ದಂಗಲ್ ಟ್ರೇಲರ್ ಬಿಡುಗಡೆ: ಮತ್ತೊಮ್ಮೆ ವೀಕ್ಷಕರನ್ನು ಬೆರಗಾಗಿಸಿದ ಆಮಿರ್

ದಂಗಲ್ ಚಿತ್ರದ ಟ್ರೇಲರ್ ಗುರುವಾರ ಬಿಡುಗಡೆಯಾಗಿದ್ದು, ಇದಕ್ಕೆ ಹೊರಪ್ರಪಂಚ ಹೇಗೆ ಸ್ಪಂದಿಸುತ್ತದೆ ಎಂಬ ತಳಮಳದಿಂದ ಬಹುಶಃ ಆಮಿರ್ ಖಾನ್ ಗುರುವಾರ ರಾತ್ರಿ ನಿದ್ರೆ ಮಾಡಿರಲಾರರು. ತಮ್ಮ ಇಬ್ಬರು ಹೆಣ್ಣುಮಕ್ಕಳು ನಟಿಸುವ ಚಿತ್ರವಲ್ಲದಿದ್ದರೆ ಅವರು ತಲೆಗೆಡಿಸಿಕೊಳ್ಳುತ್ತಿರಲಿಲ್ಲ. ಮಾಮೂಲಿನಂತೆ ದಂಗಲ್ ಬಗ್ಗೆಯೂ ಆಮಿರ್ ಖಾನ್ ಪರಿಪೂರ್ಣ. ಸಣ್ಣಪುಟ್ಟ ದೋಷಗಳಿದ್ದರೂ, ಟ್ರೇಲರ್ ಹೊಸ ನಿರೀಕ್ಷೆ ಹುಟ್ಟುಹಾಕುವಲ್ಲಿ ಯಶಸ್ವಿಯಾಗಿದೆ.
ಪ್ರತಿ ಪಾತ್ರದಂತೆ ಈ ಬಾರಿಯೂ ಅವರು ಆಮಿರ್ ಆಗಿ ಕ್ಯಾಮೆರಾ ಮುಂದೆ ನಿಂತಿಲ್ಲ. 3.25 ನಿಮಿಷದ ಟ್ರೇಲರ್‌ನಲ್ಲಿ ಅವರು ಮಹಾವೀರ್ ಸಿಂಗ್ ಫೋಗತ್. ದೇಶಕ್ಕಾಗಿ ಚಿನ್ನ ಗೆದ್ದುಕೊಡುವ ತಮ್ಮ ನನಸಾಗದ ಕನಸನ್ನು ಪೂರೈಸುವ ಮಗನ ಹೆಬ್ಬಯಕೆಯಲ್ಲಿರುವ ವ್ಯಕ್ತಿ. ಮಗನೇ ಏಕೆ? ಏಕೆಂದರೆ ಹರ್ಯಾಣದಲ್ಲಿ ಕುಸ್ತಿ ಪುರುಷರ ಕ್ರೀಡೆ. ಹೆಣ್ಣುಮಕ್ಕಳು ಈ ಕ್ರೀಡೆಯಲ್ಲಿ ಭಾಗವಹಿಸಬಹುದು ಎಂಬ ಕಲ್ಪನೆಯೂ ಆತನಿಗೆ ಇಲ್ಲ. ಆಮಿರ್ ಖಾನ್ ಅವರ ಹೆಣ್ಣುಮಕ್ಕಳಾದ ಝೈರಾ ವಾಸಿಮ್ (ಗೀತಾ ಪೋಗತ್) ಹಾಗೂ ಸುಹಾನಿ ಭಟ್ನಾಗರ್ (ಬಬಿತಾ ಕುಮಾರಿ) ಅವರೇ ಈ ಚಿತ್ರದ ಪ್ರಮುಖ ಆಕರ್ಷಣೆ. ಚಿತ್ರ ಅನಾವರಣಗೊಳ್ಳುವವರೆಗೂ ಕಾಯುವ ತಾಳ್ಮೆ ಇಲ್ಲ ಎನ್ನಿಸುವಷ್ಟರ ಮಟ್ಟಿಗೆ ಟ್ರೇಲರ್ ಆಸಕ್ತಿ ಹುಟ್ಟಿಸಿದೆ. ಅಂತಿಮ ಕ್ಷಣದಲ್ಲಿ ಕುಸ್ತಿಯ ಅರೇನಾದಲ್ಲಿ ಶಕ್ತಿ ಪ್ರದರ್ಶಿಸುವ ದೃಶ್ಯವನ್ನು ಟ್ರೇಲರ್ ಒಳಗೊಂಡಿದೆ.
ಟ್ರೇಲರ್‌ಗೆ ಜನರ ಸ್ಪಂದನೆ ಬಗೆಗಿನ ತಳಮಳವನ್ನು ಆಮಿರ್ ಟ್ವಿಟ್ಟರ್ ಹಾಗೂ ಫೇಸ್‌ಬುಕ್‌ನಲ್ಲೂ ಹಂಚಿಕೊಂಡಿದ್ದರು. ಪ್ರತಿ ಬಾರಿಯಂತೆ ಡಿಸೆಂಬರ್‌ನಲ್ಲಿ ಚಿತ್ರ ಬಿಡುಗಡೆಯಾಗುವ ನಿರೀಕ್ಷೆಯಿದ್ದು, ಸಂಪ್ರದಾಯದಂತೆ ದೀಪಾವಳಿಗೆ ಮುನ್ನ ಟ್ರೇಲರ್ ಬಿಡುಗಡೆ ಮಾಡಿದ್ದಾರೆ.