯೂಮನ್ ಸೆಕ್ಯುರಿಟಿಯ ಅಧ್ಯಯನಕಾರರು ಇತ್ತೀಚೆಗೆ 171 ದೇಶಗಳಲ್ಲಿ ಇಂತಹ ದುರಂತಗಳು ಹಾಗೂ ಅವುಗಳು ಒಡ್ಡುವ ಅಪಾಯದ ಬಗ್ಗೆ ಅಧ್ಯಯನ ನಡೆಸಿದೆ.
ಈ ಅಧ್ಯಯನವು ವಿವಿಧ ದೇಶಗಳ ಪರಿಸರ, ಮೂಲಭೂತ ಸೌಕರ್ಯ ಮುಂತಾದವುಗನ್ನು ಪರಿಗಣನೆಗೆ ತೆಗೆದುಕೊಂಡು ಆ ದೇಶದ ಸುರಕ್ಷಾ ವ್ಯವಸ್ಥೆ ಸಂತ್ರಸ್ತರ ಸಹಾಯಕ್ಕೆ ಎಷ್ಟು ಬೇಗ ಆಗಮಿಸುವುದು ಮುಂತಾದ ವಿಚಾರಗಳನ್ನು ಪರಿಗಣಿಸಿ ವರದಿ ನೀಡಿದೆಯೆಂದು ಅಧ್ಯಯನದ ಪ್ರಾಜೆಕ್ಟ್ ಮ್ಯಾನೇಜರ್ ಪೀಟರ್ ಮ್ಯುಕ್ ಹೇಳಿದ್ದಾರೆ.
ತೀರಾ ಕಡಿಮೆ ಸುರಕ್ಷಾ ವ್ಯವಸ್ಥೆಯಿರುವ 15 ದೇಶಗಳಲ್ಲಿ 13 ದೇಶಗಳು ಆಫ್ರಿಕನ್ ಖಂಡದಲ್ಲಿವೆಯೆಂದು ಈ ವರದಿ ಹೇಳಿದೆ. ಮುಖ್ಯವಾಗಿ ವನುಆಟು ಹಾಗೂ ಟೋಂಗಾ ಆಗಾಗ ಭೂಕಂಪ ಹಾಗೂ ಜ್ವಾಲಾಮುಖಿಗಳಿಂದ ತೊಂದರೆಗೀಡಾಗಿವೆ.
ಈ ವರದಿ ನೀಡಿರುವ ಪಟ್ಟಿಯಲ್ಲಿ ಅಗ್ರಸ್ಥಾನದಲ್ಲಿರುವ ದೇಶಗಳಲ್ಲಿ ಉತ್ತಮ ಮೂಲಭೂತ ಸೌಕರ್ಯಗಳು, ಟೆಲಿಕಮ್ಯುನಿಕೇಶನ್ ಸೌಲಭ್ಯಗಳು, ವಿದ್ಯುತ್, ಒಳಚರಂಡಿ, ನೀರು ಹಾಗೂ ಆಹಾರ ಪೂರೈಕೆ ವ್ಯವಸ್ಥೆಗಳಿವೆಯೆಂದು ಹೇಳಲಾಗಿದೆ.
ಆಸ್ಟ್ರೇಲಿಯಾದಲ್ಲಿ ಆಗಾಗ ನೆರೆ ಹಾವಳಿಯುಂಟಾಗುವುದರಿಂದ ಈ ದೇಶವು ಪಟ್ಟಿಯಲ್ಲಿ 121ನೆ ಸ್ಥಾನ ಪಡೆದಿದೆ. ಪ್ರಾಕೃತಿಕ ವಿಕೋಪಗಳು ಸಾಮಾನ್ಯವಾಗಿರುವ ಜಪಾನ್ ಕೂಡಪಟ್ಟಿಯಲ್ಲಿ ಕೆಳಗಿನ ಸ್ಥಾನ ಪಡೆದುಕೊಂಡಿದೆ.
ಅದೇ ಸಮಯ ಲೈಬೀರಿಯಾ (56ನೆ ಸ್ಥಾನ), ಝಾಂಬಿಯಾ(66) ಹಾಗೂ ಮಧ್ಯ ಆಫ್ರಿಕಾ (71 ನೆ ಸ್ಥಾನ) ಮುಖ್ಯವಾಗಿ ಆರೋಗ್ಯ ಹಾಗೂ ವೈದ್ಯಕೀಯ ಕ್ಷೇತ್ರಗಳಲ್ಲಿ ಸಂಪನ್ಮೂಲಗಳ ಕೊರತೆಯನ್ನನುಭವಿಸುತ್ತಿವೆ.
ಹಲವಾರು ದೇಶಗಳಲ್ಲಿ ಕೆಟ್ಟ ರಸ್ತೆಗಳಿಂದಾಗಿ ಪ್ರಾಕೃತಿಕ ವಿಕೋಪಗಳ ಸಂದರ್ಭಗಳಲ್ಲಿ ತುರ್ತು ಸೇವಾ ತಂಡಗಳಿಗೆ ಕೆಲ ಪ್ರದೇಶಗಳಿಗೆ ಸಹಾಯ ನೀಡಲು ಧಾವಿಸಲು ಕಷ್ಟಸಾಧ್ಯವಾಗುತ್ತಿದೆಯೆಂದೂ ವರದಿಯಲ್ಲಿ ತಿಳಿಸಲಾಗಿದೆ.
‘‘ವಿವಿಧ ದೇಶಗಳು ತಮ್ಮಲ್ಲಿ ಸಂಭವಿಸುವ ಪ್ರಾಕೃತಿಕ ವಿಕೋಪಗಳನ್ನುಹಾಗೂ ಕೆಲವೆಡೆ ನಡೆಯುತ್ತಿರುವ ಯುದ್ಧಗಳನ್ನು ನಿಲ್ಲಿಸಲು ಅಸಾಧ್ಯವಾದರೂ, ಅಲ್ಲಿನ ಸರಕಾರಗಳು ಇವುಗಳಿಂದ ನಾಗರಿಕರಿಗುಂಟಾಗುವ ಅಪಾಯವನ್ನು ಕಡಿಮೆಗೊಳಿಸುವಲ್ಲಿ ಹಾಗೂ ಸಂತ್ರಸ್ತರ ಸಂಖ್ಯೆಯನ್ನು ಕಡಿಮೆಗೊಳಿಸುವಲ್ಲಿಕ್ರಮ ಕೈಗೊಳ್ಳಬಹುದು’’ ಎಂದು ಈ ಅಧ್ಯಯನ ವರದಿ ಹೇಳಿದೆ.