ಜೊಕೊವಿಕ್‌ಗೆ ಶಾಕ್ ನೀಡಿದ ವಾವ್ರಿಂಕ ಚಾಂಪಿಯನ್

ನ್ಯೂಯಾರ್ಕ್,ಸೆ.12: ವಿಶ್ವದ ನಂ.1 ಆಟಗಾರ ನೊವಾಕ್ ಜೊಕೊವಿಕ್‌ರನ್ನು ಮಣಿಸಿದ ಸ್ವಿಸ್ ಸ್ಟಾರ್ ಸ್ಟಾನ್ ವಾವ್ರಿಂಕ ಯುಎಸ್ ಓಪನ್‌ನ ಪುರುಷರ ಸಿಂಗಲ್ಸ್ ಚಾಂಪಿಯನ್ ಆಗಿ ಹೊರಹೊಮ್ಮಿದರು. 31ರ ಪ್ರಾಯದ ವಾವ್ರಿಂಕ ಯುಎಸ್ ಓಪನ್‌ನಲ್ಲಿ 46 ವರ್ಷಗಳ ಬಳಿಕ ಪುರುಷರ ಚಾಂಪಿಯನ್‌ಶಿಪ್ ಪ್ರಶಸ್ತಿ ಜಯಿಸಿದ ಮೊದಲ ಹಿರಿಯ ಆಟಗಾರನೆಂಬ ಕೀರ್ತಿಗೂ ಭಾಜನರಾದರು.

ರವಿವಾರ ರಾತ್ರಿ ಇಲ್ಲಿ ನಾಲ್ಕು ಗಂಟೆಗಳ ಕಾಲ ನಡೆದ ಪ್ರಶಸ್ತಿ ಸುತ್ತಿನ ಪಂದ್ಯದಲ್ಲಿ ವಾವ್ರಿಂಕ ಅವರು ಸರ್ಬಿಯದ ಆಟಗಾರ ಜೊಕೊವಿಕ್‌ರನ್ನು 6-7(1/7), 6-4, 7-5, 6-3 ಸೆಟ್‌ಗಳ ಅಂತರದಿಂದ ಮಣಿಸಿ ಮೂರನೆ ಗ್ರಾನ್‌ಸ್ಲಾಮ್ ಪ್ರಶಸ್ತಿಯನ್ನು ಎತ್ತಿ ಹಿಡಿದರು.

ವಾವ್ರಿಂಕ ಯುಎಸ್ ಓಪನ್ ಜಯಿಸಿದ ಹಿರಿಯ ಆಟಗಾರನಾಗಿದ್ದಾರೆ. 1970ರಲ್ಲಿ ಕೆನ್ ರಾಸ್‌ವಾಲ್ ತನ್ನ 35ರ ಹರೆಯದಲ್ಲಿ ಯುಎಸ್ ಓಪನ್ ಪ್ರಶಸ್ತಿಯನ್ನು ಗೆದ್ದ ಹಿರಿಯ ಆಟಗಾರನಾಗಿದ್ದರು.

  ವಾವ್ರಿಂಕಗೆ ಇದು ಚೊಚ್ಚಲ ಯುಎಸ್ ಓಪನ್ ಪ್ರಶಸ್ತಿಯಾಗಿದೆ. ಅವರು 2014ರಲ್ಲಿ ಆಸ್ಟ್ರೇಲಿಯನ್ ಓಪನ್ ಹಾಗೂ 2015ರಲ್ಲಿ ಫ್ರೆಂಚ್ ಓಪನ್ ಪ್ರಶಸ್ತಿಯನ್ನು ಗೆದ್ದುಕೊಂಡಿದ್ದರು. 2015ರ ಫ್ರೆಂಚ್ ಓಪನ್ ಫೈನಲ್‌ನಲ್ಲಿ ಜೊಕೊವಿಕ್‌ರನ್ನು ಮಣಿಸಿ ಪ್ರಶಸ್ತಿ ಜಯಿಸಿದ್ದ ವಾವ್ರಿಂಕ ಇದೀಗ ಎರಡನೆ ಬಾರಿ ಅಗ್ರ ರ್ಯಾಂಕಿನ ಆಟಗಾರನನ್ನು ಮಣಿಸಿ ಪ್ರಶಸ್ತಿ ಎತ್ತಿಹಿಡಿದಿದ್ದಾರೆ.

ಯುಎಸ್ ಓಪನ್‌ನಲ್ಲಿ 2011 ಹಾಗೂ 2015ರಲ್ಲಿ ಚಾಂಪಿಯನ್ ಆಗಿದ್ದ ಜೊಕೊವಿಕ್ ಈ ವರ್ಷ ಮೂರನೆ ಪ್ರಶಸ್ತಿಯ ನಿರೀಕ್ಷೆಯಲ್ಲಿದ್ದರು. 29ರ ಪ್ರಾಯದ ಜೊಕೊವಿಕ್ ನ್ಯೂಯಾರ್ಕ್‌ನಲ್ಲಿ ನಾಲ್ಕನೆ ಬಾರಿ ರನ್ನರ್-ಅಪ್ ಪ್ರಶಸ್ತಿಗೆ ತೃಪ್ತಿಪಟ್ಟುಕೊಂಡಿದ್ದಾರೆ.

ಪ್ರತಿಷ್ಠಿತ ಗ್ರಾನ್‌ಸ್ಲಾಮ್ ಟೂರ್ನಿಯಲ್ಲಿ 21ನೆ ಬಾರಿ ಫೈನಲ್ ಪಂದ್ಯ ಆಡಿದ ಜೊಕೊವಿಕ್ ಸೋತ ನಿರಾಸೆಯಲ್ಲಿ ತನ್ನ ರ್ಯಾಕೆಟ್‌ನ್ನು ಹಾನಿಗೊಳಿಸಿದರು.