ದುಬೈ ಆರ್.ಟಿ.ಎ.ನಿಂದ ವಾಹನ ಮಾಲಕರಿಗೆ ಸಾರಿಗೆ ನಿಯಮಗಳ ಮಹತ್ವದ ಮಾಹಿತಿ

ದುಬೈ ಸೆ.5: ದುಬೈ ನಿವಾಸಿಗಳು ತಮ್ಮ ಸ್ನೇಹಿತರಿಂದ ಹಾಗೂ ಸಂಬಂಧಿಕರಿಂದ ಶುಲ್ಕ ಸಂಗ್ರಹಿಸುವುದಿಲ್ಲವೆಂದಾದರೆ ಅವರನ್ನು ಎಷ್ಟು ಬಾರಿ ಬೇಕಾದರೂತಮ್ಮೊಂದಿಗೆ ವಾಹನದಲ್ಲಿ ಕುಳ್ಳಿರಿಸಿಕೊಂಡು ಕರೆದೊಯ್ಯಬಹುದು ಎಂದು ದುಬೈ ರಸ್ತೆ ಸಾರಿಗೆ ಪ್ರಾಧಿಕಾರ ಹೇಳಿದೆ.

ಅನಧಿಕೃತ ಟ್ಯಾಕ್ಸಿಗಳು ತಂದೊಡ್ಡುವ ಸಮಸ್ಯೆಯವಿಚಾರವಾಗಿ ಪ್ರವಾಸಿಗರಲ್ಲಿ ಹಾಗೂ ದುಬೈ ನಿವಾಸಿಗಳಲ್ಲಿ ಜಾಗೃತಿಯನ್ನುಂಟು ಮಾಡುವ ಅಭಿಯಾನವೊಂದಕ್ಕೆ ಆರ್ ಟಿ ಎ ಇತ್ತೀಚೆಗೆ ಚಾಲನೆ ನೀಡಿದ್ದು, ಅನಧಿಕೃತವಾಗಿ ಟ್ಯಾಕ್ಸಿ ಸೇವೆ ಸಡೆಸುವವರಿಗೆ ವಿಧಿಸಲಾಗುವ ದಂಡ ಮೊತ್ತದ ಬಗ್ಗೆ ವಿಮಾನ ನಿಲ್ದಾಣ ಹಾಗೂ ರಶೀದ್ ಪೋರ್ಟ್ ಸಮೀಪದ ಹಲವು ಪ್ರದೇಶಗಳಲ್ಲಿ ನೋಟಿಸ್ಗಳನ್ನು ಲಗತ್ತಿಸಲಾಗಿದೆ. ತಮ್ಮ ಸ್ನೇಹಿತರನ್ನು ಹಾಗೂ ಸಂಬಂಧಿಕರನ್ನು ತಮ್ಮ ವಾಹನಗಳಲ್ಲಿ ಕರೆದೊಯ್ಯುವ ಹಲವು ದುಬೈ ನಾಗರಿಕರಿಗೆ ಈ ನಿಯಮಾವಳಿಯಿಂದ ಸಮಸ್ಯೆಯಾಗಬಹುದೆಂಬ ಭಯವಿರುವ ಹಿನ್ನೆಲೆಯಲ್ಲಿ ಆರ್ ಟಿ ಎ ಮೇಲಿನಂತೆ ಸ್ಪಷ್ಟೀಕರಣ ನೀಡಿದೆ.
ಅನಧಿಕೃತ ಟ್ಯಾಕ್ಸಿಗಳ ಮೂಲಕ ಸಂಚರಿಸದಂತೆ ಆರ್ ಟಿ ಎ ದುಬೈ ನಾಗರಿಕರಿಗೆ ಮನವಿ ಮಾಡಿದೆ. ಅನಧಿಕೃತ ಟ್ಯಾಕ್ಸಿಗಳು ಪ್ರಯಾಣಿಕರನ್ನು ಕರೆದೊಯ್ಯುವುದು ಕಂಡು ಬಂದಿದ್ದೇ ಆದರಲ್ಲಿ ಅಂತಹ ಟ್ಯಾಕ್ಸಿಗಳಿಗೆ 20,000 ದಿರಮ್ಸ್ ನಿಂದ 50,000 ದಿರಮ್ಸ್ ತನಕ ದಂಡ ವಿಧಿಸಲಾಗುವುದು. ದಂಡ ಮೊತ್ತವನ್ನು ಈ ವರ್ಷ ನಿರ್ಣಯ ಸಂಖ್ಯೆ 6, 2016 ಮುಖಾಂತರ ಪರಿಷ್ಕರಿಸಲಾಗಿದೆ. ಅದೇ ಸಮಯ ಪರವಾನಿಗೆಯಿಲ್ಲದೆ ಕಾರ್ಯಾಚರಿಸುವ ಮೊಬೈವ್ ಆ್ಯಪ್ ಆಧರಿತ ಟ್ಯಾಕ್ಸಿ ಸೇವೆಗಳು ಕಂಡು ಬಂದಲ್ಲಿ ಅವುಗಳಿಗೆ50,000 ದಿರಮ್ಸ್ ತನಕ ದಂಡ ವಿಧಿಸಲಾಗುವುದು. ತರುವಾಯ ಟ್ಯಾಕ್ಸಿ ಅಥವಾ ಲಿಮೋಸಿನ್ ವಾಹನಗಳನ್ನು ಚಲಾಯಿಸಲು ಪರವಾನಿಗೆಯಿಲ್ಲದ ಚಾಲಕರನ್ನು ನೇಮಿಸಿದ್ದೇ ಆದಲ್ಲಿ ಸಂಬಂಧಿತ ಸಂಸ್ಥೆಗಳು 20,000 ದಿರಮ್ಸ್ ತನಕ ದಂಡ ಪಾವತಿಸಬೇಕಾಗುವುದು.

ಈತನ್ಮಧ್ಯೆ ತಮ್ಮ ಸ್ನೇಹಿತರು ಯಾ ಸಂಬಂಧಿಗಳನ್ನು ವಿಮಾನ ನಿಲ್ದಾಣಕ್ಕೆ ಕರೆದೊಯ್ಯುವ ಯಾ ಅಲ್ಲಿಂದ ನಗರಕ್ಕೆ ಹೋಗುವ ವಾಹನಿಗರನ್ನು ಆರ್ ಟಿ ಎ ಅಧಿಕಾರಿಗಳು ತನಿಖೆ ನಡಸುತ್ತಿದ್ದು, ಕೆಲ ಸಂದರ್ಭಗಳಲ್ಲಿ ಕಾರುಗಳ ಚಾಲಕರು ಹಾಗೂ ಅದರಲ್ಲಿ ಪ್ರಯಾಣಿಸುವವರ ಸಂಬಂಧಗಳನ್ನು ಸಾಬೀತುಪಡಿಸಲು ಪುರಾವೆಗಳನ್ನು ಕೇಳಲಾಗುತ್ತಿದೆ ಎಂದು ಕೆಲವರು ದೂರಿದ್ದಾರೆ. ಆದರೆ ಸಂಬಂಧಗಳ ಪುರಾವೆಯನ್ನು ಕೊನೆಯ ಕ್ರಮವಾಗಿ ಕೇಳಲಾಗುತ್ತದೆ, ಎಂದು ಆರ್ ಟಿ ಎ ಇದರ ಸಾರ್ವಜನಿಕ ಸಾರಿಗೆ ಏಜನ್ಸಿ ಸಿಇಒ ಅಬ್ದುಲ್ಲಾ ಯೂಸುಫ್ ಅಲ್ ಅಲಿ ಹೇಳಿದ್ದಾರೆ.
ಅದೇ ಸಮಯ ತನ್ನ ಮೇಲೆ ತಪ್ಪಾಗಿ ದಂಡ ವಿಧಿಸಲಾಗಿದೆ ಎಂದು ಯಾವುದೇ ನಾಗರಿಕ ತಿಳಿದುಕೊಂಡಲ್ಲಿ ಅಂತಹವರು ತಮ್ಮ ದೂರನ್ನು ಆರ್ ಟಿ ಎಗೆ ಸಂಖ್ಯೆ 8009090 ಗೆ ಕರೆ ಮಾಡುವ ಮೂಲಕ ದಾಖಲಿಸಬಹುದು ಎಂದು ಅವರು ವಿವರಿಸಿದ್ದಾರೆ.
ದುಬೈ ನಿಂದ ಬೇರೆ ಯಾವುದೇ ಎಮಿರೇಟ್ ದೇಶಕ್ಕೆ ಪ್ರಯಾಣಿಸುವಲ್ಲಿ ಅಗತ್ಯ ಪರವಾನಿಗೆ ಹೊಂದದೇ ಇದ್ದ ಹೊರತಾಗಿಯೂ ಅಲ್ಲಿಗೆ ಪ್ರಯಾಣಿಸುವವಾಹನಗಳಿಗೂ 20,000 ದಿರಮ್ಸ್ ತನಕ ದಂಡ ವಿಧಿಸಲಾಗುವುದು.
ಸಾರ್ವಜನಿಕ ಸಾರಿಗೆ ಕ್ಷೇತ್ರವನ್ನು ಪುನರ್ ಸಂಘಟಿಸಿ ದುಬೈ ರಾಜಕುಮಾರ್ ಶೈಖ್ ಹಮ್ ದನ್ ಬಿನ್ ಮುಹಮ್ಮದ್ ಬಿನ್ ರಶೀದ್ ಅಲ್ ಮಖ್ತೌಮ್ ಕೆಲ ಸಮಯದ ಹಿಂದೆ ಆದೇಶ ನೀಡಿದ್ದನ್ನು ಇಲ್ಲಿ ಸ್ಮರಿಸಬಹುದಾಗಿದೆ.