ಎರಡನೆ ಟೆಸ್ಟ್ ; ಭಾರತಕ್ಕೆ ನ್ಯೂಝಿಲೆಂಡ್ ವಿರುದ್ಧ 339 ರನ್ಗಳ ಮುನ್ನಡೆ
ಕುತೂಹಲ ಕೆರಳಿಸಿರುವ ನ್ಯೂಝಿಲೆಂಡ್ ವಿರುದ್ಧದ ಎರಡನೆ ಟೆಸ್ಟ್
ಕೋಲ್ಕತಾ, ಅ.2: ಇಲ್ಲಿ ನಡೆಯುತ್ತಿರುವ ನ್ಯೂಝಿಲೆಂಡ್ ವಿರುದ್ಧದ ಎರಡನೆ ಕ್ರಿಕೆಟ್ ಟೆಸ್ಟ್ನಲ್ಲಿ ಭಾರತ ಎರಡನೆ ಇನಿಂಗ್ಸ್ನಲ್ಲಿ ನ್ಯೂಝಿಲೆಂಡ್ನ ದಾಳಿಗೆ ತತ್ತರಿಸಿದರೂ, 339 ರನ್ಗಳ ಮುನ್ನಡೆ ಸಾಧಿಸಿದೆ.
ಈಡನ್ ಗಾರ್ಡನ್ಸ್ನಲ್ಲಿ ನಡೆಯುತ್ತಿರುವ ಎರಡನೆ ಕ್ರಿಕೆಟ್ ಟೆಸ್ಟ್ನ ಮೂರನೆ ದಿನವಾಗಿರುವ ಇಂದು ದಿನದಾಟದಂತ್ಯಕ್ಕೆ ಭಾರತ ಎರಡನೆ ಇನಿಂಗ್ಸ್ನಲ್ಲಿ 63.2 ಓವರ್ಗಳಲ್ಲಿ 8 ವಿಕೆಟ್ ನಷ್ಟದಲ್ಲಿ 227 ರನ್ ಗಳಿಸಿದೆ. ಎರಡನೆ ಗೆಲುವಿನತ್ತ ನೋಡುತ್ತಿದೆ. ಭಾರತಕ್ಕೆ ಈ ಟೆಸ್ಟ್ನಲ್ಲಿ ಜಯಿಸಿದರೆ ಐಸಿಸಿ ಟೆಸ್ಟ್ ರ್ಯಾಂಕಿಂಗ್ನಲ್ಲಿ ನಂ.1 ಸ್ಥಾನ ಪಡೆಯಲು ಅವಕಾಶ ಇದೆ.
ಆಟ ನಿಂತಾಗ 39 ರನ್ ಗಳಿಸಿರುವ ವಿಕೆಟ್ ಕೀಪರ್ ವೃದ್ಧಿಮಾನ್ ಸಹಾ ಮತ್ತು 8 ರನ್ ಗಳಿಸಿರುವ ಭುವನೇಶ್ವರ ಕುಮಾರ್ ಔಟಾಗದೆ ಕ್ರೀಸ್ನಲ್ಲಿದ್ದರು.
ಎರಡನೆ ಇನಿಂಗ್ಸ್ನಲ್ಲಿ ಭಾರತ 106 ರನ್ಗಳಿಗೆ 6 ವಿಕೆಟ್ ಕಳೆದುಕೊಂಡಿದ್ದರೂ ರೋಹಿತ್ ಶರ್ಮ ಮತ್ತು ವೃದ್ಧಿಮಾನ್ ಸಹಾ ಏಳನೆ ವಿಕೆಟ್ಗೆ ದಾಖಲಿಸಿದ 103 ರನ್ಗಳ ಜೊತೆಯಾಟದ ನೆರವಿನಲ್ಲಿ ಚೇತರಿಸಿಕೊಂಡಿತು.
ರೋಹಿತ್ ಶರ್ಮ 132 ಎಸೆತಗಳನ್ನು ಎದುರಿಸಿ 9 ಬೌಂಡರಿ ಮತ್ತು 2 ಸಿಕ್ಸರ್ ಸಹಾಯದಿಂದ 82 ರನ್ ಗಳಿಸಿದರು.
ನ್ಯೂಝಿಲೆಂಡ್ನ ದಾಳಿಗೆ ಸಿಲುಕಿದ ಭಾರತಕ್ಕೆ ಎರಡನೆ ಇನಿಂಗ್ಸ್ನಲ್ಲಿ ದೊಡ್ಡ ಮೊತ್ತದ ಸವಾಲು ದಾಖಲಿಸಲು ಸಾಧ್ಯವಾಗಿಲ್ಲ. ನಾಯಕ ವಿರಾಟ್ ಕೊಹ್ಲಿ 45ರನ್, ರೋಹಿತ್ ಶರ್ಮ 82 ರನ್ ಅವರ ಬ್ಯಾಟಿಂಗ್ ನೆರವಿನಲ್ಲಿ ಸ್ಪರ್ಧಾತ್ಮಕ ಮೊತ್ತ ದಾಖಲಿಸಿತು.
ನ್ಯೂಝಿಲೆಂಡ್ನ ಹೆನ್ರಿ (44ಕ್ಕೆ 3) ಸ್ಯಾಂಟ್ನೆರ್ (51ಕ್ಕೆ 3), ಟ್ರೆಂಟ್ ಬೌಲ್ಟ್ (28ಕ್ಕೆ 2) ದಾಳಿಗೆ ತತ್ತರಿಸಿದ ಭಾರತ ಆರಂಭಿಕ ಕುಸಿತ ಎದುರಿಸಿತ್ತು. ಭಾರತದ ಅಗ್ರ ಸರದಿಯ ದಾಂಡಿಗರು ಬೇಗನೆ ಔಟಾಗಿ ಪೆವಿಲಿಯನ್ ಸೇರಿದಾಗ ನಾಯಕ ವಿರಾಟ್ ಕೊಹ್ಲಿ ಹೋರಾಟ ನಡೆಸಿ 45 ರನ್ಗಳ ಕೊಡುಗೆ ನೀಡಿದರು. ಕಳೆದ ಮೂರು ಇನಿಂಗ್ಸ್ಗಳಲ್ಲಿ ವಿಫಲವಾಗಿದ್ದ ಕೊಹ್ಲಿ ಅರ್ಧಶತಕ ದಾಖಲಿಸುವಲ್ಲಿ ಎಡವಿದ್ದರೂ ತಂಡವನ್ನು ಸಂಕಷ್ಟದಿಂದ ಪಾರು ಮಾಡಲು ಪ್ರಯತ್ನ ನಡೆಸಿದರು.
ಆರಂಭಿಕ ದಾಂಡಿಗ ಮುರಳಿ ವಿಜಯ್ (7) ಅವರು 5.4ನೆ ಓವರ್ನಲ್ಲಿ ಹೆನ್ರಿ ಎಸೆತದಲ್ಲಿ ಗಪ್ಟಿಲ್ಗೆ ಕ್ಯಾಚ್ ನೀಡಿದಾಗ ಭಾರತದ ಸ್ಕೋರ್ 12 ಆಗಿತ್ತು. ಅವರೊಂದಿಗೆ ಇನಿಂಗ್ಸ್ ಆರಂಭಿಸಿದ್ದ ಶಿಖರ್ ಧವನ್ 32 ಎಸೆತಗಳಲ್ಲಿ 4 ಬೌಂಡರಿಗಳ ನೆರವಿನಿಂದ 17 ರನ್ ಗಳಿಸಿ ಕ್ರೀಸ್ನಲ್ಲಿ ತಳವೂರುವ ಸೂಚನೆ ನೀಡಿದ್ದರೂ, ಅವರಿಗೆ ಬೌಲ್ಟ್ ಅವಕಾಶ ನೀಡದೆ ಎಲ್ಬಿಡಬ್ಲು ಬಲೆಗೆ ಬೀಳಿಸಿದರು. ಚೇತೇಶ್ವರ ಪೂಜಾರ ಮೊದಲ ಇನಿಂಗ್ಸ್ನಲ್ಲಿ 87 ರನ್ಗಳ ಅಮೂಲ್ಯ ಕೊಡುಗೆ ನೀಡಿದ್ದರು. ಆದರೆ ಎರಡನೆ ಇನಿಂಗ್ಸ್ನಲ್ಲಿ (4) ಬೇಗನೆ ಪೆವಿಲಿಯನ್ ಸೇರಿದರು. ಹೆನ್ರಿ ಅವರು ಪೂಜಾರಗೆ ಪೆವಿಲಿಯನ್ ಹಾದಿ ತೋರಿಸಿದರು. ಅಜಿಂಕ್ಯ ರಹಾನೆ(1) ನಿರ್ಗಮನದೊಂದಿಗೆ ಭಾರತ 13.1 ಓವರ್ಗಳಲ್ಲಿ 4 ವಿಕೆಟ್ ನಷ್ಟದಲ್ಲಿ 43 ರನ್ ಗಳಿಸಿ ಒತ್ತಡಕ್ಕೆ ಸಿಲುಕಿತು. ಈ ಹಂತದಲ್ಲಿ ವಿರಾಟ್ ಕೊಹ್ಲಿಗೆ ರೋಹಿತ್ ಶರ್ಮ ಹೋರಾಟ ನಡೆಸಲು ಸಾಥ್ ನೀಡಿದರು. ಇವರ ಜೊತೆಯಾಟದಲ್ಲಿ 48 ರನ್ ತಂಡದ ಖಾತೆಗೆ ಸೇರ್ಪಡೆಗೊಂಡಿತು. ಆದರೆ ತಂಡದ ಸ್ಕೋರ್ 100ರ ಗಡಿ ದಾಟಲಿಲ್ಲ. 24ನೆ ಓವರ್ನ ಕೊನೆಯ ಎಸೆತದಲ್ಲಿ ವಿರಾಟ್ ಕೊಹ್ಲಿ ಅವರನ್ನು ಬೌಲ್ಟ್ ಎಲ್ಬಿಡಬ್ಲು ಬಲೆಗೆ ಬೀಳಿಸಿದರು. ಕೊಹ್ಲಿ 65 ಎಸೆತಗಳನ್ನು ಎದುರಿಸಿ 7 ಬೌಂಡರಿಗಳ ಸಹಾಯದಿಂದ 45 ರನ್ ಗಳಿಸಿದರು. ಭಾರತ 106/6:ಕೊಹ್ಲಿ ನಿರ್ಗಮನದ ಬಳಿಕ ರವಿಚಂದ್ರನ್ ಅಶ್ವಿನ್(5) ಕ್ರೀಸ್ಗೆ ಆಗಮಿಸಿದ್ದರೂ, ಅವರು ಹೆಚ್ಚು ಹೊತ್ತು ಕ್ರೀಸ್ನಲ್ಲಿ ನಿಲ್ಲಲಿಲ್ಲ. 30.3 ಓವರ್ಗಳಲ್ಲಿ 106 ರನ್ಗಳಿಗೆ 6 ವಿಕೆಟ್ ಕಳೆದುಕೊಂಡಿದ್ದ ಭಾರತ ಕ್ರಿಕೆಟ್ ತಂಡದ ಬ್ಯಾಟಿಂಗ್ನ್ನು ಮುನ್ನಡೆಸಲು ವೃದ್ಧಿಮಾನ್ ಸಹಾ ಕ್ರೀಸ್ಗೆ ಆಗಮಿಸಿದರು. ಇವರು ನ್ಯೂಝಿಲೆಂಡ್ ಬೌಲರ್ಗಳ ಬೆವರಿಳಿಸಿದರು. 103 ರನ್ಗಳ ಜೊತೆಯಾಟದಲ್ಲಿ ತಂಡದ ಸ್ಕೋರ್ 200ರ ಗಡಿ ದಾಟಿತು.
ರೋಹಿತ್ ಶರ್ಮ ಅವರಿಗೆ ಈಡನ್ ಗಾರ್ಡನ್ಸ್ ನೆಚ್ಚಿನ ತಾಣ. ಇದೇ ಕ್ರೀಡಾಂಗಣದಲ್ಲಿ ಅವರು ಚೊಚ್ಚಲ ಟೆಸ್ಟ್ನಲ್ಲಿ ಚೊಚ್ಚಲ ಶತಕ ದಾಖಲಿಸಿದ್ದರು. ಏಕದಿನ ಕ್ರಿಕೆಟ್ನಲ್ಲಿ ವಿಶ್ವದಾಖಲೆಯ 264 ರನ್ಗಳ ದಾಖಲೆಯನ್ನು ಅವರು ಇದೇ ಕ್ರೀಡಾಂಗಣದಲ್ಲಿ ನಿರ್ಮಿಸಿದ್ದರು. ಅವರ ನಾಯಕತ್ವದ ಮುಂಬೈ ತಂಡ ಎರಡು ಬಾರಿ ಐಪಿಎಲ್ ಕಿರೀಟ ಕೋಲ್ಕತಾದ ಈಡನ್ ಗಾರ್ಡನ್ಸ್ನಲ್ಲಿ ಧರಿಸಿತ್ತು.ರಣಜಿಯಲ್ಲೂ ರೋಹಿತ್ ದ್ವಿಶತಕದ ಸಾಧನೆ ಮಾಡಿದ್ದರು. ಈ ಕಾರಣದಿಂದಾಗಿ ರೋಹಿತ್ ಕಠಿಣ ಪರಿಸ್ಥಿತಿಯಲ್ಲೂ ಮತ್ತೊಮ್ಮೆ ಶತಕ ದಾಖಲಿಸುವ ನಿಟ್ಟಿನಲ್ಲಿ ಪ್ರಯತ್ನ ನಡೆಸಿದರು.
20ನೆ ಟೆಸ್ಟ್ ಆಡುತ್ತಿರುವ ರೋಹಿತ್ 6ನೆ ಅರ್ಧಶತಕ ದಾಖಲಿಸಿದರು.89 ಎಸೆತಗಳಲ್ಲಿ 4 ಬೌಂಡರಿ ಮತ್ತು 2 ಸಿಕ್ಸರ್ ಸಹಾಯದಿಂದ ಅರ್ಧಶತಕ ಪೂರ್ಣಗೊಳಿಸಿದರು.ಆದರೆ ಶತಕ ದಾಖಲಿಸುವ ಪ್ರಯತ್ನ ವಿಫಲಗೊಂಡಿತು. 132 ಎಸೆತಗಳನ್ನು ಎದುರಿಸಿದ ಅವರು 9 ಬೌಂಡರಿ ಮತ್ತು 2 ಸಿಕ್ಸರ್ ಸಹಾಯದಿಂದ 82 ರನ್ ಗಳಿಸಿದರು.60.2ನೆ ಓವರ್ನಲ್ಲಿ ರೋಹಿತ್ ಶರ್ಮ ಅವರು ಸ್ಯಾಂಟ್ನೆರ್ ಎಸೆತದಲ್ಲಿ ರೊಂಚಿಗೆ ಕ್ಯಾಚ್ ನೀಡಿದರು. ಇದರೊಂದಿಗೆ ಭಾರತ ಮಹತ್ವದ ವಿಕೆಟ್ ಕಳೆದುಕೊಂಡಿತು. ಆಲ್ರೌಂಡರ್ ರವೀಂದ್ರ ಜಡೇಜ (6) ಹೆಚ್ಚು ಹೊತ್ತು ನಿಲ್ಲಲಿಲ್ಲ. ಭುವನೇಶ್ವರ ಕುಮಾರ್ ಕ್ರೀಸ್ಗೆ ಆಗಮಿಸಿ 10 ಎಸೆತಗಳನ್ನು ಎದುರಿಸಿದ್ದಾರೆ. 1 ಸಿಕ್ಸರ್ ಇರುವ 8 ರನ್ ಗಳಿಸಿ, ಸಹಾ ಜೊತೆಗೆ ಬ್ಯಾಟಿಂಗನ್ನು ನಾಲ್ಕನೆ ದಿನಕ್ಕೆ ಕಾಯ್ದಿರಿಸಿದ್ದಾರೆ.
ನ್ಯೂಝಿಲೆಂಡ್ 204: ನ್ಯೂಝಿಲೆಂಡ್ ಮೊದಲ ಇನಿಂಗ್ಸ್ನಲ್ಲಿ 53 ಓವರ್ಗಳಲ್ಲಿ 204 ರನ್ಗಳಿಗೆ ಆಲೌಟಾಗಿತ್ತು. ಇದರೊಂದಿಗೆ ಭಾರತ ಮೊದಲ ಇನಿಂಗ್ಸ್ನಲ್ಲಿ 112 ರನ್ಗಳ ಮುನ್ನಡೆ ಸಾಧಿಸಿತ್ತು. ಎರಡನೆ ದಿನದಾಟದ ಅಂತ್ಯಕ್ಕೆ 34 ಓವರ್ಗಳಲ್ಲಿ 7 ವಿಕೆಟ್ ನಷ್ಟದಲ್ಲಿ 128 ರನ್ ಗಳಿಸಿದ್ದ ನ್ಯೂಝಿಲೆಂಡ್ ಈ ಮೊತ್ತಕ್ಕೆ 19 ಓವರ್ಗಳಲ್ಲಿ 74 ರನ್ ಸೇರಿಸಿತು.
ದಿನದಾಟದಂತ್ಯಕ್ಕೆ 12 ರನ್ ಗಳಿಸಿ ಔಟಾಗದೆ ಕ್ರೀಸ್ನಲ್ಲಿದ್ದ ಬಿಜೆ ವಾಟ್ಲಿಂಗ್ ಮತ್ತು 5 ರನ್ ಗಳಿಸಿದ್ದ ಜೀತನ್ ಪಟೇಲ್ ಬ್ಯಾಟಿಂಗ್ ಮುಂದುವರಿಸಿ ಎಂಟನೆ ವಿಕೆಟ್ಗೆ 60 ರನ್ ಸೇರಿಸಿದರು. ಪಟೇಲ್ 47 ಎಸೆತಗಳಲ್ಲಿ 9 ಬೌಂಡರಿಗಳ ಸಹಾಯದಿಂದ 47 ರನ್ ಗಳಿಸಿದರು. ಅಶ್ವಿನ್ ಎಸೆತದಲ್ಲಿ ಶಮಿಗೆ ಕ್ಯಾಚ್ ನೀಡುವುದರೊಂದಿಗೆ ಅರ್ಧಶತಕ ವಂಚಿತಗೊಂಡರು. ವಾಟ್ಲಿಂಗ್(25) ಮತ್ತು ವ್ಯಾಗ್ನೆರ್ (10) ಅವರನ್ನು ಎಲ್ಬಿಡಬ್ಲು ಬಲೆಗೆ ಬೀಳಿಸಿದ ಮುಹಮ್ಮದ್ ಶಮಿ ನ್ಯೂಝಿಲೆಂಡ್ನ ಮೊದಲ ಇನಿಂಗ್ಸ್ ಮುಗಿಸಿದರು. ಟ್ರೆಂಟ್ ಬೌಲ್ಟ್ ಔಟಾಗದೆ 6 ರನ್ ಗಳಿಸಿದರು.
ಭಾರತದ ಭುವನೇಶ್ವರ ಕುಮಾರ್ 48ಕ್ಕೆ 5, ಶಮಿ 70ಕ್ಕೆ 3 , ಜಡೇಜ 40ಕ್ಕೆ 1 ಮತ್ತು ಅಶ್ವಿನ್ 33ಕ್ಕೆ 1 ವಿಕೆಟ್ ಪಡೆದರು.
,,,,,,,,,,,,,,,
ಸ್ಕೋರ್ ಪಟ್ಟಿ
ಭಾರತ ಮೊದಲ ಇನಿಂಗ್ಸ್ 104.5 ಓವರ್ಗಳಲ್ಲಿ ಆಲೌಟ್ 316
ನ್ಯೂಝಿಲೆಂಡ್ ಮೊದಲ ಇನಿಂಗ್ಸ್ 53 ಓವರ್ಗಳಲ್ಲಿ ಆಲೌಟ್ 204
ಗಪ್ಟಿಲ್ ಬಿ ಕುಮಾರ್13
ಲಥಾಮ್ ಎಲ್ಬಿಡಬ್ಲು ಬಿ ಶಮಿ01
ನಿಕೊಲಾಸ್ ಬಿ ಕುಮಾರ್01
ಟೇಲರ್ ಸಿ ವಿಜಯ್ ಬಿ ಕುಮಾರ್36
ರೊಂಚಿ ಎಲ್ಬಿಡಬ್ಲು ಬಿ ಜಡೇಜ35
ಸ್ಯಾಂಟ್ನೆರ್ ಎಲ್ಬಿಡಬ್ಲು ಬಿ ಕುಮಾರ್11
ವಾಟ್ಲಿಂಗ್ ಎಲ್ಬಿಡಬ್ಲು ಬಿ ಶಮಿ25
ಹೆನ್ರಿ ಬಿ ಕುಮಾರ್00
ಜೀತನ್ ಪಟೇಲ್ ಸಿ ಶಮಿ ಬಿ ಅಶ್ವಿನ್47
ವ್ಯಾಗ್ನೆರ್ ಎಲ್ಬಿಡಬ್ಲು ಬಿ ಶಮಿ10
ಬೌಲ್ಟ್ ಔಟಾಗದೆ06
ಇತರ19
ವಿಕೆಟ್ ಪತನ: 1-10, 2-18, 3-23, 4-85, 5-104, 6-122, 7-122, 8-182, 9-187, 10-204
ಬೌಲಿಂಗ್ ವಿವರ
ಬಿ.ಕುಮಾರ್15.0-2-48-5
ಎಂ.ಶಮಿ18.0-1-70-3
ಜಡೇಜ12.0-4-40-1
ಆರ್.ಅಶ್ವಿನ್08.0-3-33-1
ಭಾರತ ದ್ವಿತೀಯ ಇನಿಂಗ್ಸ್ 63.2 ಓವರ್ಗಳಲ್ಲಿ 227/8
ಶಿಖರ್ ಧವನ್ ಎಲ್ಬಿಡಬ್ಲು ಬಿ ಬೌಲ್ಟ್17
ವಿಜಯ್ ಸಿ ಗಪ್ಟಿಲ್ ಬಿ ಹೆನ್ರಿ07
ಸಿ. ಪೂಜಾರ ಎಲ್ಬಿಡಬ್ಲು ಬಿ ಹೆನ್ರಿ04
ಕೊಹ್ಲಿ ಎಲ್ಬಿಡಬ್ಲು ಬಿ ಬೌಲ್ಟ್45
ರಹಾನೆ ಸಿ ಬೌಲ್ಟ್ ಬಿ ಹೆನ್ರಿ01
ರೋಹಿತ್ ಸಿ ರೊಂಚಿ ಬಿ ಸ್ಯಾಂಟ್ನೆರ್82
ಅಶ್ವಿನ್ ಎಲ್ಬಿಡಬ್ಲು ಬಿ ಸ್ಯಾಂಟ್ನೆರ್05
ವೃದ್ದಿಮಾನ್ ಸಹಾ ಔಟಾಗದೆ39
ಜಡೇಜ ಸಿ ನೇಶಮ್ ಬಿ ಸ್ಯಾಂಟ್ನರ್06
ಬಿ.ಕುಮಾರ್ ಔಟಾಗದೆ08
ಇತರ13
ವಿಕೆಟ್ ಪತನ: 1-12, 2-24, 3-34, 4-43, 5-91, 6-106, 7-209, 8-215
ಬೌಲಿಂಗ್ ವಿವರ
ಬೌಲ್ಟ್14.0-5-28-2
ಹೆನ್ರಿ15.2-2-44-3
ವ್ಯಾಗ್ನೆರ್13.0-2-43-0
ಜೀತನ್ ಪಟೇಲ್08.0-0-50-0
ಸ್ಯಾಂಟ್ನೆರ್13.0-1-51-3
