ಅಗ್ರಿಗೋಲ್ಡ್ ಬಹುಕೋಟಿ ಹಗರಣ: ಅ.5ರವರೆಗೆ ನಾಲ್ವರು ಆರೋಪಿಗಳು ಸಿಐಡಿ ಕಸ್ಟಡಿಗೆ

ಉಡುಪಿ, ಅ.1: ಅಗ್ರಿಗೋಲ್ಡ್ ಅಂತರ್‌ರಾಜ್ಯ ಬಹುಕೋಟಿ ಹಗರಣದ ನಾಲ್ವರು ಆರೋಪಿಗಳನ್ನು ಉಡುಪಿ ಜಿಲ್ಲಾ ಮತ್ತು ಸತ್ರ ನ್ಯಾಯಾಲಯವು ಅ.5ರವರೆಗೆ ಸಿಐಡಿ ಪೊಲೀಸ್ ಕಸ್ಟಡಿಗೆ ಒಪ್ಪಿಸಿ ಇಂದು ಆದೇಶ ನೀಡಿದೆ.

ಪ್ರಕರಣದ ಒಟ್ಟು 23 ಆರೋಪಿಗಳ ಪೈಕಿ 2ನೆ ಆರೋಪಿ ಅಗ್ರಿ ಗೋಲ್ಡ್ ಕಂಪೆನಿಯ ಚೇರ್‌ಮ್ಯಾನ್ ವಿಜಯವಾಡದ ಅವ್ವಾ ವೆಂಕಟರಾಮರಾವ್ (58), 3ನೆ ಆರೋಪಿ ಆಡಳಿತ ನಿರ್ದೇಶಕ ಅವ್ವಾ ವೆಂಕಟ ಶೇಷು ನಾರಾ ಯಣ ರಾವ್ ಯಾನೆ ಕುಮಾರ್(49), 7ನೆ ಆರೋಪಿ ನಿರ್ದೇಶಕ ಇಮ್ಮಡಿ ಸದಾಶಿವ ವರಪ್ರಸಾದ್ ರಾವ್(67), 19ನೆ ಆರೋಪಿ ಆಡಳಿತ ನಿರ್ದೇಶಕ ಕಾಮಿರೆಡ್ಡಿ ರಾಮಚಂದ್ರರಾವ್(55) ಎಂಬವರನ್ನು ಸಿಐಡಿ ಪೊಲೀಸರು ವಶಕ್ಕೆ ಪಡೆದುಕೊಂಡಿದ್ದಾರೆ.

ಪ್ರಥಮ ದೂರು ದಾಖಲು:

ಮಣಿಪಾಲ ಸರಳೇಬೆಟ್ಟುವಿನ ಕೃಷ್ಣ ನಾಯ್ಕ ಎಂಬವರು ಅಗ್ರಿಗೋಲ್ಡ್ ಕಂಪೆನಿಯಲ್ಲಿ ಹೂಡಿದ ಹಣ ಅವಧಿ ಮುಗಿದರೂ ವಾಪಾಸು ನೀಡದೆ ವಂಚಿಸಿರುವುದಾಗಿ ಕಂಪೆನಿಯ ಉಡುಪಿ ನಿರ್ದೇಶಕ ಪ್ರಕಾಶ್ ಕೆ.ದೇವಾಡಿಗ ಹಾಗೂ ಕಂಪೆನಿ ವಿರುದ್ಧ 2015ರ ಜ.10ರಂದು ಉಡುಪಿ ನಗರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಿಸಿ ದ್ದರು. ಇದು ಕರ್ನಾಟಕದಲ್ಲಿ ಅಗ್ರಿಗೋಲ್ಡ್ ವಂಚನೆ ವಿರುದ್ಧ ದಾಖಲಾದ ಪ್ರಥಮ ಪ್ರಕರಣವಾಗಿದೆ.

ಬಹುಕೋಟಿ ಈ ಪ್ರಕರಣವನ್ನು ರಾಜ್ಯ ಸರಕಾರ 2015ರ ಜು.24ರಂದು ಸಿಐಡಿ ತನಿಖೆಗೆ ವಹಿಸಿತ್ತು. ಡಿ.12ರಿಂದ ಪ್ರಕರಣದ ತನಿಖಾಧಿಕಾರಿ ಯಾಗಿರುವ ಸಿಐಡಿ ಡಿವೈಎಸ್ಪಿ ನಂಜುಡೇಗೌಡ ನೇತೃತ್ವದಲ್ಲಿ ತನಿಖೆ ಆರಂಭಿಸಲಾಗಿತ್ತು. ಆಂದ್ರಪ್ರದೇಶದಲ್ಲಿ ನೋಂದಾಣಿಯಾಗಿರುವ ಅಗ್ರಿ ಗೋಲ್ಡ್ ಸಂಸ್ಥೆಯು ವಿಜಯವಾಡದಲ್ಲಿ ಪ್ರಧಾನ ಕಚೇರಿಯನ್ನು ಹೊಂದಿದೆ.

ಆರೋಪಿಗಳು ಕರ್ನಾಟಕದಲ್ಲಿ 56 ಶಾಖೆಗಳನ್ನು ತೆರೆದು ಸಿಬ್ಬಂದಿ, ಏಜೆಂಟರನ್ನು ನೇಮಕ ಮಾಡಿ ಹಣ ದ್ವಿಗುಣ, ಹೆಚ್ಚಿನ ಬಡ್ಡಿ, ಸೈಟುಗಳನ್ನು ಕೊಡಿಸುವುದಾಗಿ ಆಸೆ ಆಮಿಷಗಳನ್ನು ತೋರಿಸಿ ಕರ್ನಾಟಕ ರಾಜ್ಯದ 8,41,616 ಮಂದಿ ಹೂಡಿಕೆದಾರರಿಂದ 1639,63,45,230ರೂ. ಹಣ ಸಂಗ್ರಹಿಸಿ ವಂಚಿಸಲಾಗಿದೆ ಎಂದು ದೂರಲಾಗಿದೆ. ಆರೋಪಿಗಳ ವಿರುದ್ಧ ಆಂಧ್ರಪ್ರದೇಶದಲ್ಲಿ 5 ಪ್ರಕರಣಗಳು, ತೆಲಂಗಾಣ ದಲ್ಲಿ ಎರಡು ಪ್ರಕರಣಗಳು ದಾಖಲಾಗಿ ಸಿಐಡಿ ತನಿಖೆ ನಡೆಸಲಾಗುತ್ತಿದೆ. ಪ್ರಕರಣಕ್ಕೆ ಸಂಬಂದಿಸಿ ಕರ್ನಾಟಕ ಸಿಐಡಿ ತಂಡ ಈಗಾಗಲೇ ಕರ್ನಾಟಕದಲ್ಲಿ ಹಣ ಹೂಡಿಕೆ ಮಾಡಿರುವ ಸುಮಾರು 80 ಜನರ ಹೇಳಿಕೆಗಳನ್ನು ಪಡೆದಿತ್ತು.

ಒಂದೆ ಪ್ರಕರಣದಡಿ ತನಿಖೆ:

2016ರ ಎ.5ರಂದು ರಾಜ್ಯ ಹೈಕೋರ್ಟ್ ಈ ಸಂಬಂಧ ರಾಜ್ಯದ ವಿವಿಧ ಕಡೆ ದಾಖಲಾಗಿರುವ ಪ್ರಕರಣಗಳನ್ನು ರದ್ದು ಮಾಡಿ ಪ್ರಥಮವಾಗಿ ದಾಖಲಾಗಿರುವ ಉಡುಪಿ ನಗರ ಪೊಲೀಸ್ ಠಾಣೆಯ ಒಂದೇ ಪ್ರಕರಣದಲ್ಲಿ ತನಿಖೆಯನ್ನು ನಿರ್ವಹಿಸಿ, ರದ್ದು ಮಾಡಿರುವ ಮತ್ತು ಇತರೆ ಪ್ರಕರಣಗಳ ದೂರುದಾರರಿಂದ ಹೇಳಿಕೆಗಳನ್ನು ಪಡೆದುಕೊಳ್ಳುವಂತೆ ಆದೇಶ ನೀಡಿತ್ತು.

ಅದರಂತೆ ಸಿಐಡಿ ಎಲ್ಲ ಅಗ್ರಿ ಗೋಲ್ಡ್ ಪ್ರಕರಣಗಳ ತನಿಖೆಯನ್ನು ಕೈಬಿಟ್ಟು ಉಡುಪಿ ನಗರ ಪೊಲೀಸ್ ಠಾಣೆಯಲ್ಲಿನ ಒಂದೇ ಪ್ರಕರಣದಲ್ಲಿ ತನಿಖೆ ಯನ್ನು ನಡೆಸಲು ಆರಂಭಿಸಿತು. ಈ ಹಿನ್ನೆಲೆಯಲ್ಲಿ ನ್ಯಾಯಾಲಯ ಆರೋಪಿ ಗಳ ವಿರುದ್ಧ ಹೊರಡಿಸಿದ ಬಾಡಿ ವಾರೆಂಟ್ ಆದೇಶದಂತೆ ಸಿಐಡಿ ತನಿಖಾಧಿಕಾರಿ ನಂಜುಂಡೇಗೌಡ ನೇತೃತ್ವದ ಆರು ಪೊಲೀಸರ ತಂಡ ಆಂಧ್ರ ಪ್ರದೇಶದ ಪಶ್ಚಿಮಗೋದಾವರಿ ಜಿಲ್ಲೆಯ ಏಲೂರು ಜಿಲ್ಲಾ ಕಾರಾಗೃಹದಲ್ಲಿದ್ದ ಈ ನಾಲ್ವರು ಆರೋಪಿಗಳನ್ನು ಕರೆತಂದು ಇಂದು ಉಡುಪಿ ಜಿಲ್ಲಾ ಸತ್ರ ನ್ಯಾಯಾಲಯದ ಮುಂದೆ ಹಾಜರುಪಡಿಸಿತು.

ಆರೋಪಿಗಳನ್ನು ವಿಚಾರಣೆಗೆ ಒಳಪಡಿಸಲು ಏಳು ದಿನಗಳ ಕಾಲ ಪೊಲೀಸ್ ಕಸ್ಟಡಿಗೆ ನೀಡುವಂತೆ ಸಿಐಡಿ ತನಿಖಾಧಿಕಾರಿ ಜಿಲ್ಲಾ ಸರಕಾರಿ ಅಭಿಯೋಜಕಿ ಶಾಂತಿಬಾಯಿ ಮೂಲಕ ನ್ಯಾಯಾಲಯಕ್ಕೆ ಮನವಿ ಮಾಡಿ ದರು. ಇದಕ್ಕೆ ಆರೋಪಿಗಳ ಪರ ವಕೀಲರಾದ ಕರ್ನಾಟಕ ಹೈಕೋರ್ಟ್ ನ್ಯಾಯವಾದಿ ದಿವಾಕರ್ ಹಾಗೂ ಆಂಧ್ರಪ್ರದೇಶದ ಹೈಕೋರ್ಟ್ ನ್ಯಾಯ ವಾದಿ ಜಾನಕಿ ರಾವ್ ವಾದ ಮಂಡಿಸಿದರು. ವಾದ ಪ್ರತಿವಾದವನ್ನು ಆಲಿಸಿದ ನ್ಯಾಯಾಧೀಶ ಶಿವಶಂಕರ್ ಅಮರಣ್ಣನವರ್ ನಾಲ್ವರು ಆರೋಪಿಗಳನ್ನು ಅ.5ರವರೆಗೆ ಪೊಲೀಸ್ ಕಸ್ಟಡಿಗೆ ಒಪ್ಪಿಸಿ ಆದೇಶ ನೀಡಿದರು.

ಪ್ರಕರಣದ 20ನೆ ಆರೋಪಿ ಆಡಳಿತ ನಿರ್ದೇಶಕ ಪಥನ್‌ಲಾಲ್ ಅಹ್ಮದ್ ಖಾನ್(48) ಎಂಬಾತನ ವಿರುದ್ದವೂ ನ್ಯಾಯಾಲಯ ಬಾಡಿ ವಾರೆಂಟ್ ಹೊರಡಿಸಿತ್ತು. ಆದರೆ ಆರೋಪಿಯ ತಂದೆ ಚಿಂತಾಜನಕ ಸ್ಥಿತಿಯಲ್ಲಿ ಆಸ್ಪತ್ರೆ ಯಲ್ಲಿ ದಾಖಲಾಗಿರುವುದರಿಂದ ಆಂಧ್ರಪ್ರದೇಶ ಏಲೂರು ನ್ಯಾಯಾಲಯ ಈತನಿಗೆ ನಾಲ್ಕು ದಿನಗಳ ರಜೆ ನೀಡಿದೆ. ಆ ಕಾರಣದಿಂದ ಅಹ್ಮದ್ ಖಾನ್ ನನ್ನು ಇಂದು ನ್ಯಾಯಾಲಯಕ್ಕೆ ಹಾಜರುಪಡಿಸಿರಲಿಲ್ಲ.

ಆರೋಪಿಗಳನ್ನು ನ್ಯಾಯಾಲಯಕ್ಕೆ ಕರೆ ತರುವ ಮಾಹಿತಿ ಪಡೆದ ಮಂಗಳೂರು, ಭಟ್ಕಳ, ಉಡುಪಿಯ ಕೆಲ ಏಜೆಂಟರು ಕೋರ್ಟ್‌ನಲ್ಲಿ ಜಮಾಯಿಸಿದ್ದರು. ಈ ಹಿನ್ನೆಲೆಯಲ್ಲಿ ಕೋರ್ಟ್ ಆವರಣದಲ್ಲಿ ಬಿಗಿ ಪೊಲೀಸ್ ಬಂದೋಬಸ್ತ್ ಒದಗಿಸಲಾಗಿತ್ತು.