ಬ್ರಿಗೇಡ್ ಕದನ ವಿರಾಮಕ್ಕೆ ಬಿಎಸ್ವೈ ನಕಾರ

<ಬಿ. ರೇಣುಕೇಶ್

  ಶಿವಮೊಗ್ಗ, ಅ. 14: ಸಂಗೊಳ್ಳಿ ರಾಯಣ್ಣ ಬ್ರಿಗೇಡ್ ಅಸ್ತಿತ್ವಕ್ಕೆ ಬಂದ ಬಳಿಕ ಹಾವು - ಮುಂಗುಸಿಯಂತಿರುವ ಬಿ.ಎಸ್.ಯಡಿಯೂರಪ್ಪಹಾಗೂ ಕೆ.ಎಸ್.ಈಶ್ವರಪ್ಪನವರ ನಡುವಿನ ಹಗ್ಗಜಗ್ಗಾಟ ದಿನದಿಂದ ದಿನಕ್ಕೆ ವಿಭಿನ್ನ ತಿರುವು ಪಡೆದುಕೊಳ್ಳುತ್ತಿದೆ. ಈ ನಡುವೆ ಕೆ.ಎಸ್. ಈಶ್ವರಪ್ಪ ಕದನ ವಿರಾಮಕ್ಕೆ ಮುಂದಾಗಿದ್ದು, ಮತ್ತೆ ಸ್ನೇಹ ಹಸ್ತ ಚಾಚಲು ಬಯಸಿದ್ದಾರೆ.

ಆದರೆ, ಯಡಿಯೂರಪ್ಪ ಮಾತ್ರ ಈಶ್ವರಪ್ಪ ವಿರುದ್ಧ ನಡೆಸುತ್ತಿರುವ ಸಮರಕ್ಕೆ ವಿರಾಮ ಹಾಕಲು ಸುತರಾಂ ಸಿದ್ಧರಿಲ್ಲದ ಅವರು, ಈಶ್ವರಪ್ಪಗೆ ತಕ್ಕ ಪಾಠ ಕಲಿಸಿಯೇ ತೀರುವ ಯೋಜನೆ ರೂಪಿಸಿ ದ್ದಾರೆ. ಈ ಹಿನ್ನೆಲೆಯಲ್ಲಿಯೇ ಈಶ್ವರಪ್ಪ ಭೇಟಿಯಾಗಲು ಇಚ್ಚಿಸಿದರೂ ಅವರೊಂದಿಗೆ ಮಾತುಕತೆ ನಡೆಸಲು ಮುಂದಾ ಗುತ್ತಿಲ್ಲ ಎಂದು ಹೇಳಲಾಗುತ್ತಿದೆ. ಸಾಧ್ಯವಾಗದ ಭೇಟಿ:

 ಗುರುವಾರ ಕಾರ್ಯನಿಮಿತ್ತ ಶಿಕಾರಿಪುರಕ್ಕೆ ಆಗಮಿಸಿದ್ದ ಈಶ್ವರಪ್ಪನವರು ದಿಢೀರ್ ಯಡಿಯೂರಪ್ಪನವರ ಮನೆಗೆ ಆಗಮಿಸಿ ಎಲ್ಲರ ಹುಬ್ಬೇರುವಂತೆ ಮಾಡಿದ್ದರು. ಆದರೆ, ಈ ವೇಳೆ ಮನೆಯಲ್ಲಿ ಅವರು ಇರದಿದ್ದ ಕಾರಣ ಪುತ್ರ ರಾಘವೇಂದ್ರರೊಂದಿಗೆ ಮಾತುಕತೆ ನಡೆಸಿ ಹಿಂದಿರುಗಿದ್ದಾರೆ. ಭೇಟಿಯ ಬಳಿಕ ಸುದ್ದಿಗಾರರೊಂದಿಗೆ ಮಾತನಾಡಿದ ಈಶ್ವರಪ್ಪ, ಇದೊಂದು ಸೌಜನ್ಯದ ಭೇಟಿಯಾಗಿದೆ. ಯಾವುದೇ ರಾಜಕೀಯ ಉದ್ದೇಶವಿಲ್ಲ ಎಂದು ಹೇಳಿದ್ದಾರೆ. ರದ್ದಾದ ಸಮಾಲೋಚನೆ: ದೆಹಲಿಯ ವರಿಷ್ಠರ ಸೂಚನೆಯಂತೆ ಈಶ್ವರಪ್ಪ ವಿಜಯದಶಮಿಯಂದು ಯಡಿಯೂರಪ್ಪನವರ ಜೊತೆ ಮಾತುಕತೆ ನಡೆಸಬೇಕಾಗಿತ್ತು. ಶಿವಮೊಗ್ಗದಲ್ಲಿಯೇ ಇವರಿಬ್ಬರ ಭೇಟಿಗೆ ವೇದಿಕೆ ಸಿದ್ಧವಾಗಿತ್ತು. ಇದಕ್ಕೆ ಬಿಎಸ್‌ವೈ ಕಡೆಯಿಂದಲೂ ಸಕಾರಾತ್ಮಕ ಪ್ರತಿಕ್ರಿಯೆ ವ್ಯಕ್ತವಾಗಿತ್ತು. ಆದರೆ, ಈ ನಡುವೆ ಸಂಗೊಳ್ಳಿ ರಾಯಣ್ಣ ಬ್ರಿಗೇಡ್ ಕಾರ್ಯ ಚಟುವಟಿಕೆ ನಿಲ್ಲಿಸುವ ಪ್ರಶ್ನೆಯೇ ಇಲ್ಲ. ಅದೊಂದು ರಾಜಕಿಯೇತರ ಸಂಘಟನೆಯಾಗಿ ಕಾರ್ಯನಿರ್ವಹಿಸಲಿದೆ ಎಂದು ಈಶ್ವರಪ್ಪ ನವರ ಹೇಳಿಕೆಗೆ ಇದರಿಂದ ಆಕ್ರೋಶಗೊಂಡ ಬಿಎಸ್‌ವೈ ಸಮಾಲೋಚನೆ ನಡೆಸುವ ನಿರ್ಧಾರವನ್ನು ಕೈಬಿಟ್ಟರು ಎಂದು ಬಿಜೆಪಿಯ ಉನ್ನತ ಮೂಲಗಳು ಮಾಹಿತಿ ನೀಡಿದೆ.

ದುಷ್ಮನಿ: ತಮ್ಮ ನಡುವಿನ ಸ್ನೇಹ-ವಿಶ್ವಾಸದ ಕಾರಣದಿಂದಲೇ ರಾಜಕೀಯ ವಲಯದಲ್ಲಿ ‘ಹಕ್ಕಬುಕ್ಕರು’ ಎಂಬ ಹೆಸರು ಸಂಪಾದಿಸಿದ್ದರು. ಆದರೆ ಬದಲಾದ ರಾಜಕೀಯ ಸನ್ನಿವೇಶದಲ್ಲಿ, ಇದೀಗ ಈ ಇಬ್ಬರು ಮುಖಂಡರು ವಿರುದ್ಧ ದಿಕ್ಕುಗಳಾಗಿ ಮಾರ್ಪಟ್ಟಿದ್ದಾರೆ. ಸ್ನೇಹದ ಜಾಗದಲ್ಲಿ ವೈಮನಸ್ಸು ಆವರಿಸಿಕೊಂಡಿದ್ದು, ನಾನಾ ಕಾರಣಗಳಿಂದ ಪರಸ್ಪರ ದೂರವಾಗಿದ್ದಾರೆ. ಇವರಿಬ್ಬರು ಮತ್ತೆ ಒಂದುಗೂಡುವುದು ಯಾವಾಗ ಎಂಬುವುದೇ ಗೊತ್ತಾಗುತ್ತಿಲ್ಲ ಎಂದು ಹೆಸರು ಬಹಿರಂಗಪಡಿಸಲಿಚ್ಛಿಸದ ಬಿಜೆಪಿಯ ಹಿರಿಯ ಮುಖಂಡರೊಬ್ಬರು ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.

ಶಿವಮೊಗ್ಗ ಬಿಜೆಪಿಯಲ್ಲಿ ಬಣ ರಾಜಕಾರಣ

ಯಡಿಯೂರಪ್ಪ ಹಾಗೂ ಈಶ್ವರಪ್ಪ ಕಲಹದಿಂದ ಅವರ ತವರೂರು ಶಿವಮೊಗ್ಗದ ಬಿಜೆಪಿ ಯಲ್ಲಿ ಎರಡು ಬಣಗಳು ಸೃಷ್ಟಿಯಾಗಿದ್ದು, ಬಿಎಸ್‌ವೈ ಹಾಗೂ ಕೆಎಸ್‌ಇ ಬಣಗಳ

ಲ್ಲಿ ಮುಖಂಡರು ಹರಿದು ಹಂಚಿ ಹೋಗಿದ್ದಾರೆ. ಪ್ರಸ್ತುತ ಶಿವಮೊಗ್ಗ ನಗರ ಸೇರಿ ದಂತೆ ಜಿಲ್ಲಾದ್ಯಂತ ಬಿಜೆಪಿ ಪಾಳೆಯದಲ್ಲಿ ಬಿಎಸ್‌ವೈ ಬಣದವರೇ ಪ್ರಾಬಲ್ಯ ಸಾಧಿಸಿದ್ದು, ಈಶ್ವರಪ್ಪನವರ ಬಣದಲ್ಲಿ ಗುರುತಿಸಿಕೊಂಡವರ ಕಡೆಗಣನೆ ಮಾಡಲಾಗುತ್ತಿದೆ ಎಂಬ ಮಾತುಗಳು ಕೇಳಿಬರುತ್ತಿವೆ. ಇದರಿಂದ ಪಕ್ಷದ ಸಂಘಟನೆಯ ಮೇಲೆ ಪರಿಣಾಮ ಬೀರುವಂತಾಗಿದೆ ಎಂದು ಕಾರ್ಯಕರ್ತರು ದೂರುತ್ತಿದ್ದಾರೆ. ದೋಸ್ತಿಗೆ ಒಪ್ಪದ ಬಿಎಸ್‌ವೈ

 ಸ್ಥಳೀಯ ಬಿಜೆಪಿ ಮೂಲಗಳು ಹೇಳುವ ಪ್ರಕಾರ, ಬಿಎಸ್‌ವೈ ಭೇಟಿಗೆ ಈಶ್ವರಪ್ಪ ಖುದ್ದು ಆಸಕ್ತಿವಹಿಸಿ ಸಂದೇಶ ರವಾನಿ ಸುತ್ತಿದ್ದಾರೆ. ತಮ್ಮ ನಡುವೆ ಮನೆ ಮಾಡಿರುವ ಭಿನ್ನಾಭಿಪ್ರಾಯ ಪರಿಹರಿಸಿಕೊಳ್ಳಲು ನಿರ್ಧರಿಸಿದ್ದಾರೆ. ಆದರೆ, ಇದಕ್ಕೆ ಬಿಎಸ್‌ವೈ ಕಡೆಯಿಂದ ಸಕಾರಾತ್ಮಕ ಪ್ರತಿಕ್ರಿಯೆ ದೊರಕುತ್ತಿಲ್ಲ. ದೂರವಾಣಿ ಯಲ್ಲಿಯೂ ಸಂಪರ್ಕಕ್ಕೆ ಸಿಗುತ್ತಿಲ್ಲ. ಈ ಕಾರಣದಿಂದ ಅವರೇ ನೇರವಾಗಿ ಯಡಿಯೂ ರಪ್ಪನವರ ನಿವಾಸಕ್ಕೆ ಭೇಟಿ ನೀಡಿ, ಪುತ್ರನ ಮೂಲಕ ಸಂದೇಶ ರವಾನಿಸಿದ್ದಾರೆ ಎಂದು ಹೇಳುತ್ತಿವೆ.

ಕಲಹ ನಿಲ್ಲದಿದ್ದರೆ ಕಮಲ ಬಾಡುವುದು ಖಚಿತ...!

ಕಳೆದ ವಿಧಾನಸಭೆ ಚುನಾವಣೆಯಲ್ಲಿ ಪಕ್ಷದ ಮುಖಂಡರ ಪ್ರತಿಷ್ಠೆ, ಕಿತ್ತಾಟ, ಕಲಹ, ಪಕ್ಷಾಂತರ ಮತ್ತಿತರ ಕಾರಣಗಳಿಂದಲೇ ಪಕ್ಷ ಹೀನಾಯವಾಗಿ ಸೋಲನುಭವಿಸುವಂತಾಯಿತು. ಮುಖಂಡರ ನಡುವಿನ ವೈಮನಸ್ಸು ಸರಿಯಾಯ್ತು ಎನ್ನುತ್ತಿದ್ದಂತೆ ಮತ್ತೆ ಒಳಜಗಳ ಆರಂಭವಾಗಿದೆ. ಮುಂದಿನ ವಿಧಾನಸಭೆ ಚುನಾವಣೆಗೆ ಕೇವಲ ಒಂದೂವರೆ ವರ್ಷ ಬಾಕಿಯಿದೆ. ಇಂತಹ ಸಂದರ್ಭದಲ್ಲಿ ನಾಯಕರು ಪಕ್ಷ ಸಂಘಟನೆಗೆ ಒತ್ತು ನೀಡುವುದು ಬಿಟ್ಟು ಪರಸ್ಪರ ಕಾದಾಟದಲ್ಲಿ ತಲ್ಲೀನರಾಗಿದ್ದಾರೆ. ಪರಿಸ್ಥಿತಿ ಇದೇ ರೀತಿ ಮುಂದುವರಿದರೆ ಮುಂದಿನ ಚುನಾವಣೆಯಲ್ಲಿಯೂ ಪಕ್ಷ ನೆಲಕಚ್ಚುವುದು ಶತಸಿದ್ಧ ಎಂದು ಹೆಸರು ಬಹಿರಂಗಪಡಿಸಲಿಚ್ಛಿಸದ ಬಿಜೆಪಿಯ ಹಿರಿಯ ಮುಖಂಡರೊಬ್ಬರು ಪತ್ರಿಕೆಯೊಂದಿಗೆ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.